Post: #1
Title: كــــدا......المــــوت....يا بـلاش
Author: سجيمان
Date: 08-19-2003, 12:38 PM
Parent: #0
الاغتراب ما نفع..... شغل في البلد ما جايب همو.....خسبتها براي.... لقيت اني من اشتغلت لي حسي ما دخلت علي قروشا يقولو عليها..... حق الكسرة والهديمات.....ودا زاتو بعد مرات في تلتله....اتخلعت وطيرت عويناتي....وانا اسمع انو القذافي داير يدفع عشرة مليون دولار للراس الواحد.... في لكوربي....... زعلتت زعل شديد واتحرقت...وكل مرة اقبل غلي الوليدات اشتمهم. انتو يا الفقر يا النقر.... يا الحظكم زي سجمكم يظهر عليهوا ابوكم داير يموت اوانطة ساكت..... مرمي الله اصلو ما بترفع....قلت في نفسي يا سجيمان يا داقس.... دا الاستثمار يا بلاش.....الواحد ليه من زمان ما فكر يركب طيارات الخواجات؟....وتتفجر واحدة ويعوضو اهلك عشرة مليون دولار....وانت تموت شهيد ما فيها اتنين تلاتة....بدل ما تموت فطيسه ساكت بالملاريا.... وحق الكشف ما يغطي تكاليف فراش البكاء....واهلك يقعدو يحلو في ديونك بالسنين.....
ضربت تلفون لي امي....قلت ليها يا يمة الدعوة البتقوليها لي طوالي ديك... حقت الله يكفيك شر الحديد والشديد.... خليها.. ونادي بنتك وجيبو ورقة وقلم واكتبي الدعوات دي لي..وابقي قيها عشرة.....وعليك الله لمو نسوان الحلة واقعدو ادعو لي.....انشاء الله يا سجيمان يا وليدي.... ربنا يعدلها عليك.... ويركبك طيارة امريكية وتتفجر....وقدر ما تجي تركب طيارة غيرها ما تسهل و تتقفل في وشيك محل ما تدخل مكتب خطوط غيرها.......بركة المكاشفي و سيدك الحسن وعلي الطيار.....واعصري علي علي الطيار دا...انتي ما بتعرفيهو لكن دا فقير متخصص طيران...
وساعة البكا.... اقلدي مرا مرا....وابكي وقولي.......
الليله يا حليك .....
يا المحظوظ.... وما منحوس
يا الموتك جاب لنا كوم فلوس
يا حليلك.....
يا الرزين وما ك بوبار
يا التعوضيك... بالدولار
يا حليلك .......
يا القمرا.....وماك شهير
يا الموتك جاب لنا الخير
|
Post: #2
Title: Re: كــــدا......المــــوت....يا بـلاش
Author: Ahlalawad
Date: 08-19-2003, 12:47 PM
Parent: #1
غايتو يا سجيمان نحن عندنا حزب جديد دايرين نكونو منو وجاي ... الفكرة بتاعة الحزب مبنية على المثل البقول بلاد أبوك كان خربت شيلك فيها شلية .. دحين نحن حا نسجل إسمنا في دفتر المتضررين من لوبيا دي .. مش براهم مشوا وقالوا نحن إرهابيين؟ أها نحن بنقول القذافي دا جاب لينا الضرر قبل كم سنة ، والجماعة موجودين الله يخليهم ، بمدونا بالمستندات ، دعم التمرد ، دعم المرتزقة ، دعم السكر ، وقرش الكرامة ، أها ، ونخلي القرعة تشيلك في الناس البجيهم التعويض .. بس ما تنسانا من التن بيرسنت .
|
Post: #8
Title: Re: كــــدا......المــــوت....يا بـلاش
Author: سجيمان
Date: 08-19-2003, 05:28 PM
Parent: #2
اهل العوض.......التن بيرسنت فاضية لك انت؟....وناس المستندات ديل نديهم كم يعني؟........ والله خايقين نشتكي ويدفعونا نحن بعدين
|
Post: #3
Title: Re: كــــدا......المــــوت....يا بـلاش
Author: مريم بنت الحسين
Date: 08-19-2003, 03:22 PM
Parent: #1
الله يديك العافية يا دكتور..
عاد السيد الحسنز. يلحقنا وينجدنا.. لكن على الطيار ده على سمعته بيهو لا طقش أضاني....
بنت الحسين
|
Post: #6
Title: Re: كــــدا......المــــوت....يا بـلاش
Author: ابو نور
Date: 08-19-2003, 04:05 PM
Parent: #3
الاخالعزيز / سجيمان
ليه داير تحرمنا من كتابتك الجميله دي وتركب لينا طياره الخواجات
الزيك ديل رجال مابتمتوهم بي تمن بخس ذي ده يلعن ابو الدولارات
يعني شنو عشره مليون دولار 0
واستغفر الله يااخوي يكون حريم البورد عملو ليك حاجه عند فكي قوي
خلاك تلهوس ساااااكت 0
كفش الغلبان
|
Post: #11
Title: Re: كــــدا......المــــوت....يا بـلاش
Author: سجيمان
Date: 08-20-2003, 07:15 PM
Parent: #6
ابونور اخوي.......انا ميت ميت.....اخير اموت ميتة فيها فائدة.....من اروح فطيس ساكت
|
Post: #10
Title: Re: كــــدا......المــــوت....يا بـلاش
Author: سجيمان
Date: 08-20-2003, 06:13 AM
Parent: #3
بنت الحسين ......علي الطيار خريج الكلية الملكية البريطانية لعلوم الطيران....زميل الفكي حسين ود طلال....والفكي قابوس
|
Post: #4
Title: Re: كــــدا......المــــوت....يا بـلاش
Author: alfatih
Date: 08-19-2003, 03:39 PM
Parent: #1
بركة الشيخ ملوال اكو مجواك
يا سجيمان ما تقع فى محنة
كلم امك قول ليها الشيخ دة
شيخ قوى شديد وجايبنو ناس الحركة
فى المفاوضات للتأثير على ناس
الحكومة متافيزيقيا
عشان كدة هو شيخ قوى اوى اوى
وما تنسى اديتك السر دة عشان تدينى
2% فقط
|
Post: #5
Title: Re: كــــدا......المــــوت....يا بـلاش
Author: خالد
Date: 08-19-2003, 03:51 PM
Parent: #4
خلاص قررت تمووووووووووووووووت وهم يا قشرنمان
بعدين اريتوا يدغعها القذافي بعد ده العشرة مليون دولار دي والله تحانيس وتحانيس عشان تكون ما كاش ومرة يقول اقساط ومرة شيكات ومرة ياخروا الزمن وبعد ده الامريكان ما راضيين
|
Post: #12
Title: Re: كــــدا......المــــوت....يا بـلاش
Author: سجيمان
Date: 08-21-2003, 06:45 PM
Parent: #4
الفاتح....اديك 2في المائة من اتفاقية السلام؟
|
Post: #7
Title: Re: كــــدا......المــــوت....يا بـلاش
Author: sentimental
Date: 08-19-2003, 04:11 PM
Parent: #1
سجومى
التونسية كييف?
|
Post: #9
Title: Re: كــــدا......المــــوت....يا بـلاش
Author: 3mk-Tango
Date: 08-19-2003, 07:37 PM
Parent: #1
والله يا سجيمان الفكرة مغرية..لكن يا اخوي العيب في التنفيذ..كعب يطلع اسمك في الطيارة ويطلعوك انت الارهابي ..والسودان يدفع تعويضات وكمان يا اخوي التعويضات دي بدفعوها بعد كم سنة..يعني اولادك يكونو عجزو لمن يستلموها..يا اخوي اخير ليك الكفيل دا طال عمرك
لووول
سلمت لينا وللبورد
تنقو
|
Post: #13
Title: Re: كــــدا......المــــوت....يا بـلاش
Author: ود الشيخ
Date: 08-22-2003, 07:07 AM
Parent: #1
سجيمان
افكارك نيرة وكتاباتك ذات مغزى لكن انت ماشي
بعيد ليه اركب سودان طير ويز وكان ما وقعت
تموت غيظاً واهو كلهُ موت
ود الشيخ
|
Post: #14
Title: Re: كــــدا......المــــوت....يا بـلاش
Author: SAMIR IBRAHIM
Date: 10-28-2003, 02:24 PM
Parent: #13
اسعد الله هذا الصباح.....
|
|