Post: #1
Title: حـــنيــن....الجيــــــنات
Author: سجيمان
Date: 08-15-2003, 11:50 AM
اخوي هشام.......
كيفنك يا يابا؟......ساعلين منك سعالا شديد......وطارينك كل ما تغيب شمش....وتشرق اختها....من يومك السافرت بلد العجم.... لا جواب لا خطاب لا افادة.......خمستعاشر سنة.. الحول يصبق الحول..لا اتشاوفنا لا اتلاقينا....شوقنا ليك يا اخوي..... مطرة ترعد وشايل برقها عبادي....تروي امور..والعتمور ووادي المقدم....وتنزل علي البحر....سيلها خبوب....كاري السدر....في سدرو.....ينزل بعند الترتار..... وعومتنا في البحر ونحن صغار.....وام شلال...... وغبشتنا من بحر الدميرة.....وعراريقا......رسم الدفّيق.....عليها....شقاق طين االبحر....وريحة طين البحر....وحصحيص...حبوبتنا لي قانقينا.....وقت نتلمّ فوقها وهي قاعدة في التبروقة..... بعد صلاة المغرب.... وياربي تحفظني وتحفظ وليداتي من كل بلا......
شوقنا ليك.....عددايام ابونا.....جاي الضهرية في عز الهجير.....وملاقنو نحن نشيل من ايدو....ونخفف حملو.....ولمتنا بعد الغدا.....وونستنا....ولعب البلي...وام الحفر......وضحكنا بملا البيت و الشارع والحلة......والدنيا...شوقنا ليك عدد ايامنا.وقت نتحلق فوق امنا......نحس بها ... تعاين لنا واحد واحد.....تقول دايره تبلعنا نحس بيها....وتحس بينا...... ويكبرو الجهال ويزيلو الغبار. جمال الشيل.....اليعدلو الميل....الجهال كبرو....وكل واحد ضارب لو بلد.....
خمستاعشر سنة... يا ود امي وابوي....ان سعلت مننا...الصغار كبرو....والكبار المروءة كل يوم ماشة نازلة......والدنيا مرة تطلشنا.....وقليل ما نلطشها.....الزمن يادافرنا...وندافرو..كتير يعافرنا وما نقدر نعافرو.. يضحك معانا يوم......ويدينا قفاهو سنين..انا اتهديت..... العمر الجاي ما اظنو قدر الراح......وكل ما يصبح صباح....احمد ربي الصبح عليّ......القليب من عامنو من يومو رهيف.....بقن دقاتو محسوبات ...علي وعليهو......مرة يحرن تب....ومرة يطلق بلا ميزانية....امشي فيهو بالحكماء والدويات.....ادودر فيهو كان يدودر......العوينات.....زي بلبلة...مختوتة في طاقة داناقتنا...نورها يخفت شوية شوية....و البدن... الوردا....كل يومين تتاورو...بي سبب وبدون سبب....وقتين تقوم.... نيران كماين..... تهري في جوف الحشا........اصبح ريقي ناشف...والخشيم اغبش.....واتستند علي الحيطة......كان تساعدني علي المشي.......دا كلو ما يعادل شوقي ليك......
وفي الختام......اريتك تبقى طيب انت.....وانا البي كلو هين.......
|
Post: #2
Title: Re: حـــنيــن....الجيــــــنات
Author: 3mk-Tango
Date: 08-15-2003, 12:14 PM
Parent: #1
العزيز سجيمان
حقيقي ..حقيقي ..دي عدد السنوات الما شفت فيها اخوي..بالجد قلبي انقبض وانت بتذكر تفاصيل تكاد تكون متطابقة.. برقم الاختلاف الطفيف في التفاصيل لكن يبقي الحنين هو الحنين وتبقي الغصة في الحلق هي نفسها
ربنا يجمعنا بيهم يارب ويجمع كل السودانيين
سلمت ويسلموا كل البعيدين مننا
تنقو
|
Post: #8
Title: Re: حـــنيــن....الجيــــــنات
Author: سجيمان
Date: 08-16-2003, 06:27 AM
Parent: #2
عمك تنقو........ايوا والله خمستاشر سنة ما اتشاوفنا.....علا نضم بالتلفون
|
Post: #3
Title: Re: حـــنيــن....الجيــــــنات
Author: maia
Date: 08-15-2003, 01:48 PM
Parent: #1
الاخ سجيمان
بقدر ما رسالتك بسيطة في كلماتها بقدر ما عميقة في معنى الحنين
غايتو انا رايح لي حنين الف كده
كم هو صعب الحنين لما تصعب اللقيا
|
Post: #4
Title: Re: حـــنيــن....الجيــــــنات
Author: oudenoord
Date: 08-15-2003, 04:58 PM
Parent: #1
دكتور
سلام ابوي ومالك علينا الليله برانا متجرسين..يديك العافيه ويلمنا ويلمكم ويلم كل انسان بحبانوا واهلوا..
امين..امين
|
Post: #5
Title: Re: حـــنيــن....الجيــــــنات
Author: Dr. NassurEldeen
Date: 08-15-2003, 07:44 PM
Parent: #1
سي جي يا حنين
يا رجلا تدثر دوما بالجمال
جمال الكلم
وجمال الحنين
تأكد
سنلتقي ويختفئ
وجع اليالي في المرافئ
يا حنانا ينعش الروح
واسرار القوافي
فيداعبني زماني
ويغازلني مكاني
كيف اني قد هزني الشوق وقتلني الحنين
الغريبة عارف البوست لامس لي الشغاف ليه
انو اخر جواب من الحاجة عليها شابيب رحمته
قبل 4 شهور كان معاه ديسك قبل الرحيل
الابدي الي مثواها الاخير كان فيهو ويا للعجب
يا عينيه يا عينيه سفرك طال متين الجيه
ولكن الاغرب انو انا بقرأ البوست بسمع فيهو
وكان في امتي ارجع لي ام در وازورها
ومع اخوي هشام دي وكاني بقرأ ولدي نصر
قلب الديسك
بسمع في كلامها الحنين وصالح الدعوات
جاتني بعدهم يا عينيه سفرك طال متين الجيه
ليه ياخي بس مالك علي ولا قاصد عنادي
سلاااااااااااااااااام كتيرررررر
SudaneseMusic/music/AbdaAlSheikh/ya203iney%20ya%203ieny.
wma"loop="infinite">
|
Post: #6
Title: Re: حـــنيــن....الجيــــــنات
Author: haneena
Date: 08-15-2003, 08:18 PM
Parent: #5
سجيمان
مالك علينا الليلة
برانااليومين ديل غالبنا الصبر
وما متحملين سيرة الفراق دي
فراق اهل وخلان وحبان...و..وو
كتر علينا يا سي جي
كتر عليييينا
الصبر يا رب العالمين
حنينة
|
Post: #7
Title: Re: حـــنيــن....الجيــــــنات
Author: Zongiya
Date: 08-15-2003, 11:50 PM
Parent: #1
..
.
سيجيمان و الصوره
تحياتي ليك ....
|
Post: #9
Title: Re: حـــنيــن....الجيــــــنات
Author: ابو جهينة
Date: 08-16-2003, 09:31 AM
Parent: #7
سي جي
اريتك تبقى طيب انت.....وانا البي كلو هين
و بس
|
|