Post: #1
Title: وصية العازة لبتها السرة في يوم عرسها
Author: aboalkonfod
Date: 08-03-2003, 04:29 PM
تراثيــــات وصية العازة لبتها السُرة في يوم عرسها (2)
آبنية بَدُور أسويلي شوية نضماً ، خليهو مِتل الحِجل في كُراعِك. دحين بتفارقي خيمة الجاموس لاخيمة جنا " ود عرديب ". النصيحة أكان بتتقال فيشان نقاصة العقل ، أكان خليتها لشانك ، عيلا بدور أذكرك واحدثك. والدهب بجليهو النار. علوق الشد تب ما بنفع آبنية !! حزمي أمرك واتوكلي ، لا تقصري. أسمعي مني النحدثك ..... أهلنا الأولين قالوا الفَحَل ما عَوّاف ، عيلا فَحل الزمن دة بلحيل عواف ، عَودِي راجلك من البداية لا يشوفك إلا بأحسن ، لا تنسي نضافة جسمك وتوبك ومطرحك ، خمرتك وديلكتك لا تفارق جسمك تب. دحين المرة أم جسماً حفان مِتل أبو الصِقير العجوز. آبنية عطني شَعرِك وجِسمك بالودك والكركار ، لا تنسي الكُركُم الما خَمج ، وحُفرة دُخانَك سَويها شغلتك ، دحين أنا رسلت " راجين الله بت مُرسال " فيشان تجيب ليك طلحاً وشَاف من القدمبلية ، فيشان تعلقي دُخانك. آبنية أهلنا قالوا السفر بلا زاد هَلاك ، كمان البيت بلا مَرة خراب. من أول الصباح رتبي بيتك ، ولمن راجلك يصحى من النوم ، أول شئ ترتِبي سريرو ، وتنضِفي غرفتو ، وقبل ما يطلع يكون شايو وقهوتو جاهزات تب ، وقبل ما يطلع آبنية لا تقوليلو أي مطلب ، قوليلو كلاماً زين يفرح قلبو. وكتين يجي من الشغل آبنية لا تسألي ، سلِمي عليهو ، وخَلي هو الينضم أول ، آبنية أوعا يجي يلقاك بهدوم الخدمة أو الطبيخ ، قبل ما يجي استحمي والبَسِي نضيف ، وسويلك شوية خُمرة ، وعَلِكيلك شُوية بخور ، أهلنا قالوا الراجل بشم قبل ما يشوف. آبنية المرة النضّامة بتقصر عُمُر راجلها ، لا تنضُمي كتير ، وفي العَصير لمن تجلسي مع راجلِك أعمليلو كباية قهوة أو شوية شاياً ، ووكت تنضُمي أنضُمي في الحديث البريدو ، ووكتين يكون عندك مطلب ، لا تقوليهو إلا وكتين يكون فَرحان ، واكان بِدُوري تسعدِي معاهو أختِي مطلب الفُراش تب !! آبنية سعادتك في إيدك ، أهلنا قالوا البيت مَرة ، لا ترفعي صوتك في النضم ، لا تَلويلو الكلام ، لا تناكريهو ، لا تغمزيهو ، لا تطاعنيهو في الكلام. وأكان بِدُوري تملكي راجلك أطيعيهو ، واكان شدة معاك في النضم ، أرخيلو ، دحين الحبل أكان شدوهو إتنين بنقطع. إحترمي أهلو فيشان يحترمك. أهلنا قالوا النضم الشين عفانة الخشُم ، والنضم الزين بَخُور البيت ، المَرة المُدبِرة حكَّامة بيتها ، المَرة البزارة خرَّابة بيتها ، الحِكمة مطلوبة والجهالة مُذلة. الضحكة في وش الراجل أمان ومطلوبة ، والتكشيرة في وشو مذمُومة. آبنية أهلنا قالوا العُود الما فيهو شك ما بقول طَق ، والفِعل إن غلبك شوف دليلو ، والراجل الزين عينو ما بتزوغ ضُمة ، عيلا أكان في شئ ناقصو ، واكان فَكَر في العِرس تاني ، يكون حاربو الدليل تب !! آبنية مَرفَعِين أكان ما جعان ما بِقِد البهم ، والراجل نضمو ما يكتر ، عيلا يكون في شئ موجعو منك ، والراجل مِتل الجنا الصغير بقدور المَلُولا. بدورك تبقي حكيمة فيشان ترتاحي ، والراجل لا يشاور إلا المرة الحكيمة. آبنية سَوِي الزين ونُومِي قَفا ، أختِي الشين ينعدِل حالك. دحين آبنية لو سمعتي حديثي تب عوجة بتجيك مافي ، حبوبتك بت " العجب " خبرتني الحديث دة قَبُل أربعين سنة لمن عرّسني أبوك " الجاموس " ، وانا سايسة الجاموس متل الفارس السايس حُصانو الجامح ، لكن أهلنا قالوا "" جَقَلو ولا مَشِي عُرجا "" .
|
Post: #2
Title: Re: وصية العازة لبتها السرة في يوم عرسها
Author: سجيمان
Date: 08-03-2003, 04:32 PM
Parent: #1
ابوالقنفد.......وصية العازة....زين سمحة..... لكن حتكلف ود عرديب
|
|