بمساندة دورية نسائية و بامر العمدة: منع خروج الاسبان لانجاز شغل البيت

اعلنت بلدة توريدو نيخمينو جنوبى اسبانياانها سوف تحظر على الرجال الخروج من المنزل ليلة مساء الخميس و تفرض عليهم قضاءها فى البيت لمساعدة زوجاتهم فى القيام بالاعمال المنزلية
وقال خافير شيكا عمدة البلدة ان من { يتجاسر} على الخروج مخالفا الامر يتعين عليه دفع غرامة مالية رمزية تبلغ خمسة يورو"لرفضه تحمل مسئوليته"
وقال شيكا ان على الرجال ان يدركوا ان حق الخروج لشرب البيرة مع اصحابهم ليس مقصورا عليهم فحسب
ومن المقرر ان تجوب شوارع البلدة التى يبلغ عدد سكانها 14 الف نسمة دورية نسائية من 4 سيدات للقبض على منتهكى القرار من الرجال ما بين التاسعة ليلا و الثانية صباحا ، وسوف توجه عائدات الغرامة للجمعيات المناهضة للعنف الزوجى


{عن الخليج الاماراتية}
______________________

لووووووووول يا لنا
دورية نسائية من غير محرم؟؟؟؟

خلي المحرم ياهاله .اها الاربعه ديل رجالهم حا يشرب البيره معاهم منو؟؟؟؟؟

وطيب المتزوج أربعة يقوم يوزع يوم الخميس على أربعة أسابيع .. ولا يقوم يزوعها بالساعات

الحقيقة يا هالة الاربعة حيمرقوا بدون محرم يعنى الله و رقبتهم و طبعا الفكرة كلها على بعضها موحية للبوردابيات المتزوجات و بينهم العبدة لله ، و بالامس اتهمنى زوجى العزيز - صراحة و فى وشى عديل -بتحريض النساءالوادعات بالبورد بايراد مثل هذه الاخبار المثيرة للفتنة الجندريةو اثارة النعرات النوعية و ما فضل ليهو الا ينزل فينى بيان
و ده يقودنى لسؤال صفوان : و المشكلة يا خوى انو رجالهم اكيد ح يزوغوا يوم الخميس بالمساء لانعدام الرقابة المنزلية الا لو الواحدة طلعت نجيضة و خلت مراقب محايد و طبعا يا فيصل المتزوج اربعة حيضطر يحتل فى البيت اربعة خمسان ورا بعض و اعتقد ده شى جيد عشان معشر الرجال يفكروا و يقلبوها كويس فى راسهم قبل ما يتنو و يتلتو
عجبى

بركه والله

gracias على الموضوع
بس ليه يعني من تسعه بالليل لغاية اتنين صباحا ؟ الراجل الفالح مفروض من بدري بدري ، لما تجي الساعة تسعه دي يكون شي واحد ما خللاو
والله أبوي الله يجزيهو خير زمان كان بقول لأمي أنها ما تعمل أي حاجه يوم الجمعه ، كان هو البطبخ ، وكنا نحنا بشغلنا نضافه وغسيل هدوم وعده و مكوه ، وماشاء الله كانت هي ما بهون عليها تقعد تتفرج فينا ساكت وتتونس تقوم تمد يدها تعمل حاجه ، يقوم يكورك فيها أنها ما تمد يدها يوم الجمعه ، طبعا بالنسبة لينا نحنا كان أسوأ يوم عشان دا يوم اجازتنا الوحيد بس بعوضو لينا برحلة مسائية

أما اختيار الأسبان ديل للخميس بالليل والاحنا بنسميهو ليلة الجمعه ، فدا بذكرني بالنبي محمد كان بخصص ليلة الجمعه والله أعلم للفسحه مع زوجة من زوجاته ، فالله أعلم دي سنه يا ريت لو نخللي أمسية الخميس \ ليلة الجمعه للخروج من البيت بدون الشفع
وللا تسوقوهم بس ترموهم بعيييد وتقولو ليهم الشافع البقرب مننا بدون ما نناديهو ما حيطلع معانا الاسبوع الجاي

تسلموا

حقيقة يا ابى يا اخوى انو القصة دايرة تفكر لانو مفروض الرجال لا يتركون الزوجات المسكينات لوحدهن امام غول الاعمال المنزلية ، بعض الرجال السودانيين لا يستنكفونها لو كان الامر بينهم و زوجاتهم ، اما لو عرف احد الاهل ان {سبع البرمبة}يساعد زوجته فى المنزل فويلها وويله
وعندى صديقة تعرضت للموقف المضحك المبكى
زوجها كثيرا ما يساعدها شريطة التاكد من كل الاستحكامات العسكرية بالمنزل
الابواب مغلقة
والشبابيك ايضا
المهم فى يوم من الايام شرع صاحبنا فى {قش الحوش}و انهمك فى اتقان عمله الى ان فوجىء بوالدته و قد فكرت فى زيارتهم على حين غرة و هى تصرخ بعد ضرب الصدر و الشهقة:سجم خشمى يا ولدى.... اتبهدلت ، دة شنو البتسوى فيهو دة؟؟؟
فبهت الذى {اتشوهم}و لم يحر جوابا
و اكتشف بعدها وجود ثغرات فى الاستحكامات الامنية المنزلية لم توضع فى الحسبان
وهى ان {المدام}نسيت ان تجر السلك الفى الباب و تخليهو بى جوة
و كانت ليلية اسود من {قعر الدوكة}لكنها مرت بسلام
لكن
لكل جواد كبوة
وجل من لا يسهو

للنساء فقط و ليس لاغراض التمرد