يا بكرى أنا نطيت من كلامى وهاك دى الأسباب

Post: #1
Title: يا بكرى أنا نطيت من كلامى وهاك دى الأسباب
Author: منعمشوف
Date: 07-31-2003, 06:42 PM
Parent: #0

أنا نطيت من كلامى الكتبتو فى بوست لنا مهدى المجيد
وسحبتوا تماماً وما حأخلى البورد للأسباب التالية

لانك كريم وتحب ان تخدم السودان بكل ما لديك
ولايمكن ان اقابل جمايلك دى كلها بالتخلى عن خشبتنا
السايبيرية لانك وإمعاناً فى كرمك رافض ان نساهم معاك ولو بالقليل

ولأنو فى اربعة ناس شحمانين جونا جُداد فى الحوش من البلد
لنا، تاج السر، ألهام وطه إتفضلوا لا جوة

ولانو اليومين دى شهتى مفتوحة وعاوز اكتب واساهم بمزاج
لم يراودنى من قبل وخصوصاً عن مسرح شوف

ولانو عندى لسة مناقرات ومشاكسات مع الآتية أسماءهم
خدر، تماضر، أبومريم، أبو الغيداء وأحمد الملك وبهذا أعلن
أن يبلوا رؤوسهم بماء فاتر .. فاتر تركين

ولانو لى احاديث لم تنتهى بعد مع الصادق الرضى ويحى فضل الله
ومعتصم وعطبراوى وبربراوى وغيرهم من الشباب الورد الذى
يتزين به حوشك العامر

ولانو لسة عاوز اكتب عن مسرح كواتو الاهلى وديرك اويا الفرد
وستيفن أثولا والسمانى لوال ارو الله يطراهم بالخير

ولانو فى فى حوشك العامر التقى مسنجرياً باصدقائى صغيرون وسمندلاوى والخواض
وأشراقة وهدهد وتمبس وبقية العقد الفريد لجميع عموم عضوية
سودانيزاونلاين ومن ياتى لاحقاً

ولانى وده السبب الاساسى حاقعد محاولاً مع الشباب فى أقناعك بالافكار
والاقتراحات التى وردت فى بوست لنا مهدى وبوستات سابقة

واكرر مجدداً انو انا نطيت من كلامى
ولايؤاخذ النطاطون فيما يقولون
فهل من ناطى آخر

Post: #2
Title: Re: يا بكرى أنا نطيت من كلامى وهاك دى الأسباب
Author: khider
Date: 07-31-2003, 10:32 PM
Parent: #1

انا

Post: #3
Title: Re: يا بكرى أنا نطيت من كلامى وهاك دى الأسباب
Author: HAMZA SULIMAN
Date: 07-31-2003, 10:37 PM
Parent: #2

الحبيب منعم
ما تفهمنا الحاصل
المشهد ده ما فهمتوا
ناطى ليه ؟
وكمان خدر
ينط سااااااااى
ما تفهمونا

Post: #4
Title: Re: يا بكرى أنا نطيت من كلامى وهاك دى الأسباب
Author: khider
Date: 07-31-2003, 10:49 PM
Parent: #3

والله يا حمزة يا اخوي انا ما فاهم اي حاجة
لكن كلام منعم دة عجبني قمت نطيت معاة
لكن الموضوع دة شكلو كدي سمح ما فيهو مشاكل .. ادخل ساكت

Post: #5
Title: Re: يا بكرى أنا نطيت من كلامى وهاك دى الأسباب
Author: dreams
Date: 07-31-2003, 11:08 PM
Parent: #4

منعم

احلى نطة...لا فوق

حمزة

اتذكرناك كتير فى لقاء الخرطوم الليلة

خدر

الزول البتاوق ده جبتو من وين

تسلمو كلكم

Post: #10
Title: Re: يا بكرى أنا نطيت من كلامى وهاك دى الأسباب
Author: منعمشوف
Date: 08-01-2003, 07:12 PM
Parent: #3

هيع هلا هلا يا ياخدورى العريس النفخ البورى
والكيس
مابتقصَّر تب وأحى نطتك ونجاملك فى السمح

العزيز حمزة
تحيات شحمانات ياصديق
يازول نط ساكت ومابتجيك عوجة
النطة نطة خير، أقرأ المشهد تانى وحتعرف السبب

إزيك يا أحلام، شفتى الرشاقة دى كيف
وكيف كان لقاء الخرطوم، هل كان هاشم صديق هناك

محمد الفاتح إزيك
دموع ماسورة محلوجة؟ دى عايزه ليها مناديل بروش وملايات

لنا جعفر، أخجلتينى بهذا الإطراء
وأعجبنى جداً هذا التصريح
Quote: ياسيدي تعددت اسباب النطات والبورد واحد

وسلامنا لتاج، عمار ومنتهى

لنا مهدى تحياتى
وماأجمل تعقيبك أنت
شكرن جميلن للتشجيع على النطيط
مع انى لم أشاوركم على النطة

عزيز دخل البطانة ياناس مالو ماجانا
وين أنت ياصديق، مسجل غياب كامل، علَّك وناس البيت بخير
درس الموسيقى ده ما طردتونى منو وقلتوا لى انت منشز
ساقرأ فقط ماتكتبه عن الجوارى والمغنيات، بس ماعرفتَ فى تأريخ العرب
ولا تأريخ الإنقاذ، تحركت غريزة الفضول عندى لمعرفة ذلك وتسلم

Post: #6
Title: Re: يا بكرى أنا نطيت من كلامى وهاك دى الأسباب
Author: alfatih
Date: 07-31-2003, 11:25 PM
Parent: #1

الاستاذ منعم شوف
التحايا بحر والدموع ماسورة محلوجة

تخيل نطيت وقعت فى الكادر
الجمهور حاول يجرى ودخلنا
المشهد

الفاتح
WesterPark

Post: #7
Title: Re: يا بكرى أنا نطيت من كلامى وهاك دى الأسباب
Author: لنا جعفر
Date: 08-01-2003, 01:47 PM
Parent: #6

ياجميل الطبع والطله ياشوفنا
انا سعيده جدا كوني احد اسباب نطتك وسعيد معي تاج بترحيباتك الدافئه والجميله بينا
وقبلت نصيحة الغالي علي خضر ودخلت ساكت
اها اكان بقت حرب سيفنا معاك وان صار سلام ورطنا مع ود ابوبكر
ياسيدي تعددت اسباب النطات والبورد واحد
شكرا لهذا الغمر وحبي لخضر ومزمل بيسال عليك ياخضر
وحا ارسل ليك على بريدك عزيزي خضر وعزيزي منعم
كل حبي لكم

Post: #8
Title: Re: يا بكرى أنا نطيت من كلامى وهاك دى الأسباب
Author: lana mahdi
Date: 08-01-2003, 03:26 PM
Parent: #1

اخى منعمشوف
تهديدك بترك البورد كان من فرط محبتك فيه
وعدولك
بسبب ان المحبة غلبتك اكثر
فما اجمل النكوص عن الوعود ان كان هكذا

Post: #9
Title: Re: يا بكرى أنا نطيت من كلامى وهاك دى الأسباب
Author: عزيز
Date: 08-01-2003, 04:11 PM
Parent: #8

شوووووووووووووف
ترانى بنط
وما أحلى النط معاك ياحلو
لك كل الحب والشوق ايها القريب البعيد
وكل الحب للنص واحلى مشهد على خشبتك
وأنا كمان خلاص جيت وقاعد ومزاجى اتصلح وخلينى ارحب معاك بالحبايب وسوف أواصل دروس الموسيقى وسوف اكتب عن الجوارى المغنيات
لن نقابل كرم الاخ الفاضل بكرى الا بالجميل والحب
ولكم الحب

Post: #11
Title: Re: يا بكرى أنا نطيت من كلامى وهاك دى الأسباب
Author: OMDRMAN
Date: 08-01-2003, 09:54 PM

wa ana kman brdoo

Post: #12
Title: Re: يا بكرى أنا نطيت من كلامى وهاك دى الأسباب
Author: bayan
Date: 08-02-2003, 02:42 AM
Parent: #1

Quote: ولانو لسة عاوز اكتب عن مسرح كواتو الاهلى وديرك اويا الفرد
وستيفن أثولا والسمانى لوال ارو الله يطراهم بالخير

الاخ منعم شوف
هل يمكن ات تكتب عن كواتو
عرفانا وفضلا لمن ذكرتهم
مع خالص الحب

Post: #13
Title: Re: يا بكرى أنا نطيت من كلامى وهاك دى الأسباب
Author: ahmad almalik
Date: 08-02-2003, 09:28 AM
Parent: #1

الاخ الكريم منعم شوف
غبنا بضعة ايام عن المنبر للمشاغل التي لا تخفي عليك، لنكتشف انك قلت كلام ونطيت دون ان نعرف التفاصيل،عمومالاتبخل علينا بدفء نورك سرعان ما يعتاد عليك الجميع في كل مكان تحل فيه ويصبح رحيلك عنه ضربا من الخيانة.
واها نحن بلينا راسنا وراجينك !

Post: #14
Title: Re: يا بكرى أنا نطيت من كلامى وهاك دى الأسباب
Author: منعمشوف
Date: 08-02-2003, 10:29 AM
Parent: #13

العزيز أمدرمان
تحيات زاكيات
شكرن لمرورك وتجاوبك معانا
وانشاءالله ننط معاك فى السمح

الأخت بيان
تحيات طيبات
قد بدأت فعلاً الكتابة عن مسرح كواتو منذ فترة هنا فى البورد
وعن هذا الثلاثى البديع ويمكنك الرجوع للروابط أدناه
مونج البديع .. يكتب عن السلام ويرقص للسلام
فرسان كواتو يحولون طقس هولندا الى إستوائى

صديقى أحمد الملك
هل انت بخير؟ أمازلت تدخل مياهنا الأقليمية ولاتوجه قواربك نحونا
سأُحرش عليك حتماً كلاب الخواجية جارتنا إن كررتها
تعجبنى شجاعتك وانت تبلُ رأسك قبل الشباب
كيف كان صيف توسكا؟ هل إنستر الطقس معكم؟ تحياتى