Post: #1
Title: نكات سياسية
Author: alfatih
Date: 07-30-2003, 03:39 PM
البشير مشى ليبيا والعقيد القذافى جاب ليهو ببغاء فى الاستقبال كان يقول ... سير سير يا البشير ... شاءت الصدف انو القذافى يزور السودان وناس المراسم فتشوا ليهم ببغاء ما لقوهو الا عند ست العرقى عشة ....وكانت تضعه فى باب المنزل كمراقب للبوليس بتاع النظام العام .... المهم جابوهو ودربوهو وقالوا ليهو قول القذافى قائد اممى .... الغريبة هيئة التدريب كانوا من المدنيين وفى المطار الببغاء شاف العساكر بدل يقول القذافى قائد اممى ... قال يا عشة الكشة .
واحد سأل حسين خوجلى عن النعومة دى من وين يعنى ؟
رد حسين كان من الوضوء .... الراجل قال ليهو نعومتك من الوضوء يعنى على الحاج دة بيتيمم ؟
بوش فى حملته الانتخابية قال لجماهيره ... احسن تصوتو للذى يهتم بشئونكم ومصلحة الولايات المتحدة فوق اعتبارى وسأخفض لكم الضرائب ...فما تصوتو لى واحد سكران .
رد آل غور وقال ... الشعب الاميريكى الرائع ... صوتو لصالحى بدل ان تصوتو لواحد ما بقدر يتخذ قرارين فى وقت واحد ... بوش دة اذا عاوز يلوك اللبانة وسائق الا يوقف العربية .
الترابى سألوهو عن اغنيته المفضلة ... قال .. متين يا على تكبر تشيل حملى على كبر شالو هو زاتو .
واحد يتصل كل يوم على القصر الجمهورى ... آلو دى السلخانة ؟
سكرتيرة البشير تقول ليهو لا ما السلخانة ...البشير استاء جدا من الكلام دة وقال ليها اسمعى شنو كل ما اجى داخل القاك زى كدة ؟ دى رئاسة جمهورية ولا جزارة ؟ .... تانى اذا سأل قولى ليهو آآآى ...
المهم الراجل اتصل تانى والسكرتيرة قالت ليهو نعم دى السلخانة ..
والبشير بسمع ساكت ... الراجل قال ليها الخروف دة جاء ؟
اقيم فى الجزيرة ابا مهرجان الكذب العالمى وتم فيه استثناء الجبهة وعندما تساءلوا الكيزان عن سر ابعادهم ....رد المنظمون بأنكم كذابون محترفون
بعد فشل المحاولة الانقلابية التى قادها الشيوعيون تمت محاكمة
المتهمين .... فاروق حمدالله قال فيها لنميرى .... شوف يا سعادة الرئس لو مسكناها بيكون فوق الله وتحت حمدالله .... نميرى زعل وضرب بالكاب التربيزة قائلا : تقلب الحكومة ؟ كان راجل اقلب الكاب دة ؟
نميرى قال لتاتشر فى احدى الزيارات ... مس تاتشر ILOVE U
تاتشر قالت ليهو ILOVE U TOW MR NOMAYRI
رد نميرى ILOVE U 3 .
الرئس بوش قال العرب ما بفهموا ... اهتمامهم بصغائر الامور وينسوا الاهم فى قضاياهم ..... قال : فى العراق قتلنا 9 الاف شخص وساعى بريد فما من العرب الا وان قالوا ولماذا ساعى البريد ؟
سورى معاهو ابنه فى السوق وكان ان مروا بواحد يبيع صور للراحل حافظ الاسد .... الشافع شاف الصورة وقال :: بابا مش دة اللى بتدوس عليهو بالجزمة فى البيت ؟
ما كان من الرجل الا وان رفع الشافع وقال باعلى صوته :: دة ولد منو
قام بعض الوزراء بزيارة الى الاقليم الجنوبى .... اجتمع الحاكم فى الاقليم وقال لحكومته :: بكرة بجينا وزير بتاع قوة مائية ووزير مواصلات ووزير بتاع لعب { يقصد الرياضة .
وقع احد الكيزان فى كمين .... وقعد يبكى والله انا عندى اولاد وعندى يتامى وووو ... الجنوبى من الجيش الشعبى مسكو من ذقنه وقال ليهو :: مالى اراك تكرهين الجنة ؟
طالب : الزكاة دى بتمشى وين ؟
كوز : الزكاة يا ابنى فى العاملين عليها بس .
بعد القبض على الخبراء الفرنسيين فى قناة جونقلى من قبل الحركة الشعبية ...قام النميرى بزيارة الى باريس وكان الحضور الاعلامى مكثف جدا على الزيارة لا لانه نميرى ... بل لحوجة الرأى الغربى الى معلومة عن الرهائن .... الصحفى سأل نميرى : سيادة الرئس , جون قرنق دة سبب لكم جرحا عميقا فى الشأن السودانى وازعجنا .
نميرى رد بغضب وطلع من طورو :: جون قرنق دة كان ضابط معانا هنا فى الجيش السودانى ودخل الغابة ومثل لينا فيها ابو عرام .... المترجم توقف وسأل النميرى : وما هو ابو عرام سيادة الرئس ؟
رؤساء فى طيارة قالوا نعمل اختبار وطنى للمحبة .... مبارك قال للمصريين فى الطيارة .... منو البحب مصر ومبارك ؟
المصريين وقعوا من الطيارة محبة فيه .... المهم كل الزعماء الا البشير وقف حائرا لعدم اعتباريته وخذلانه من الركاب السودانيين داخل الطائرة .... بعد شوية واحد طوالى وقع .... هنا البشير قال يا سلام انا شعبى كلوا بيحبنى ...بعد ما رجع الراجل قال انا عايز اعرف اللزانى دة منو ؟
النكتة دى للاستاذ يحى فضل لله :
فى واحد اسمه عباس الوناس بيحكى قصص سياسية ... ناس الامن استدعوهو واوقفوا نشاطه الفكاهى مع الجمهور وكتب تعهد بذلك ... عباس جاب ليهو ببغاء ودربو ... الناس بدأت تهتم بأمر الببغاء فى الحدائق العامة وفى اماكن التجمعات وفى كل حته .... مدير الامن سخر كل القوى الامنية وقال ليهم من السما من الواطة الببغاء دا يجينى حى ؟
جابو الببغاء ومارسوا عليه ضغطا حتى اعترف بملكيته لعباس الوناس
فى القسم الببغاء دا حقك ياعباس ؟
عباس : آآى حقى بس انا مختلف معاهو سياسيا
|
Post: #2
Title: Re: نكات سياسية
Author: lana mahdi
Date: 07-30-2003, 10:47 PM
Parent: #1
اضحك الله سنك يا الفاتح و المزيد المزيد ، كما بحثت عن بوست حلمنتيش دون جدوى اخشى ان يكون مسح فى تجديد البورد
|
Post: #3
Title: Re: نكات سياسية
Author: alfatih
Date: 07-31-2003, 03:16 AM
Parent: #1
الحبيبة لنا مهدى
متعك الله بالصحة والعافية الفيها فرح
قلنا نلطف الاجواء القربت تسمم دى
اما بخصوص حلمنتيش ... ف يوجد فى الارشيف
رقم 18
تسلمى يا ايتها الاديبة المبدعة
|
|