اساسي وبدر الشين في :احـداث ملخومـه جدا /ح3

اول الحكي
والكلام القلتو ليّا

كان بيخدع فينى زيفو

والجُرح في قلبي نوسر

وديمه زايد في نزيفو

.... وكنت برضو....!!

ممكن أهديك نور عيونى

شان عيونك منّى يرضو...!!

وأصلى حاسس طول سنينى

إنو أشواقى وحنينى

نقطة الضُعف الى فينى
الكلام : مختار دفع الله
______________________________________________


لا شيء ينذر باليسر


منظر فوقي
تقاطع الشارع .. اشارة المرور والهواء يتلاعب بها .. الشارع يخلو تماما من الماره ..
مازال البكس دبل القبينه يقف في مكانه وقد تحطم زجاجه الامامي .. كثير من السفنجات .. اربع ركشات تتناثر على الشارع ..(راحت في الرجلين تعليق بالاحمر من المخرجة) ..
تقترب الكاميرا اكثر ، منتقصة من المنظر الفوقي حتى تتسلل من الزجاج الامامي للبوكس دبل القبينه
اساسي يجلس على مقود السيارة .. مفجخة جضومه .. متورمة عينيه يحيطهما سواد باين .. جيمس لازال في المقعد الخلفي بنفس العصابة السوداء التي تحيط براسه وتحتجز وراءها عينيه بحرص ، وشده كأنما يخافون ان تهرب عينيه الى حيث الفضاء الفسيح .. ومازالت اسئلته متراميه الاطراف لا احد يلم بعثرتها ولا يسكت جنونها ..
بدر الشين يعاين في خسائره وجراحاته ، يتفحصها ..
صمت عميق لا شيء يحركه الا اصوات الهواء وهي تلملم مانسيه الناس على الارض او ما تساقط منهم الى الارض غصبا عنهم ..
يتخلى اساسي عن صمته وهو مازال مشغولا بما لحق به ..
- شنو يا معلم .. نعمل شنو في المصيبة الوقعت على راسنا دا(موجها الكلام الى اساسي ) طبعا هو في غيره (تعليق زهجان بقلم الرصاص من المخرجه ) .
- والله انا ذاتي متحير ، كدي خلينا نفكر (برضو المشكلة دي مقلقاني شديد ، ياسلام لو قدرنا نقبضها (اقصد افكارهما) وهي تتصاعد من راسيهما . . تعليق بالقلم الاحمر من المخرجة ) .. .
- يتدخل جيمس : ياجماعة ماتورونا في شنو ، يمكن نفيدكم
- صمت .. طويل ..
- قلت لي شنو : يتناول اساسي الكلام موجهه الى بدر الشين
- والله يا اساسي حكاية غريبة فعلا ، دا نحس شنو اللي نحن واقعين فيهو .. نحن قابلنا منو من الصباح .. ؟؟؟
- اكيد الزول المعفن داك ..
- يتدخل بدر الشين محاولا ايقاف اساسي حتى لا يكمل الاسم ، كانما ذكر اسمه فقط هو نوع النحس المتكامل
- خلااااص ما تكمل عرفتو .. الله يقلعوا .. .
الكاميرات لم تتخلى ولا لحظه عن قبض وجوههم الثلاثة ، جيمس ، اساسي ، بدر الشين . مع تحينها في كل لحظة خلو الشارع من الماره لتشرك معها المشاهد في رؤية ذلك .. اذ ان الشارع مازال يئن من وقع الرياح على ظله ..
موسيقى حنينه ، يشترك فيها صوت الكمان ، الساكسفون ، وايقاع افريقي ، ينقل احساس الفاجعة والفقد المؤلم ..
اخيرا ، يتوكل على الله ، اساسي ، ويقفز بفكرته الى بدر الشين معلااا ذلك
- اكيد طبعا ماممكن نمشي ونحن بالصورة دي ، ح نجيب لنفسنا هوا ، نحن في غني عنو
- طبعا ، وسين وجين ، وتحويل للتحقيق ..
- نحن كدي نمشي بيتنا ونغير هدومنا ،
- المشكلة ياساسي موش في هدومنا ، لو على الهدوم هينه ، لكن في العربية الاتكسرت دي ، بعدين نحن وين نلاقي القروش البنغير بيها القزاز والكسير الحصل فيها دا .. ؟
- يازول اقول ليك نحن نمشي البيت ، وبعدين نغشي واحد صاحبي في المنطقة الصناعية يمكن نلاقي عنده قزاز ولا صرفه
- ااااااااف ينفث اساسي كثير من الهواء امامه ، ثم يستغفر ربه .
يتدخل جيمس ، بنفس اسئلته .
- ياجماعة ماتصلوا علىالنبي وتورونا الحاصل شنو ، يمكن اقدر اساعدكم ..
صمت لا احد يشركه في الحديث او حتى يبرد (بطنه) .. غايتو جنس غتاته ، ديل شنو ديل (تعليق بقلم الرصاص من المخرجه ).

مازلنا نعمل ضمن الفسحه
الممنوحة لنا من باندوث بكري
شيلوا الصبر معانا
الصابرات روابح

احداث لا يمكن
الركون الى معقوليتها


منظر خارجي .. تشترك فيه الكاميرا الشوافه .
ينتقص المنظر الخارجي حتي يصير منظر جانبي ممسكة بتفاصيله الكاميرا العسراويه وهي تستعرض كفرات السيارة وهي تدور
منظر جانبي للجانب الايمن للسيارة بواسطه الكاميرا اليمناويه ..
منظر فوقي
السيارة تقترب من الحي الشعبي ببطء ، باستحياء ، كانما تخاف عيون الناس الشمشارين . تخاف اكثر صغة الاستجواب التي تجيدها اكثر الحارات وسكانها ..
الكاميرا الشوافه لازالت مفتونه بمثل هذه المناظر ، فلها اوكلت مهمة ضبط هذه المشاهد .
تتوقف السيارة امام بيت جداره من طوب احمر ، به بوابتين احداهما كبيرة والاخرى صغيرة مطليتين باللون الاسود ، مع تغلغل اللون البيجي والابيض في تشكيلات دائرية تجمل البوابتين .. مسطبة عاليه تسند السور .. عتبة الباب الصغير متدرجة بمستويين ..
الباب الصغير نصف متااااكي .. تتدلى منه سلكه ربطة بكالون الباب وثبتت من خلال خرم في الضلفة اليمني .
منظر جانبي لسيارة تتمسك فيه الكاميرا اليمناويه بكفرات السيارة وهي تتوقف تماما ..
يفتح اساسي باب السيارة . تتتك .
يتخلى عنه بابعاده بيده .. ينزل رجلة اليسري الاقرب الباب ، ثم الى الارض .. يتخلى عن مفتاح السيارة دون ان ينزعه ...
يتذكر بدر الشين ، يتلفت ناحيته دون ان تنضم رجله اليمني الى اليسرى التي سبقتها الى الارض ..
يلاااا ، ننزل ، نشوف لينا هدوم نغير بيها هدومنا دي ، وبعدين يحلها ربك ..
يسال بدر الشين
الساعة عملت كم بالله ؟
يرفع اساسي يده ليعاين ساعته ، لا اثر لها . .
لا يتفاجئ ، لكنه يتحسر ..تظهر الكاميرا الشوافه هذا التعبير .. (طبعا ماهو باين واحد اضارب مع العالمين كلهم بعد عايزين ساعتو تكون فيهو ؟؟؟ تعليق بايخ بقلم الرصاص من قارئ ملقوف اطلع خلسة على السيناريو ..)
الساعة كمان ذاتها اتلحست .. الله يعين بس في اليوم الماعايز يعدي على خيرو
يلاااا ننزل يا بدر ( يتكلم اساسي وهو يتخلى نهائيا عن مقعده امام مقود السيارة ويخرج الى رحابة الشارع .. )
منظر جانبي للجانب الايمن للسيارة ..
رجلي بدر الشين ، تستقبلهما الارض ...
يدلف اساسي الباب الصغير ويدخل ... ومن وراءه يقف بدر الشين مترددا . . يلتفت اليه اساسي قائلا
0 ياخي خش ، الناس ديل كلهم نائمين .. يلاا ندخل سرعة قبل ماتشوفنا الحاجة ولا الفقري داك ويفضحنا ..
زوووووم ان للبوابة الصغيرة ..
يخرج صبي في الثانية عشره من عمره .. يرتدي زي مدرسته .. يحزم الى ظهره حقيبته المدرسيه ..
زوووم ان لوجهه .. (يتفاجئ عندما يلمح السيارة وهي مدشدشه بهذه الصورة ) ..
يهرول صوبها ، وهو ينفخ بواسطه فمه جمله اكثر اندهاشه
-اااااااااايكككككككك ، ابوك زفت .. دا شنو الدشدشها كده .. يا دين محمد !!!!!!
وفي ثواني يفتح باب السيارة .
تسبقه الكاميرا الشمشارا الى داخل السيارة .. زووم ان لوجه جيمس ، وقد استسلم لسبات عميق ..
يتاوق بفضول داخل السيارة ، ومع ذلك لا يري جيمس في المقعد الخلفي ..
يجلس الى مقود السيارة ، كعادته دائما كلما وحد السيارة واقفة غير مقلقة ..
زوووم ان للوجه .. لمفتاح السيارة وهو يحتل مكانه الطبيعي بين الدركسون وطبلون السيارة ..
اااااااامك ، ديل نسوا المفتاح . . سننننننه ... !!! كدي النجربها ..
موسيقي صاخبه ، تعني الانطلاقيه .. وتدوير الاحداث .
تدور السيارة ، والفرح الطفولي يحتل وجهه .. يضع واحد ... تنطلق السيارة ...

يمنكم سادتي ان تقفلوا
تلفزيوناتكم ، ترشيدا
للاستهلاك الذي تنادي به الحكومه
مع انها ترعي برامج البذخ

سلام بالكوم ومربع كمان يامخرجتنا الكبيرة شيري

عندي ليك سؤال
انتي متخرجة من مدرسة يوسف شاهين؟؟؟؟؟
لك التحية

سلام مربع

عمده 4

سلمت ياسيدي للطله
ولمتابعة
هذه شهادة من متذوق جميل
اعتز بها جدا
سلمت اكثر لكونك
واحد من الذين اعطوني دافعا لاواصل

آكششششششششششن

ضبطتك متلبسة بالإبداع

فوووووووووووووووووق

وعشان خاطرنا ترجع