ونسة ساكت

يا ناس الحلة هووووي سلام جاكم
... من زول جديد كرت و ربنا يجعل دخلتنا خفيفة عليكم...
اهلنا و احبابنا.. قدر ما عافرتة و دافرتة ولزيت عشان ما اخش حلتكم دي بالباب ،، غلبني عديييل كيدة،اها بعد داك المسعلة حرقتني شديد لمن بطني فارت .. قمتا دخلتا بالشباك... و زي ما انتو عارفين،، الايامات دي السودانين ديل مابتقيف قدامم حاجة الا ناس ال..... غايتو .. ربنا يهونا علينا ويفتح في وشنا كل الشبابيك المقفلة..
خلان الصفا... جيتكم الليلة بدور اقول ليكم كلمتين و ماشي,, فعليكم الله اسمعوني لحدي النهاية و ما تقاطعوني لمن اكممل , لانو كلامي دا ظنيتو بهم ناس منكم لو ما كلكم...
في اللول خلوني النوريكم البحادثكم دا منو...
انا زول اغباااش كرعينو معججات لي ركبينو, لاعندو حروفا بيكتبا قبال اسمو ولا بعدو ويمكن حتي العليا ما كملا,ولا حصل يوم وقفلو في صف بنك، لكنو متاكد انو من جهلو راضع الادب قبل العلم والحكمة قبل القلم...مليان ايمان و يقين و تصوف بي ربو واهلو وبلدو... دارع مخلايتو فوق كتفو و سادر في بلاد الله كايس سترة الحل لي ناسو و نفسو .. وبهبش علو يلقالو مخرجا آمن لحدي ما يتخارج .. ما شايل في قلبو من اي زول، لا كان ناس اليمين والا كان ناس الشمال، ما ياها دي حال الدنيي عاد, ودي قسمتنا ياها كدي, نسوي شنو بس .....
اها دا تراني انا، عرفتوني؟؟ وانا قايل الزيي ديل كتاااار و ظنيت يانا البيسمونا اهل الكتب، الاغلبية الصامتة، ومرة سمعتهم بيسمونا، وقود الثورة، وما عرفتا هم قاصدين شنو...
.... اها ما نكتر عليكم النضمي و نخش في الكلام الجد..
انتو يا دكتورة فلانة و فلانة وفلانة، ويا دكتور فلان وفلان ،،، وزي ما شايفين انا قدمتا النسوان علي الرجال عشان ما يقولو علينا بنضيع حقوق الحريم وبنختهم بعد الرجال....
انتو يا دكاترتنا، البتسو فيهو دا اكان ما قادرين عليهو ما تخلو و تشوفو ليكم حاجة غيرا!!.... وكدي عليكم الله ما تزعلو مني ولا تفهموني غلط، لانو انا، والله عالم بالفي القلوب، ما قصدتا اقلل من مقاماتكم ولا اسخر منكم، حاشا لله... لكن قصدي انو ارسل ليكم عتاب خفيف جدا جدا من زول قلبو عليكم كاخوات واخوان في الدين ما عاجبو البتسو فوقو دا.... وطبعا انتو عارفين انا قاصد شنو...لكن برضو اوضح ليكم اكتر.
الكلام المر دا انا قولتو لي سببين....
السبب الاول هو انو المواضيع البتكتبو فيها دي مواضيع خطيرة جدا جدا والواحد لو ما واثق من ايمكانياتو ومدرب علي النضم التقيل ومدرع بي اسلحة الحجة والاقناع، ما مفروض يخش فيها عشان ما يحرج نفسو ويحرجنا معاهو... واقول ليكم حاجة كمان، الواحد فينا بجيكم في واحتكم دي شارد من هجير الغربة والترحال وكايس فيها ريحة الطيبة والسمحين، فما ظريفة يجي يسمع ليهو كلام ما في محلو.
السبب التاني واظنو دا هو الاهمة....انتو يا اخوانا الزولة البتناضمو فوقا دي ما عرفتوها هي منو؟؟؟؟؟؟؟
يتبع

قلت لي جديد.. يا اخي دا انت اقدم من بكري
بس يا زول كلامك سمح بالحيل كدي النخليك تتم كلامك ونشوف موضوع السنه ونص الابيت تكتب فيهن حرف ديل شنن
اها يا اخوي في العقاب

ها .. جيمس بوند
سلامات ... وينك ياراجل من زمان ... مشتاقين
لسه انت في شغلة "جديد كرت" دي ؟؟

صدقت وصدق أخونا هوب فل ... ء


في إنتظار التوابع

مرحب بيك يا الكرت ابقى داخل
لكن شكلك كده داخل من زمان

ويابورداب جاكم قرين سجيمان
وامسكو الحبل
وزى ما قال هوبلس منتظرين
الاستفهامات دي

هوبلس يا هوب فل... ما هي الحرفنة هنا... تكون مسجل من زمان لكن برضو تكون جديد...
زيدون...عليك الله في زمتك دا كلام بيقولو جيمس بوندا..
شكرا يا كولا وشكرا ليكم كلكم....
اها يا اخوانا اللتم ليكم الحكاية.
كتا سالتكم ياجماعة انو الزولة الاسمها رودا دي ما بتعرفوها؟.... حاجة غريبة والله...
لانو اي زول متابع الشان العام السوداني متابعة بسيطة، حيعرفا هي منو, لانو النضم ياهو النضم والاستايل ياهو الاستايل واكان ما اخاف الكضب كان قولتا ليكم الخط ياهو خطها زاتو....والظاهر هي صدقت لمن قالت في مكان تاني غير دا خالص انو المثقف السوداني مشكلتو بيقرا المتون دون الشروح واكان قرا الشروح، مابيقرا التفاسير. وانتو يا اخوانا اكان ركزتو شوية في الكلام البتقولو دا، كان عرفتوها هي منو...واكان عرفتوها، النقاش كان حياخد شكل تاني خالص.....
وانا شخصيا والكلام ليكي يا رودا او روضة زي ما تحبي تسمي نفسك، من اشد المعجبين بيكي وبي اسلوبك في الكتابة، و انتي بتستاهلي، وبي جدارة، لقب مفكرة، وبشوف انو كان ممكن يكون ليكي دور تاني خالص في الحياة العامة السودانية، لكنك وزي ما بيقولو اهل النضم السمح، فتحتي امكانياتك علي الاحتمال التاني...وكل زول عندو حاجاتو البعرفا... وانا طبعا ما حاقول اسمك لانو المسالة دي زي ما بيقولو مستهوياني خالص، والظاهر نحن كنا فعلا محتاجين زولة زيك تقعدنا في علبنا وتورينا الما بنعرفو....
ولي قدام لا اعانك الله لما فيه شر لكي
وخفي علينا شوية....
وكتر الف خيرك يا بكري

هوبلس، زيدون، كولا... ما وريتوني رايكم؟؟

Quote: كتا سالتكم ياجماعة انو الزولة الاسمها رودا دي ما بتعرفوها؟.... حاجة غريبة والله... لانو اي زول متابع الشان العام السوداني متابعة بسيطة، حيعرفا هي منو, لانو النضم ياهو النضم والاستايل ياهو الاستايل واكان ما اخاف الكضب كان قولتا ليكم الخط ياهو خطها زاتو....والظاهر هي صدقت لمن قالت في مكان تاني غير دا خالص انو المثقف السوداني مشكلتو بيقرا المتون دون الشروح واكان قرا الشروح، مابيقرا التفاسير.

بالله دي راحت عن بالنا كيييف؟؟
بس يا صديقي ما يهم خليها زي كدا عشان الخصوصيه و بس بعد دا التروق في علبه .. حلوه علبه دي
**
خلي بالك الدنيا حر .. والصيف بيرفع درجه الحراره.. عشان كدا النمله نايمه في كشاشه بحريه مستأجره لزوم إجازة الصيف
**
البرق لمن يبرق بيضوي صح
طيب ليه الرعد زعلان؟؟
**
تطلع تنزل تكتر تقلل حبة الفلفل حبه وما ممكن تكون غير كدا .. اوكي
طيب كدا اتفقنا علي الفايت بس الآتي لازم نعطنو في مويه برش
**
007
حول الكود مع الحروف السريه عيد التنسق لبحر مالح عشان القطر يعدي ‍‍‍.. سكه حديد مائيه اضرب تعظيم سلام للمركب
**
007
القضية متداوله بيني وبيني وبيني والحمد لله في تقدم في المباحثات وممكن نطلع بنتيجه مرضيه لجميع الاطراف
**
وقف الغساله وخلي الغسيل في النشافه لحدي ما الشمس تطلع
حول

علم.....

حول.