الشاعر التونسي : علاء الدين شاموق .. عاد دا كلام دا

مدائن الشعر

علاء الدين شاموق - شاعر من تونس

مَدَائِنَ الشِعْرِ حَلِّقْ
فِيْ مَرَافِيْهَا
واهْدي للسمْرَاءِ شَيْئاً
مِنْ قَوَافِيْهَا
وليَتْبَعِ الغَاوونَ سِرَّاً
خَافِيَاً فِيْهَا
سَأعُودُ وحْدِيْ..
والدُروبُ قِفَارْ

سَأَعُودُ رُوُحَاً
فِيْ المَسَافَةِ والمَدَي
وأحَارِبَ الأشْبَاحَ
فِيْ وَادِيْ الرَّدَي
سَأعُودُ صَوتَاً
فِيْ مَسَاحَاتِ الصَدَي
وأدُوْزِنُ الوَجْدَ المُعَبأَ
فِيْ الأغَانْي

مَكَامِنُ الوَجْدِ تَهفُو
كَيْ تُلاقِيْهَا
ونَظْرَةُ الشَوْقِ تَبْدُو
فِيْ مآقيها
الحُسْنُ يَزْرَعُهَا
زَهْرَاً ليَسْقِيْهَا
بالعِطْرِ حَتَّي ..
تَرْتَويْ الأَنْهَارْ

سَأوَاصِلُ التِرحَالَ
فِي هَذَا الفَضَاءْ
وسَأقرَعُ الأبْوَابَ
أبْوابْ السَمَاءْ
وسَأُشْرِكُ الغَيْمَاتِ
أفْرَاحَ الغِنَاءْ
وأعَطِّرُ اللَيْلَ المُخَبَّأ
فِيْ الأَمَانْي

صَبيْحَةُ الوَجْهِ بَدْرٌ
لَسْتُ أُخْفِيْهَا
جَمِيْلَةُ اللحْظِ أَهْويَ
كُلَّ مَا فِيْهَا
مَلِيْكَةُ الحُسْنِ عَادَتْ
مِنْ مَنَافِيْهَا
تُخْبِّئُ الشَمْسَ..
لَكِنَّ الليَالِيْ قِصَارْ

سَتُشْرِقُ خَلْفَ نَافِذَتِي
شُمُوسٌ مَرْمَرِيَّةْ
وسَتَصْبِغُ الدُّنيَا
بِلَوْنٍ أحْمَرْ
وسَيَمْلأ الزَهْرُ المُجَفَّفُ
غُرفَتي
والمِزْهَرِيَة
لَكِنَّ لَوْنَ الحَقلِ
لَنْ يَبقيَ
كَمَا هُوَ أَخضَرْ

سَأعُودُ يا خُرْطُومُ
يَومَاً كَيْ أُلاَقِيْهَا
وأُعَانِقَ البَدْرَ المُعَلَّيَ
فِيْ مَرَاقْيْهَا
لأصِيْرَ خَمْرَاً
فِيْ كُؤوسٍ
أنْتِ سَاقِيْهَا
سَأعُودُ حَتْمَاً..
للمَلائِكَةِ الصِغْارْ



AZZAMAN NEWSPAPER --- Issue 1549 --- Date 6/7/2003
جريدة (الزمان) --- العدد 1549 --- التاريخ 2003 - 7 - 6
AZP09



http://217.205.164.249/azzaman/articles/2003/07/07-05/687.htm



نفسي أفهم تونس دي الحشرها هنا شنو ؟ رغم انو مكتوب سأعود يا خرطوم .. عموماً حصل خير كويس برضو النشروها ما كعب.

.

مبروك الجنسية الجديدة يا علاء الدين

ماقلت لي دي ادوك ليها كيف ؟؟ بالمواطنة ولا لوتري ؟



عموما قصيدة رائعة حتي وانت تونسي تكون سوداني الاحاسيس


ولك الود

تنقو

الله يبارك فيك يا عمك تنقو

غايتو التغيير ما كعب

يكون الواحد سوداني-تونسي فكرة

.

أفسد علي متعة القراءة أنني وجدت آخر مقالك هذا العبث من أصدقائنا في جريدة الزمان ، وعندما يزول غضبي ، سأعود لأقرأها ثانية

وما تعرف أنا غضبان كيف
بس بتمنى عزانا أنو من يقرأها يفكر لماذا اختار التونسي الخرطوم ليعود اليها
وأتمنى أن يبقى هذا السؤال معلقا في ذاكرة اخواننا العرب القراء الأكارم

أعود اليها مجددا

تصدق يا أبي ناس الزمان ديل ما بيكونوا أبداً قاصدين حاجة، بس تكون لخبطة، وأنا أساساً ما قاعد أؤمن بي نظرية المؤامرة عشان كدا قاعد اضحك مما شفتا المنظر دا.

.

ود شاموق سلام

بس جماعتك ما يكونوا مستكترين الفن دا على السودان

رجعتنا لاغانى البنات ((احلف ليك سودانية وفى السودان كمان شايقية)) طبعا حاجة خطرت على البال بعيدا عن التعصب والنعرة القبلية((ودا لاهل النضم)) ولا انا غلطانى؟؟

امس بالليل امى كانت بتحكى لى عن حبوبتى ام ابوى قالت كانت بتغنى لعمتى السمراء وتقول ((الخضرا التشبه القمرا)) اغتاظت منها جارتها وقال ليها والله قمارتن زرقا ما سمعنا بيها الا عندك انتى وبتك))هى الموجعا شنو؟؟انا ماعرفت لكن البعرفو عمتى تقول للقمرا قومى وتقعد فى محلها

وانا ما حاقول ليك مبروك الادوك الجنسية وهم التوانسة بعرفو يقول زى دا ؟؟؟
كان فى مبروك نقولا ليهم هم الادوهم ود شاموق

وبتمنى الاتمناهو او بى

لكم الود

ود شاموق
قال الفيتوري كان اسمها أمدرمان
وعرفوه في بعض الكتب المدرسية المصرية بانه الشاعر المصري محمد الفيتوري ثم جاء الدور علي الليبيين فأضافوا الشاعر العربي الليبي محمد مفتاح ذلك حينما كان كبيرهم زعيما للقومية العربية وعلي كل حال تونس حلوة بالله أعمل لينا دعوة الواحد نفسو يشوف بلدكم دي من ما زرعوا فيها بدل كل غنماية شجيرة زيتون بالله ما تنسي يا -الحبيب ود شاموق- تحياتي

الحبيب ودشاموق

يازول مبروك الجنسية الجديده ... بس أعمل حسابك من باقي الدول التانيه ديل برضو ممكن (يغمطوك) ويدوك الجنسية بدل (صك العبودية) المعاك
في زول قال ليك تكتب كلام حلو زي دا ؟؟ اها شيل شيلت واتحمل نتيجة كتاباتك

صديقي هوب

ربنا يبارك فيك ويديك الفي مرادك

كان جنسية كان لوتري كان لجوء سياسي

احنا ما شعب الله المعذب، دي احلامنا

نحلم بي الغياب ولمن نغيب نقعد نتاوق


لك رحيق المودة

.

والله يا صديقي أبا إحنا بقينا نحنن

هسع عليك الله زي الفيتوري، هذه الثروة القومية، يستاهلوهو الليبيين ولا يستاهلوهو المصاروة، بلد ما عندها وجيع.

لك جميل المحبة

.

حبابها الملكي

دا بس عشان تعرفي إني ما شايقي من نوري

شكراً يا راقية

.

الاخ العزيز علاء
كيفك وكيف اخبارك

كلماتك دائما مميزة وعالية
في القمة

بس ما كنت عارفاك من تونس


طلعت في النهاية







بس مايضرش


لوول

تحياتي والله
وتسلم على عظيم الكلام

هوزي يا هوزي

شفتي القصة الغريبة دي

والله انا زاتي مبسوط اليومين ديل
وقاعد أجمع في معلومات عن تونس

يمكن الواحد يمشي يشوف وطنو الجديد
أصلو القديم بقى خرابة

.

ود شاموق

لك التحية؛ ومعليش

عادل

عزيزي عادل

والله صحي معليش .. الجاتك في جنسيتك .. سامحتك

الله يسامحها

.

عزيزى ودشاموق

لم أكن أعلم أنهم أركبوك التونسية...وبقصيدة !! وكمان رائعة

سلام

عزيزي أكزورست

والله التونسية راكبنها من زمان

هسع بقت جنسية كمان، يعني حتى نزول ما في طريقة نزول

الله يستر

.

أبن أستاذي
سلام
وأحترام
حقيقة الجماعة كملوا علينا الكلام كلوا
و بي كلام أهلنا
بخيت وسعيد
قلنا نسلم عليك لأنك طولت مننا
في كنف الله

الحليلة يا عابدون يا صديقي

تسلم ياخي وانشاء الله ربنا يديك الفي مرادك

لكن صحي انا بخيت وسعيد وكت أدوني الجنسية الجميلة دي

.

مبروك ودشاموق
يمكن ان تراسلهم لتصحيح الخطا

ود شاموق
عمل إبداعي جميل

تعرف الجماعة ديل فاكرنك "قناة المستقلة"ه

عزيزي نادوس

والله صحي ياخي .. إلا سؤال : المستقلة دي سودانية ولا تونسية ولا دي أممية الإسلام البيقولوها ؟

.

الله يبارك فيك يا زمراوي يا حبيب

ما بيكونو قاصدين، عشان كدا ما في داعي الواحد يزعجهم، وبعيدن طالما كتبوا تونس الواحد ما حيسألهم .. لكن في دول معينة كدا كان كتبوا واحدة منها كان الليلة ما حينوموا ناس الزمان

.

مبروك يا علاء
بس تعرف تونسي دي احسن جنسية عربية ممكن تاخدها
والله انا حاسداك
تعرف عندهم قوانين احوال شخصية رهيبة

عفوا مكرر

مبروك يا علاء
بس تعرف تونسي دي احسن جنسية عربية ممكن تاخدها
والله انا حاسداك
تعرف عندهم قوانين احوال شخصية رهيبة

يبارك فيك يا الجندرية

ويديك الفي مرادك

كان جنسية كان إقامة

لكن صحي والله تونس دي عندها قوانين تحسد عليها، أهما واحد فيها - قبال بتاع الأحوال المدنية - بتاع منع الغنم من السرحة في تونس كلها والله ديل ناس محسودين علي نعمة اللا-غنم.

.

ماعندهم غنم بسرحن جميل

ولو ماعندهم شفع سارحين بالكراتين يكون جميل جدا

اها كدى انضموا وورونا القوانين الرهيبة دى

اخوى قال مابعرف فى تونس الا الترجي والحبيب بورقيبة

ودشاموق

التسوى بيدك
يغلب
أجاويدك
ياخوى
علاء الدين ود سميرة بت مريم مش كان أحسن

سلام مربع

مبروك يا علاء
التونســي

بيرم التونسي

اخوك ولا شنو
؟؟

عندي أختي لزم

اسمها شيري التونسية

ما شفتيها لي بي جاي ؟

.

آي والله يا دور نقاس

دي مشكلة أيه دي ياربي

أنا خلاص تاني

من الضل دا ما بزح

.

الأخت ملكة سبأ

من قوانينهم الرهيبة

التعدد ممنوع ، أى الرجل التونسى لا يسمح له بالتزوج بأكثر من واحدة وأفتكر أن هذا هو السبب الذى سوف يدفع ودشاموق بالمطالبة بالتنازل عن التونسية

وبالمناسبة تركيا أيضا قوانينها لا تسمح بالتعدد ، لذلك على المتضررات السودانيات الإسراع بالتجنس بالتونسية أو التركية

والسلام

الله يهديهم يا أكزورست ياخوي

بالغوا والله .. هي دي دايرة قانون ?? براااانا بنسويها .. ما محتاجة لي بند في القانون عشان يمنعوها .. انتا متخيل منظر الواحد يا أكزورست يجي راجع العصر بيتهم يكون شايل 4 قفف ملاح .. ؟؟

.

والله يا ملكة سبأ أخير اخوك

أنا بعرف أبو القاسم الشابي .. تلقى التوانسة زاتم ما متذكرنوا

.

EXORCIST7
تسلم


وكان كدا امانى ماوقع راجل

ود شاموق التونسى دابى جيت اقولك بخيت وسعيد

ونحن كاتحاد مرأة نطالب بالجنسية التونسية لكل رجال بلدنا

ووراء مؤمن على قول الكيزان

علاء الدين إزيك
معذورين أكيد لمسو نكهة الشابي في القصيدة
بالرغم من أن الأحسايس تورد المقالة إلى إنك ربما تكون قد كتبتها وأنت بتقطع تذكرة على الخطوط التونسية
وبالمناسبة دي اضمن لك هنا أغنية تونسية تقول:
فاطمة يا فاطمة
عينيك الحوتة
وأنا بنوتة
فاطمة يا فاطمة
أهلك كرهوني
وأنا بالهوني
على القروية شن بقدر
على القطية شن بقدر
على التونسية يلا فكر

الحبيب ود شاموق.........عندما يكون الحديث عن ود شاموق فانه ثروه ثقافيه......تنتمي للوطن الكبير........من الخليج الي المحيط.....بارك الله فيك اخي....