كتاباتكم : مالها التقول مغلفة بسولفان

..
.

بعض الملاحظات على ما يتم طرحه بالبورد : جيفارا
كتلو البورد بالسياسة : منو لا اذكر
كيف تعرف انك فى سودانيز اون لاين : اساسي

وها هى مقولة رابعة للاخ الفاضل الاستاذ
مام
ملك البوردات واحد عمداء المنتديات السودانية
دار بينى وبينه حديث هاتفى طويل
تذكرنا فيه ايام زمان وايام بناديها وشتات
ومعزاوى قبل ان يصبح هيرو وايام رضا
والقطارات و ومنتديات الاجازات
طواحين الكسمبر .. وكتابات د.صادق
واغانى الصادق وفلكبات انا
وفجاة يقول لى
ياخى مالها الكتابات هنا التقول مغلفة بورق سولفان
وعايزين تقدموها هدية وكلمات شفافية وتنوير
ويواصل قائلا : لي سنين ما سمعت فى السودان
كلمة شفافية دى
لكن
بالجد يا جماعة
الواحد تحس بيهو يصيغ الجملة عشرة مرات
ويعصرها ويدخل ليها ستين كسرة وشولة عشان تطلع انيقة
وبالتالى تفقد واقعيتها ونكهتها السودانية وبساطتها
عليكم الله براحة علينا
عشان الواحد يحس انو فى حوش صريفه من القش
وقاعد فى ضل ضحى بشرب فنجان شاى
ما لابس الفل سوت وفى مؤتمر والكرافته خانقاه ومسخن رقم الاسبليت
والمشروبات الباردة المدورة
بالله كدا ما احسن لينا وليكم
على الاقل الانقة فى البساطة
مش فى التلميع واختيار ازهى الالوان والاقمشة

تحياتى لمام
وبناديها
ورضا وشتات ورمانه والصاوى
ود البلد
وكل المحاربين القدامى وكل الاخوة
واجازة طيبة ياولياب

وسلام

تبلدينا العزيز

فعلا كانت ايام ..لقد دار نقاش بيني وبين العزيز الخواض قبل فترة عن ما يدور في البورد وعن كثير من التفاصيل والجوه التي تاتي وتمر بسرعة البرق ولكني اشترك معك في الكلمات اصبحت تلبس كرفيته
عموما احيانا يحتاج الموضوع وجديته ان يلبس هذا النوع ..ولكن ليس دائما

الله يطري ايام زمان بالخير ( ليه دائما نحن بنحن لي زمان ) سؤال دائما يخطر ببالي

هناك شخصية رائعة كانت من ايام زمان وهي الاخت سارة لا انسي انها اول من رحب بي عندما كان الموضوع يبقي في الصفحة الاولي ثلاثة ايام ولم نكن نعاني من انيميا الباندوث اتمني لها كل الصحة والعافية


تحياتي لك ولقدامي المحاربين

تنقو

تبلدينا
تحياتنا لمام الذي نفتقده بشدة...بالله هل هذا تعليق مام الرجل الشديد التهذيب لدرجة الواحد يخاف يطلع منه قدامه حرف مافي محله؟ ومال الناس التانين يقولوا شنو..نفتقد فعلا مام والسارا وكل الجميلين اللي صبغوا المنتديات بروح الوطن وأعطوها معنى الانتماء
وتحياتي معك لكل المحاربين القدامى

معاك رجع الصفا الصداح
من الهجره
واتكتبت علي الابواب
معاني النظره لي بكره
همد موج الحزن في الروح
وغابت حرقة الذكرى
واصبح يقيني معاك
هوي والفه وجمال فكره
................

تبلدينا الكثيف ..اشواق بحجم الغياب ..ولون الشفق ..ونسمة
دعاش ..وطعم الجوافه ..الفين سلام ايها الجميل ..مازلنا في
الخاطر ..كما انت ..الشكر لحروف الوفاء ..والتحيه لمن قعدتني
معاهم في الصف القدامي ..واخوك من ناس ورا

واحده من عندينا وكده ..جابتها الغربه ..رجاله ساكت ..مجبوره
كانت مبسوطه ومقتنعه بالقراصه الماخمج ..والملوحه والبركاوي
متمسكه بالرطانه تمسكها بشافعها ..اجبروها الضيوف ..بالونسه
معاهم ..باللغات التانيه ..حلفت ما تلف الكلام بالسولفان ..
واكتفت بي جمله واحده ..وهي ..مره كده ومره كده ..يعني لو سالوها
الغربه كيف ..تقول :مره كده ومره كده ..الصحه كيف ..مره كده
ومره كده ..والباقي تتمو رطانه ..واها ياخوي لو سالت عن
الغياب اقول ليك ..بقينا ناس قرايه ساكت لكن برضو ..مره كده
ومره كده
...............
من نكات ايام زمان عن الغربه
...............

ولدو سافر للقرايه في واحده من دول اوربا
الشرقيه الزمان ديك ..طول ما ..رجع البلد
واخبارو مقطوعه ..موسيقيه ..الابو قلق شديد
علي ضناهو وقال يمشي يشوف الوليد مالو .وصل
الجامعه البيقرا فيها ولدو لقى شلة من الطلبه
السودانيين ..سلم عليهم سلام شديد ..وسالهم عن
ولدو ..واحد من الطلبه سال عمو

عمو ولدك ليهو كم سنه هنا في ..براغ
عمو قال ليهو :والـلـه ياولدي ســــتة سنوات
الطالب رد عليهو :والـلـه ياعمو نحن الطلبه ..الجداد
ديل ما بنعرفهم

.........................

التحيه للاعزاء تنقو ورمانه
بجيكم صادي

اخوك ..شتات

لما شـــــــــفتك
ليلي ضـو وبـق نور
ونرجس الجنه المفرهد
رف بي جنحات عطور
وغنى فارســــــك
خـت صورتك في الاطار
في الليالي نجم يلالي
ونسمه في وهج النهار
وقال في وصفك لما بنتي
احلى منك برضه انتي
ومــافي زول معانا
حتى كان ياسمحه غبتي

...............هاشمنا

من حكاوي زمان

...

واحد سواق في خط حلتنا كاتب قدامو في البص

حســن يوسـف وعفـاف مريم

يوم من الايام والبص لافيهو صمت رهيب لانو نـص الركاب
معسلين من تعب اليوم داك والنـص التاني سـارح قام ليك
واحد وسط الصمت داك وبصوت عالي قال :حسن يوسف وعرفناهو
..يقصد الممثل ..عفاف مريم دي منو؟

وطبعا المقصود بالكتابه الاغنيه المشهوره ..وهي تعني
حسن يوسف ..اي جمال سيدنا يوسف عليه السلام
وعفاف مريم ..عفة السيده مريم عليها السلام

الناس الفي البص ضحكو شديد ..وصاحبنا احتار الجماعه
العورا ديل بيضحكو ليه؟

...................

ومره جالن الف خاطر
بي عيون عقلي المساهر
فجأة عينيك الحبيبه
قالو سارح وين مسافر؟

........

التحيه لكل مبدع في هذا الموقع
وسلمت تبلدينا
..........

تشدني الكلمات الفايحة منها ريحة دعاش

تذكرني ب (تكل) حبوبة
نرفع البوست فوق شوية

أول مرة أرى هذا البوست .. وأقرأه
حقاً يا اخي تبلدينا .. التلقائية مطلوبة ومحببة .. وانا من أنصارها. لكن هنالك بعض الموضوعات المعقدة بطبيعتها وتستلزم استخدام أدوات تحليلية وتعبيرية معقدة. فمثل هذه الموضوعات يجب التقليل منها .. لأن كل مرتادي هذا البورد أو جلهم .. لا يبحثون عن مواضيع تستفذ مقدراتهم المعرفية بقدر ما هم في بحث عن الترويح والترفيه وبعض الجدية المبسطة. كل الأعضاء أو جلهم يرتادون البورد في فترة استراحة عن عملهم اليومي المضني .. ولا أظن الكلام المغلف بأوراق السلوفان يمثل وجبةً مريحةً في فترة استراحة بين العمل والعمل
والله من وراء القصد