.
.
[qb]
مشهد اول
تحت شجرة ظليله تتوسط الفناء الجامعى التفت مجموعة من الطلاب حول
احد معاول الحزب المعارض ذلك المشاغب الذى طالما الهب مشاعر الطلبه بشعاراته الرنانه وخطابته المتميزه ... دعوة لمناهضة الدكتاتوريه وحكم العسكر تليها هتافات واناشيد ثوريه ثم صفير وتصفيق ... 0
يمر عماد وصديقه حسن وهم يتجاذبون اطراف الحديث
شنو يا حلو وين طالع بدرى كده ... عماد
والله ماشى السفاره الفرنسيه قالوا فتحت .. كان الله يخارجنا من البلد الحفره دى .... حسن
يا بوى السودان لذيذ وما بتفات ... عماد
اى لذيذ انت اخوك ماخامى مع الجماعه ماعندكم مشكله انحنا بنتخارج ياخوى وخليناهو ليكم اتجدعوا فيهو ... حسن
احم احم .. الجماعه وصلوا ..والله يا حلو الحاجه دى مكسره فيك عديل كده ... والله راقده واطه ... عماد
يابوى ديل ناس مرتاحين ماعندهم هم دايرين يحبو ونحن الحب ده نسيناهو مع لقمة العيش .. هسى تشبكنا ليك هاى .. وياى ..وباى ونحن ماعندنا حق الشاى... حسن
هاى سون ... هاى عمده
اهلا شيرى ازيك .. مشتاقين وكده .. امس حلمت بيك .. حسن
اها قمت تمارس الدجل اللذيذ .. الله معاكم انا زاحف ... عماد
شنو يا حبيب .. ما سمعت الصادق بيقول الدجل فينا كائن يمشى على ساقين ... اهو كترة الحزن علمتنا الدجل
ياى يا سون ماشفت امس الحصل .. فظيع ..فظيع .... اتخيل ونحن طالعين من النادى الارمنى بابا صدم " لولو " ..تخيل المسكين رجلوا اتكسرت قام باب وداهو لى واحد طبيب صاحبوا ... فى الاخر نوموه عندهم فى المستشفى ... شيرى
ياااه .. مشكله والله ..وهسى كيف هو ؟ ..حسن
كويس طالعين بعد شويه نزورو ...شيرى
هو قريبكم.. ولا صديقكم بس فى النادى .. حسن
ياى قريبنا ؟ رفعت حاجبها بدهشه وابتسامتها الحلوه تتصدر وجهها
لولو ده كلب لندا صاحبتى
والله لكن لولو فى نعيم .. ياريتنى انا ...امبارح حاجه مدينه بتاعت الشطه وعجور يطردوها من المستشفى عشان ماعندها حق الدواء ولولو منوم..سبحان الله .. حسن
شنو شطه وعجور يا سون ... شيرى
لا لا .. ماعليك دى هترشات بس يلا باى نتشاوف
يافرده ... يافرده
اتاه صوت اسماعيل صبى الاورنيش الانيق .. حيث كانت لحسن علاقات واسعه مع حرس الجامعه وبتاع الكافتريا وحتى بتاع الطبليه
فى مدخل الجامعه وكل واحد طبعا ليهو عوزه
اوووه سمعه ..وينك انت يا لذيذ ... حسن
متوفر بى كميات ... هو انته بتشوفنى ومعاك الترطيبه دى .. لينا الله وعيشة السوق انحنا بس ... اسماعيل
كدى خلى الحنك البيش ده وفك ليك زرقاء نتم بيها حق المواصلات و نتخارج .. حسن
كان ليك والله .. يادوب تمينا حق العشاء وكده الليله السوق نايم ... اسماعيل
عديله يازول ... نشوفك بالليل فى المركز الفرنسى .. فى قرايه هناك ... حسن
اكيد يا حبه ... الله معاك
مشهد اخير
عند مرور حسن من البوابه الرئيسيه متوجها للسفاره الفرنسيه ممنيا نفسه بملح كارب يوصله الى العمارات .. كانت مظاهرة ضخمه تهدر متحركة من تحت الشجره فى طريقها للشارع ... لتتسرب شيرى ولندا وعمرو فى اتجاه سيارة شيرى الزرقاء لزيارة "لولو" فى المستشفى ... كان اسماعيل يكشكش صندوقه لاحقا بالمظاهره
ورنش .... ورنش 0 ... ورنش
ديك الجن
[/qb]