يا جماعة بدون زعل ادونا رأيكم هنا عن مستوى المواضيع المطروحة فى البورد ....

يا جماعة وبدون زعل انتوا متفقين معاى ولا لا فى انه مواضيع البورد مستواها بقى مازى زمان رأيكم شنو وبدون زعل قلنا بدون زعل

اختى حنين
نفس تعليقك سمعته من احد البورداب المخضرمين الذين اشتركوا منذ بداية افتتاح الموقع لكن نظرة عامة الى مواضيع البورد فى مختلف الايام منذ بداياته تجدين تباينا فى دسامة الموضوعات و تركيز شديد فى ايام يعقبه موضوعات خفيفة فى ايام اخرى ثم سرعان ما تطرح قضايا تغرى البورداب بالرد بكثافة بل و تصلح لتتفرع منها مواضيع اخرى لا تقل عنها اهمية
و ارى ان استحداث الاستاذ بكرى لفكرة المانشيت للمنبر الحر تعمل على خلق نوع من التنافس بين اعضاء البورد لتجويد كتاباتهم لتصلح الموضوعات عناوين رئيسية تزين واجهة بوردنا
تحياتى لك

الاخت لنا الحبيبة اولا اهلا بيك وما تكونى زعلت من تعليقى فى بوستك عن الطفل الناجى من الحادثة لكن وددت فقط لفت الانتباه انه فى موضوع بنفس المحتوى مفتوح احتمال ما تكونى انتبهتى اليه مع اتفاقى معك فى ما تضمنه اختى انا اقارن البورد بالمستوى الذى كنت اقرأه من قبل المواضيع كانت جاذبه وعميقة وهادفة ولو انتبهتى الآن ليس هنالك غير موضوع الطيارة وهو فعلا مهم جدا جدا وحزننا على هذه الفاجعة لا يعادله حزن الا على الاهمال الذى تردى بالمسئولين فى السودان لكن ماذا بعد ذلك .....تابعى معى هذا مع اشادتى بجهود الاخ بكرى لكن مرادف لها اود مواضيع بحجم هذا الجهد ودمتى

يحياتى يا حنين البلد
اصلو البورد ممكن نقول عليه ذى بستان بنلقى فيه لشجار مثمرة واخرى للزينة وقد تكون هنالك بعض النباتات المتسلقة لكن مصيرها قبل ما يمر عليها الحول بتنشف ولكن لا تنسى توجد شتلات لسه ما استوى عودها واكيد مصيرها تكبر وتثمر مع تحياتى
@@@@@@@@@@@@
كم من ظلمة الليل من بهاء
ولكن كثيرون حولها الى ارتكاب المصائب

واحـد إفتح موضوع و التاني إفتح ليهو بوست علشان إرد عليهو و التالت يفتح بوست

تالت علشان إرد على البوست التاني و هلمجرا.

كتير من المواضيع مكرره

مشاكل و مهاترات ما ليها أي داعي.


مواضيع الونسة أجمل شئ لأنو فيها روح الدعابة و بعيدة عن المشاكل و الإساءة

بلدى يا حبوب شكرا لى ردك فيه كتير من الموضوية لكن مازلنا نشتاق لمواضيع زماان.


ابو حسين ويييييييييييييييين انت والله مشتاقين وفرقت معانا والله الاوضة الزمان حقت السفير عرفتنا بى ناس رائعين زيك دمت

الحبيبة حنين
كلامك كان صح بخصوص ترشيد الباندوث فلم اغضب منه و صدقينى طبيعتى لو حاجة ما عجبتنى بقول طوالى و نحنا بنذكر بعض لو زول فاتت عليهو حاجة فالف شكر يا حبيبة و اضم صوتى لك فى طلبك تعميق تناول المواضيع بالبورد
محبتى لك

الاخت لنا تحياتى واعجابى واحترامى واشادتى بسمو اخلاقك وتقبلك لتعليقى تصدقى والله ردتك عديل كدة من كلامك شكرا يا ماكة

يا حنين سيبي الكبكبه واكتبي براحه
لوووووووول

Quote: لتعليقى تصدقى والله ردتك عديل كدة من كلامك شكرا يا ماكة

حسدتك
ياملكة
***
وزي ما سبقتنا الاخت الفاضله لنا مهدي بردها الكافي الجميل
البورد يمثل تفاعل الناس .. وكل موضوع بوقتو وبياخد حقو من النقاش
ومرة لعب ومرة جد
ولما تشوفي البورد انقلب كلو جد
جيبي ليك موضوع يريح الأعصاب شويه
عشان عملية التوازن وكدا
***
بعدين انتي قبل كدا حملتينا امانه نسأل عنك
أها الليله كيف اصبحتي/امسيتي/قيلتي؟

تحياتي

هوبلس شكرا للسؤال انا والله فى الشغل عشانكده انا مستعجلة يا كافى البلاء والمحن البورد بقى لينا مرضة انا لازم اخد لى هبرة وازوغ على البورد اسه انا مزوغة عشان ارد عليك ما مزوغة من الشغل لانى بشتغل والكومبيوتر فاتحة فيه المنبر لكن غلط وانا عارفة وما قادرة اسيب المتاوقة فى المنبر تانى حاجة املكة والله عجبنى ردها وتقبلها لى تعليقى الراق ديل لو ناس الشبك كان نطت لى فى حلقى وادتنى مليون كلمة عموما تسلم انت زاتك وشكرا للسؤال عنى

الحبيبة حنين
اخى هوبلس
شكرا لكما حسن الظن بى و اعتقد ان كل من يداخل فى البورد لو انطلق من ان ارائه فروض و ليست مسلمات سيستقيم الحديث ، المشكلة ان البعض يدخل و هو يتمترس خلف راي مسبق يعتقده الصواب ولا يقبل التزحزح عنه قيد انملة و يطلب من الاخرين نقاشه و هو ما يحدث حالة من حوارات الطرشان كل منهما فى وادى
اريد نقاشك على ان تعترف اولا اننى على صواب
فكيف يستقيم ذلك؟؟؟
الامر الآخر عدم تقبل النقد احيانا بصدر رحب و هذه اشكالية كبرى فكل من بالبورد بينهم قواسم مشتركة اقلها السودانية و تلك كافية لمد حبال التسامح و رحابة الصدر الى اقصى مدى

محبتى لكما

ومحبتنا ليك يا لنا