أمونة -- مسدار الخريف

أمونة يا زينة البنات لى حدّهِن
أمونة يا طعم الغنيوات البجن
داخلات مع ضى الصباح
مضارية فى توب الشمش
خايفة الغبينة تصدهِن

أمونة لُوُلاية الغيوم
شالت مناديل المطر
بازماها فاكابا الهموم
قاصده التراب
شايفه التراب
يتناطا ينده فى النجوم
كايس الروا وليها انتظر

أمونة جيابة البشاره
معنى اللُقا وطعم الأهل
زيناً هطل
قايده العشم مارقاهو من نص الوحل
دافراهو فى دريب بنيات الفريق
شاقات ضفاير الحله
كاسيهن خجل
اطقسن ريحة الخبر
كان زول رجع
كان زول رحل
كان ريده شلعت زى حريق
كان ريد قديم مكتوم ظهر
أمونة يا شعاع المناره
تهدى المودَر والغريق
الليك يجابد شان يصل

أمونة يا مطمورة الزمن المحل
بتحوّا بى ريدتك حجاب
أمونة ترياق العذاب
أمونة يا نمة منى
يا كاتبة تاريخ الحنان
البيكى تم واكتمل

أمونة بطر الموج وكتين يهابش القيف
أمونة فكة ريقا بايته ومرحباب بالضيف
أمونة عِينه نديه جايه خريف
وأمونة مسداراً مهيد فينا تم الكيف

أمونة ودارة الشقا عز الطشيش والغربه
أمونة الفى القليب ساكنه انبساط ومحبه
أمونة موية جدولاً حاضنه الخدار منسربه
أمونة نيماتنا الحنان جاتا الطيور منكربه

أمونة مخلاية الزواده البيها فكة ريقنا
أمونة يا شتيلة جروفنا الخدرا نوارة فريقنا
أمونة هداية النفوس ياكى العدلتى طريقنا
أمونة ريدك فى الفواد مكمون اياهو رفيقنا

أمونة عطية المولى الكريم الرازق
محوّطه يا الحسينة بى عناية الإله الخالق
درنا اللمه من فرزيعة البعد المقيت الحارق
وطال الشوق مِوَجْوِج وعلا تب مو مارق

مما قمنا خلينا الفريق فارقنا
جرحاً فينا نوسر والوحيح حرّقنا
فوق شوك الظعن عافرنا وادردقنا
يوماً اسوداً طفشنا من جنب العزاز ومرقنا
========================================================

آمنة بالخريف الفينا ده، تكون أكلت خريفها التامن

الحبيب

ابوبكــــر

اين انت يا رجل

مشتاقين والله

هكذا انت دائما

لا تتعب من رش عبيرك في ساحات المنبر

سلمت لنا ولابداعك

أمونة لُوُلاية الغيوم
شالت مناديل المطر
بازماها فاكابا الهموم
قاصده التراب
شايفه التراب
يتناطا ينده فى النجوم
كايس الروا وليها انتظر

أمونة جيابة البشاره
معنى اللُقا وطعم الأهل
زيناً هطل
قايده العشم مارقاهو من نص الوحل
دافراهو فى دريب بنيات الفريق
شاقات ضفاير الحله
كاسيهن خجل
المطر:
شكرا لك لهذا البهاء

العزيز قرجة

كيف حالك يا بحراوى، اهو والله مدهوجين فى الدنيا العجيبة، وكل يوم فى جيهة، يسال منك الخير انشاء الله

العزيزة هالة

شكرا على الإطراء ويزيد بهاك يا رب، وبهاء آمنة حبيبتى الإحتفلت فى مايو الفات بى ميلادها الثامن، وعقبال ليها الثامن والثمانين، قولو آمين

موال امونة
ساعة العصاري
الضل يمد فوق الجروف
يكسي التبيسات بالطرح
وعين الشمس تنزل خجيلاني وتكوع بين شجيرات البلح
والغيم ينقط من دموعو علي الصفيقات السبح
امونه تمسح من خديداته وتلون قوز قزح
يابت وجوها نايرة في عز الصباح تلقاك بالرضي والفرح
يا بت رجالا
من جريدم ومن وريدن
يلفو ضيفن بالقدح