Post: #1
Title: يابكري يابكري انا اشتكيتك في مجلس الامن .. وين هترشاتي؟؟
Author: shiry
Date: 07-06-2003, 01:35 PM
اول الحكي
خاف من الله على قلبي
وقلبي من غرامك
خاف
زرعت الشوك على دربه
ياما وياما في هواكم
شاف قلبي
الكلام :لاسماعيل حسن .الغناء لوردي
______________________________________
يا لهذا الباندوث المكركب الذي يشبهني وايديّ بالذات في مضرته .. اذ لم يحدث على امتداد حياتي التي هي موش قصيرة ولا طويلة ، اذ نمى الى علمي انها حياة مناسبة للموت كما هي مناسبة تماما للهترشه وبكميات تفوق قشر قصب السكر في ليالي شتوية على سوق يسمى السوق الشعبي امدرمان ..(يالهذه الجملة الطويلة التي تنسيك ماذا اردت ان تقول !!) ان قمت بفعل شيء تنسبط له حبوبتي ولا امي او الاثنين معا ، افرحتهما ، فما ان تطأ قدمي ارضية مطبخنا حتى يتداعي البيت كله بالسهر ، والبيت هنا حينما اطلقته لم اكن اقصد به اهله ولا الجدران نفسها على راي ناس البلاغة ، فكل الذي قصدته - وحتى اريحكم من هذه التحريفات الهترشتانية – مجموعة الادوات المنزلية التي تسمي (عدة) عند اهل السودان قاطبة وتغتنيها المراة من ساعة ان تبلغ الحلم (ويستثني من هذه القاعدة شيري وام مازن) وتحافظ عليها اكثر الف مرة واكبر درجة من محافظتها على زواجها او حتى حميمية علاقتها مع زوجها ..
غبيان وواهم هو ذاك الرجل الذي ظن او تبادر الى ظنه قيد لمحه ان زوجته تحبه اكثر من عدتها المرصوصه في متحفها اقصد مطبخها .. والعدة التي لا ادري ما الذي حشرها هنا في موضوعنا عن الباندوث والتي من اخواتها الكبابي ، والحلل والاطباق والملاعق والكمش جمع كمشه .. فهي تضعني _ومازلت اتكلم عن العده _ كما تصنف الحكومة علاقتها مع شعبها الذي يخالفها الراي وعلى كثرة هذه الفئة في مصاف الاعداء _ كذلك تناظرني هذه الاواني المنزلية على قولة اهل الشام والحجاز ... ما ان تسمع حفيف خطواتي مع ان الحفيف هذه لا تتفق مع مشيتي فانا ، وعلى حسب وصف اهل بيتنا ، انا لا امشي انا انقز مثل كرة البنغ بونغ ، فما ان تسمع هذه الكشتته (كشت كشت كشت ) ، يا قصفه ما تشيلي رجلك من الواطه ، ضرستيني يضرسك المرض ، واعرف انني المعنية بهذا الدعاء الحميم الذي يرد الروح هو انا شيري بت ام شيري ، وبالتالي تعرف (عدة امي ) ان الموت جالها يا مرصوصة داخل بيوت الزجاج وجواك الخوف.. وتعتصم بارففها وتقرأ في سرها (محمد معانا ما تغشانا ، محمد معانا ماتغشانا ) .. وترتجف وترتج وتصطك اطرافها (روووورووووروو) وتستحيل كلها كلها الى حالات من الفوضي والانتظار والتنشنه ... حتى تنقضي مهمتي في المطبخ واقطع وشي في ستين داهية .
وهاهو باندوثك يا سيدي ابوبكري ، يتحكر مكاني ويمارس هذه الخراب مع بوستاتي بدلا مني ايديا الهابشه ..
يالهذا الباندوث المخطرف الاشتر الذي احال كل حروفي الى رفات اسكنها سيرفرات باردة القلب جليديه الملمس ...
سجمي .. الليلة السجم ماكال الرماد ..
ووب علي الليلة يا حروفي الكنت ميته من الحر وعلى مقربة من خط الاستواء ،
وودوك خط ايه ماعارفه؟؟
، هو انت يا بكري ، سيرفرك دا ساكن وين .. .؟
موش برضو السيرفات ، تتخذ من البيوت سكنا ؟؟
الليلة السجم كال الرماد .. يا الحروف الكنتي دفيانه
رقدوك (استبالية ) الخواجيات ، التي تتتردم فوقها جبال الجليد ..
يا باشمهندس انا ماعارفه الحصل شنو ؟؟
غير انه نمي الى علمي انه منذ ست ايام اخذت شنطة عدتك
كل المفكات والزرديات والكوريك والشاكوش ورحت تهبش في سيرفرنا وانت تعرف ان باندوثنا اصله (متحيل) وانت تعرف ان المتحيل بتبكيه الريشه .. ولم يستحمل هذه الباندوث او يتقبل فكرة انك عايز مصلحته ، فاعلن التمرد عليك .. والتفت وعاين جاي جاي ، فلم يجد الا بوستاتي ، وكان ان حدث انني عملت بوست جديد ناديتك فيه ان ترجع بوست الحفلة التي سحرها اساسي شكال البورد ، فلحقها امات طه .. وبما ان هترشاتي كانت لا زالت لم تبرد ، فلاحقتها ايدايه الضاره فطمسها فرد طمسها لحقها امات طه ..
واضاع البوست الثاني في اقل من ساعة .. باللله موش حرام علي باندثوك دا ؟؟
|
Post: #2
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: shiry
Date: 07-06-2003, 01:37 PM
Parent: #1
يحلك مني الليلة
الحلا بله يا باشمهندس
وكان ان رحت انا احاول ان اعمل شيئا مع انني لا اعرف ما الفرق بين لبان لادن ولا شامبو بالموليف او قانون التوالي ولا السيدي روم ، ومع ذلك فتحت السيدي روم وعلى مصراعيه على حسن ظن مني _ مع ان الظن لا يغني من الحق شيئا _ ان اجد الباندوث دائرا مع اسطوانة السيدي دي روم او حتى مرتاحا على السيدي بتاعة (باك استريتت بويز) .. وارتددت الف خطوة للوراء تصحبني خيبة الامل .. واحضرت المفك وفتحت الجهاز افتش عن شيئا يقال له الموميري شيبت ، حتى اري ياتو صامولة وقعت عليها من الباندوث فطت حركة دورانها الاهيليجيه ... موش برضو يا باشمهندس رضا / الصادق الموميري بتلف في شبة دائرة اهليجيه حتى تغذي الهاردديسك بشوية نبضات تسند طولها حتى لا تهلك وتقع ..
وهذا ما ظنتت حصل ، لكن في النهاية توصلت الى امر مهم جدا .. ان الساوند كارد هي العدوة الاكبر للببور فان ، لانها تجهرها برياحها الهوجاء وهذا لعمري ما لا يريده السي بي يو . الذي يكره جدا الباندوث ، كراهة كلمة السلام في خشم البشير .
وكان نتيجة هذه الاعمال الهندسية التي تجلت فيها عبقرياتي ان انحبست عن البورد لمدة تساوي اربعة ايام ، لم اعرف كيف ادخل البورد..
ليه بس كده يا بكري .. موش حرام عليك ..
بكري يا بكري .. وين بوستاتي .. امسك عليك باندوثك دا .. الله بيني وبينو
بكري يا بكري
انا ماعارفه ، تستعين برجال الاف بي اي ، او شرطة الكومنث ويلس او حتى شرطة نيويورك او تتضامن مع تحالف قوي الشعب المطحونة وتجيبوا لي من السماء ولا الارض مواضيعو .
شيل مفكك ، وهبش كده ولا كده .. شوف تحت السيرفر ولا جمب الملتي ميديا او شمالها ، يمكن تلقى شوية من هترشاتي السابقة..
يمكن تحصلها قبل ما يفوت عليها الفوات وتنشف على سلوك السيرفر بتاعك ، وتقوم تحسى . موش برضو اذا السيرفر درجة حرارتو ارتفعت بسخن البوستات وبالتالي تحسي كما اللبن وهو على البوتوجاز .
انا فكرت في ذلك .. واكيد هذه الفكره محجوز حقها الادبي باسمي انا شيري بت ام شيري .
مالها ام مازن ، مخاصمتني مذاك الوقت . اذ انها اشتهت ان تقراني في ذاك البوست وقد جلست تهترش معي من الخرطوم حتى توقفت المطره هناك .. ولم تعرف كيف تدخل لتقرأ الحفلة التي فرتقوها ناس شرطة امن المجتمع .
سيدي ابوبكر ، رجاء رد الى طمانية هترشتي التي اضحت جافلة تخاف ان يغتالها باندوثكم المضر . الذي ترك كل هترشات العالمين
وتشعبط على احدى هترشاتي .. شكيتو على الله
عجبت الف مرة وزيادة شوتين لكونه ترك كل البوستات وعلى رحابتها وتشعلق في هترشاتي ، يالهذا الباندوث الذي قصدني عديل كده ، كلما كتبت في حقه شيئا شحذ عضلاته وجاءني محمرا عيونه .. كانني الوحيدة التي تهدد بهترشتها امنه واستقراره ..
بكري يا بكري اعد الى بوستاتي ، الا فانني سالجا الى مجلس العدل ، رغم انني اجهل اين هو ، لكني لن اغلب حيلة فكثيرون هم الذين يجيدون تكنيك المديده حرقتني ، الله لا كسبهم خير ، سيدلوني اليه ، لا بل ساجد استعدادهم التام بتسخير كل امكانياتهم من اجل قضيتي .. اليوم اصبحت لي قضيه .. يا لهذه البت المهترشه التي ليس لديها شغل ولا مشغلة هذه الايام الا بوستاتها التي ضيعها باندوث بكري ابوبكر ..
اين مواضيعي يابكري ..
لاتقل لي ان النحث هو من اعياد ثورة الانقاذ ، اذ تعودت دائما منذا ان ابتلانا الله برئيسها ونائبه الذي من غتاته لا يضحك ابدا ، انه تامر على شيخه وادخله السجن .. يالهذا الشيخ الغتيت الذي تامر ايضا مع الباندوث ليجيب السيرفر عاليه واطيه .. ويخرب مواضيعي
سيدي ابوبكر .. بالله انت الوداك تهبش شنو في السيرفر دا ، حتى خربته ..
هترشتي عليك غضبانه .. سارفع شكوتي الى مجلس الباندوثات العالمي ..
وانت من هسع دا شوف ليك محامي ..
|
Post: #3
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: HOPELESS
Date: 07-06-2003, 01:52 PM
Parent: #2
شيري
سلام مبندث
العالم كلها متضرره من عمليه العمره العاجله .. وبعدين هترشتك دي بكري سمع عيني قال لخبطه كلها في حله الكمونيه الماااااانعه وبدور يخليها في متحف الباندوث للعرض فقط
كتب عليها كمونية شيري بنت ام شيري ممنوع الهبش واللمس
حقوق الملكيه محفوظه لمخازن الباندوث العالميه
والما عندو باندوث .. يهترش عند الجيران
|
Post: #4
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: shiry
Date: 07-06-2003, 02:01 PM
Parent: #3
سلام مر بع
هوبليس
هوبليس ياخوي ، سيبك من تكنيك المديده حرقتني دا
انا قلت بكري
ماقلت هوبليس
؟
انا ما ح اسيبيب الباشنمهندس دا
يعني موش ح اسيبوا
في ساعة واحدة يلحق لي عدد 2 بوست
امات طه
؟؟
عاد دا كلام دا
والله تكتر تقلل انا ذاتي اشتكيك معاهو في مجلس اللوردات السوداني
|
Post: #5
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: HOPELESS
Date: 07-06-2003, 02:37 PM
Parent: #4
سيري
كلمت ليك بكري
قال ليه خليها تسأل عنهن ام طه الوسطي
وما تغلطي تسألي عنهن الكبري
عشان هي مقهووووره من حلة كمونيتك .. قالت يدك طاعمه في عمل الكمونيه .. وانت عارفه حسد الحريم
والله يكفيك شر ام طه الصغري .. دي بلوه مسيحه
رأيك شنو نخلي طه يتوسط عند اماتو؟؟؟
|
Post: #6
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: shiry
Date: 07-06-2003, 02:45 PM
Parent: #5
سلام مربع
هوبليس
النبي فوقك كان ما اتوسطت لي عندها
خليها بس ترجع لي واحد بوست بس
ح اصمت يومين حداد عن الهترشه
ايه رايك
وصل الحل دا للباندوث بتاع بكري
يمكن يوافق
يتصلح معاي الباندوث الفقري دا
شيكتوا على الله
|
Post: #8
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: زوربا
Date: 07-06-2003, 02:50 PM
Parent: #5
الزولة جدا شيري
أركزي شوية دا شنو السكلي دا
ذكرتيني مرة كنت ماشي السجانه وبعدين أول ما دخلت الشارع في تلات بنات طلعوا من بيت في النص تقريبا وعاينو في إتجاهي وطقوا السكلي
طبعا أنا قربت اقوم جاري بس المشكلة انو رجلي اتمردوا علي إشارات الجهاز العصبي وحلفوا ستين يمين ما يتحركوا شبر
بعد مسافة اكتشفت المسألة
الأنسات بيتهم اتسرق
واتخيل لي أنو الباندوث سرقك عديل كدة
تعرفي الحرامي دايما بسرق الحاجات الحلوة شيدد والغالية جدا جدا جدا
|
Post: #10
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: shiry
Date: 07-06-2003, 02:57 PM
Parent: #8
زوربا السوداني
سلام مربع
والله ياخوي ، انا فعلا استرقت
بدل بوست واحد اثنين بوست
وبوستي في الراس بوجعي ياخوي
شفت الضيقة الانا وقعت فيها
المشكلة انو البوست دا بالذات انا
كان عندي فيهو شغل ، كنت مخططه ليهو
لكن اهو يلعن الكسل محل ما قبل
قلت بعد شوية كده اقوم اعمل ليهو كوبي
واجي انزلوا على الوين وورد
لكن اهو لا وين وورد ولا وندوز نانتي فايف نفعوني
باندوث بكري كان لي بالمرصااااد
بكري يابكري ، اتقى هترشتي
وفتش لي مواضيعي دي وجيبها لي
|
Post: #12
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: dalihabboub
Date: 07-06-2003, 08:18 PM
Parent: #2
أللغة التي تستخدمينهافي غاية البلاغة وكذلك الصور ولا أدري لماذا تصرين على البقاء في خانة المهرجين والمضحكاتية في زمن لم يعد يحتمل ذلك
هذا مع خالص المودة والتقدير
دالــي
|
Post: #14
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: shiry
Date: 07-07-2003, 06:54 AM
Parent: #12
سلام مربع
دالـــي
سلمت ياسيدي لهذا الاطراء
وسلمت ايضا للتشجيع والتحريض البناء
لكن يقيني انني لم انضج بعد
ينقصني الكثير حتى اتخلص من نكهة التهريج التي
تتلح لغتي
سلمت ايضا للطله
|
Post: #7
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: Tabaldina
Date: 07-06-2003, 02:48 PM
Parent: #1
..
.
سلام يا شرشورة
مالك شاكية الراجل
الراجل يتيم ولامى عيال الفقراء
وكمان المقطعيين فى العالم
والمشتتين فى بقاع الارض
كدى انت ورينى عايزه ياتو بوست من بوستاتك بالضبط
وربنا يسهل الباندوث يفك سراح واحد بس ؟؟
تحياتى
مشتاقون للهترشات
|
Post: #9
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: shiry
Date: 07-06-2003, 02:52 PM
Parent: #7
سلام مربع
تبلدينا يا تبلدينا
اول شي وين الحي بيك
تاني شيء ، اتخيل ماعارفه اسمو شنو ، لان الموضوع بالكامل كله وغالبا ما افعل ذلك اذ انني كتبته مباشرة
في البوست
عشان كده ماعندي منه نسخة
هم تقريبا اثنين بوست
واحد كتب في نفس اليوم
دا يعني مامتذكراهو
وماعندي فيهو كبير غرض
لكن واحد بتاع الحفلة التي فرتقها ناس شرطة امن المجتمع
ينوبك فيني ثواب
يعني الاجاويد بدأوا يتفاودون ...
مرحب بالاجاويد ، لكن لازم تكون هناك حلول
الا فانني في حل من تنازلي عن الشكوى
سمعت قالوا مجلس الامن فتح ليهو فرع صغنتوتي كده
سماهو الخلاف الباندوثي السيرفري
|
Post: #11
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: فتحي الصديق
Date: 07-06-2003, 07:59 PM
Parent: #1
شيري الشقية
لك السلام والود..
سحروك والله وسحرو البوست الأخير اصحاب العيون الناشفة.حقيقي يا شيري أنتي بالغتي شوية في بوست حظر التجول والغنا بعد الساعة حداشر.لكن ما مشكلة.منتظرين أبداعاتك الجاية يا عزيزة. وأنا متأكد أن القادم أحلى.
شكرا شيري
|
Post: #13
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: HAMZA SULIMAN
Date: 07-06-2003, 08:28 PM
Parent: #11
يا شيرى انا ما قريت
بوست حظر التجول والغنا بعد الساعه 11
على الرغم من انى مداوم على بوستاتك كلها
وهترشاتك الابداعيه
ونحن لو عارفين كدى كان قلنا لى بكرى ابوبكر
روحه من زمان
حتى يضاف اليك ابداع اخر
دمتى
|
Post: #15
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: shiry
Date: 07-07-2003, 10:34 AM
Parent: #13
ٍسلام مربع
فتحي صديق
نعمل شنو عليك الله ، يفرتقوا لينا
حفلاتنا ونسكت نخليهم
شكيتهم على الله
سلمت ياسيدي للطله
وسلمت اكثر للاطراء
استاذي الموسيقار
حمزه سليمان
شايفاك زغت مانزلت لينا الغنوة
بتاعة هاشم صديق
للاسف انا ماعندي منو نسخه
الا كان نزلتها تاني
لانو اشتغلتو مباشرة في البورد
من غير ما انزلوا على الون ويرد
سلمت ياسيدي للطله البهية
وسلمت اكثر للاطراء
|
Post: #16
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: sympatico
Date: 07-07-2003, 11:09 AM
Parent: #15
شيري الهتراشة المبدعة
مليون سلام مربع
كدي شوفي الروابط دي وراجعيها شوفي بوستاتك كلها موجودة ولا ناقصة
وبعدين لو لقيتي حاجات ناقصة نعمل ليك حملة تضامن
<a href="http://www.sudaneseonline.com/cgi-bin/sdb/2bb.cgi?seq=search&str=&usr=shiry&board=2" target="_blank">http://www.sudaneseonline.com/cgi-bin/sdb/2bb.cgi?seq=s...r=&usr=shiry&board=2
<a href="http://www.sudaneseonline.com/cgi-bin/sdb/2bb.cgi?seq=search&str=&usr=shiry&board=5" target="_blank">http://www.sudaneseonline.com/cgi-bin/sdb/2bb.cgi?seq=s...r=&usr=shiry&board=5
<a href="http://www.sudaneseonline.com/cgi-bin/sdb/2bb.cgi?seq=search&str=&usr=shiry&board=3" target="_blank">http://www.sudaneseonline.com/cgi-bin/sdb/2bb.cgi?seq=s...r=&usr=shiry&board=3
|
Post: #17
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: shiry
Date: 07-07-2003, 12:28 PM
Parent: #16
سلام مربع
sympatico
اخوي
سلمت ياسيدي لهذا الدعم
وسلمت ايضا للاهتمام
بس عارف ولا واحد من الوصلات الكتبتها هنا
رضيت تمسك معاااااي
|
Post: #18
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: ايمان
Date: 07-07-2003, 12:46 PM
Parent: #17
شيرى ياهتراشة
والله مشتاقين كتير
هترشاتك شكلها كدة ضاعت فى الزحام
حاولى هترشى اكتر عشان ماتضيع تانى
باين كدة حاتلقى ليك منافس قوى كان كترت اكتر من كدة
|
Post: #19
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: shiry
Date: 07-07-2003, 01:06 PM
Parent: #18
سلام مربع
ايمان
من الناحية دي
اماني ماتعب معاي الباندوث المكركب دا
بس المشكلة كيف تعودي لي مواضيعي القديمه دي
|
Post: #21
Title: Re: يابكري يابكري انا اشتكيتك في مجلس الامن .. وين هترشاتي؟؟
Author: shiry
Date: 07-08-2003, 08:40 AM
Parent: #20
سلام مربع
الرائع
sympatico
ممعنة انا في شكري
وممنونة كثير لهذا المجهود الخارق
وماعدمناك ياسيدي
|
|