دردشة فاضية-سلاماتكم

من الذي اخترع اللون الأبيض للممرض؟؟؟
حسبي الله على ذوقه
فكلما يفتح المريض الذي لا بد انه يتوقع نكير ناظرا له عشرة عشرة،، كلما فاجئته إحدى الممرضات بذاك الرداء الأبيض
والتي في الغالب تكون واقفة قرفاً،، تدير وجهها اوفوفا (من اوووووف) بعد أن اضطرت نص الليل على الأستيقاظ لتقيس لك ضغطك الذي لا بد يرتفع خلعة من هذا الرداء الأبيض الذي يذكر بماسك الروح
ولست ادري لماذا يتجه التفكير دوما إلى أن ملك الموت لا بد يرتدي لونا ابيض وانه سينقض على روحك على عجالة وانت نائم
؟؟؟
دعونا لا نتحدث في هذا الموضوع
خصوصا والدنيا جمعة ونص الليل برضو
مع اني لا ادري لماذا نتشائم هكذا من سيرة الموت؟؟؟
وإذا ما خضنا تجربة حياتية بسيطة،، تتفكفك كل صواميل قوتنا،،نتخوف ونتكبكب و،، حسنا،، نكب الجرسة
ما اصدق تعابير الشماسة بدون فلسفات فاضية
ثم ندعي فيما ندعى اننا (زهدة) زهدة دي جمع زاهد يا ربي صاح؟؟؟

حسنا انا بنقنق
وقد فكرت في كل ذاك الكلام الفارغ،،، وانا احاول تجميع ما تشتت من مسنجراتي
اتلحست
الم نقل أن الشماسة خطرين في تعبيراتهم؟؟؟

بالله كيف اعيد مسنجراتي إلى الحياة؟؟؟
بعدين الحاصل ماذا؟؟؟
هل البورد يعاني من حالة ملل واللا اني براي
؟؟؟

حبيت اسلم بس وانا استمتع باجازتي في بلاد السندباد

كل الود

بنت قضيم
سلام واحترام

نقتك عينه

وماسنجرات لحست يا لحظك الملحوس

يقال في معجم الشماسة اتلحس اي توفى
اتلحس انسرق
اتلحس خلص

وبياض النية زي بياض الودع بيفتح الشهية والعرافه من غير بياض بتجيب الكلام الاسود

تحياتي عزيزتي وامنياتي لك بقضاء اجازه سعيده
ولك الود

ميرسي يا هوبليس

هوبليس
قالوا التلاجة بتفصل
والمكوة زاتها
انت اي وقت مطنقر في البورد ده؟؟؟
مطنقر دي من مصنقر

هسه يقولوا انا مسيخة

قالوا الرباطابي قاعد في مزرعته زرعها اخضضضضضضضضضضضضر
مر واحد سألوا
الزرع ده بتسقوه موية
قال ليه لا
زارعنوا تيمم
لووووووووول

كيفك؟؟
للبورد وحشة بالجد جد

لوووووووووووووووول
بت قضيم بدوري تكتليني بالضحك

هههههههههههههههههه

قال تيمم قال دي بالغتي فيها

((نكات اهلكم ديل لزيزه لزه))
لووووووووووووول

هوبليس
لست رباطابية
دي مواهب ساي ياخي

سلام بت قضيم ممكن اشكرك؟؟؟؟؟
شكراً ليك علي الموافقه

لكن بالغتي بالزرع البيتيمم ده
بس حبيت اتاوق بس
مسيييييييييييييييييخ مش كده؟؟؟
معليش اتحملوني شويه

اديكم نكته؟؟؟
انتو بتوافقوا طوالي كده والله معاي بس؟؟؟
لوووووووووووول

قال ليك الامام في حلفا القديمه قاعد يخطب في صلاة الجمعه
ما خلي حاجه ما قالها بدء بالسياسه والاقتصاد و و و و
الناس مله وزهجه من الخطبه الطويله بتاعت الامام في النهايه قام قالو يصلو واحد حلف قال الامام ده لو ما قال النشره الجويه ما بقوم اصلي

لكم التحيه

عمدة
سلاماتك
لوووووووووول
بس نكتتك فيها نظام عام
ياخي ما قادرة افهم نظام عام كيف؟؟؟
يعني ناس الخاص يسوا الدايرنو؟؟؟؟

بعدين نوافق علي ايه؟؟؟

بنت قضيم سلامات
نظام عام ده بس مايكون الناس الطردوني من ست جنب ست الشاي وطيروا لي الجبنه الشربتها

انا قصدي توافقوا علي النكته

ولو يا عمدة
نحن نجيز بس ما ينط لينا حلفاوي هسة يقلبها حرب اهلية

ما تخافي انا منهم انا
بتفاهم معاهو بكلمه السر(الرطانه)لووووول

واحد شــد حيلوا أنقطع

و دمتم
و دامت أيامكم هترشات

كبر

بـت قـضـيـم ســـلاااااااااااااااااااام

الماسينجرات دي أوع تـكـون رسـائل المعجبين

و الله لو رسائل المعجبين تكوني إتعوقتي عدييييل كــدا

ابو حسين
قالوا ليك بت قضيم
رسائل معجبين ماذا
لا افهم لماذا لم اسمى نفسي شاهيناز مثلا،، كان زماااااااااااان أجرنا مسنجر إضافي
لووووول
امزح
كيف المساخة معاك؟؟
بوستي الطير الناس وينو صحي؟؟

كبر
دام فضل النكتة الأثرية
انت عارف النكت دي تموتني من الضحك فعلاً
هاك دي
قالوا جنوبي سافر امريكا الفلهمة ركبته
اتصل بيه واحد صاحبه
كيفك يا جون
بالله كويس؟؟
الجمائة كيف
صاحبه قال ليه والله امبارح كنت مع الجمائة امك وابوك
جون قال ليه بالله؟؟ أها الجمائة العواليق ديل كيف؟؟
لوووول
شوف يا سيدي،، كل النكت مسموح بها إلا نكت الجنوبيين،، هسه يبلعوني لساني،، كأن كلمة الجنوب تحتها خط
خلينا ما نتكلم في السياسة احسن
عنوان بوستك الأخير حقيقي تحفة
يا اخوانا من اين تأتوا بهذا الكلام الجميل؟؟؟

عمد
اشرنكيل مسونكيل ايني
وهذا كل ما اعرفه عن الحادث
اعني هذه هي الكلمات الوحيدة التي استطعت لقطها من جارنا الحلفاوي
وكل ما يذكر اسم الحلفاويين تنط في راسي نكتة (شان هقاراتكم سويناها بلا وضو) وعندي نكت حلوة لكن النظام العام بكش معانا ست الشاي زاتها المرة الجاية

سلمتم

تبكين فيخفض الجمال رمشه خجلا

والله يا استاذ كبر،، يعقدني عنوانك
انا اذا بكيت،،،سيخفض كم الفستان اكمامه خجلا
وامي زاتها ستخفض خجلا

يا اخوانا الكلام الحلو ده بالجد ما من شواطين؟؟؟
بسم الله

طيب يا بت قضيم
واحد جرسة شديد ..عندو مشكلة مع رمضان ..ٍسألو واحد تاني قال ليهو انت ما صايم؟
و كان السؤال سنة 1996
رد صاحبنا الجرسة قائلا: على اليمين صمت لي يوم واحد سنة 1981 و لحد الآن عطشان

واحد جرسة تاني قال لصاحبو الأجرس منو: واللـه رمضان جانا في الحر
فقال الأجرس: اخير انتو..و اللــه نحن جانا مرة في عيد الضحية ..مسخ علينا الضحية


يبدو لي العناوين في مرات كتيرة بتكون مرآة الدواخل


شـــواطين؟
هن البنات قالوك هينات..واحدات مساكين..والأكتر سكاكين

عاد باقي ليك في داعي للبشكة دي ..و في نص الجزارة كمان؟

و دمت يا زولة ها

كبر

..
.
سلام
من البلاد التى اكتوينا بنيرانها
نار الغربة ونار شمسها ونار صحرائها
وكيف اجازاتكم فى بلاد السجم والرماد
اتمنى ان تكون قد صارت بلاد الفرح والجمال
حسب نظرتكم لها
ان شاء الله الامور بقت تمام
وعال العال

اجازة سعيدة
مضمخة بالفرح والكهرباء والرخاء

كبر
وينك يا مجافينا ما تحن علينا
انتو صلة القربي دى ما عندكم؟؟
ارجو ان اجد اسمك فى بريدى قريبا

التحية
لعوبليس
وعمدة

سلام

لكم التحيه ولا تنسو ان توصلوها لتبلدينا

علي حس جرسه رمضان واحد بيقول للتاني ياخي اول يوم في رمضان صعب
التاني قال ليه خلاص صوم من تاني يوم
لكم التحيه

ست الهترشه

اكتر لحظات سعادتى تكون بمطالعة هترشتك

البتخفف عننا شويه

انت كلام الجماعه التانين ديل خليهو

كلامك انتى بتجيبيهو من وين

يديك العافيه

بت قضيم
تحياتى
رباطابى شايل ليه ديك ماشى يبعه فى السوق
لاقاه واحد قال ليه مودى الديك دا وين
قال ليه ماشى اغير ليه نغمات
ها ها ها ها ها ها
اما اخوى هبولس دا ساكن فى البورد
ولكم الشكر

مكرر

لووووووووول يا كبر على رمضان الجاهم في الضحية
واعتذر عن تأخر الرد
الموضوع اني كنت احمل كمبيوتر محمول
شوف العوارة؟؟؟
احمل كمبيوتر محمول
اعني كنت استخدم كمبيوتر محمول شحنته من نخلة شبرا المضيئة
عسى عندك فكرة عنها
قوووومي يا البطارية افضي،، ومنذ ذاك الحين ونحن في انتظار ناس الكهرباء يجيبوا لينا الكهرباء وما جابوها
والحقيقية انا اعذرهم نوعا ما
إذ أن لديهم كبير سبب في عجزهم عن توفير كرت الكهرباء المحوسب (من حاسوب) لان الكمبيوتر البعملوا بيه الكروت البتجيب الكهرباء لم يتمكن من العمل بالشمعة
إذ ان كهرباء الإدارة المركزية التي تدير الكهرباء كانت قاطعة

عاين انا ما شاربة حاجة والله هذا ما حدث
any way
(عقدت أم اللغة صح؟؟؟)
على كل الأحوال،، حين من الله علينا بالعودة إلى بيت الكفيل سعداء،، تمكن لي ان ارى ردك واقرأ نكتتك الجميلة واصهلل بها واقرر ان ارد عليها حتى بعد أن لفظ البورد بوستي إلى اسفل سافلين المعدة
معدة البورد
وتسلم

مكرر

العزيزة بت قضيم
حمد لله على السلامة
شفنى شيرى قالت لناس اميركا شنو وكت كهربتهم قطعت ؟
وصلى سلك من عمود جيرانكم بس
او تعالى نديك من جيرانا عندهم كهرباء ملح

لك التحايا مرة اخرى

مكرر

تبلدينا
يطيب لي ان احدثك هذه المرة عن بلاد السجم والجوال
معليش لتغيير المقولة إذ ان الجوال في بلادي بقى اكتر من الرماد
ثم هل تعلم ان الفحم سبحان الله بقى اغلى من الغاز؟؟


عمدة
حلوة
هاك دي
قالوا الحلفاوي مشى الحج قال للجماعة
أها يا جماعة كان شدينا حيلنا شوووووية بنقضى قبل العيد
لووووول بالرطانة

ارتيقا
الله يخليك يا جميل
والله الكلام بجي براها واشك برضو في كديستنا المشوطنة تكون فتحت ليها فرع في الراس اللقته فاضي ده

ابوقوتا
النكتة حلوة ولا تنافسني في نكات اهلنا ديل
بعوقك

الفاتح
لسه القصيدة الحملنتيشية ما ناسياها
ما قريت شيري لسه وفاتحة صفحاتها كلها مشتاقة لدرجة اني تصدق حتى الشنط لسه ما روقتها وجيت جارية على البورد شفت الشلاقة؟؟؟
وبالنسبة للكهرباء طرحت قبل فترة فكرة مشابهة لكني افكر في كهرباء جدة باقي امريكا دي بعيدة بالحيل من ابو صفق العايشين فيها
والله يسلم عمرك يا رب

من بالدار؟؟
بنت قضيم!؟
يا هلا ومرحبابك كتير..لكن الاجازة ما بالغت فيها..كم شهر دي كانت؟

بت قضيم سلام ومرحب
اشتقنا ليك

عادل .

رمانة الحبيبة
إجازة باكستان بس
ممنونة جدا على السؤال
تسلميلي

اخي عادل
الله يسلم عمرك
انا ايضا اشتقت لكم جدا جدا
يخليك

مسطول بضرب بوهيه فالوا ليهو خت جريده تحتك قال لا كده محصل



عجبتك ؟؟

مسطول واقف بعاين في الساعه قال:ياربي انا مواعد لي وحده الساعه اتنين ولا مواعد اتنين الساعه وحده



واحد مشي يحجز في سودانير قالوا ليهو الميزان 4 والقيام 6 والدفن8

با لمناسبة دي كلها جديدة .. كرت ..اوعه تقولي لي سمعتيها .. بتعوقيني كده

صلحي كمبيوترك
الاطرش ..داير اسمعك ...انا بحب عمرو موسي

حمد الله على السلامة

وعودا حميدا

عزيزي الصاوي
الله يسلمك ويخليك
اشتقت لكم جدا
تحياتي (الصاخبة) للمدام
يخليك

تمبس
مسطول مشى يعزي في بيت بكا،، قال ليهم
يا اخوانا ما تزعلوا اصلو ده حال البني ادم،، أول ما يتوفى،، يموت طوالي

يا بت قضيم .. يا بنت قضيم والأيام مقبلة .. بركة الشفناك طيبة وسالمة. بس انتي مشيتي وين؟ حاجة غريبة .. في اي حتة نسأل يقولوا ما جات بيجاي

العزيزة بت قضيم
سلامات

القصيدة انا ما نسيتا لكن قاعد احسب متين بترجعى

رباطابى اذا عايز يتكلم بيقفل عين ويخلى التانية
الحكاية دى مجننا واحد شديد ....
قام قال ليهو ياخ زعلتنا لكن اذا عايز
تتكلم لييه بتقفل عين وتخلى التانية ؟
قال ليهم هو انتو المفتحة دى مالينها ؟

(الخال) شنتير العزيز
لك مني دعاش كتيييييير

كنت في السودان يا شنتير
تمتلئ الحيشان بزاز مطر جميل،، دعاش يشد نحو إدمان رهيب
وباعوض بالطبع
ذقون كثيرة
وحالة من التوهان يصطبغ بها مرتادو ابو جنزير ،، ومحطة الشهدا
على فكرة هم شهدا فعلا

كنت اقرأ في محراب جبران الآن،، قرأت تعليقك الأخير،، وطلعتني من حالة حزن وسكون لحالة هستيرية من الضحك
واللااااااهي انت دمك عسل

الفاتح
حاحاول اكتب القصيدة قريبا بس انفض التراب من كوزي المصدي المسمى مجازا (راس)
هاك دي
قالوا واحد (أهل عوض) مشى الخرطوم زيارة قدموا ليه قزازة ببسي ،، جغمها كلها وقال ليهم
سمحة بالحيل،، علا ماعونكم ضيييق

الله يديك العافية يا بت أختي .. حرمة عمنا قضيم
الشهدا عندهم محطة؟ عملوها كيف دي؟ أنا سمعت بمحطة ابو جنزير دي وشفتها لكن الشهدا دي قطع شك نجرتيها من راسك

محراب جبران والله أنا حيرني .. لقيت الناس كلهم التقول فوق فراش. قريت الكلام وكبيت الزوغة عشان العدوى ما تنتقل لي. لكن بسألك انتي برضو .. الناس دي ممكونة كدي مالها؟ بالله ما في واحد يبدا ليه مشروع بكية الا تلقى المعزين بدل يطمنوه يقوموا ينفقعوا بكا لروحهم. يا رب خفف على عبادك. أها في حالات زي دي أنا بكب الزوغة لانهم بحسسوني باني قلبي على حجر .. وجناي من حجر وقلبي على جناي .. وكلو حجر في حجر .. واليوم حظيت بلقاك يا ظبي الحجر

شنتير
لن اقول انك (راكب فيل) ممكن تكون اكلت الفيل زاتو

قالوا فيل وفار في بار بيشربوا
الفار سكر قعد يحدر في الفيل ويقول (في واحد حينفعص الليلة هنا)
الفيل يعاين ليه ويواصل شراب
الفار مصر ،، يحدر في الفيل ويضرب بي يده في الهواء (قلت ليكم في واحد الليلة حينفعص) الفيل ما شغال بيه
لما كترها الفيل اتنرفز طج فعص الفار بي يده
الفار بعد ساعتين رفع راسه وقال (مش قلت ليكم في واحد الليلة حينفعص)

طبعا لو ضحكت مؤكد تكون ماكل فيل،، لان دي نكتة ما بضحك فيها إلا الفيل

في ميدان كبير جدا وقديم جدا وعريق جدا بتاع مواصلات اسمه ميدان الشهدا وهو في امدرمان في محطة الشهدا
طبعا ما في وصف غير انه في ميدان الشهدا في محطة الشهدا
غريبة انك ما سمعت بيه،، نعلك يا شنتير انت من زمن محطة الطابية؟؟

الناس في المحراب ما ،،حزينة وممكونة يمكن هم كذلك لئلا يستطيعوا تذوق الفرح الأصيل

كثييييف ودي للفيل الأكلته

يسعلني الله والشيخ دفع الله ضحكت .. لكن ما ماكل فيل. أنا حقيقة بحلم بالفيل .. كل ليلة بحلم بالفيل .. ولمن أصبح بتذكر كلام التومة بت بركات. كانت دايماً بتقول: أكان سعدك رقد تحلم تلاقي الفيل!!!!ه يبقى سعدي أخد غفوة يا بت قضيم؟ والأغرب من ده كلو أني أحياناً بحلم بأني فيل .. شوفي العوج ده

بالله محطتك بتاعة الشهدا العجيبة دي في أم درمان؟ يا بت أختي أنا ام درمان دي ما بعرف فيها إلا سوق الناقة .. وكنت بمشي للسوق ده عشان بيكونوا فيه ناس ود أب تلة الهمباتي وبخيت ود عبد المولى وأولاد الهواوير .. وبس. تقومي تجيبي لي شهدا في أم درمان؟ شن خبرني بيها؟ أنا العاصمة دي كلها بعرف فيها الخرتوم .. أياهي الحتة البجيها وبتجيبني ليها شغاليت الدنيا .. تاني ما تسعليني من أيتها بكان في العاصمة المتلتلة دي .. وللا هي متلتة؟ العاصمة أنا شن علاقتي بيها. أنتي بالله من أم درمان حلة الامام المهدي؟ والله سمحة المقدرة

أها .. ديوان صاحبنا جبران داك فراشو ما بنرفع تب. ناس غرقانين لحد الركب في احزانهم .. وانا الاحزان دي بجري منها. الأحزان دي هي الانثى الوحيدة البتخوفني حمرة عين عدييييييييل

والله يا شنتير تلقاك من ناس ابو صفق جيران لينا

مع ان شكلك من امدرمان خصوصا بي فيلك ده
بالله ناس غزال المسالمة ختوك؟؟؟
بالغت ياخي امدرمان دي مزار لازم تعيشها وصدقني ما بتندم

قالوا السوداني سأل الولد في الفصل
أذكر اسم حيوان بطير
الولد قال ليه الفيل يا استاذ
السوداني قال ليه يا حيوان يا غبي،، الفيل بطير؟؟
اسمك منو يا ولد؟؟
قال ليه بندر آل سعود
السوداني غير رأيه،، قال ليه والله هو مرات كده بطير

ولد شاطر قاعد هناك سأل الأستاذ،، لكن يا استاذ الفيل بطير؟؟
السوداني قال ليه إذا انا يا ولد قربت أطير الفيل ما يطير؟؟

انفض الغبار وحاسب ضيق النفس،،،نكتة عتيقة عارفة