ايام الخستكه

ازيكم يا حلوين
بصراحه كدا بوست هدفو الوحيد اني اسلم عليكم.... اولا باركو لي كمبيوترنا اخيرا اخيرا رجع ...
وتاني حاجه لي كم يوم بحنس في قلمي اكتب وما راضي يسمع الكلام....امكن لاني مؤخرا اتحولت لانسانه متلقيه من مصاقره الكبر.....احم احم نظام البت كساره وكدا
في الفتره الاخيره مرت بي كميه من المعاكسات بس ناس متاعب ينفعو يسجلوها حلقه...بدات بانو كمبيوتري المسكين رفض وبعناد المصالحه معاي وكان لابد من اخذو للدكتور....اها شكلو كدا الدكتور اتحير في علتو ورقدو عندو لمن نسيناو ...وجاءت الطامه الكبرى لمن خط التلفون ضرب والحراره اتقطعت من البيت ...وطبعا ما بين بيتنا ومقر سوداتل اتحول للصفا والمروه....واحنا كل يوم في الليله وبكره....وشي بالتحنيس.....وشي بحمير العيون ونفخ الشلاليف والشكل.....وكلو ما جاب نتيجه مع ناس سوداتل .... في النهايه وما بين الحلم والصحيان قررت اعمل فيلم هندي....
صحيت الصباح وكل علامات الشر مرتسمه في وشي وقروني مطبوعه علي المخده.....دورت العربيه ومشيت ناس سوداتل ....وبحركه يحسدني عليها سلمان خان...وقفت العربيه قدام طابور عربات سوداتل الكان مستعد للانطلاق قاطعه عليهم الطريق
وكانو روح فان دام اتلبستني اليوم داك....دل دل دل نزلت وقلت ليهم الليله دي يا ناس سوداتل انا ما متحركه من هنا كلو كلو الا تلفونا يتطلع....
طبعا بعد الوعد الاول من المهندسين انو يتطلح الليله دي كنت دايره اجري لانو انا ما من هواه افلام الاكشن....لكن قلت في قلبي يا بت ما تبقى خفيفه خليك صعبه شويه....
وبعد ما اوصلتهم الدرجه الانا عايزاها)) درجه ان تجعل البعض يشك في قواك العقليه(
تنازلت وانا اهدد انو التلفون لو ما رجعت البيت لقيتو شغال سالجا لطرق اخرى....طبعا ما عارفه الطرق الاخرى الكنت حالجا ليها لو ما كانو صلحو اليوم داك لكن الاشرار بيختمو كلامهم كدا في العاده
بعد ما اتصلح التلفون قومي يا اميه الكهربا احردي تلاته ايام تلاته ايام من اسخن الايام في الشهر الفات....كانت اعظم الاماني هواااا باااااارد اما النت دا طار لي من راسي طيره
غايتو نصيحتى لكل اخواني القاعدين هنا معاي انو يحافظو على حاجاتهم شدييييييييد لانو اي شي بيعيا في البلد دي بيتطلح بخراج الروح....من الزول الى الماسوره...مرورا بالكدايس

اها كفاكم كدا حسه لكن بجيكم تاني

حنين يا ختى السلام عليك




وحمد الله على السلامه

وباقى لى الحريقه مستسيقه الايامات دى وده وباء عام فى الاجهزه

تصدقى انا برضو الجهاز بتاعى عكر مزاجى ثلاثة ايام حسوما واتصلح بعد تعب
بس تلفونا يبرا من الكضم

ام الاء

حنين ازيك
اول شي حمدالله علي السلامة

تاني شي ..انت البوست دا قلتي سلام

هسع عليك الله دا كلو سلام

والله مواهبك في السلام لو عرفوها ناس الحكومة

ما كان احتاجوا لي ابوجاتهم ديك ولا لي مشاكوس




الله لا اعاد ايام الخستكة

حنين
يا لذيذة

مبروك عودة الجهاز والخط

بس مشكلة الكيبورد شنو؟؟؟؟
لووووووووووول

تحياتي

سلامات
تتخيلي برضو ياحنين الكمبيوتر بتاعي فيهو مشاكل وحتي اللاب توب فيهو نفس المشاكل ويوم انا ماشي المكتب عندي اجتماع مهم جدا مع سياسيين عرب واجانب نتناول فيهو القضايا التي تشغل الشارع العام العربي والمتعلقة بي البني التحتية وماشاكل ذلك قمت بالليل لخصت الكلام الح اقولو في الاجتماع وحفظتو في اللاب توب بتاعي طبعا بعد ماجبتو من المهندس البيصلحوا لي اها
صحيت بدري اليوم داك وجهزتا حالي ومشيت علي مقري الدائم في عمارة الفيحاء
دخلت المكتب بتاعي وقلت للسكرتيرة وريني البرنامج بتاعي لليوم شنو اها قامت قالت لي الاجتماع فاضل ليهو ربع ساعة ويبتديء وورتني باقي البرنامج كلها بس قاموا الضيوف دخلوا قاعة الاجتماعات وجيتم رحبتا بيهم وناس التلفزيون وشلة من القنوات الفضائية والاذاعية موجودين بداية الاجتماع تعتمد اعتماد كلي علي الملخص العندي في اللاب توب بتاعي اها فتحت اللاب توب عشان اتلو عليهم ماتيسر لي من مقدمات واطروحات يصح تناولها في مثل هذا اليوم بس فتحت اللاب توب وحلف بي دينو وايمانوا مايشتغل كلو كلو تتخيلي الموقف المحرج دا كيف المهم جغلبت جغلبت كدا وناديت السكرتيرة قلتا ليها اتصلي بي المهندس وحولي لي المكالمة علي موبايلي بس قمت من الجماعة قلت ليهم في مشكلة بسيطة وبجيهم عشان نبدا قلت عشان انبذ المهندس دا بعيد منهم المهم انا لم قمتا علي حيلي كدا ضربتني ليك كراع العنقريب واتفنقلتا في نص الحوش وصحيت من النوم لقيت نفسي كنت بحلم شفتي الماساة
انا يايما لاكمبيوتر ولاعجلة زاتو ماعندي لكن بنكابس كدا لي سودانيز اون لاين دي عشان الواحد بيرتاح جدا جدا لما يكون وسطكم
والف حمد لله علي سلامة الكمبيوتر وشاحد الله يايما ربنا يديك لاب توب يكون لابيتعطل ولابيتشغلب شغال 24 ساعة
وعودة طيبة ياحنين وماتنقطعي

سلام مربع

حنين ياعسل
ازيك
عامله ايه
حمدالله على سلامة العودة
والف حمدالله على عودة الابن الضال
اقصد الكهرباء
وصراع في النهر
من اجل زمزمية المويه
اقصد من اجل شوية سلوك كده لا راحة ولاجات بتجيب الكلام من الهواء
هو تعالي كده النسالك
ناس سوداتيل ديل شايفين نفسهم على شنو
يعني هم الاقترعوا الذره ولا التلفون
كل البعملوا شوية سلوك مربوطه في بعض
وشوية صحانه مرفوعة في راس البيت
وسلك تاني ضعييفوني يدوك مني شوية كلام اقصد تلفون
بالله لو قطعوا منك التلفون امشي قولي ليهم كده
قول ليهم شيري بت ام شيري قالت ليكم
يا ناس سوداتيل يا ماظريفين
يا ناس سوداتيل يا معندكم الفاظ
بس
هم طوالي المره الجاية ح يخافوا منك من غير ماتشمي ليهم

حنين
ليست هذه مشكتك لوحدت
نحن ماسورتنا ربع بوصة وتنقط
ليه الموية تنقط عن بعض الناس رغم
ان مواسيرهم ربع بوصة وتنقط وما تنقطع
عن آخرين. رغم أن مواسيرهم بوصتين وأكثر؟ ليه؟
والكهرباء بالقطارة
يوه
الإجابة بسيطة يا حنين وامثال حنين
أحنا من الناس اللي حيشوفوا حظهم يوم القيامة
ولكن الصبر طيب بكره تجيكم الكهرباء والموية

ولكن في شيئ غلط وكلنا عارفين الغلط
كلنا عيال تسعة شهور
والسباعيين أيضاً يحطونهم في حضانات حتى يكملوا التسعة

sallllllllllaaam ya haneen... nice to see you around after all.

تيتا يا حرف النغم....الله يسلمك ويبارك فيكي...ولا اراكم الله مكروها في جهاز

جدو...اول شي الله يسلمك
تاني شي....كلمتهم قالو لي...والله يا حنين في زول كدا مواهبو في السلام والحرب فاقت كل التصورات
تالت شي....عارفو منو؟
تسلم يا غالي

هوووووووووزي.....ازيك يا سكره
والله الكيبورد حلف ما يفك ايدي كلو كلو

مباااااااااااالغه يا ود رمليه.....لووووووول
انا قلت يا زول الزول بتاع السياسيين العرب والعربيه الشبح دا دخلو البوست بتاعي شنو...جريت لميت البنابر ورشيت الحته...وهدومنا بتاعه البيت المرقه بقت بتاعه البيت وكدا......الف شكر ليك

شيري يا سكره.....والله ليك وحشه
طبعا لما نتشاكل مع ناس سوداتل فان موباتل هي المستفيده...ولما نشاكل موباتل طبعا سوداتل هي الكسبانه....صدقو في وجود مؤامره بين الاتنين مستغلين ضعفنا الفطري كنساء نحب البري والشمارات والاطمئنان على اخبار بعضنا البعض....يا حليل حبوبتي اللسه بتخت السماعه بالقلبه


يا ايمو ما تجيب لي سيره المويه دي برنامج تاني احنا كل يومين في حاله احفروا المويه وطلعو الاشجار اللي ما لقيت ليها مكان اجمل من مواسيرنا عشان تلصق فيو
غايتو الحمد لله


سنتمنتال يا احلى سنتمنتال يا يا حليلك والله مشتاقين بدرجه

في يوم من الايام قررت انو اكون شفته....
يوم اتسرق موبايلي العزيز الله يرعاهو وين ما كان
طبعا حينط زول يقول لي ما هو انتي لو كنت شفته من اول ما كان موبايلك اتلطش...معليش دي كانت نقطه التحول اللي قررت انو اتقدم بطلب شهاده شفته تحت التدريب وابدا العمل...
اليوم داك كنت في موباتل للتبليغ عن فقدان البطاقه والغائها واستصدار بدل ليها....وطبعا البطاقه الجديده حتاخد تلاته اسابيع وفي روايه اخرى شهر..وفي ثالثه اقنع
اها جلست مصادفه بجانب احدى الموظفات المهمات التى كانت بتوصى زميل لها في الاداره على بت خالتها المسكينه التى اتلطش موبايلها ...وللصدفه العجيبه لقيت انو موصفات ابنه الخاله المحظوظه بتنطبق على شخصي الضعيف....وهنا جات موهبه الشفتنه وقام قلبي قال لي اها كان مشيت وقلت انا فلانه دي حيحصل شنو...؟؟
ولو الموظف بعدين اكتشف اني ما فلانه دي بعد ما فلانه الاصليه تظهر يعني حيعمل شنو؟ مش حيطر يساعدها برضو؟ خلاص كدا اكون استفدت وما ضريت الزوله ديك
وقمت اجري وجواي فكره انو انا فلانه وكان ما فلانه فلاااااانه
وطبعا حفظت ليكم اسم الشخصيه المهمه في موباتل ولنقل انو اسمو محمد بما ان نص السودانيين اسمهم محمد...
ودخلت موباتل ولاكمال الشفتنه اتلفت لاحد الموظفين وقلت ليو
_اسمع عليك الله محمد دا القالو وين
واشار لي للطابق العلوي يا سلااااام لابد انو محمد دا المدير او ما شابه ذلك
وطلعت بكل الثقه فوق وعند باب محمد تاوقت في الاول لا حول الله الراجل شكلو صعب
وقفت لحظات خانتني شجاعتي كليا وقربت انسى الفكره واروح زايغه...وبينما انا افكر الليله محمد دا كان المدير تخشي توووووش كدا يا حنين...ايوه الشفتنه حلوه لكن يا بتى قدر دا وكان وكان...
وبديت احس باطرافي بارده وقررت اسال عن منصب محمد دا في الاول قبل ما اقوم بخطوه تانيه...سالت احد الموظفين المارين عن محمد قال لي انت دايراو لي.
قلت ليو قالو لي امشي لمحمد بيطلع ليك البطاقه..
قال لي لا يكونو قصدهم حسن واشار لنفسه بابتسامه عريضه
طبعااعلم تماما ان الحظلعب دور كبير في استلام بطاقتي الجديده في ظرف يومين لكن...اخخخخخ يا محمد لو كنت قريبي كنت اخدتها في يوم

ازيك يا حنينة سلام حنين من ناس المحنة للناس الحنان سلام ملان حنية حنين للبلد