الطياره السودانيه كانت حتتحرق في بورتسودان أو تقع جمبلغ

والجلك كان حيتلحس ! الحمدلله ربنا ستر

أول أمبارح الطياره قايمه من بورتسودان للخرطوم
قومتها كدا بعد ما طارت ، الركاب يسمعو طاخ طراخ ، بعد شويه الطياره تهتز ، وما قادره تطلع لفوق ، مجرد صوت هادر بس
شويتين كمان الدخان طلع و اكتشفوا أنو المحرك اليمين أظنو اتحرق
قام الطيار بسرعه فضا البنزين من الطياره عشان يعمل هبوط اضطراري
والحمد لله قدر ينزلها في مدرج مطار بورتسودان بالسلامه
وما عارف الموضوع دا كتبوهو في الجريده وللا نهيي كارتا مهبتي

الخبر جاني سخن من الجلك بعد وصولو ليلة أمبارح بالسلامه ، وجا تعبان ما قدرت آخد منو الشمارات و أعرف القامو بالولوله كانو رجال و للا نسوان


الله يحفظكم ، ومنتظرين الخصخصه ، كان بتنفع

Quote: والجلك كان حيتلحس

حمدالله علي السلامه
لكن الكلام ده شنو

حمد لله على سلامة الجلك
دي طيارة وكمية البدفقو
منها البنزين

جللك
جمبلغ
نهيي كارتا مهبتي
القامو بالولوله
الخصخصه

ممكن تورينى معنى الكلمات ده?
وده تبع ياتو لغه! بس نفسى افهم

الله يستر على طيارتنا ما تروح فى ستين داهيه


وفى امان الله

لا اله الا الله

الأخ عبدالله
الله يسلمك ، أما اذا كنت ما بتعرف الجلك و الجلكينه ، فأنت مقصر في حق والديك



الأخ ُأيمو
يا ود الغرب يا مغترب
الله يسلمك و يسلم والديك بالمناسبه وقود الطياره من متين بقى بنزين ؟


الكريمه المكرمه bint_alahfad
عرفت قبل قليل أن جهازك حماه الله تعطل مرة أخرى ! باين أخوك عمل ليهو كجور
أسأليني من الكجور كمان

الجلك هو الأب
الجمبلغ أو التشمبولغ هو صوت الارتطام بالمويه
نهي أو نيي يعني لأ بالهندي
كارتا دي ما بعرفها كان في كان مافي
مهبتي معروفه من المحبه
الولوله زي السكليبه نظام وررورووك & ووب علينا
الخصخصه كلمه عربيه معناها شراء القطاع العام من قبل شركات خاصه
أو مساهمة القطاع الخاص بالنسبة الأكبر في الأسهم ، نظرا لعدم قدرة الحكومه على الصرف على مشروع معين أو حتى ادارته

أما طيارتكم ، فان شاء الله الدعاء يبدأ من لحظة طيرانها حتى هبوطها
عشان أنا ما أقوم كمان ألحقك في البحر جمبلغ

سلامي لوالديك

عزيزى اوبى حمدا لله على سلامة الوالد وكل امر المؤمن خير ولك كل الود

مش كان من الأول تكتب بالعربى عشان نفهم
عموما حمدلله على سلامه الجمبلغ..
sorry
الجللك

ممكن تشرح معنى كلمه الكجور??? وده كمان تبع الوالد???


وفى أمان الله

لا اله الا الله

الوالد يوصل سلامه الى كل من حمد له السلامه

الأخ Sado7,
كيفك ؟ الله يسلمك و يسلم والديك ، وان شاء الله تكون له في دواخل نفسه خيرا
والغريبه ناس بورتسودان ما اتكلموا عن الموضوع ولا أنور كينق ! باين ما دايرين سمعه لبورتسودان



الكريمه المكرمه
الله يسلمك ويسلم والديك ومجموعة بيمليكو و هوللوواي رود أما الكجور
دا أسألي عنو أسيادو ! بس قولي اللهم احفظنا
حاولت أبحث عن معلومات في الانترنت تحت نفس الاسم ولم أجد ! معقوله تراثنا مهمش كدا ؟ هيهيهي عموما سميهو سحرا حفظنا الله واياكم
وهناك رقصة للكجور أتينا بها من غرب أفريقيا وهي حسب ما علمت لما يدعونه الأرواح الشريره ، ويا ليت لو أحد يأتينا باسمها الانجليزي أو حتى الفرنسي

الله يحفظ طياراتنا وناسا

يا أخ أوبي الحكاية دي جديدة ولا قديمة؟
انا بسأل عشان قبل حوالي 3 سنوات حصلت نفس الحكاية بذات التفاصيل لطائرة سودانية وكان من بين الركاب والدتي وأختي الصغرى في طريقهم من الإمارات إلى السودان ، وربك ربك الخير قدر و لطف هبطوا بسلام في بورسودان وجابوهم الخرطوم بطائرة أخرى. غايتو يا نفس الحكاية يا إما نفس الحكاية بتكرر كل سنة مع الطائرات السودانية ذات الهياكل والمحركات المتهالكة ، ربنا يحفظ الجميع ويتولاهم براعايته ، ويصلح الحال.

تحياتي

عزيزي أبو علي
مرحبتين وسلامة الجلك
موضوع الطائرات السودانية خصوصا في بورتسودان قصته غريبة جدا
فحسب علمي وأنا حينها طالب جامعي قمت بزيارة شبه رسمية لبورتسودان
بعض الأخوة المهندسين هناك أخبروني بأن مطار بورتسودان مشيد علي آبار بترول وللقصة تفسيرات كثيرة
لا أدري مدي صدق الرواية ولكنني أرجحها
ويبدو أن هناك علاقة بين هذا وقصة الطائرات المتكررة
طبعا هذا لا ينفي حكاية طياراتنا المتهالكات
بخصوص الرقصة المشهورة في غرب افريقيا رقصة السامبا وهي رقصة معروفة للشعوب الأفريقية (أظنها في الكنغو ) أما
الكِجُور والتِّكِجِّر فمعروف كثيرا في الكورة وعندما يذكر الكِجُور يذكر الفلاتة وهناك أنواع مختلفة للكِجُور لعل أشهرها كِجُور الكورة والكِجُور مربوط بالمنطقة فمثلا الكِجُور في الصعيد يركز علي أشياء أهمها الثروة الحيوانية وما يتعلق بها وهكذا
وقد نرجع مرة أخري ان سمح الزمن لأستعراض الموضوع بصورة أوسع
أما اللفظ في اللغة الأنجليزية والفرنسية في تقديري لا يوجد لفظ مطابق مائة في المائة نسبة لأن المفهوم نفسه لا يوجد في مجتمعات اللغة الفرنسية والأنجليزية .ولكني سوف أبحث عن اللفظ الفرنسي هنا في كويبك

يا اوبى يوكى

انت فى ده ولا قبل كده انا راكب الطيارة فى مطار الخرطوم. لما عاينت بالشباك لقيتم بدورو فيها بى تراكتور. بطاريتها كانت نازلة

غايتو الف سلامة للحاج

يا اوبى يوكى

انت فى ده ولا قبل كده انا راكب الطيارة فى مطار الخرطوم. لما عاينت بالشباك لقيتم بدورو فيها بى تراكتور. بطاريتها كانت نازلة

غايتو الف سلامة للحاج

معليش يا ابي والحمد لله على سلامة (الجلك) بتاعك
بس ياريت تورينا الوالد بيشتغل شنو
أصلو الطيارت البتقع اليومين ديل هي طيارات ناس الـ
.......
وأنا ما قلت حاجة

حبيبنا اوبي

حمد لله علي سلامة الوالد
والجاتك في بنزينك سامحتك

الأخت Rose
لأ دي طياره من بورتسودان للخرطوم ، وكانت قبل اسبوعين تقريبا والحمدلله على لطفه
وآمين على الدعاء

الأخ العم الصديق Elhilayla
والله يا أستاذنا ياريت لو تقدر يوم تعرف لينا العلاقة بين دا وداك
أما عن الكجور السحر ، فأنا حسبما قرأت مرة أن هناك رقصة أيضا بنفس الاسم للأرواح الشريرة بغض النظر عما هي ، ولكن أشكرك عللى معلومة رقصة السامبا والتي اعتقدت أنها من أمريكا اللاتيني’ أصلا

أما عن قصة الفرنسيين ، فصدقني ديل أساتذه في السحر ، ومتخصصين في السحر الأفريقي ، هذا عدا سحرهم الخاص بهم ، وأذكر مرة حضرت برنامج عن السحر في قناة فرنسية لمدة ثلاث ساعات كامله !! بس طبعا ما فاهم حاجه غير من الصور والأحداث اللهم احفظنا وان كنا مسحورين فأبطل السحر بجبروتك وقدرتك وقوتك

وفي انتظارك عشان موضوع الكجور دا

الأخ sentimental
الله يسلم والديك ، بس كيفن عاد قصة يشحنو بطارية الطياره ببطارية التركتر ؟
ما في طياره تانيه بطاريتها قويه يشحنو بيها ؟
:]

الأخ kov_123
في الأول اتغظت من جملتك بعدين قعدت أضحك
عموما الله يسلم جلكك و جلكينتك ويرحمهما في أي مكان كانوا ، واجابة لسؤالك فهو استشاري هندسي ، وغير مقيم بالسودان فلا تخف أما طيارات الجماعه
فأنا زيك ما حأعلق ، بالذات عندي سفريه الاسبوع دا ، وما في داع للشماته يقوم الله سبحانه وتعالى يبشتننا

3abdo الأخ
الله يسلمك ووالديك ، وذكرك للبنزين خللاني أسأل تاني الحصل شنو ، وباين الجلك كان ما مركز في الطياره هيهيهي لأنو رده كان مختصر بدون تفاصيل ، قال لي الطياره مشت على البحر أو كانت فوق البحر ما عارف ، وأفرغت البنزين ولحظتها كان الخوف أن المحرك المعطل يرسل شرارة فتنفجر الطائره ، ولكن هذا هو الحل الوحيد ، عشان اذا وقعت الطياره ما تنفجر بسبب وجود البنزين ، وفي الآخر الكابتن كان فالح بلطف ربنا وقدر يلحق ينزلها في المدرج

أما عن شعور الناس ، فقال لي ، لم يفتح أي أحد فمه ان كان رجلا أو امرأه حتى نزلوا في المطار بحمدالله
:]

ياريت بو في زول من بورتسودان يوررينا الاشاعات التي وصلت عما حدث
بداخل الطائره

الأخ أوبى يو كى

حمدلله على سلامة الجلك والعجوز

أما عن الكجور هو طقوس السحر التى يقوم بها سحرة النوبة (نوبة جبال النوبة) وكذلك تقوم بها بعض قبائل الجنوب
الكجور هو مثل الفدو أى السحر الأسود ولقد كان لنا جارا نوباويا يقوم بطقوس الكجور ويذبح الدجاج للجن تقربا لهم ليقوموا بتلبية رغباته
والكجور أيضا يعمل لإستنزال المطر ولجلب الخير ودفع الشر أو العكس

والله أعلم

الاخ العزيز obay_uk

الف حمد لله على سلامة الوالد

لكن صراحة كده الكلام ده جد جد؟ تعرف انا اولادي مسافرين يوم الخميس بالسودانية كانبقى الكلام ده جد الواحد يمشي يشوف ليهم طيارة تانية

الله يرحم الجميع ياهو دا حال البلد وقع اليوم الحادث الما اتوقعهوا الناس والضحايا 115 شخصا الى متى يكون للإنسان قيمة فى وطنى ومتى ومتى ومتى؟ نحن فى إنتظار الكوارث القادمة طالما اننا لا نتحَسب رغم المؤشرات ولا حول ولا قوة إلا بالله

حمد لله على سلامة الجلك

بس السؤال الذي يطرح نفسه بقوة...
هل هي نفس الطيارة المنكوبة؟؟

الأخ اكسورسست
سلم الله والديك ، أما عن ذبح الدجاج فقد ذكرتني بقصة شاب في الامارات أراد فتاة فلما رفض أبوها لكشفه بعض الأشياء قامت الفتاه بالهرب مع الشاب ، وأحكي لكم لاحقا كيف تطورت الأمور و دخل السحر فيها وذبح الديك ، وقد عايشت القصة فانتظرها

الأخ ياسر حنا
سلم الله والديك ، والقصة حقيقيه وانظر طائرة الأمس أيضا
الله يحفظ أولادك ويرجعهم بالسلامه

الأخ الطاهر
رحم الله الجميع ، ومثلما قلت ، وأنا أستغرب عدم ذكر هذه الطائرة في الاعلام

الأخ مانج
سلم الله والديك ، ولكني لا أظنها نفس الطائرة ، لأن تلك كانت رحلة داخلية ولكن من يدري وربنا يلطف بالبقية
نسأله بالأعمال الصالحات لجميع أهل السودان

الكريمة المكرمه بنت الأحفاد
أخوي الصغير يطلب منك أنت وأختك أن تغيرا الحجز لطيران آخر ، قلت له لن يحدثالا ما سيحدث ، فقال لي نأخذ بالأسباب ، قلت له أنا سآخذ بالدعاء
حفظكم الله

Obey Uk

that was what excatlly happened.

الأخ Obey UK
السودان اليوم يعيش فى حالة حزن عام
كأنك ياأخى كنت تقرأ الغيب
فتلك الحادثة التى اثارتك مما دفعك للكتابة بالبورد يبدو انها لم تثر فى ادارة سودانير شـعرة حتى وقع المقدور واخذ حكامنا المتأسلمين فى البحث عن الشماعة ووجدوها فى الأمريكان وقرارات المقاطعةوالتى والحق يقال لم تشمل اسبيرات الطائرات المدنية وهى المعلومة التى اكدها مدير الطيران المدنى فى مقابلة له مع البى بى سى وذلك عكس ماردده مصطفى عثمان اسماعيل
حقيقة الأختشوا ماتوا
نسأل لشهدائنا الرحمة والقبول الطيب عند الله سبحانه وتعالى

This prove that, there is no concern of the life of people in Sudan, here the airplane have problem but not to a death level, and could control it safely, but then after just days it burnt and about more than one hunderd person killed in Portsudan. Is this airplane is the same one that falled yesterday, if this is the case then Sudanair must go to hell.

..
.
سبحان الله
يعنى يا ابي كما توقعت المأساة حصلت
قبل اسبوعين الوالد طلع منها والف حمدالله
على سلامته
وها هى الايام تثبت هذا الامر وينجم عنه هذا الجريمة الشنيعة

اللهم اغفر لهم وارحمهم


خارج التفاصيل
الكجور دا .. الفكى بتاع ابناء النوبة
النوبة بتاعين جبال النوبة وليس الشمالية
يعنى البعمل الارضى والرتينزات بتاعت العرس والمحبة

اها كدا ما ريحتك