لكن يا بكري ما جننتنا جن

انتو يا اخوانا بكري ده بقى ينضف السيرفر ده كل يومين ولا شنو؟

عليك الله يا بكري كان ما عايزنا نخد صورنا دي عندك كلمنا بالعديل كده، عشان نمشي نشوف لينا زول تاني نمسكها ليه

ما ممكن كل يومين انا انزل العلم بتاعي ده تاني يوم اجي القى اتلحس

انحن فوق عزنا سرافر ما بتهزنا

سرافر = جمع سيرفر SERVER
والسيرفر في لغة الكومبيوتر هو خادم الشبكات على وزن هادم الذات


اها الرايحة ليه صورة اليمش يشوف بوست اخونا جيمس عشان يرفع الصور العايزها وبعدين ينزلها في ملفه

يمكنك تحميل صورك عبر هذا الموقع

ترا
يا ياسر
علمك يتشلوط في امان الله
هدا قدامي يتحرق ويرجع في زي ما كان
الكلام صورة امي الحلفت
قاعدة لي اكس قدر الهجمة
والمشكلة في ناس متهنيين وشايفنها
الا انا بس الكج ضاربني
شفت المصيبة دي ؟

الرهيف الشفيف والعفيف النضيف والظريف الدمك خفيف ياسر حناالمن اعجابنا بيك نقعدونقيف
(هاهاهاهاهاهاهاها)
يتخيل لي والله اعلم ان المسألة ما مقصودة اطلاقا
لان لاحظت ان الصور تمشي وتيجي
(بما في ذلك صورة لي لم أعد انزالها)
أها
والحمد لله إنك جبت المناسبة برااااااااك
انا صراحة خجلان منك ومن ما تعلم من اعجابي بكل ماتكتب
بس كانت في حاجة واحدة ما عاجبني في علمك دا
وقت ياربياقولي ولا ما اقول لي
اقو ل لي في الخاص ولا قدام الناس
والحمد لله اليوم صادف فتحك للموضوع اونلاينية مني
يا ياسر نحن كلنا (أو انا شخصيا)اشعر بمشاعر مثل مشاعرك دي تجاه الادارة الامريكية الحالية
لكن العلم يمثل أمة كاملة تربطنا بها علاقات إنسانية كريمة
اسي لو في يوغندي ولا أرتري زعلان من تصرفات نظام البشير مثلا
وقام حول زعلته دي لي علم السودان وسوا متل سواتك دي
نحن كلنا
وأولنا انت ما بنرضاها منو
اها الباقي منك
ولا شنو؟؟؟؟

بسم الله الرحمن الرحيم

الغالي ياسر
سلام وإحترام

ياخي أنا مشيت لي موقع جيمس لكن غالطني في إسمي قال ما عندنا إسم زي دا
وعندي سؤال ممكن الموقع دا يديني صورة غير صورتي الشينة دي
تسلم يا حبيب

ٍسلام مربع

ياشباب

وحات نظري المسالة كلها بسبب
صورة بدر السمح دا

القديمه
مع انو شالها ، لكن حلقت ما تمرق من قعر السريفر

دي عايزه ليها (ليفة) سلك عديل كده
عشان نكرتا من قعر السريفر

دا كلوا يا بدر الدين عشان تعرف
انني ماحنكوشه
وبعرف (ادوات)غسيل العدة

ديك العده زاتو ، عندي معاهو موده

شيري
انتي اوعا تكوني (اولاد امبدة)البنسمع بيهم في الحجا؟؟؟؟؟؟

بسم الله الرحمن الرحيم

شيري بت أم شيري
سلام وإحترام

أها عرفتي ديك العدة
طيب بتعرفي ديك المكوة؟؟؟

أيواااا
بعد شوية طلعي إشاعة إنو صورتي هي (الفايرس) الظهر في كمبيوتر بكري كمان

الاستاذة الجندرية

تسلمي أختي، انا علمي لكن ما مشيت رجعته تاني زندية بس، اها كان عايزة صورة امك ترجع يا تمشي الموقع بتاع جيمس ده يا شوفي اللينك التحت، لأنه ده لا عايز تسجيل ولا حاجة

العزيز فتحي

كتر الف خيرك، وشكرا على النصيحة، ويعلم الله نصصحيتك ما بناباها كان في السر ولا قدام الناس، وعشان خاطرك واكراما ليك ان من دربي ده بنزل علم العلوج ديل(يا خ لكن ديل ماغصني جنس مغصة ما يعلم بيها الا الله) المهم هسع دي بنزل ليك علمهم وبرجع صور اولادي اصلهم ي=ح يوحشني منيوم الخميس ان شاء الله مسافرين السودان وبدل مااقعد اتفرج في علم امريكا المحروق اقعد اشوف صور عيالي احسن


بدر سامي علاه

والله انت بدون صورة سمح خلي لما تجيب صورتك كمان، هو نحن لا قيننشوف صورتك كل يوم، انت لو عايز اي صورة ممكن تلطشها من اي مكان لكن لو عايز صورك زاتها كدي شوف اللينك التحت ممكن ترفع اي صورة انت عايزة من اي نوع

لتحميل اي صورة بدون تسجيل اضغط هنا

العزيزة شيري

تسلمي على الطلة(c) حقوق الطبع محفوظة

تعرفي المشكلة بدر ده لو كان سمح ما عارف كان عمل فينا شنو، لكن بس نسكت ساكت يا بت امي ونقطعه في حشانا


ورروووووووووووووووووووووك

الحقوا صوركم رجعت
انا بكتب في الرد ده لقيت الصور كلها رجعت كما كانت
الظاهر بكري قرا الكلام ده وقام اتحسس

شكرا ليكم جميعا

ياسر العزيز
انت علمك رجع لكن انا صورتي لحد هسع ما عارفة الحصل ليها شنو؟؟ وبالمناسبة كنت دايرة اكتب بلاغ زي بدر الدين لما صورة بتو ضاعت.. وعمل ليها عريضة عديل كده
بيني وبينك انا ارتحت لما صورتي اتشالت.. قلت احسن جات منهم

الاخت رجاء

والله بكري ده ما عرفنا نعمل ليه شنو بعد ده، غايتو الا نمشي نشتكيه في الامم المتحدة

عارفة الصور بقت زي لمبات المولد تظهر وتختفي