وطـــن..رايح.../عمر الطيب الدوش حأسأل عن بلد رايح وافتِّش عن بلد سايح واسأل عن امانينا الِّي ما بتدِّينا صوت صايِح وأسأل وين مخابينا إذا جانا الزمن... لا فِح واسأل عن بلد مجروح وعارف الجارحو ليه جارِح وابكى على بلد ممدوح وعارف المادحو ما مادِح واحْلم بي حلم مسروق لا هو الليَلهْ لا امْبارِح أعلِّق في جناح سَفَري خطابات لي زمن فجْري وادْخُل من درِب سرِّي لِكُلِّ مضاجع الأحزان واضفِّر من شجر بلدي بروقاً مارْقَهْ من صدري حأسأل عن بلد غايص لحدِّ الليلهْ في الوجْعَهْ أَنُط فوق سرْجي واتْحزَّم أقوم من وقْعَةْ لي وقعًهْ أخُتْ ايدي البتوجِعْني على السأم البِراجِعْني واسأل.. يا وطن يا بيتنا ليه شوقك مواجِهْني ليه حُبّك مُجهْجِهني وليه تاريخ زمن خسران موكر لسَّه في شجني؟ حأكْتب لي شجر مقطوع مسادير يمْكِن يتْحرك خطابات لي طِفِل مجْدوع يقُوم يجرى يَقَع يبْرُك رسالَهْ لكلِّ قُمْريّه إذا دم الشقا اتوزّع على كل البيوت ما تْرِك واسأل.. عن وطن رايِح وادّيكم خبر جارح: بأنّو جميع جُموع الناس حيفْضَلوا لا كُراع لا راس ونشترى في الدكاكين يوم مسابِح من دموع الناس مساحيق من هموم الناس زَهَج يتْعَبّا في الأكياس ونعْلن في المزاد علناً وترْغي الجوقَهْ والأجراس: "!نبيع الطِفلَهْ والكرّاس" واصْرَخ ! ياوطن! يا بيتنا ليه ما تبقى لينا الساس قَدُر ما تجري فيك أفكار... يزيدوا الحَبْس والحُرّاس قَدُر ما تجري فيكْ الخيل تَدُوس الهيبَهْ والإحساس واسأل يا وطن رايح اذا كل القبور دَخَلت بيوت الناس بلا اسئذان بلا صلوات بلا أكفان جريمَهْ اسائل الدّفَان؟ حريمَهْ طَلَب تَمَن قبري من البايع في أيِّ مكان؟ واقولكَ يا وطن رايح واقولك يا وطن آمر سلام النّفْسِ ما كافر ولا كافر ولا كافر ...تحياتى... ودعزة

هل تعلم كيف مات عمر الدوش يا ود عزة
؟؟؟
عاد للعمل في أخريات أيامه في معهد الموسيقى والمسرح
وكان مرتبه يوم مات موقوفا من قبل المسئولين في المعهد
ومات جائعا
أو هكذا سمعت من آخر من رآه من الشعراء

فتحى...
وعشان كده قال : ضلمت
ويا بنفسج عالى غالى وبرتقالى أمشو انتو أنا البقيف...

كان مبدعا متغرقا فى قراءة ..الضفة والطفلة والموجة الصباحية...



تحياتى
ودعزة

تسلم يا ود عازه
على هذا الامتاع
قدر ما تجري فيك الخيل
تدوس الهيبة و الاحساس

و ما زلنا بنحلم بي وطن عالي و غالي

الزومة
تسلم