Post: #1
Title: حنين
Author: zumrawi
Date: 06-18-2003, 11:57 PM
Parent: #0
حنين
روحى ليك تتشابى وكت ماوقع الكلام
وترجاك فى عافية صبر
من حتلتو من غيمة مشروقة وزحام
بلقاك كيف شان ابعدك جواى دسائس الذكرى
والبحر الحسير
شكرا اذا ماقلت ليك انك حنينة على الغياب
وانو الدفاتر هى هى بتوصفك
عدد النهارات فى الرحيل
وانا بينى مابينك مدن
خاويت دموعى عليها تب وكتبت
مرسال للخريف
اهلا اذا ما بادلت فيك الذكرى
والاسم الهلام
اهلا اذا ما حاورت فيك هواجسي والزمن
الشحيح
من بر رحيلى ندهت جاتنى السيرة بنبرة
فرح مضغوط وبشارع مكانو هواك
مكانى الذكرى والوجع الرطيب فى الدم
واتوكا فى سكة خطر
اتوكا ماشبه الكلام فينى
واتوكا فى سكة ودار
اتوكا
اتوكا
لوفينى الجزر اليانعة
والشجر الاليف
من خطوة ليك بعد مداى
وفهارس الذكرى النحيب
|
Post: #2
Title: Re: حنين
Author: zumrawi
Date: 06-19-2003, 00:13 AM
Parent: #1
وبشد على الخاطر سؤال
كملت سؤالاتى القبيل
كمل الصبر من دفترك
جات النوارس خلف در
رحلت سريعة على مضض
فض الخطاب نسمة ومطر
ومعانى مكتولة وجروح
اسفا اذن
اسفا اذن
اسفا لكل مناطقك
للقبر والنعرة الحلال
للالفة مخبوطة فى حجى
للناعى يوم يبسط هواو
اسفا ذكرتك فى الغياب
وانا بيك تميت الحضور
تميتو مشنوق بالعبير
بالفاتوا من عينى واحد خلف واحد
الفين سلاما هكذا
الفين غيابا هكذا
الفين رحيلا هكذا
اوهكذا بحرس رؤاك
من الضجر
واداعبك بنهر متواطى
وخفيف
اول محل ماشفت فيكى البادية
صدانى الخريف
والغابة موال الشهور
اول وكت ماقلت ابداك
التفت فينى النواح
اه واه يابلد
اه واه هكذا
|
Post: #3
Title: Re: حنين
Author: WAD ELGAALI#4
Date: 06-19-2003, 00:14 AM
Parent: #1
والله يا زمراوى روعه فقد لامست فينى وترا منخفى لك تحياتى اخى العزيز
|
Post: #4
Title: Re: حنين
Author: zumrawi
Date: 06-19-2003, 00:16 AM
Parent: #1
تسلم ياود الجعلى وجميل انها وجدت عندك مسمع
الف مرحب
|
Post: #5
Title: Re: حنين
Author: zumrawi
Date: 06-19-2003, 00:24 AM
Parent: #1
محتار اسميك العبور
والسكة مابتعرف حدا
والمطرة جافة من العواطف اخرا
دى المطرة ماكانت كده
وانساك لحظة واعترف
للغيمة انى رحلت الف مكان
بعيدا عن هواجسك وخاطرك
القى المواعيد زى كل مرة
من البداية توضح الرحلة الودار
وتعيد متاريس الضحك لوجهتك
شكرا اذن انا بشبهك
مرات كتير بقسم براي
بالمولى انى بشابهك
وبينا الفوانيس الكفاف
بينا الحروف الذابلة
فى حد الحواف
واتوكا تانى واندهك
ترجع مدن من الفتا
تقيم دهورا فى النحيب
كل الخرط بس زى كده
كل البحار بس زى كده
كل المواويل النهار بس زى كده
|
Post: #6
Title: Re: حنين
Author: HOPELESS
Date: 06-19-2003, 01:57 AM
Parent: #5
Quote:
وبشد على الخاطر سؤال
كملت سؤالاتى القبيل
كمل الصبر من دفترك
جات النوارس خلف در
رحلت سريعة على مضض
فض الخطاب نسمة ومطر
ومعانى مكتولة وجروح
اسفا اذن
اسفا اذن |
جميل جميل واصل ابداعك
يديك العافيه
-
|
Post: #7
Title: Re: حنين
Author: zumrawi
Date: 06-19-2003, 03:02 AM
Parent: #1
شكرا ياهوبليس
وتسلم على الحث والتشجيع
|
Post: #8
Title: Re: حنين
Author: bayan
Date: 06-19-2003, 03:21 AM
Parent: #7
ياسر
فى انشوطة الغربة
والذكريات
شكرا يا ولدى
على ملامستك آلامنا
|
Post: #9
Title: Re: حنين
Author: zumrawi
Date: 06-19-2003, 03:31 AM
Parent: #1
تسلمى ماما بيان
علنا من انشوطة الغربة هذه نكتب لفجر جديد
شكرا جزيلا
|
Post: #10
Title: Re: حنين
Author: مبيوع
Date: 06-19-2003, 06:50 AM
Parent: #1
كلامك سمح يا ياسر
والقبلو برضو سمح
دايرين لينا قعده قبل الصيف ما ينتهى
|
Post: #11
Title: Re: حنين
Author: zumrawi
Date: 06-19-2003, 02:40 PM
Parent: #1
جدا مبيوع
ناخد قعدة قبل الصيف يكمل
وشكرا على اعجابك بالقصيدة
|
Post: #12
Title: Re: حنين
Author: zumrawi
Date: 06-19-2003, 06:03 PM
Parent: #1
رفض الشعر كل القوافى
الماجنة والبحر اللدود
بين غيمةطليت من غياب
ضاعت خطاى على اعتماد
انك اليفة وممكنة
ومتوجه الوجهة الرحال
عادت صور لذكرتك
لطفل ضائع فى خلاف
لغنية بتخاوى الجفاف
لارض ماترحل بلا الدمع السخين
انا وين ومنك كنت وين
انا وين ومنك ببقى وين
مهلا اذا ماعاكست رؤياي
محلة منبعك
مهلا اذا ماداخلت افكارى
بعضا من سحب
مهلا اذن انا بعشقك
الفين سلاما يامطر
مهلا اذن انا بعشقك
انا بعشقك
انا بعشقك
انا بعشقك
انا بعشقك
|
Post: #13
Title: Re: حنين
Author: الفاتح يسن
Date: 06-20-2003, 04:26 AM
Parent: #1
لله درك يا زمراوي اتحفتنا انت من شعراء وادي الدفوفه أم وادي هليل لك التحيه يامبدع
|
Post: #14
Title: Re: حنين
Author: zumrawi
Date: 06-20-2003, 04:36 AM
Parent: #1
وادى الدفوفة الاخ الفاتح يس
|
Post: #15
Title: Re: حنين
Author: الفاتح يسن
Date: 06-20-2003, 05:12 AM
Parent: #1
لوداي الدفوفه سلام ولي كرمه البلد سلام ولأبدله نارتي سلام وسوقدان نارتي سلام وبالله عليك اقرضنا بعضا من اشعارك المدكنه الفيها ريحة الحتات دي ونلبسها لك ألحانا وتسمع ولو لامست فيك حاجة من الحتات دي نعرضها للبورداب عشان يبتو في الموضوع ايه رأيك
|
Post: #16
Title: Re: حنين
Author: zumrawi
Date: 06-20-2003, 05:20 AM
Parent: #1
والله زدت لى اشواقى يالفاتح واخر عهد لى بكرمة زيارتى سنة88وبعدها مامشيت الا اصالتها بحاول استفيد منها فى اشعارى وكويس انك حتمسك حكاية التلحين وانشاء الله
عمل موفق
|
Post: #17
Title: Re: حنين
Author: الفاتح يسن
Date: 06-20-2003, 05:42 AM
Parent: #1
الاخ زمراوي بما انو عنوان بوستك حنين ياصديقي احكي ليك قصة مرة راجع من كرمه البلد بالمركب انا والريس فقط واذا بالريح تجرنا تودينا لي عبدالله نارتي وصعب علينا ان نعدي للضفة الغربية واسدل الليل ستاره وما كان للخضرجية الصعايدة بعبدالله نارتي الا ان يرغمونا بالمبيت ياسلام الكرم الصعيدي الجميل وأول مرة أقرا لقاءا في مجلة صباح الخير مع الفنان هاني شاكر على ضوء اللمبه والونسة دايره والنسيم العليل والشاي الكشري ومع صياح الديوك عدينا للغرب عشان كده ياسيدي الحتات مخزنه في الذاكرة واحن اليها حنينا ماج في صدري على قول الراحل جيلي
|
Post: #18
Title: Re: حنين
Author: zumrawi
Date: 06-20-2003, 06:59 AM
Parent: #1
من وين انت ياستاذ الفاتح
|
Post: #19
Title: Re: حنين
Author: الفاتح يسن
Date: 06-20-2003, 02:20 PM
Parent: #1
الاخ زمراوي صوارده لينا هملي
|
Post: #20
Title: Re: حنين
Author: AlRa7mabi
Date: 06-20-2003, 02:27 PM
Parent: #1
زمراوي
كلما شك مخلب الصدق جسد العاطفة
كلما تحول نزف الجراح .. لعطرٍ فواح
فأنزف بصدق .. علنا نتنسم هذه العطور
لك صادق المحبة
رحمابي
|
Post: #21
Title: Re: حنين
Author: zumrawi
Date: 06-20-2003, 04:35 PM
Parent: #1
الرحمابى
لك صادق الود ولنكن سويا فى تزيين البورد بنفيس الاعمال
الفاتح يسن
مرحب وحباب ناس صواردة واهلين وسهلين بيهم
|
Post: #22
Title: Re: حنين
Author: mustafa mudathir
Date: 06-20-2003, 08:06 PM
Parent: #21
لا املك وقتا لاقول اكثر من ان القصيدة الاولى ان كانت
هذه اشارة صحيحة، هي جد جميلة
|
Post: #23
Title: Re: حنين
Author: soma
Date: 06-20-2003, 08:43 PM
Parent: #1
الاخ زمراوى التحيه لك بقدر ابداعك المكنون
لتحيه لاهل الشمال الحنان كما الصندل المدفون '
لله درك يا ابن الشمال الشامخ شموخ نخيل بلادى
اين مخبىء كل هذا الكم الهائل من الحنان والحنين
بالله عليك اتحفنا ..ولا تتوقف
نحن فى انتظار المزيد
ذكرتنى ابيات عن الحنين بتقول
بحن ليك زى نهارات وكتين تشيل الشوق تضمو
وزى صغيرون فى غربه قاسية بناجى امو
وزى المسافر البعيد وكتين ديارو تهش تلمو
وزى درافين وكتين يهمو
وبحن ليك وبحن ليك
تسلم يا حنين يديك الف عافية يا رب ومزيدا من الابدااااااااااااااع
|
Post: #24
Title: Re: حنين
Author: ahmad almalik
Date: 06-20-2003, 09:29 PM
Parent: #1
زمراوي لك التحية علي هذا الشعر الرائع الذي اعاد الينا ذكري ايام انطوت في عتمة الذاكرة، كرمة مدينة تثير في النفس ذكريات كثيرة لابد انك زرتها ايام الفيضانات والسيول عام 1988 زرتها انا بعد ذلك ربما كانت اخر زيارة عام 1998 وقبل ذلك اذكر اننا حضرنا فوق الدفوفة محاضرة قيمة للبروفسور شارلز بونيه الذي يواصل اعمال التنقيب عن الاثار في منطقة كرمة منذ عدة سنوات ، له التحية ذلك الرجل العالم العظيم الذي يبذل الكثير من الجهد ليكشف لنا خبايا تلك المنطقة العامرة بتراثها واهلها الطيبين .
،
|
Post: #25
Title: Re: حنين
Author: خضر حسين
Date: 06-20-2003, 10:59 PM
Parent: #1
الأخ زمراوى
شكرا كثيفا يا شفيف
.ـ.ـ.ـ.ـ.ـ.ـ.ـ.ـ.ـ.ـ.ـ.ـ.ـ.ـ.ـ.ـ.ـ.ـ.ـ.ـ.ـ.ـ
البلاد التى ضيعت خاتما، البلاد التى دائما
ستظل محنية، فوق الجثث
ونحن سنبقى هنا، هناك، سوف نعلو
بالذنوب الخفيفة فوق هذا العبث
|
Post: #26
Title: Re: حنين
Author: zumrawi
Date: 06-21-2003, 01:29 AM
Parent: #1
مصطفى مدثر
شكرا جزيلا كنت اكتب الجزء من القصيده وانزله فى البورد واعود لكتابة الجزء الاخر ربما اخل ذلك بالنفس
شكرا وتسلم والبريد الذي اعطيتنى اياه لم يدخل فى مسنجرى وكانت الرسالة انك لاتملك النت باسبورت لاعرف
ماذا يعنى ذلك وربما لانك لست مشتركا فى الهوتميل
سوما
تسلمى ياسماء على اعجابك بالقصيدة واعجابك باهل الشمال وهذا يسعد الابيات التى كتبتيها رائعة
والحنين اصل فينا اليس كذلك
احمد الملك
انت زرت كرمة اكثر منى وتعرف عنها اكثر منى قضينا ضحى
فى ارقو وكان ضحى سعيدا
نعم زرت كرمة بعد الفيضان وسعدت بقدرتهم على تحمله
كيف هى اخبارك واحوالك ...
عنوانك على المظروف المرسل لى غير واضح...
خضر حسين
تسلم ياانيق الفعل وشكرا على اعجابك بالقصيدة
ودائما نحن معكم
|
Post: #27
Title: Re: حنين
Author: أبو ساندرا
Date: 06-21-2003, 05:42 PM
Parent: #26
زمراوي
نتابع مساهماتك الرائعة ، ونقدر جهدك المبذول هنا وهناك ، ونعتذر عن تقصيرنا في الرد والإكتفاء بالمتابعة ، بالكاد نلقى وقت للردود
يا صديقي إعتمد على الحنية لن تأتيك الطعنة من تالاها ، ولا تندم
لنا عودة في البوست السابق
كل الحب
|
Post: #28
Title: Re: حنين
Author: هدهد
Date: 06-21-2003, 08:54 PM
Parent: #27
العزيز دوما ياسر
اني افتقدك بشدة... وحين قرأت هذا النص كنت غائباً اعد نفسي للمشاركة في بوست عجب الفياحول البنوية والرد على اسامة الخواض
وكان السبب هو دعوتك الرقيقة لنا بالمشاركة في نفس البوست بالاضافة الى عدم الاستقرار حتى الان وذلك ناتج من الراهن المحيط
عموما اتيت انت بحنينك لكي تربكني بشكل فرضي / انساني وتجعلني ابحث عن نفسي بشكل او بآخر في ظل من الغيظ المتدفق مني نحوي ونحو الآخر الذي لابد ايجاده في ذاك المحيط
القصيدة صرخة عميقه دون ولولة... مكتوبة بانا جامعة بما يعني صوت الصرخة المحدد يشمل الآخر.. ويفتح كوة في صدر اي كائن حتى ولم لم يكن متأثراً بشكل مباشر بالحنين... من منا بلأ حنين الكلمات متداخلة ومتميزة ويوجد تعدد دلالي للكلمة الواحدة يؤدي كله الى حالة واحدة القصيدة دافئة برغم تغلب مافيها من درجات لكنها درجات اتساق لوني عميق هاديء جدا ولكنه حنين عنيف.. وليس هو ذلك العنف ولكنه هو
كم انا متؤتر الان
دعني اعود اليك لاحقاً
انه الحنين ايها المتسق مع ذاتك
|
Post: #29
Title: Re: حنين
Author: Hozy
Date: 06-21-2003, 08:59 PM
Parent: #1
كلمات حنينة برضو يازمراوي
الى الامام اخي وتحياتي
|
Post: #30
Title: Re: حنين
Author: zumrawi
Date: 06-22-2003, 05:03 AM
Parent: #1
ابوساندرا شكرا على كلماتك
وانما ان اصنع من الكلمات لغة جميلة تزيل مابنا من رهق ....
هدهد
كم اشتاق لحواراتك اين انت وانا اغنى مع مصطفى
ياهدهدى المهدود عساك طيب
تقول ان الراهن المحيط ابعدك ولاشك لمن يتحرك من بلد
الى بلد ويكون الله فى عونك وانت تستقبل الارض الجديدة
تحليلك للقصيدة اعجبنى وهذا التعدد الدلالى للفظة
من عمق المعنى بعدنا عن البلاد وعن الصبيات التى يغزلن
الحسن ولكن تحضرهن القصيدة
عساك طيب واراك
هوزى
شكرا على كلماتك الرقيقة واعجابك بالقصيدة
|
|