سؤال .. : هل وجودي في البورد غير مرغوب فيه أم ماذا ؟

هي ليست شكوا ... هي عتبة لمن في داخله براح لبعض العتاب الجميل
في البدء حين يممت كلمي ناحية البورد كنت أتوق شوقا ( للإنسان الإنسان الإنسان )
ارتضيتموني بين ظهرانيكم كان أعلان الفرح الأنيق فيني
وأرتضيت لنفسي عهدا لكم أن تكونوا مرآة لي بكل ما أحمل
وكان البدء مساحات اللقيا الأولى حتى جاءني من حيث لا أدري السيد أساسي
يبدوا لي أن السيد أساسي لم يعجبه بوستي ( حنكوش جدا ) و لا اعتقد أن أحد منا مطالب بإرضاء الجميع ولا أعتقد أيضا أننا مطالبون بالرد علي بوستتات الجميع فأي موضوع لا يشكل لك اهتماما أنت وأنا في حل من الرد علية
أليس هذا هو العرف ها هنا .
وكان من الممكن أن اتقبل الردود المبطنة بالقسوة إذا كان المقصد منها إضافة فكرة ما .. كما حدث لي شخصيا من الجميل الخواض والرائع السمندل فحين أخطأت أنا عرف البورد ورفعت بوستي بنفسي إلى الأعلى وفي بالي فكرة أن أتيحه للجميع لمحوا لي وبشيء من القسوة إن ما أرتكبته خطا وتقبلت الأمر بجزيل الشكر
أما السيد أساسي فكان رده عي بوستي ((وفرحان خالص يا روح ماما جاي تحكيها للناس في البورد ))
تعاملت مع الأمر بإفتراض حسن النوايا وحسبت انه نوع من المزاح الثقيل فكان أن كتبت له قال أساسي قال ( أقسم بالله العظيم ) أن لم أكن أقصد أكثر من الدعابة .
ففوجئت بردة كالتالي
(( زوربا
حناكيش عملوا مظاهرات جابو ليهم بوليس الحركة (المرور) يفرق المظاهرات .
يلا يا روح ماما اشرب الحليب ونوم البوست دا للكبار بس ))
كان من الممكن أن أتقبل الشق الأول أما الثاني
كنت ولا زلت آمل أن يكون البورد إضافة فعلية لمعارفنا التراكمية في مختلف المجالات
ووطن بمعني المنتهي من الفرح .. أما أن يصبح جرح جديدا فنحن ملآي بجراحات الغربة والزمن الملامحه معكرة و المساحات لم تعتد تحتمل حزن أو بكاء
لكل هذا السيد أساسي : إذا لم تعجبك بوستاتي فتجاهلها أو علي الأقل أحترم مشاعر الآخرين
وإلا فلك البورد ولي الذهاب القسري ولا عزاء بعد مراسم الدفن

الاخ/ زوربا

اولا كل التحايا لك وكل الود
ومرحب بيك بينا في البورد
اخ وصوديق

هنالك بعض من الناس لاهم لهم سوي الدخول في البوستات
وخلق وتفعيل البلبله من اجل المجد الزائف
وتجدهم بكثره 24 ساعه في اليوم ، 7 ايام في الاسبوع
.وح تلقي رقم بوستاتهم بالالاف الولفه ويملأون البورد زعيقا ونعيقا
لا تكترث لهم وواصل مسيرك فلا حق لاحدهم في هذا البورد اكثر من الذي .....لك

ودمت




ابونور

الاخ زوربا

نعم أنا جديد ولكن دخلت لكي ابقى لأنني اعتبر
بأني جدير لأن اكون بين الموجودون هنا على
إختلافهم فكرا وفهما وعلما واختصاصا فاما افدت
أو استفدت فحري بك ان تتوقع كل شئ وترد بهدوء
ولكن ما دعاني للكتابة لك هي حساسيتك المفرطة
بدليل ان
فقط ومن شخص واحد كان اول حلولك الانسحاب
قارعه الحجة وجانبه الصواب في القول وبذا
تكون قد اصلحت من لفظه

ود الشيخ

ابقى زوربا وركز شديد على كلام ابونور وودالشيخ

الاخ زوربا
سلامات
يا عزيزي هذا البورد حياة بكل تفاصيلها، فهل لك ان تتخلى عن الحياة بمجرد ان تعرض لك شخصا ما؟ لا اظن فما اكثر الذين يتعرضون لنا في خضم الحياة اليومية0
هكذا البورد يا عزبزي، فتجد فيه من يعجبك قوله وتجد من يختلف معك وستجد من يسيئك، وستجد من يمارس ليك ارهابا فكريا0 00 يجب ان تكون انت ولن يملك الباقون سوى قبولك كما انت عاجلا ام آجلا0
وختاما لا املك سوى ان اقول ليك مرحبا بك بين اخل البورد 00 واكتب ثم اكتب ثم اكتب ثم اكتب، ما بقي فيك نبضا للحياة0
وعظيم سلامي
عبد الخالق السر

زوربا
والله معك حق
نحن فعلا كنا قاسين ، قاسين جدا
وأنت إنسان رقيق وتحملت منا كل هذه القسوة
لك كل الحق فيما قلت
ليس لنا ما نخفي به قسوتنا عليك
لكن لا أجد لها علاجا
قابلك الناس بكلامهم على عواهنه
لم يغربلوا حديثهم القاسي
لا أجد لنا عذرا
إلا أني أرجو أن تعرف ، أننا نقدرك
نسعد بوجودك
نحترمك
نتمنى أن تستمر معنا
ربما للبوست الذي كتبته وطريقة تناول الناس له هي مجلبة هذه القسوة
أرجو أن تجد لنا عذرا
فلا أجد أنا لنا عذرا
أرجو أن تعذربنا
فلا أجد أنا لنا عذرا
أرجو أن تقبلنا أصدقاء لك
قراء لك
أخوة أشقياء لك
فقد فشلنا نحن في الحفاظ عليك
أرجو أن تبقى معنا

العزيز زوربا


لن ازيد علي قول عطبراوي وودالشيخ واهل العوض كثيرا


بل اوكد لك ان وجودك بالبورد مرغوب فيه جدا
وهذه المناطحات دائما تحصل مع المرغوب فيهم جدا

فارجع البصر كرة واحدة وشوف براك

اضم صوت اعتذاري مع اهل العوض
ولكنا الاثنين لم نكن نقصد سوءا
في مداخلاتنا معك
ولا اساءة
ولا قولا مبطن

ولك العذر مني

اخوك جدا

ابويارا

زوربا
ما تهتم مادام فى ناس فاهمين ما لازم تفهم كل الناس
وطول بالك على اخوانك وسوف تجدهم ان شاء اخوان جد
وتسلم يا رائع
ودعقاب

يا زوربا لا تقسو على نفسك بهذه الطريقة
ولا تحمِّل الأشياء فوق ما تحتمل لدرجة أن تصنع منها سوطاً لجلد الذات ـ أو حتى جلد الآخرين ـ
اكتب ما تشاء ، ووقت تشاء
وصدِّق ما قلته لك ذات يوم : نحن قراؤك المنتظمين

الى الأمام ايها المبدع
ولا تلتفت الى الوراء إلا من اجل ان تصحح الخطى

ـــــــــ
السمندل

سلام مربع

زوربا السوداني الشفيف


هنا عالم حقيقي ..
هنا تشرق الشمس مرة
لكنها ابدا لا تدنو من مغربها
لذلك احتدام الصراع
سيقوي من وجودنا
ويقوي من وجود البورد نفسه
لذلك اخي زوربا
امسح شقاؤك على عصب رؤسنا
واكتبنا كلنا
بحبر من الحب
وتناسي بقسوة كل ما يدعوك
للانفلات خارج سرب البورداب
انت جديد وفعلا
الحاجات الزي كده بتزعلك
لكن اساسي ،
ليس دفاعا عنه
بحب يغلف مشاعره بهذه القسوة
رغم ملامح الطيبه التي تخرج في كثير من الاحيان
من جلد حروفه
وانا حاسه كده انو هو ذاتو
حنكووووش

الليله ووووب علي
مايقوم الود الشكال دا يجي يشاكلني
ياجماعة امانة عليكم لو الود الشكال دا
جاء يشاكلني شاكلوا معااااي

عزيزي زوربا لم تستعجل الهروب
لا يا صديقي ان جاز لي هذه التسميه
ابقي بيننا ما بقي للشهيق مدخل وللزفر سخانه الدواخل
وعن اساسي اسمع كلام شيري بت امي شيري
او كلام اهلنا .. الفيك بدربو

شيري انا غايتو غطستا معاك
ويحلنا الحله بله

بسم الله الرحمن الرحيم

المرهف زوربا
سلام وترحيب

أنا شخصياً قبل كدا في واحد رد لي رد في بوستي ما عجبني فرديت على الجميع وفطيطو ما علقت على ردو

ما تخليك زول حساس شديد

وانتما ياروحا ماما الإتنين أشربا اللبن الصافي دا عشان تتصافيا

لا اله إلا الله محمد رسول الله بالله الف الإتنين دا أخير منو واو الجماعة قوم نفسي

أنا حا أطل كل يوم لمن أساسي يعتذر أو يرضى زوربا

الاخ زوربا

قلت ليك قبل كده انو اسمك عاجبنى
ليه..يازول
البورد ده اعضاءه كتار
حتى لو ما كلهم بيتفاعلوا مع الاحداث بالردود
الا انهم موجودين وبيستمتعوا فى صمت
وزى ما ما شايف فى ناس نيتهم صافية زى اهل العوض ونزار ما قالوا

رغم انو انا برضو جديد لكن بقول ليك زى ما قال العطبراوى اكتب .. اكتب
وفى كترين مستمتعين بكتاباتك
وجودك مرغوب فيه



وما تخليك حنكوش

العزيز ذو الإسم الأعز زوربا
من هو الذي يحدد هل وجودك مرغوب فيه أم لا؟ هذا بوست حر يختار فيه الواحد مننا ان يشارك أو لا يشارك.. ولتجعل هدفك الأول في الانضمام هو هدفك النهائي ..
مافي شئ تغير، ونصيحة اخوية.. اتمنى ألا تفرض ان الجميع يفكرون بنفس طريقة تفكيرك.. وأنك لا تستطيع ارضاء كل الناس، فحاول حسب ما المثل بيقول إرضاء بعض الناس
ودمت

عهدي بمجتمع الجامعة ليس بعيد افتقده احيانا والمعروف ان الدراسة في الجامعة تسمي الحياة الجامعية لانها حياة متكاملة فيها صداقات وزمالات وقفشات وثقالات ومقالب وفوضي وجدية وسياسة ورياضة ودراسة ولهو اي مجتمع متكامل من الجنسين ,وجدت هذا البورد شبيها بتلك الحياة التي استمتعت بها ايما متعة فقد كانت زكريات الجامعة من اجمل الزكريات. في هذا البورد نجد اننا صنعنا عالم من الاثير الشبيه في نظري بتلك الحياة فكل بوست يمثل منحي مختلف فبامكانك ان تشاهد ركن نقاش وبامكانك ان تتابع اخبار الرياضة والفن والشعر والموسيقي والادب وكل ضروب الابداع الحياتي حتي المزاح واللهو والقفشات موجودة في هذا البورد .
بعضنا يفترض في حياته الجامعية الجدية والتحصيل هما هدف حياته وهؤلاء الاكاديمين والبعض يريد ان يؤهل نفسه ليكون كادرا سياسا ورقما مهما في السياسة والبعض يبدع في ضرب من ضروب الرياضة والبعض يجود قوافيه الادبية والثقافية ...الخ هذا العالم المختلف تربط بينه الزمالة المحضة فمهما اختلافا او تقاطعا في الافكار في اول لقاء لهما بعد الجامعة تجدهما يحنا لتلك الايام ويسردا زكرياتهما الجميلة عن تلك الفترة وفي نظري هذا البورد هو حالة مشابهة في اذهاننا لتلك الحالة
في خضم كل هذا نجد اصناف البشر المختلفة فهناك من لا يعجبه العجب ولا الصيام في رجب وهناك الساخر اللاذع وهنا الطيب الوديع وهناك غير المبالي ولا تهمه الامور وهناك الاكاديمي المتفرق للتحصيل وهناك المختلف مع ظله في كل شئ وهناك الذي يتعاطي مع اكثر الامور جدية بلا مبالاة عالية وهناك الحساس محمد حساس وهناك الدمه تقيل وروحه محرقاه مستعد يشاكل ظله وهناك ..وهناك ...الخ
في نظري الشخصي ان الامر مشابه لهذا في البورد لذا اخوتي ان اخذ الامور علي محمل شخصي هو من المغالاة وتحميل الامور اكثر مما تحتمل خاصة وان تعارف البعض من خلال احرف لا اكثر وايضا الحالة النفسية التي يكون عليها كاتب الحروف احيانا تؤثر كثيرا علي اخز الانطباع عنه واعطاء رايا بالتناقض احيانا فاحيانا ااتي الي البورد وليس في مزاجي الا قراءة بعض الاشعار والرومانسيات واحيانا اخر ااتي والشرر يتطاير من عيني واحيانا ااتي الي البورد والروح المرحة تتقمصني واحيانا اخر اللسان اللاذع يخرج نفسه ليسخر منك نفسك وهكذا
عموما في نظري ان الامر في هذا البورد يحمل احيانا محمل اكثر مما يطيق فلا هو حياة واقعية نعيشها ولا هو فعل ذو اثر محسوس في الواقع حتي يؤتي اكلا ولا ولا . . الخ لذا اخوتي ما رايكم ان ناخز الامور ببساطة ونتعامل مع الواقع هنا كما هو ولا نفترض في هذا البورد حياتنا اليومية التي افتقدناها في الواقع ونحاول ان نعوض عنها هنا فلن يكون المنبر يوما بديلا لحياتنا والباندوث يشهد علي كلامي والسيرفرات واذا لا سمح الله توعك بكري يوما وخلص الباندوث ماذا نفعل هل نموت
اخوتي هذا بمثابة اعتزار عام لكل من في نفسه شئي شخصي تجاهي اذته كلامتي او كدرته او حملها محمل شخصي فلله العفو والعافية واخص هنا الاخوة زروبا لاخذه بعض الامور علي محمل الجد فكلماتي حين اخاطب بها لا اعني سوي هذا النك نيم امامي ولاني لم اري صاحيها ولا اعرفه فحتما انا لا قصده لذا اخوتي هلا وسعتم مدارككم
وختاما اوعدكم وعدا جازما اني ساسعي جاهدا لاظل انا كما انا عليه فهذا يعجبني واوعدكم انه متي ما سنحت للساني فرصة فسوف يلذع ومتي ما حانت طرفة سوف يطلق ومتي ما راي ان هناك اعتزار فسوف يفعل والله ولي التوفيق
ملحوظة يا روح ماما
في زول مقاش رجله ستة واربعين يكون روح ماما ولا خالها
يود ما تبطل حنكشة
لكن يا شيري وخواض قصة انا حنكوش دي عجبتني جدا
ابو نور يعني عشان نزلت بوست فيهو تكرارك للقصة حاقد علي كدا يازول انت ابل مالك حاقد كدا

زوووووووووررررررررربااااااااااا

أهدى شوية .. مافي داعي للحسحسة

دي ضريبة البوردات ... معظم الهنا ديل دفعوها ... ومازالو متواجدين برغم التضخم الإقتصادي الحاصل.

شوف الناس الفوق ديل ....
حونااااااااااااان زي ديل تلقاهم وين .... مهما لفيت برضو حترجع ليهم ... مافي داعي إتعب نفسك ....


روووووووووووووووووق المنقة ....

وسمعنا طارك .......
والما عايز يسمع يشوف ليه قطن يسد بيه إضنيه.

الصديق زوربا

واصل فى ابداعاتك

زوربا

او

زوربا الحنكوش

امتع من لحظة تناكف ..وتتناكف مع اخوانك الظاهر لي في الدنيا دي مافي ..مافي اجمل من كده ..وهنا الوضع الطبيعي ..للأسرة ..بي كل معانيها الجميلة ..الشلة ،الأخوان ،،، الأخوات ،،الخالات ..الخ
وبعدين كمان حتي الاساتذه المرعبين في ..والناس المكربناتيه في ..والغياظين في ...
واساسي ده ...الله يديهو العافيه قلنا ليك زول شكال ماركة مسجلة ...لكن جميل ..انا شخصيا ما بخاف منو زي وشيري ..لانو صاحبي ..شفته كيف ؟؟صاحبي الا يقوم يتقابي فيني العرفه ..المهم ما تتحسس يا زوربا
وخليها قاعده ثابته عندك المكان ده رغم مافيهو من اي شي ..احيانا بيكون صعب الاحتمال ..الا أنو المكان الوحيد الممكن يعيد ترتيبك ..ويعلمك اشياء كتيرة في الدنيا ام قدود دي
كن هنا
نكون معك

ينصر دينك يا اساسي ... ما قصرت تب


زووووووووورباااااااااا

اها ... بعد ده ما ظنيت يكون عندك حجة تانية ...

يلا قوووووم سخن طارك ده وسمعنا ...

قال اساسي قال

عهدي بمجتمع الجامعة ليس بعيد افتقده احيانا والمعروف ان الدراسة في الجامعة تسمي الحياة الجامعية لانها حياة متكاملة فيها صداقات وزمالات وقفشات وثقالات ومقالب وفوضي وجدية

اها يا حنكوش ماما اجهز ليك البزة وعلى السرير
شنو عهدى بمجتمع الجامعة ليس ببعيد
يا ود النهار دا ؟؟
والله يا رومانسي تزعل اضرب ليك تلفون


زوربا
والله حبابك عشرة
ومقامك زين
وقنب طولا
انا شخصيا عندى مشكلة بعتبر اى زول جاى هنا
زول فطحل كبير ما محتاج لترحيب وتصفيق
وكمان بعتقد انه من المحاربين القدامى الذين تغيروا من السلاح الابيض للالية الحديثة .. فاهمنى ولا اعيد
وزى ما قال الاخوان الف مرحب بيك ووسط البروتاريا والبرجوازية والطائفية والتقدمية والحنكشة والشماسة
ما ياهوووووو دا السودان

تحياتى

يا تبلدينا الناس بتتحنكش عديل ما قلتو حاجة
نصغر لينا كان خمسة كان سبعة سنوات
تقيفوا لينا في حلقنا
ياخي ما تضرب لي تلفون بدون زعل
شفتني طيب كيف ما وريت الناس انا قلت ليهو كلامي الزعل منه دا لشنو
وهو ما جاب ليهو سيرة زاتو لكن في داعي تحكها معاهو
لووووووووووول
قال زوربا قال
يا روح الموز

البورداب الأعزاء :
أبو أنور : ود الشيخ : زمراوي : عطبراوي : ود عقاب
كنتك كنتم وكنتم ولا اعرف ماذا كنتم غير كل الجميل
أحبكم جدا
أهل العوض العزيز : أما أنت . أقسوا ما تشاء . في زول سالك هسة
نزار سليمان : أقبلني عندك صديقا
السمندل الجميل : نلبس جبة الكلمات كي تبدوا ملامحنا .. ما عارف حكياتك معاي شنو ؟ أنت قايلني بلطجي مرة ساكي الناس بهرواة ومرة جالدهم بسوط ... هو في شنو ؟؟
الزولة جدا شيري : شكرا جدا والله ما يجيب شكل بسببي
الوضاء فيني حد الفيض : الفرح الحقيقي عندما نتاديني صديقي
بدر الدين ( السمح ) : أسامة حسن احمد : رجاء
دمتم كل الغناء الأصيل فينا
زيدون والشريف : بكم نكون
tabaldina
tmbis
شكرا جدا لكم واتمناكم دوما بخير
السيد أساسي :
لم اطالب ان تكون غير ما تشاء .. لك مطلق الحرية في ان تختار ما تكتب كما هو الحال لكل البورداب ... فقط لاداعي للتجريح
عموما لازالت الحياة الجامعية كما قلت عالما متكامل بكل ضوضاءة
لكن صدقني حتي في هذا العالم لا اقبل الآ بالجميل منه
كن كما تشاء وشكرا علي اهتمامك

يا طيب
نصيحة من اخوك دكين
دكين المافي زول مالي عينو هنا...

لاهنا ولا في اي حتة تانية..


ما تخلي البورد لامن يقولوا ليك خلي البورد
...
خلي البورد وكت تحس بانك مفروض تخليهو

دكين الما ماليو عينو زول :
تفتكر أنو الواحد ممكن أهجر بلده بعد كتر معاناه ... البورد وطن
لكن الافتراض أنو وطن شديد الجمال
أشكرك جدا

دكين الما ماليو عينو زول :
تفتكر أنو الواحد ممكن أهجر بلده بعد كتر معاناه ... البورد وطن
لكن الافتراض أنو وطن شديد الجمال
أشكرك جدا

الاخ زوربا
بالاش تفارق خليك هنا
تعرف اصلو البورد اجمل مافيه انو ذى البستان تلقى فيه كل الزهور وممكن تقول بيت الشاعر ايلي ابوماضى
يصور حاله
وترى الشوك فى الورود وتعمى ان ترى فوقها الندى اكليلا
وبرضو انا ممكن تقول على دخلت فى هجير شهر مايو وتمتعت بنسائم البورد العليلة
فكافنا الله الهجير
ولك التحايا
@@@@@@@@@@@@

كم لظلمة الليل من بهاء
ولكن كثيرون حولها الى ارتكاب المصائب