نصوص شعرية للاطفال ...... محجوب شريف

نصوص شعرية للأطفال
محجوب شريف

كدي سي

كدي سى حبا حبا
الحبوب حبا .
. قولن يا سلام
أهلا ومرحبا
حق الريدة ليهو
وحق التبتبا
فرهد بيتنا ولع
واخضر النبا
ما بكبر مدلع نادوه وأبا
يقعد بكره .. بهمه
جنب الكمبيوتر
ويمشى المكتبة
كدي سى
حبا حبا حبا

اشتقت ليك

اشتقت ليك أقدمك
اشتقت ليك اجضمك
اشتقت ليك أرسلك
قدامى تجرى احصلك
للروضة تمشى أوصلك
مرات أفكر ريدة بس
لمن تقومي اكسلك
كبرت سافرت وبقت
بيناتنا لاسلكي وسلك


احمد جا

احمد جا ..احمد جا
نكتب اسمو نتهجا
ما قصر معاى في البيت
ولا خلانا نترجا
فالح ربنا يخلى
ومن شر الكضب نجا
أبوي أنا جدكم ربا
زمانك نوموا وحجا



دق دق أدق

دق..دق..دق
أدق دق دق
عندي مدق
سمح للدق
بكره يا ناس
حلو كالأناناس
وكمان وناس
ويقول الحق
يقرا الفى الرف
ما بشق الصف
مابختف كف
وعلى قول الناس
لا شق لا طق
ادق ادق ادق
ادق ادق ادق


لحظة الميلاد

في اللحظة ديك والتو
لحظة الميلاد
كنت نقطة ضو
فرهدت بيك فرهيد
وانتشيت بالريد
وطرت بيك الجو
قالوا أيضا بت
قلت مالو ولو


واحد اتنين تلاتة

واحد أتنين تلاتة
عن ساعة الرضاعة
كل سحابة جاتا
القمرا بتريدا
والقمرية ذاتا
تنجح في دروسا
وتلقى شريك حياتا



عز التبتبة

بشوفا عز التبتبة
بتي البريدة مرتبة
دولابا داك والمرتبة
جات من قبيل من مكتبا
أدت أبوها مرتبا
سددنا دين دكان حسين
كستني توب
نجدنا كم كم مرتبة
جيهت بيتنا القديم
السقف داك والمصطبة.


شبت وحبت

شبت حبت وحبوها
وشالت ختت ما انحتت
لمت كل البشتت
ربت ذي ما ربوها
ولا من همس إذا مرت
ما منطلقة وجابوها
تضاري الشمس إذا حرت
تغطى أبوها وبابوها


طيبة

طيبة حبيبه وبتشارك
الناس آلامها وأوجاعا
بتقلق نومك روشتة
في ايد آلام الملتاعة
وطنك والدينك ودينك
كل قطرة دم من دمك
كل نقطة ضو شفى عينك

في النفس الطالع والنازل
تلقاهو محل ما تقبل
ومحل ما تمد ايدينك