يا بكرى قول ليها دقى راسك فى الحيطة .. .. ولا

عذاب ارتيقا ولا انا …. بورد بكرى ولا هنا

*******************************************
رب ضارة نافعة …. ينطبق هذا القول على غياب بورد هواري بعد ان

اعتدنا عليه لدرجة الادمان ، وتكمن المنفعة فى انه وبعد ان جدد فينا منتدى المشاعل روح الكتابة وتبادل الاراء وابراز الافكار فكان اختفاء البورد بمثابة الدافع الذى دفعنا لطرق ابواب المنتديات الاخرى وكان ذلك العذاب اللذيذ .فهنالك منتديات تضل طريق الرجوع اليها وثانية تراك بها غريب اليد واللسان وثالثة يضيع فيها احساسك بموضع ذاتك واخرى تحكمها الخصوصيات ولايسمح لك بالدخول من ابوابها وفى هذه نتوقف لاحكى لكم قليلا من الطرائق والمغامرات.
فى هذا البورد صاحب الباب المغلق اعتدت انا اجمع كميات من الطوب ورصها فوق بعضها البعض بكل حرص لاقف عليها واستطلع مايدور بالداخل من خلال الشباك، وكثيرا ما استفزتنى بعض المواضيع واعجبتنى بعض الافكار وابدأ بالتفاعل معها لكن اهتزاز الطوب تحت ارجلى يذكرني بوضعي فابتلع حسرتي واعود للفرجة مرة اخرى وما ان يظهروا ناس (رحبو بى جديد لنج) هوووب اتلب وجرى على الباب ووحاتكم ياها القفلة الخليتو فيها .. الناس ديل تدخل كيف؟ ربك يعلم واشوف ليك الورقة ملصقة فى محلها (عفوا .. اقتصر الدخول على المبدعين فقط) ومختَبر الابداع دا ماعرفنا وين !! وقال ملكة سبأ قال انا عفاريت سليمان مايدخلنى . اها ارجع تانى ادىليك طوبى داك رصة ومن محلى دا ماقصرت حفظت كل انواع المجاملات يامبدع يارائع وبالمناسبة الكلمة دى قعد تقوم شعر رأس صديقنا علاء ولو معاى ماكنت عارفة عمل شنو ، واصبحت خبيرة بفنون الشكل (بالفتحة) وشيلو شيلتكم ، وفى حاجات فعلا رائعة تستفيد منها وتستمتع بالحوارات الموجودة فيها وحاجات توجع مصارينك وبلا تشعر تكابس الكى بورد لكن الله يلعن ابو قلة الحيلة.
المهم كلو يوم فى الحالة دى لما جاء يوم اشوف ليكم صاحبنا ارتيقا شوف الشقية وطبعا ما استغربت فامثال ارتيقا تفتح لهم الابواب على مصراعيها .. لكن المحيرني الزول دا شايل شنو كلو يوم ونفسه قايم جارى من تحت لفوق ؟؟ اليوم دا قعدت انتظرته لآخر اليوم وطبعا كاتلنى الشمار ولما استفسرته والله خفت على الراجل مايصاب بغضروف فى عز شبابه ، القصة ياخوانا انه لما يكتب بوست ويعلقه فى البورد لازم يعضى جلابيتو ويجرى وراهو يحصلوا فى اخر الصفحة ويرفعه تانى وإلا وصل الصفحة العاشرة زى ما قال. نقعد نتشاور ونتفق انه يكتفى بالرد فقط الى ان يبدأ يلمع نجمه … اليوم التانى ادخل او بالاصح اتاوق القى ليكم زولكم مطيرة شكلة لرب السماء .. ((والله فطيتنى آآى فطيتنى عديل كدا )).. هى يا ارتيقا الحاصل شنو ؟ - ((الزول دا رديت ليهو بعشرين سطر فطانى واجاب للبعدى وقال لى ماشايفك)) !! وما يرتاح الا يلقى ليهو جماعة معلنين العصيان على الشلليات والتعنصر والبوم داك يوم عيدو وفش غبينتو…
اخيراً قررت انه لابد من مؤازرة صديقى ارتيقا من الداخل واخبرته بانى سوف اغير اسمى لعشة الفلاتية وعليه ان يخبر الموسيقار بانى قمن من (التُرب) ولى عظيم الشرف للانتماء اليهم ((لاحول الله!! دايرة تفتنينى مع نجوم البورد)) دا كان رد ارتيقا المحبط ، لكن مازلت عند تصميمي ورأيت ان الحل فى ان اركز جهدى ووقتى فى ارسال الرسائل لصاحب البورد عسى ولعل ان يلين جانبه فاحبطتنى مرة اخرى بقولة ((والله انا الرسائل الرسلتها لبكرى مارسلتهن لما كنت بحب)) بدون فائده .. هى لكن الحل شنو ؟؟ وبعد مشاورات ومداولات رأينا ان تتدخل لجنة وساطة رفيعة المستوى بزعامة العمدة قرشو .. وظللنا فى انتظار العمدة لعرض الامر عليه.
بينى وبين نفسي قلت اترك ارتيقا منتظر وانا برااااحة امشى اتاوق واشوف الحاصل من الشباك للمرة الاخيرة .. وقبل ما ارفع رجلى اسمع ليك المسلسلات مدورة دكين وماتعرف شنو والافلام الاجنبية والعصابات والثورة واطفال الحجارة …. الشمار خلاااص كتلنى مسكت ليك الطوب نقصته بحيث الجماعة ديل مايشفوفو رأسى وشغلتهم ليك رادى وبقيت اتصنت … فجأة اسمع لبكم صوت مايغبانى (( آآى فى تعنصر ولللللللللللل ماتعرف شنو)) لا لا انا اكيد مابسمع كويس ارتيقا البدخلو هنا شنو ، لكن ياهو صوته وقلت اقطع الشك باليقين واسندت مرفقى على حافة الشباك ونطيت لفوق وقدر ما طاولت ومديت راسى مالقيت ارتيقا وسط الزحمة دى لما الجماعة قربوا ينبهوا لى … وعووووووووووووووك … يابو مرووووووة !!! الطوب وقع والجماعة ديل علىّ الحلف عندهم نبل وكان جانى حجر طاير فى عينى عاد يحلك منى الحلا بله يابكرى ود ابو بكرى …

ملكة سبأ

الاخ / بكرى
ملكة سبأ من على شباك المنبر:السوق العربي دا لذيذ لذة
فى البدء اعتذر عن عنوان البوست وما قصدت غير لفت النظر

وهذا نداء ثانى منى بعد اخونا فتحى البحيرى للنظر فى امر

الاخت ملكة سبأ التى ارهقتها المتاوقه على قولهاواتمنى منك

الاستجابة

ياجماعة كدى سيبكم من رودا

دى شويه وادونا يدكم

اسمع ناس البورد ما فاضين
من رودا
وبكري بفتش في ناس الامارات
وصور الارشيف
ما فاض ليك الا انا المتابع موضوعك دا
وعندي ليك الحل
اها يا ارتيقا
انا ببيع ليك الباس وويرد باسمي البكتب بيهو دا
وبتنازل ليك من اي حقوق ومتعلقات
كان موافق قول موافق
عشان ارسل ليك رقم الحساب ونتفق علي المبلغ
شيكات وبطاقات ائتمان ممنوعة
الكاش بقلل النقاش
اها قلت شنو

ارتقا يا اخوى
الناس هنا تحب المشاكل الكلام متفق عليه
ودعقاب

الاخ ارتيقا

لك التحية والود

قرأت مقالك من البداية وساعتها تحسرت على نفسى لاننى من جلب لكم النحس فى ذلك البورد الراقى الذى يخلو من المشاكل والانحرافات عن المزاج العام ورغم تحفظاتى على بعض من قولك ان هذا البورد للمبدعين فقط فهو يحوى قرشو السجمان الرمدان ولكنى اعترف اننى ساعة تسجيلى كان مطلوقا وهاملا يسجل فيه كل من يشاء ساعة ما يشاء ولذا تجدنى هنا اما ذلكم الرائع فوالله يجل عن الوصف من جمال ما فيه من مواضيع اكثر من رائعة ولو احتج البعض على هذه الكلمة ولو كان فيه البوست الذى استشهدت به للغالية ملكة سبأ لكفاه ان يكون رائعا بحق ولكن ما ان دخلت واتحكرت فيه حتى اختفى كالشبح ولست ادرى ومازلت اتوقعه واتاوق ولكن لا حياة لمن تنادى..

معقول يا ارتيقا ملكة سبا لم تجد فرصة للدخول هنا ؟؟ حقيقة لا اصدق اخى الكريم ولا بد ان فى الامر خطأ فمثل هذه لا توصد امامها ابواب ابدا بل تقدم لها الدعوات المذهبات بكل كلمات التبجيل والتوقير والاحترام وانها لعلم فى موقع علم يعز مواكبته لمن هم فى شاكلتى من خلق الله الترابلة ..

سعدت بهذا البوست والله فهو قطعة جميلة جدا (ولن اقول رائعة) تستحق ان تقرأ وأن يقرأها قبلنا جميعا الاخ الزعيم بكرى والذى اصبح رأسه على ما اظن كمبنى مجلس الشعب الكل يصيح بطريقته طالبا الانصاف من الاخر والعدل تجاه الاخر واقصاء ذلك وابقاء هذا وادخال تلك..

معهم اصيح يا بكرى ارجوك ادخل ملكة سبأ فهاهو الهدهد يبشر بها وبما وراءها من اقوام لا يوصفون..

لك التحية والاحترام ولك الحب كله

اساسى الاساسى

والله رودا وجماعتا ديل كرهونا البورد

اليومين ديل .. كل يوم تلقى 15 بوست

متفرع .. الله يصبرنا ساكت

وبكرى الناديناهو تاوق لى البوست اول

يوم وعمل نايم

اها خلينا فيك انت .. انت خليت المشاكل

وبقيت سمسار ولا شنو

سعيد جداً بى زيارتك الهادية دى

كل الود

ارتيقا انا عاوز اشاكلك رأيك شنو؟؟؟
يا اساسي بالله سلفني عكازك النطالع الزول دا



اخونا ارتيقا

هل سمعت عن الطينه والعجينه؟؟؟

ارتيقا يا حبيب عليك الله ده اسع ما خسارة باندوث ساكت كان ترسل لى طلب بالبريد و الموضوع انتهى علما باننى لم اقرا مافى البوست ليست تكبرا او لا استعلا على ما فيه لكن الزحمة حاصلة و من شكله عرفته طلب عضوية قايتو يا شباب البورد ده لو اتقفل ما ما تقولوا السبب بكرى لانو بالطريقة دى نحن بنهدر الباندوث فى الفاضى
فى انتظار رسالتها بالبريد لى قدام يا حبة

ودعقاب

والله نحن المشاكل دى ما من ناسا
لكن اصبح البورد ساحة معركة لمن
لا ساحة له .. الشكية لى ابيداً قوية
سلمت على الدعم


العمده
حاشاك النحس ياراجل هى جات كده بى ظروفا
واهو رجع تانى
والباقى على الماسنجر

جمال هوب فل
يا خوى انت كملت مشاكلك بى هناك
جاى تتمها بى هنا ولا شنو ..يازول
ارع بى قيدك انا كان فتحت العكاكيز
بتاعة اساسى ما بتحلك
اها الطينه والعجينه شالوها رايك شنو
مشكور على الطلة ياغالى

حبيب الكل بكرى
والله ما كان قصدى استغل الباندوث استغلال
غير سليم .. لكن رسايلا ليك ما جابت فايده
قلت الطريقه دى يمكن تنفع
على العموم الباندوث ما بتجيهو الحبه منى انا
الا رودا وجماعتا ديل بخلو ليك كيف
اشكرك على الاستجابةوعارف المشاغل
ليك القومة