Post: #1
Title: من دافي..الي بكري ابوبكر الذي لا يعرف دق الشرموط..وود عزه في الضفة الأخري
Author: Dafi
Date: 06-12-2003, 11:37 AM
Parent: #0
بسم الله ..... ابتديت
..متل البرق...... لاحت
في الشين والفسل..بقينا نتباحت
طال الكان قصير ..والعالي اتاحت
والصولات ..حليلن..ملكتن..راحت
والاهليه كملت ..يا حبيب راحت
يا حليل..شمس المحنه ..الغربت طاحت
**
لساني مر....ما عندي ملاريا...ولا مرارة زعل..لكن قمت من الصباح كده
لقيتو مر...اخوي قال لي ده من المعجون...الليله اتسوكت..بي سيجنال تو..الجابو معاهو من السعوديه..ما عارف بكره لساني حا يبقي كيف
ده بمناسبة المرارات
فلاش باك.
مره من المرارات..جيت داخل البورد..لقيت سيد البورد كاتب في الباب
ممنوع الدين ولو بعدين
دافي اطلع بره شهر..انت قليل ادب ..!!!
طبعا ضحكت...قلت يا ربي..ابو صلعه ده جن ولا شنو!!!؟؟؟دخلت البوست..لقيت الموضوع جادي جدا
وناس تضرب..واللي رايح يضرب..واللي جايي يضرب..وانا اعياااااااط
شئ بالانجليزي.
..اسكرو هيم اند هيز ميزرابول ثووتس!!!!!!!
وشئ بالعربي..ناس الساحر العربي..جدا صديق السنجك العربي للطيش.
.خيرا فعلت يا بكري...تبا له ..من صفيق وقح...ائتنا بالغدااااء يا فتي!!!!!!
وشئ بي عربي جوبا
!!..ده ما بحاكيهو .عشان ما انطرد تاني
المهم
انطردت ما اكضب عليكم...
وقعدت في ماسنجري احمد ربي...بعد شويه ..جاتني وجن تبكي..وفاتت..جاء تمبس يبكي..وبعدهم جات واحده تانيه..ما عارفه انا منو..قالت لي في واحد اسمو دافي طردوهو..وقعدت تبكي..ما عارفه انو ده انا!!
!وانا اقول الناس دي مالها زعلانه شديد كده!!!؟؟
في النهايه طلعت ..فتحت التلفزين حضرت ..برنامج ..جيري اسبرنقر......ما زول صعلوق كمان!!!!!وبعدين بالليل داك..مافي اوبرا..ولا دكتور فيل ياها البلايند ديتس..والشيب ميتس..وكلاااااااااام من النوع ده
اقوالي في المحضر
جئت انا..دافي ابن ام دافي..من العمل ..مكدودا مهدود الوجدان...وكعادتي..بعد ما لبست جلابيتي مباشرة ..فتحت البورد...وانا يا سيدي وكيل النيابه..رجل في حالي..وبطني طامه..طمام طبيعي...ادخل بوستا افتحه...لا ابصر الا بوستا اخر...يا ربي ..كم بوستا يفصلني عني!!!!!؟
وباحساس القرف المستوطن..ثنايا خلاياي..المخيخيه..اقفل البوست الما بقسم معاي
وافتش كواستي ..للحاجات التريح...ما هو انا اصلا..دخلت البورد ده..عشان الحاجات البتبسط فيهو دي ..بس
لكن غلبني وحياة الاخوه
رايت فيما يري النازف...امراه جميله..تتالم..تبكي..يا اخوانا ..انا بحبكم!!!
يا ناس..انا جاياكم..كايسه المحبه!!!
والجلاد..لا تاخذه شفقه....تدسين السم في الدسم!!!!وتعملين وفق اجنده...لك مآرب ..وتلوين عنق الحقائق
لن يغفر لك التاريخ..ولا لابيك...دموعك مزيفه...ومحجراك اصطناعيان تخفين خلفهما..عينيك المترفعتين
ثم ما يلبث ان يلتفت الي منبها..انتبه عزيزي القارئ..السيده الكريمه ..تاخذك علي حين غره..الي مستنقعها الآسن...حيث يعلف الاتباع الطحالب..ويجترون البوار!!!!
وما عرف الجلاد ..ان السيده..في بشاشتها اقرب الي من حبل افكاره المرتب
انا..القارئ العاطفي..البسيط
حفزني استنطاقه كل مكامن التخذيل...واحزنني تبلد احساسه
وكانت لحظه ان شعرت برغبتي في الصراخ
يعقب ..احدهم.
....رجل ما ترك نسبا ليعرب بن قحطان الا ونسبه لجده شايق او عمه فايق
تتلوي..من البؤس حروفه ..حتي اخال انا ابو الاسود الدؤلي هب من قبره مذعورا ..مستاءا يصرخ...يا اخوانا الحروف دي ما نقطناها ليكم!!!!تاني في شنو كمان!!!؟
يستل سيفه..ويضرب..لياتي الجلاد ويربت علي كتفه..احسنت يا ابن ابي شلفحه!!!
والجلاد بالامس كان غريمه...في محفل اخر..لا يلقي بالا.ولا يقوم...ينتقد...ولا يحب
جاتني رغبه كامله في اعض كليهما عضه في راسه الكبير!!!
حامل لواء النقد المرير..في نص ميكافيليته التي ابغضها بغضي لملاح الرجله
واليعربي الذي يعتني برص الشتائم دون مراعاة فروق الحرف
اشتدت رغبتي في الصراخ...
قلت ....هوي يااااااااااا ده...!!هو قالوك كده!!!!!؟
وحسيت بي نفسي عايز اعضي اصبعي..واقول احييييييي انا منكم ..لكن بقت لي تقيله
فاستعنت بالبرلومه درر الشهيره بي درر واي
قلت لها الحقيني بواي كبيره..علها تخفف عني غبني
انا القارئ العاطفي البسيط
هذا نص ما قلته..مشفوع بشرح تفصيلي حسبما ما اورد مجمع اللغات
الشوارعيه التي خشي الجميع تسربها الي البورد
Quote:
دقدقه المشاعر!!!!!؟؟دي مشاعر ولا شرموط!!؟ |
الدقدقه...هي ال ...دق دق..دق ..بالفندق ..او حجر ..او أي شئ
المشاعر...لا تدقدق..بتدغدغ..وتتكور..وتنبعج..وتتكعبر خالص خالص..لكن منها وليها كده...يعني مافي زول بدقدقها..ومن يفعل فانما قد اتي بما لم ياتي به الاولون!!!!
الشرموط!!!من منا لم يره معلقا..تشابي له الكدايس!!!!؟!؟ هذا ما
حدث والله علي ما اقول شهيد..ممكن تقفل المحضر يا شاويش بعد ده
المرافعه
حضرات القضاه..الساده المستشارين
اسمحوا لي ان احدثكم عني انا ..دافي ابن ام دافي..محامي المتهم اللي هو انا القابع خلف هذه الشاشه الغشاشه
انا يا سادتي..مواطن بسيط من مواطني كسلا...تربيت في حي الختميه القديمه..برمالها..وخيرانها...مربي تربية حيشان...نفاج يفتح في نفاج..وشريان في شريان...الغلط بي قرصه في الاضان ..من اقرب راجل جيران..او مره عم...والشينه بي نهره ..يا ولد عيب..
والدي..موظف بسيط...ياكل الطعام ويمشي في الاسواق
يحمل عبء القاصي والداني..رجل مهيب...حلال مشاكل...
ستة وعشرون عاما يا سيادة القاضي ..عشتها في كنفه..ممسكا بجلبابه..او مردوفا..علي عجلته الدبل..لم اسمع قط..رجلا اساء اليه..او امراه رفعت صوتا عليه
عطوف حال الرخاء...واعصار حال الباس
جميل في ضحكته...وقوي لم اري دمعه قط..الا وانا اودعه الوداع قبل الاخير ..حين خرجت موليا الدبر..هاربا..بما تبقي لي من انسانيه..الي مناف سحيقه
امي...اااااااااااااااااااه
امي ابتسامه...
هذا كل ما اعرفه عنها...
تقول لها ظريفة الحي..
انا ماشه لي عزيزه الحلبيه..جبنتك البلا قطيعه دي..ما بتنفع معاي!!!!
اخواتي..يا حضرات المستشارين
اسالوا عنهن النسائم..اسالوا عنهن ما شئتم
تعال هنا يا عولاق ماشي وين!!!؟
يا بت مالك!!؟ انا مارق!!؟
تمرق وين ..كم قميصك مكرفس...ارجع اقلعوا نكويهو ليك..صحباتي يقولوا علي شنو لو شافوك كده!!!؟
اسالوا عنهن..الحنان..والحياء
اخجل لهن..الف مره..قبل ان انتوي سوءا ..او اعمد الي موبقه
يفاخرني بي..ويحببني...وانا احبهن حد الجنون
هذا معيني الذي انهل منه....فكيف بنضح انائي!!؟
علقوني يا سيادة القاضي علي حبائل الظنون القميئه. كل يرمي علي سوءاته..ويلبسني ما حاك في نفسه من لفائف القبح
عزيزي بكري ابو بكر
بالله عليك..ما كنت ستفعل بي..لو كنت انا الذي انزل تلك القصيده الماجنه في ذم حسين خوجلي!!!!!؟
وماذا ستفعل بي..لو اني..اوسعت كل بوردابي شتيمه بناء علي سوء تقديري..هذا سافل وهذا ساقط!!!؟
افترض في غباءا كافيا ..يكفي لان يصدق الجميع صدق ادعائي باني انزلت القصيده دون ان اقراها!!!
وافترض في سذاجة الدنيا وما عليها من بساطة عقل..واني لا افرق بين..دق الشرموط..وجر الحبل
هل ستسامحني..علي تلويثي لجبين بورديك الطاهر بتلك السخافات!!!؟
الساحر
سينتمنتال
شكرا ..علي سبق الاصرار والترصد...شكرا جدا
دينق
يا دينق...ياااااا عزيزي دينق
اقول ليك شنو ياخ!!!؟
انا بجاوي
ودكين ده..دنقلاوي
دنقلاوي ..ازراااااااق!!!!!
كده كيف معاك!!!?
|
Post: #2
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: Dafi
Date: 06-12-2003, 11:41 AM
Parent: #1
عزيزي..ود عزه
اليك..دون سائر الخلق الكرام
الجندريه..تمبس..خواض..حنينه..اهل العوض..هاله قوته..تماضر..شيري...ود العجمي
كلهم ..الجميع
بحقهم ..اغفر لي
قد حملت عني وجعا..ما كان ليضيمني..وانا الموسع اوجاعا
قد اكتحلت المي..وبصيرتي عمياء ..ما كانت لتبصر السم الزعاف
قد شربت علقمي...وما عرفت اني قد نفقت...
اغفر لي ..شجنك النبيل.
صوتك...لا يلبس صوتي...ونهرك ..لا يرتاد عشبي الذي وطاته النازلات
عد لتسقي حقولهن من هنا..وبيادرهم من هناك
او كما قال ..محمد مدني
واترك لي..هذي الفنارات الخراب..فانا غرابها الذي غيبته سنوات الوميض الخواء
عد الي حياتهم..
اعود
ان عاد
ا
|
Post: #4
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: Ahlalawad
Date: 06-12-2003, 11:52 AM
Parent: #1
ياخونا بالله دقيقة
أولا أنا أعترض ، ماني موافق
إنت جيت عشان تعمل لينا وجع قلب؟
شحتفة روح؟
خمة نفس؟
لا وألف لا لوجع القلب
لخمة النفس
ولشحتفة الروح
يعني جاي عشان تقول ماجاي تاني؟
كدي وضح ، أشرح ، أفصح أبن
وجيب معاك ود عزة المرة الجاية
|
Post: #5
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: tmbis
Date: 06-12-2003, 12:00 PM
Parent: #1
تعرف انا مافاهم ولاحرف
بعدين يا مان
بعدين
بعدين
والله عرفتك انته شكال خلاص تاريك
|
Post: #6
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: haneena
Date: 06-12-2003, 12:26 PM
Parent: #5
دافي أخوي
سلام
بركة السمعنا صوتك--إلي حين
هل هذه عودة مشروطةإذن؟
إفصح
حنينة
|
Post: #7
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: فيصل النعيمه
Date: 06-12-2003, 01:08 PM
Parent: #6
الأخ العزيز دافي
مرحباً بك عوداً حميداً .. الحكاية شنو دي زعلة ولا زوغة ..
|
Post: #8
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: shiry
Date: 06-12-2003, 01:29 PM
Parent: #7
سلام مربع
يادافيئ
خت الكوره واطه
اهي كلها ادوار بنلعبها في الحياة
وغدا سنترك مكاننا لغيرنا
ومع ذلك اقولها
لم يحن مكان نزولك لسعة
نحن لسعة في الكبري
وانت قايل الكمســـاري داقــس
عايز يدق للسواق
قرصصصصصه يا فرده
في حد نااااازل
دي فااااتتك يا فرده
اديها غفوة شوية
الدنيا لسعة مازالت بخير
والناس بخير
كل الناس اهل وكل الناس صحاب
|
Post: #9
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: HOPELESS
Date: 06-12-2003, 01:36 PM
معليش اتخارنا في الترحيب
بس حمد لله علي السلامه يا دافي
ودا كان العشم برضو انك تسمع وتستمع للاصوات الطالتك بالرجوع
والعود احمد
لجوه
|
Post: #10
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: DKEEN
Date: 06-12-2003, 02:05 PM
Parent: #1
شاهد اول
عبد العزيز(دكين عشا البايتات)
اشهد ان المدعو اعلاه
قد التقيناه بمعسكر المرخيات (قبر الكلب) متمردا على المجي متحينا لاسباب عودته لكسلا..
تم تجويع المعسكر بكاملة عامئذ..
فكان محرضا اول على قد السلك ..ولما كان لا سلك بالجوار وكان العساكر في المعسكر يعتمدون على الصحراء كمانع للفرار..
اقترح هذا المحموق اعلاه ان يذهبو بكل اتجاه فيتفرق سبيلهم في الخلاء ولا يستطيعون لهم وصولا..
فرالمعسكر كله يومها باتجاه ام درمان ...
وذهب اخينا باتجاه كسلا...
كان ابيض الوجه.. غناي
لا فلجة في اسنانة البيضاء
وهناك شامة عند فمه ونظارة عند عينيه. . يحب الدندنة..
تخارج يومها بوجه اكتسب لون النحاس باتجاه كسلا والناس يفرون شرقا نحوام درمان ..
عدنا الي المعسكر بعد اعتذار صريح ومسموع لابنائه البرره من وزير لا اذكرة..
وما عاد اخينا ذاك..
ثم بجامعة الخرطوم كلية الهندسة ..ستة اعوام بين الاكستنشن و داخليات البركس ثم تهراقا فالنشر حيث النيل الازرق ثم ابو دجانة ..والميدان الشرقي واغاني السمبلا ..
**
وآ سيفا تكواي
توكو تى زيييى..
انا بريدا من فراق مايوووووووو..اوو
***
غنى لنا في دوري الكليات محبا للكلية ..وغنى لنا في نهارات وصمت جامعة الخرطوم محبا لنا ولها ..
يناقش في الاركان اول الصباح ..ويقول شعرا في منتدى نبته عند الضحى ..ويمشي يشوف لينا طريقة غداء في كافتيرا اقتصاد..ويدندن لنا مع مزمل التجاني ويوسف محي الدين عند اشتداد الشوق..للائي ذهبن الى خدورهن بعد الغداء...
احبنه البنوت لانه كان وجيها فاتح اللون وبه شامة
وحين يسلم عليك يسرح
كنا بنقول ليهو الزول البقشر بي السرحة..
تقسمنا ليالينا في لحافات صندوق دعم الطلاب ..طلاب دعم الصندوق . صندوق دعك الطلاب
هكذا كان يقولها سريعا وورا بعض...
حين تم اغتيال محمد عبد السلام ..في قضية السكن تلك...
جانا ليلا في سطوح داخلية النيل الابيض منقبضا وبلا قميص وكنا نفرين والخريف مبشر
قائلا :
(محمد مات في حق مرتبة..
جوهو قالو ليهو دي مرتبنا
مرتبتنا ..مرتبتكم..مرتبتنا.....شالهو حي ودوهو خور شمبات ميت وخلو المرتبة؟؟
ابناء القحبة لن نستثني منهم احدا..
هذه الارض الظالمة ..كيف بني ادم يتقتل ساي..
ارض الحيوان؟)..
حزينا ..مضى يضع لنا ما بالكيس من طعام جايبو من الحلفايا ..
وخت تلاتة سجارتين ناشفات عند طرف اللحاف..
تقاسمنا بقية الليل بين كبري بحري وود آرو ...
كان يقرا سورة الحمدو في ود ارو كانه يحادث المصلين..جميل الصوت واشهد اني اعرف اهل بيته ..
واعرفه كريم الاصل واخو بنات ..وخال وليدات من الحلفايا
واخته طيبة الاصل ..زميلة دراسة ...بهيةالطالع كاخيها وتباشرك بالسلام اينما راتك وصديقة لتلك الباكية وجن..
***
ما تركت لذها الدافي سجارة او صحن دمعة او جنيه او ارسالية من كسلا الا وكنت اصيلا فيها ...
بن الذين
اشتد به الظلم فذهب الى المكسيك ولا ندري متى.
ثم عبر نهرا صاخبا الى امريكا ..
ولا ادري كيف
ثم استقر عاملا وبحضر ماجستير في الهندسة في يونايتد استيت ولا ادري كيف..
ثم جاء هذا البورد فاخبرتي وجن..
***
هربت بعدك ولم نطق البقاء
وتركت الاصدقاء هناك حيث يظلمون
هناك في
ارض الحيوان
|
Post: #11
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: DKEEN
Date: 06-12-2003, 02:15 PM
Parent: #1
بعدين انا ما لقيت في كلامك ما يدل على انك ما جاي تاني؟؟
ليه دايما بقولوك كلام ما قلتو؟؟
شفتا بقوك
زي الزول القاعد ياكل وقام يشرب موية ..شبكوهو الناس يا زول ما بدري
وبعدين كلو زول بدا من حيث انتهي التاني
غايتو كان جيت تكون بالغتا
او ما بتخجل
وعهدي بك خجول
|
Post: #12
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: wadazza
Date: 06-12-2003, 05:11 PM
Parent: #11
هذا الدفء المبكر.....والصيف طويل أمامنا...بيننا وبين ربيع قادم ما بين مالك والخمر واللا خلينا من مالك.....ما بين معدة ومرئى ...صبية هوليود....وملاح الشرموط...تانى نجيب اسمو...لأنه مافى هوا يقسمو...
أقبل نحو هاههنا وعد....فالساحة الآن نهب قبضة اليد والكواريك...ومداخلات...طلعو دى طلعو ده...قصو البوست ده....
العناوين تهرب الآن من مدى بصر المتاوقات الاقتحامية....وأدعياء الاسلام كثر وأنصار العنصرية أكثر....
ومثل...يادار مادخلك شر....قلبوهو القلبو الحكومة....
لى يادار مادخلك عضو...
الفى القلب شايلاهو العين والفى العين مشروق برجولة ....ناس الحارة جات....أخوان البنات ومقانع البوستات....ناس وا أسفاى...
الما بعرفو يدخلوا البوست من أبوابه...
وزاهى فى خدرو ما تألم....
تحياتى وسعيد بعودتك
ودعزة...
|
Post: #13
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: بكرى ابوبكر
Date: 06-12-2003, 05:31 PM
Parent: #12
الحبيب دافى
حمد لله على السلامة و بركة الجيت و العفو و العافية و يلا لى قدام
|
Post: #14
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: سولارا
Date: 06-12-2003, 05:45 PM
Parent: #13
دافي
انا شاهد ما شافش حاجه  ياقول القبلي مافهمت شي يمكن لانه ببعد عن البوستات الفيها شكل ونكد غايته شكلك موجوع الله يكون في العون عموما الف حمدالله على السلامه
|
Post: #15
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: Abdalla Gaafar
Date: 06-12-2003, 06:36 PM
Parent: #1
دافي
دعنا نحتفل بك وبعودتك
وبركة بالعودة
عبدالله جعفر
|
Post: #16
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: bint algazeira
Date: 06-12-2003, 07:19 PM
Parent: #15
اخي المجني عليه دافئ
بعد السماع لمرافعة محامي المجني عليه القويه وبعد سماع الشهود
حكمت عليك المحكمه الموقره بالحكم الاتي نصه
العوده الطوعيه للبورد قراءة وكتابة
تم تاييد الحكم من جميع اعضاء هيئة المحكمه
عجت المحكمه بالتصفيق الحاد من قبل كل الموجودين من اعضاء سودانيزاون لاين وباركوا الحكم العادل
اهلا بعودتك بادافئ
|
Post: #17
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: Elkhawad
Date: 06-12-2003, 07:20 PM
Parent: #15
دافــــــي
دعني اتحسكن باطرفك لتغفر لنا صمتناً دهراً
ففي بعض اللحظات نصبح كا البروس
شتات في بعثرة داخليه
لحظات المراره وجيري اسبرنقر
هي قمه الحزن
اطلقها فينا
لنتقاسمها
فنحن اولى بها منك
ونضع بعد السطر نقطه
___________ .
نقلب الصفحه
ونلون فرح
القادمات من الايام
بعطر المحبه
وبعض من نقاط الحزن
حتي لاننساه فيتسربل من بين ايدنا
ويرجع الي زئبقيته ليتكون
حائط يسد كل المنافذ
|
Post: #18
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: 7abib_alkul
Date: 06-12-2003, 07:37 PM
Parent: #17
العزيز دافي
الحمد لله انك جيت
لكن شرموطك دا زكرني شرموط واحد كدا كان مدير مكتب والي احد الولايات الغربيه
وكان في احتفال في الولايه وكلف صاحبنا باعداد البرنامج واعداد الوليمه
المهم انه بعد البرنامج انتهي طلع التكلفه انه اشتري شرموطه بي خمسمائه الف جنيه
فضحك الوالي وقال ليه عرفنا الشرموط دا لكن لقيت ليه حبال شريتها فيه وين؟
|
Post: #19
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: ايهاب
Date: 06-12-2003, 07:38 PM
Parent: #17
حكمت المحكمه ببقائك الموبد في قلوبنا يا دافيء
|
Post: #20
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: sign
Date: 06-12-2003, 07:40 PM
Parent: #17
اخونا دافي..دي مشكلة كبيرة والله..انا قايل بكري لصيق بالمفردات السودانية ومعانيها..بكري اخوي..ما اكلت شرموط قبال كدي? هازول? الحلفايا دي قلب الثقافة الشعبية السودانية!والله خوفتنا ! عليك الله تاني خلنا نشوف كلام الناس المفصولين..والله انا كنت قايل دافي دة سواها كبيرة..لكن برضو كان عندي شكك ..زولا يخت صورة ابونا البرعي ما يقدر يسوي منكورة..عودا حميدا..
|
Post: #21
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: خالد عويس
Date: 06-12-2003, 07:56 PM
Parent: #20
دافى
دافى جدا
مسكون بالدفء
قرأت حروفك حرفا حرفا
فككت ألوان لوحتك الانسانية الجمالية هذى
وكنت ضمن (الحضور ) لا القضاة
أتاوق احيانا باتجاه المحلفين
وأهذي
بأن هذا (المخلوق الجميل) نووووووووت قيلتي
بالانجليزي دى يا دافى
كنت عايز اصرخ فى قاعة المحكمة
من كان منكم بلا ...خطيئة ..فــــــــــــ
أعتذر منك
على الصمت الفادح
يبدو أننا سنتحول تدريجيا الى متحف الصمت
ونتسكع على اطراف السنتنا
أكتب ..أكتب يا عزيزي
فلكتابتك
نكهة القاش ، وشموخ توتيل
وفى تضاعيفها
ترقد كيمياء السودان
ويتمدد نهر النيل
هل تسمح لى أن ارحب بك
وكيف ارحب
وانت لم تبارح قلوبنا قط؟؟؟؟؟؟؟؟؟
|
Post: #22
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: benyya
Date: 06-12-2003, 07:56 PM
Parent: #20
دافي
مرحباً بعودتك و حمد الله علي السلامه..
تحياتي
و
لى قدام
|
Post: #23
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: رباح الصادق
Date: 06-12-2003, 10:17 PM
Parent: #1
أخي دافي والأخوة البورداب
منذ ذلك اليوم الذي جرى فيه ما جرى لم أدخل البورد إلا مرتين: مرة لأرسل رسالة لتماضر تلك الدرة التي عثرت عليها هنا، وشق علي أن أغادر بدون أن أعرف لها عنوانا بريديا يجعلني أتواصل معها. والمرة الثانية كنت ابحث عن موضوع مدح السلاطين، وموضوع "هذا هو الصادق المهدي" لإحدى الباحثات الجامعيات التي جعلت بحثها عن الصادق المهدي وقالت أنها تريد الآراء النقدية حوله وأردت أن أرشدها لهذا البورد الملئ بمثل هذه المادة، وبهذه الصدفة وجدت بوستا أنزله أخي جمال عبد الرحمن يرحب بعودتي- لعله رآني ساعة إرسالي رسالة لتماضر- فطالعته واتصلت ببعض من شاركوا فيه.. كانت تلك هي المرة الثانية. ثم أني أدرت ظهري لكل الخطابات الصديقة (والشقيقة) التي أرادت إعادتي للبورد، وصممت أذني حتى تلقيت اليوم رسالة من أخي الصاوي يرفق لي فيها مرافعتك.. لكأنني كنت أنتظر إفاداتك، فقد تبدل كل يقيني السابق الآن ليقين مضاد. كبر علي سوء الظن الذي سدرت فيه.. كبر علي، وطنت الكلمات في أذني تحملني لحيث لم أحتمل.. من يلقى عليه أكوام التراب والقذى، لا يستطيع في لحظة التفريق. إنني آسفة جدا لأنني لم أستطع التفريق.
وآسفة أن حملت الكلمات ما لم تكن تحتمل.
وآسفة لك لأنني ظلمتك.
أعتذر أخي دافي بأقوى ما يكون الاعتذار.
يروى أن أحد القادة البحريين الأوربيين كان قبطانا لباخرة تبحر في الظلام وسط عاصفة هوجاء، ثم تلقى رسالة ظنها من باخرة أخرى يقودها جندي لأنه قال له عبر اللاسلكي: معك الضابط فلان، ورد الجندي بقوله: معك الجندي فلان.. عليكم أن تحولوا مجرى سفينتكم وإلا اصطدمنا، غضب الجنرال واصر، علكيم أنتم تحويل مساركم، وكان الجندي ملحا ويقول (بسرعة يا سيدي) والجنرال غاضب حتى حدث الاصطدام وعرف أن الجندي كان مراقبا في منارة ليس بوسعها أن تتحرك في الأصل!..
قصة أخرى: عندنا إحدى الحبيبات من النوع المندفع ذلك فهي تتحرك بقلب وحماس، قالت أنها مرة كانت تركب "ركشة" ولما وصلت لمنتهاها نزلت وكانت تزمع أن تعطي السائق ألفا ونصف، وتتوقع أن يطالب بألفين، فلما سألته أجاب "ألف" ولكن ردها كان حاضرا: ألف ونص بس.. وقامت مجادلة خرجت منها وهي تعلم أن سوء ظنها بالسائق هو الذي جعلها تثمن المشوار حتى أكثر مما يرى هو!..
الاندفاع بدون تراجع في القرار في مرات هو ليس ظلما للآخر فحسب، بل هو ظلم لنفسك.
وبهذه المناسبة فإنني أقول أن الأخ بكري أبو بكر تلقى شكوى مني بضرورة إزالة كلمات ظننت لها إيحاءات غير مقبولة.. صحيح أنه كأمين للموقع عليه إجراء تحقيقات قبل أية إجراءات، ربما كانت تلك التحقيقات اسفرت عن هذا الإيضاح منذ البداية.. ولكن أرجو ألا يحتمل الأخ بكري ذلك الوزر وحده.
أخي دافي
اعذرني فأنا لم أكن أعرفك ولم أعرف أيا من أعضاء البورد، ولم آت بخطة، ولم أسأل أحدا عن أحد.. جئت بمحض قلمي وقلبي أظن أن أي منبر للسودانيين هو مكان للمحبة والوئام.
وفي بعض الأحيان تكون الحساسية المفرطة تجاه شيء سببا في الضلال (الضايق عضة الدبيب بخاف من جر الحبل) .. الحقيقة أني ربما بسبب الطعنات والركلات التي تأتي من يمين ومن شمال "خفت" وأولت كل حديث.. كنت أجهد في محاربة سوء الظن فوقعت فيه!.
وبهذه الرسالة أخي دافي فإني أستأنف عضويتي للبورد كمجرد إحقاق لحقيقة وطلب للاعتذار.. وبهذه المناسبة فإني لأرجو أن تعتبرني إحدى أخواتك، والغبن بين الأخوان (عيب).
إنني أؤكد أن سوء الظن ذلك كان هو سببي الوحيد والأساسي للانسحاب عن عضوية البورد لأن نزال الأفكار ينتهي دائما لصالح الموضوعية والإخلاص ولا يحسن معه الهجوم الشخصي وسوء الظن، وإن كنت وقعت في الرذيلة الأخيرة لما ذكرت فإنني أرجو أن أكون كفّرت عنها بهذا البوست، وأرجو أن يحفظ ربي لي قلبي سالما من سوء الظنون، برءا من الأحقاد لأي شخص في الدنيا ناهيك عن أن يكون سودانيا يغني مثلي "نحن جند الله جند الوطن" واقفا، وأن يجنبني سوء نفسي، ويسلط علي اللوامة، آمين يا رب العالمين.
أخي دافي.. في بوستك الأول الذي رددت عليه لم تكن هنالك إيحاءات بأن عودتك فيها قولان، وبعد أن أعددت ردي وأنزلته وطالعت البوست كله وجدت إشارات فهمها البعض كأنك لا تعود كما كنت.. ألا تغفر سوء الظن حتى بعد كل تلك الملابسات التي حكيت عنها، لقد قلت بنفسك من كان منكم بلا خطيئة.. كل ابن آدم خطاءون وخير الخطاءون التوابون.. إنني لأرجو أن أرى في نيتك البقاء فأحبابك في هذا البورد كثر: شكرا لود عزة الذي جمع بيننا وكذلك تماضر، فهل أسوقهما كأجاويد لتستمع للاعتذار؟ أما الأخ بكري فقد قدم اعتذاره غير مرة.
وأخيرا.. إنني ولمشغوليات كثيرة تلم بي وأنا عضو في كيان وفي حزب يواجه الآن تهم الردة والكفر، في زمان فيه الصحف الرسمية تورد إعلانات التحريض بإهدار الدم.. لتلك المشغوليات فإن ذلك الاستئناف سيكون اسميا وليس فعليا. لربما لن أجد زمنا لمطالعة البورد هذه الأيام. ولكنني أتمنى حينما افعل ذلك أن أرى بوستاتك مزينة له
ولكم جميعا وافر الاحترام.
رباح
|
Post: #24
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: lana mahdi
Date: 06-12-2003, 10:41 PM
Parent: #1
رباح
العود احمد
نورتى يا حبيبة
افتقدناك بالجد
دافى
شكرا لبوستك الذى ارجع لنا رباح
مع محبتى
|
Post: #25
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: فيصل النعيمه
Date: 06-12-2003, 11:26 PM
Parent: #24
مرحباً بالأخت الحبية رباح الصادق
عوداً حميداً وفقدناك كثيراً ..
|
Post: #26
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: Elmosley
Date: 06-12-2003, 11:41 PM
Parent: #1
مكانك ومطرحك يادافي
|
Post: #27
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: Yasir Elsharif
Date: 06-13-2003, 00:02 AM
Parent: #1
دافي
سلام يا ود الشيخ
يا حليل شمس المحنة الغرّبت طاحت
شكرا على الأغنية.. وشكرا للعودة.. وسلامي لدكين ولكل رواد البوست وخاصة ود عزة
وقد أعجبني اعتذار بكري لدافي..
وسلام خاص لرباح الصادق.. وقد أعجبتني مداخلتك أيما إعجاب..
البورد دا مكان يمكن لمن يريد أن يقرأ ولا يساهم أن يفعل بدون أن يقول أنه لا يشارك.. وأن يخرج بدون أن يقول أنه خارج، حتى يمكنه أن يعود مرة أخرى.. إنه قطار كبير..
|
Post: #28
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: WAD ELGAALI#4
Date: 06-13-2003, 01:07 AM
Parent: #27
WE ARE THE JURY FOUND THE DEFENDENT NOT GUILTY
دافى الانسان لك تحايا كل اهل الارض حقيقى انت كتاب
لكن ياخى فعلا الحاجة ام الاختراع اتمنى انك تزين اريحيتنا وتكتر من جنس دا والله لكن ماعارف اقوليك شنو
لكن زي ماقالو الشقى يعضيهو الكلب فى المولد والزارعك
غير الله اللجى يقلعك ولك من الحب افضله
|
Post: #29
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: hala guta
Date: 06-13-2003, 01:18 AM
Parent: #1
دافى
حكمت عليك المحكمة بارسال عدد واحد كورة ملاح شرموط اليناغرامة حندكة فى الغربة
دافى
ماذا يمكن ان يقال بعد كلامك
العفو بس يا اخى
و السماح
وخلينا نكون كل الناس صحاب كل الناس اهل
|
Post: #30
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: الجندرية
Date: 06-13-2003, 03:21 AM
Parent: #1
دافي ود الشيخ
شفت كيف الخير على قدومك
اهو
رجع ود عزة
ورباح الرباح كمان
مراحب الف بعودة الغايبين / ات
|
Post: #31
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: omdurmani
Date: 06-13-2003, 03:39 AM
Parent: #1
اها يا دافي
جعلية سااااكت وانا دنقلاوى
ولا قريت كلامك...لكن كلو صاح قلت شنو..
.......... .......
خوة في الله ما خوة كرتون..
...................
بس تورينى انت منو....اسلوبك بذكرنى بشخصية واحد اسمو ود عجب...ياهو ولا لا..
.............
يااخى لو طردوك بنرجعك...لكن نرجعك كيف وانحنا ما عارفينك
..............
shereef muhamed shereef
|
Post: #32
Title: Re: من دافي..الي بكري ابوبكر الذي لا يعرف دق الشرموط..وود عزه في الضفة الأخ
Author: tabaldy
Date: 06-13-2003, 04:14 AM
Parent: #1
آه من البورد ده , يسرق زمنك وخلوتك مع نفسك , حاجة زي نقر الأصابع لما تسابق الكلمات
دافي حبيت عشانك كسلا_ ولأول مرة أعرف إنو في طريق أربعيني بين كسلا وفتاشة _ وحبيت عشانك بلد أو بورد , بورد بلد, يا ولد يا بلد يا زين , يا بوردي يا محبوب , حبيت بت قضيم شيري هالة بي حضورا , العولاق دكين حسب ما يحب أن ينادى نقلا عن احدهم , الموصلي برة وجوة قبل البورد وبعدو , ركبنا بص جدو , إتحمقنا لي هوبليس ,وفجاة رباح وشاكلنا روحنا زي أساسي وطمادر زات الكيبورد الألجن .
وانا بقرا في كلامك , كلامكم كلكم لقيت روحي عامل زي البحضر في فيلم مترجم و لاقادر أجهز الرد وليد اللحظة لا قادر أستمتع بيك معاهم وبي سعة صدرهم وفرحتهم بي صدتك رادّي حصل شفت ليك زول بشفط في دمعتو لي فوق ؟ أقرا كلامك عن أبوي وابوك في وداعك ووداعي , أقراهو مرة تانية ووريني شعورك وإنت بتتذكر اللحظة دي , ولو ما جمبك زول أطلق عنان دموعك , ما تغالبا زيي.
دكين يا كتايب أو كتائب ,عشان ما تطلع مختار الصحاح وتحاول تثبت الفرق بين الكتايب والكتائب ,مش الكتايب اصل الكتابة طعمك يا فنجري؟ ,والكتائب محلها الطبيعي تحت الكباري وقدام الإذاعة؟ يبقى إنك زول قوس قزح ياللع إتشتت فينا سنا وبهجة وعولقة .
يللاكم بي غادي , كلكم , عازمكم في حوش بكري نخش نكتب ونغني وغنوا معانا , ما الليلة يوم ميلاد فرحنا وعلي بكري الذي أحبه بي عتاب _تخيلوا لي اللحظة دي ما رحب بي بي يافطةالمظاهرات المليانة ورد دي _ علي بكري عشا الفنانين , علي المدعو شوق او دافي تقديم الفنان للضيوف الكرام وعشان تيامن .
تيب أوف توداي
والناس وفا
خوة وصفا
ودفء المشاعر الشاتية صيف
أبنوسي
|
|