هـا السنيـح دا انت !! كـدي زح كـده ..

اول الحكي
احتجت ارتاح في عيون فيهن ملامحك ذاتها
من غير اي زيف
واحتجت لي ضحكة صباحك
والدعاش بلل
رزاز مطر الخريف
انا وانت والدنيا الامان
والناس وفاء وخوة صفا
ودفء المشاعر الشاتيه صيف
الكلام لصلاح حاج سعيد
لغناء لمصطفي سيد احمد
________________

النواح على ضوء قمر كسول
لا احد يناوله قهوته


على الدوام كانوا يكمنون له على حواف الغفلة ليحيلوا بينه وبين مداهمة اشواقهم
وكسر غناء(قمريتهم) قبيل تشعلقها على (ابنوسة) غابات الاحباط .
ومع ذلك كلما قابلوه عاجلوه بهكذا حريق
بـِس !!!
ها السنيح دا انت !! كدي زح كده ، هسع السألك منو ؟؟
فيختبئ في شرايين اللحظة الناعمة التي حلم بها و(يكتح) الرماد في عيونهم . معزياً نفسه بهكذا حديث
شوف بالله دي !!!! عامله وشك المطاول دا ، هو ذاتو الشغال بيك منو !!!
وانت من حيرتك ابدا لا يمكنك التكهن بتفاصيل طقس يسود ربوتهما .
ولا الارتهان الى قراءات النجوم(الغبيانه)
تماما حينما يتعلق الامر باحاديث يطلقها الرجال الانقاذيون
على شاكلة الخراب دائما تطبق وعودهم على (زمارة ) رقابنا
فتزيدنا شقاء على شقاء لم يقاسيه شعب غيرنا ..
ولا شيء ابدا يتغير حولك ولا حولهما .. (الشوق البحر) ، هو نفسه الشوق..
والحب المترامي الاطراف لا احد بقادر على ترم حوافه ولا اغراق قارب التعاسه في بحوره ..
ولا اقول ليكم ..
ذاك العجيب ، الغريب .. ذو الطعم الرخم والقشره البصليه.. ح ينشف ريقكم ..
قرطعوا الشاي سرعة سرعة ، واستأنسوا بالقهوة ..
لم تعد هناك فسحة من الشوق حتى لتجرع كأس غنوه..
ومع ذلك كله .. امر فوزك بمقعد في (ركشه) مدحرجة صوب الوطن
امر يستحق ان تناضل من اجله حتى وان لعنتهم في سرك الف متر معكب

اول الحكى

من بعد ما عز المزار
و الليل صفى.. وملت نجومه الانتظار
_________________
غناء مصطفى
_____________
شيرى المهترشة
ارفعى راسك فى ليلة قمرية و انت بصحراء قاحلة بنيت عليها مدن و عمارات حديثة
ماذا ترى؟؟
لا شى
مددى قدميك ابعد من لحافك
لن تستطيعى
فالمكان ضيق
اذا مارسى هترشتك الصباحيةو كتابات الدراويش المنطقية
هنا فقط تبدين و تتجلى قدراتك
لكى التحية و انت تهترشين
و ان تحولين السنيح الى رجل لطيف و العاقبات لكى
و دمتى مفعمة بالياسمين

العزيزة شيرى

صباح الوطن المشتت

اشك طبعا انك قد سمعت بالسنيح قبل الاحداث الاخيرة وانا كذلك لم اسمع بها وكانت اقصى معرفتى هنالك هى الشيخ الطيب والتى كانت ليست ضاحية بل قرية بعيدة جدا لا ترى الا بمنظار والركوب اليها يسبب اهوال ..

يحق لكل مواطن ولا شك فى ارض المليون ميل مربع ان يكون له مأوى وانا اطالب بذلك لاننى لا املك فى المليون ميل متر مربع واحد ولكنى بأى حال لن الجأ يوما لفرض سياسة الامر الواقع وسكن العشوائيات فهذا شىء مخالف للقانون اولا والقانون واحد سواء مع ناس الانقاذ او الاحزاب ..

ليتهم يعيدوا النظر فى منح من لا يملك ارضا ويملكوه حتى لا تكون هنالك عشوائيات ابدا..

لك تحياتى

الرائعه شيري
سلام واحترام


سنيحك دا اوعه يكون ليهو علاقه بسنيحي دا؟
** الســــــــنيــح **

لك الود

سلام مربع

اسامه الخاتم
لك الياسمين وحقوله كلها وانت تتضامن عنوة مع انكسار البطل ..
لك الياسمين نسمه نسمه وانت تحفز السنيح حتى ينهض
و(يجدع) اقمار الزيف بجارة صدقه
سلمت ياسيدي اكثر لهذه الطله البهيه
وسلمت للاغنيه العذبه التي ابتدرت نافلة قولك بها
احبها جدا حد التواري في طياتها

العمده قرشو

هم يفعلون ذلك خلسة او عنوة او حتى استفذاذ اذا كان الله ليس من وراء القصد ..
كونهم يمنحون الناس ارضا او يرفضون كله باسبابه
هؤلاء القوم ليسوا (سنحاء) ولا مطاميس مثل ما تقول حبوبتي
اذ ان السنيح هو نفسه المطموس
وتقال غالبا للاطفال او ا لشفع عموما . أذ ان غالب تصرفاتهم
فيها البراءة .. منها تعلمت الفرق .. ربنا يرحمها ويحسن ا ليها
لكن هؤلاء (المجارمة) و(الخاتيين) اي الذين يرتكبون الاخطاء وهم يعلمون جيدا انها خطأ لكنهم لا يأبهون لان في ذلك غاية سيئة لهم ..
لذلك ان اشجعك ان (تقطع) تذكرتك وعلى المطار دغري ، ومن هناك اركب اي ركشه ولف ارض المليون ميل مربع واختار لك اي (قطعة ) ارض . .وانزل عليها (ركشتك) من يجروء ان يلومك
فهم اولا من بدأ الخطأ .. حينما اجازوا حرمة الاغتصاب
فلذلك لا احد يلومك
فانت صاحب حق ، من اصلا حد ملكيتك الاراضي ..
هذه الاراضي هي ارض الله ،
اذا اتاك احد منهم (بصك) تفويض من الله بحماية هذه الاراضي وتوزيعها
فساعتها يمكنك ان تمتثل لاوامره ..
اما .. فلا تسمع كلام زول . اعزل الواطه الانت عايزها
هاههاهاهاهاهاهاهااه
امازحك يا شفيف .. الناس ديلك ما بهزروا ابدا

هوبليــس

هو نفسه يا شفيف ..
شكرا لابداعك فانت الخير والبركه

مساء الخير

المهترشة شيري
عد فات زمن العيون الالفة و الحضن الملاذ
الكلمات للشاعر المرهف صلاح حاج سعيد

الى الامام و مزيدا من الابداع

و رهافه الحس البلون ضحكه الناس العزاز

المسافه
سلام مربع


سلمت ياسيدي
للاضافه وسلمت اكثر للطله

متن أول : شمس وطن تسكن ذاكرة طفل بيننا
متن ما بعد الاول : كان كتر التية نشف ضراعك أقلدي المنك فينا و أتعافي
متن بالي : عندما تطير الهناية في البتاع بتبوظ (بالجد) الشغلانة
متن ما قبل المنتهي : عذرا لإقتحامي عوالمك دون أحم ولادستور
أما قبل : كل الود

تسلمى من كل شر يا زميلة
و نتمنى لك دوام الهترشة .. و لقدام

كدى زحوا كدى
خلونا النرفع البوست ده فوق

ٍسلام مربع

زوربا
متن مابعد اقتحام عوالمنا .. لك الامنيات المستريحات على متون العافيه
متن اثاني مابعد اقتحام عوالمنا : طارت بعيدا جدا ، ولم تجلي . ربما لان النحس نابع من الذين كانوا السبب في انفلاتها وطيرانها حتى طقشت الهناية ولم تبوظ الشغلانه كلها ، لاننا اولا واخيرا نملك ايماننا بمستقبلنا . ونملك قلبا يعرف تماما متى يتوجب عليه الانتفاضه ضدهم
سلمت ياسيدي للطله وسلمت اكثر للامنيات الصادقات

المسافه
سلمت ياسيدي انت من كل بليه ، ولك كل العوافي
وربنا يخليك ياسيدي

موسيقارنا حمزه
صحيت من النوم واغنيه القدال ملازمتني وتذكرت عقد الجلاد .. وايقنت ان رأي القديم الذي قلته ان عقد الجلاد فعلا تفتقدكم

الارض متكشفه ومتبلمه
مع انو من خير الخريف
لافحالها شال

ما عارفة يا حمزة فاتنى البوست المعجون بالجمال ده كيف؟؟؟

سلام مربع


لنا مهدي

ياهذه الجميلة انت هو الجمال نفسه
نحن بعض
من اهازيجكم
سلمتي ياستي
للطله البهية بلون الحب تلك

وكمان بتعرفي كلمة السنيح؟؟؟

يا أخوانا الحناكيش ديل خلوا لينا شنو .. خلوا لينا شنو؟؟؟؟


أب أب ..

يأتي تعليقي لاحقاً ..


تحياتي ،،،

Shiry


لولا قمرياتك ...ورزاز المطر الحفيف
لكان شقاءنا خراب موسمى

شكرا يا دعاش البورد الذى لا ينتهى

سلام مربع

جاد

جبنا ليكم خارطة الطريق
بس
الى
قلوبنا

موش كفاية
ولا لسع
؟


بشرى مك

تبروا انتم من خراب المواسم
وانشاء الله عدوينكم
يارب
سلمت ياسيدي للطله
وسلمت اكثر لحسن ظنك
فينا

الحنكوشة المفتحة سلام
جني و جن الناس الكلامهم كتير
الا كلامك الزول ما بيملوا
يبقى واصلي بدون توقف

ٍسلام مربع

الزومه

وحات نظري الكلام دا
بتاباهو
هاهاههاهاهاها
انا هترشتي دا مافيش حد
بستحملها
سلمت ياسيدي للطله التي تسعد
حد الابتسامه الحلوه

سلامات مربعة
عارفة لولا هترشتك دي كان البرود حا يكون مسيخ جدا
وبعدين انا عاوز اسالك من وين جاياك القدرة تهترشي في الزمن الملامحة معكرة دا ... اللهم لا حسد
كل الود

سلام مربع

زوربا

حروف الناس الانيقة الزيكم
هي البتخليني استمر
في الهترشه

سلمت ياسيدي للطله
وسلمت اكثر للاطراء

شيرى يا روعه...

وأنا يا أختي شيري قادم اليوم إلى مقر عملي في حي السفارات بالرياض .. وفي زحمة الطريق تذكرت خارطة الطريق .. قلت يا ولد يا جاد هل تعرف شيء عن خارطة الطريق؟؟

تاني قلت والله يكون في ملوك ورؤساء أيدوها قبل ما يعرفوا معناها .. أنا مالي ومال (سهام العين) .. في النهاية وصلت إلى تأييدي التام لخارة الطريق...

بس شتان ما بين الخارطتين .. واحدة مسفلتة بي دهن الكركار ومخططة بي الدكوة والشطة السودانية .. وواحدة محفوفة بالأخطار ..

بيني وبينك أحلى الأولى .. أههها أنا جاييكم .. على قدم الحمام وساق النعام .. وروني خشم القربة بي وين .. ولا أقول ليكم وروني أقرب مشرع على البحر أصلي عطشان لمياه بحر بلدي ..

ما لاحظت حاجة..!! بديت أهترش .. بسم الله .. هل أصابين شيري (سار) نوت سارس..

تحياتي ..

سلام مربع

انور كنج

سلمت ياسيدي للحضور الباهي
وربنا يخليك ياسيدي


جاد

كيف توافق ينقلوك وتذهب الى
مكان هذا العمل دون
ان تشيل معك خارطة الطريق
هل تعرف ماهي خارطة الطريق
هي الاقامه التي تصدر من وزارة الداخلية
سيبك منها
تعال استمتع بشراب الشاي
والقهوة على كورنيش جده
الرياض دي عكره
سلمت ياسيدي

شيرى صباحك فل
اها بعد ما ينسرب للبطين و ان لم يعجبه عادى يقرطع شاى و يتاقى الباب وراهو و يشتت؟؟ما خايفة يجيك ناطى تانى من الاذين؟؟ما اخير يقفل الباب بدل المتاقاة؟؟؟
مع محبتى

شيري ..

الإقامة مش خارطة الطريق .. دي قارعة الطريق .. تعرفي أنا في الإجازة بكون في السوق مثلاً وفجأة أتخض (بالمصري) وأخبط جيوبي الخمسة بحثاً عن شيء تقيل وثقيل .. اسمه الإقامة .. وأفيق بعدها أني في السودان .. ولكن أفيق بعد ايه .. أكون قد تذكرت أن إجازتي بقت في الحركرك .. وأصاب بالكآبة..

بعدين::: قبلت الدعوة ..

ولكن:::: جدة دي ما بعيدة .. خلينا في النص كدا .. أخشى أني أطلب إجازة عمرة .. ويكون في نيتي فنجان قهوة على سواحل جدة .. فأكون في موضع(فهجرته إلى هاجر إليه)) ..



تحياتي،،

جأد

سلام مربع


لنا مهدي

تعرفي انو الحكاية كلها (جر) شكل مني اليه
اعرف انه لو دخل هناك لن يخرج
وحتى لو حاول كان متحينا للهرب
لن اسمح له
انت صدقتي انو انا اخليه يطلع باخوي واخووووك
ياخي دا بعدو
سلمت ياستي للملاحظة

جاد


انت عارف لو سألتني عن الاقامه يمكن لا اعرف المكتوب فيها كويس
لاننا اصلا لا يسمح لنا بحملها
لان الاصل بتاعها بكون موجود مع الوالد
ونحن ننزوي في ركن قصي ما من صفحات الاخيره
نتوشح بالسواد في صورة جماعية
لا اتذكر يوما انني حملتها
ولا اعرف اين هي
ومع ذلك اخاف كثيرا حينما اتجول في الاسواق
ان يتلادح معي احدهم
لكن دعوة فنجان القهوة على ضفاف عروس البحر الاحمر
لازالت باقيه
بس انت جيب البن معااااك
وفناجين القهوة
لاني بصراحة دائما ما اكمل القهوة
وحتى الشاي
لانه لا احد غيري يقرطع الشاي
في غير مارحمه
سلمت ياسيدي

إنتن محظوظات بعدم حمل الإقامة .. دا حمل من أثقل الأحمال .. دائماً لمن تكون مدردمة في جيبي بتذكرني أصحاب الحقق -من حقة التمباك- (لا مؤاخذة) ..

طيب سوف أحضر البن والشاي والمنقد والقلاي والشرغرغ والجبنة والفناجين والعرق الأبيض والهبهان والكومبا والقرفة (بكسر القاف) وحاجات تاي (حامياني) .. لكن دحين في جدة بمسحوا بالسياحة المختلطة؟؟ لكن عندنابي جاي الضبح شخ .. وعلى طول أقدم المدعو جاد على الإنفراد..


كلمة السنيح .. لماذا استوقفتني؟
كنا في رحلة صيد في البطانة وأخوتي معي .. مرينا برواعية .. وقدموا لينا لبن ضأن فشربنا عدا أخينا الوسط بيني وبينك عاف الماعون بتاع اللبن .. فاعتذر وشكر الساقي .. وبعد كم يوم تصادفنا معهم .. وكان للصدفة (العجيبة) قدموا لينا لبن وكان الساقي هو نفس الساقي .. فلما دار باللبن وجاء ووصل عند أخينا إياه اعتذر أيضاً فنظر له الساقي .. آآ دا إنت آ السنيح؟؟؟ ومن ذلك الحين سميناه (السنيح) ..

فإنت من وين بالله .. من البطانة أيضاً .. ولا ركبت ليك في بص مار على قرية العفصة ..

تحياتي ،،

جــأد

الزولة جدا : شيري :
كان الغيمة غابت في مسام الشمس الفاقعة ما معناها اتلاشت بكون الفيها عدل مسار سيره ناحية الحل النهائي بعيد من عيون شارون
ونحنا بنطلع نخلة وننزل ...
شايف السيل طالع من سجارة نايم في النيل الابيض وفارد خشمو علي الازرق ساب الكتاحة تلهله ما لاقيا تكتح مين .
شفتوا كيف
ناس جامعة السودان هندسة عندهم جوة طيارتين واحدة بغنوا تحت ضلها والتانية بيرموا فيها التالف من كيس السفة ( التنمباك ) تعرفوا ليه ؟؟ الاولي من زمن الأنجليز والتانيه بعد تسعين .
الخارطة البينهم مسدودة .
كان الود في المساحات الأولي ثم تركته الانواء وحيدا في شجون المشنقة
وكان متباهيا يرفع رأسه بشموخ وهو يعد رقبته للمقصله
الانواء/ التراتيل / أميــــــــــــــــــــــــــــــن

قاعدة تجيبوه من وين غايتو الله يكون في عونو بالمناسبة متابع كتاباتك من بدري واسف جدا اذا اكون دخلت توووووش ولنا عودة

ابداع والله ياشيري الله يديك العافية الكلام الكتير دا تجيبوه من وين غايتو الله يكون في عونو بالمناسبة متابع كتاباتك من بدري واسف جدا اذا اكون دخلت توووووش ولنا عودةا طبعا في بالي قصة الجنوبي بتاع السوق الفرنجي والله قصة ظريفة جدا

سلام مربع

جاد
الضبح جخخخخ ...
عارف ، هنا اخف وطأة من هناك . رغم اننا ممنوعات بصورة او باخرى من دخول (بعض الاماكن) مثلا لا حصرا . الاستريوهات ..
اخوك فعلا سنيح وبلغه تحياتي بعد ان تسمعه كلمة سنيح مني ..
لست من هناك ، لكني اعتدت على تلقيط الكلام ..
تعجبني جدا تلك اللهجات .. احسها (شبعانه) ومتعافيه
سلمت ياجاد للطله الرضيه ..

زوربا السوداني

طوبي لي ياناس جامعة السودان لانهم لقوا الوسيلة التي (يرموا) فيها همومهم ومشاغلهم .. لانهم فعلا اهتدوا الى طريقة تزيل احساس الغضب الذي يتلبدهم ..
كل شيء حولهم جالب له ، ومحرض اول .
يابختهم اذ وجدوا الطيارة التي (يرموا) فيها تمبااكهم تعبيرا عن غضبهم لهذه الفترة الحاكلة من تاريخنا..
في ناس تانيه الى الان لم يجدوا نفاج ضوء ينسربوا من خلاله الى طريقهم
سلمت ياشفيف

عبد الحميد

سلمت ياسيدي للطله وشرفتني جدا
العفوا ياسيدي ، البيت بيتك
وانت سيدو تدخل في اي لحظة ونحن تحت امرك
كل ما اشرب شاي او قهوة
بحصل لي كده
خاصة اذا قرمشت الجزر في وخلال شراب الشاي والقهوة
الله يخليك ياسيدي لكونك رفعت من معنوياتي
وسلمت اكثر للمجامله الصادقه

بالمناسبة يا شيري .. أخي السنيح الآن في القصيم .. وهو الآن بدأ الحقبة الثانية من اغترابه .. ذهب السودان للاستقرار ولكنه وجد عدد لا يحصى من السنحاء أو السنيحين .. قالوا إنت بتعرف شنو للسناحة

بالمناسبة أخي السنيح هو زميل للأستاذ قرشو في حنتوب الجميلة.

بصراحة بهرني سرد موضوعك وسلاسته ودقة سبكه .. أقرأه وأعيش تلك الصورة الزهنية .. وقد صرفتني منه كلمة سنيح .. قرأته اليوم فوجدته أسنح من سنيح

الضبح يا آنستي :: شخخخ .. وليس جخخخ أصلو ضابحنو بي فرامة .. بتعرفي الفرامة كمان؟ الجخ دا البوبار ..


سناحاتي = تحياتي

أخو السنيح

جــاد

سلام مربع

جاد

انا برضو سنيحه ، للعلم والافادة
ولديحة في احايين اخرى
المفرمه ما بعرفها كويس
لكن الفرامه عارفاها
المفرمه= حقت اللحم
الفرامه = بتاعة الكبكبي البي يعملوا بيهو الطعمية
وايضا يبيعملوا منو البليله
لكن لا تفرم
امنت اني ماحنكوشه
سلمت ياسيدي للطله وسلمت اكثر
لكونك ملاتني اطراء

يا سلام يا سلام يا شيرى
العسل الجنن النحل ذاتو
والله هترشاتك هذه
هى اجمل الاشياء التى
قراتها مؤخرا
عوالمك الجميلة
تشدنى و تبهرنى

سلام مربع

بيان

والله يادكتوره ومن غير مجامله
نحن من زمان مفتقدنك
وحقيقي مواضيعك رائعة
وياهلاااا مرحب
نورتي لينا البورد كلو

وسلمت ياسيدي للطله
وسلمت اكثر للاطراء

الزولة جدا شيري
هاي ... نيلينك والابنوس والشوق الجاري عليك
أيمانا منا بالمساواة نطالب بان تعمم الخطابات الذكورية
ماشي في كتاحة الوراي ضبان والقدامي ما بتشاف
أهاتي بيها
ها السنيحة دي أنت !! كدي زجي
!
!
!
!
لي جواي خليني النمشي
في تعميم أحسن من كدة
السنيحة / البت / القمرا / الغيب

والريد نيلين

how funny and precious!!!