معاي وغشيتك /للرائع ازهري محمد علي/اهداء لكل البورداب وخاصة لاب شيبا

معاي وغشيتك / ازهري محمد علي

معاي وغشيتك اسلم عليكي
واتكل قصادك هموم الحراز
اطمن طيوف الخريف الوشيك
وابشر دواخلك بوعد الرزاز
مـودر مـلامـحك غبـيتك
لقيتك بتلفظ شوارعك بيوتك
تصادر خطـاي وتكاجر مشـيك
تغالط حواسك ملامحك
وتحرد عيونك مقاطع وشييك
سالتك خبارك؟خبارك مسوكر لسانك وصمتك يشفق
خبارك بتغرب شموسك.. زمان الشموس البتشرق
تضيع الملاح التعطن وجيهك ومنك تدفق
خبارك غريبة؟
بقلب دواخلك بكوس الحبيبةال لعللك بتفرق
بتفرق حبيبتي البتلبس فصول الخصوبة
بتضحك اغاني وتدفق عزوبة وبتنزل مطر
عشقتك لانك ..لانك حبيبتي و بحبك بحر

* * *

عشقتك لانك خواتم الحقيقة وطريق الوصول
لانك بداية الخليقة واساس القبول
بحي الغيوم البتفطم زبولك ترضع سهولك مواسم الهطول
واحي المداين البتفتح حدودها وتمنح عيونك جواز الدخول

يزيد خيرك ولا طابت بلاك عيشة
مقسمة انتي في غيرك مقسمة فيكي ما فيشة
ومخيم ليللك العسعس
لا برقن بروق صحوك ولا صبحك رضى اتنفس
يحندك في العطش غيمك تمطري انتي في الخاطر
وتنفضي من دواخلي العس
بديت اتسامى للآخررميت توب البيات الرس
قويت .. وإتيقنت روحي
وسقط من الكلام الغتس
دنا الداخرك بصيرة وشوف
يا بقع الضو في عتمة قلبي المحفوف
ومسربل في الشتا والليل والخوف
فارعة ومليان بكى ضيقةعليك البشرة
انا غيبتك بيني وكنتك زملتك في الخاطر بشرى
نزلتي ستار الجلد الهـش وطلعتي من الجسد القشرة
تاوقت لقيتك ..لقيتك فيني النفس الكاملة
تتوقي اليابسة والنهر
يتسارق ضوك خافت متهافت نحوك اجري واهرول راكض
سابقت خطاي وحدقتي الغيمة وضل وبحيرة
ضاربتك بيني وضاريتك من الحزن القابض نفسي وروحي و رابض عارض
ستفت عيونك بالمطرة وقررعتك ضد الزمن الراكض
وحدقتك حبيبتي البتلبس فصول الخصوبة
بتضحك اغاني وتدفق عزوبةوبتنزل مطر
عشقتك لانك.. لانك حبيبتي وبحبك بحر
* * *


ارجو المعزرة اذا وجدت اخطاء لانني لم اجد النص مكتوبا بل كتبته عندما كان الشاعر يلقيه ووجدته جدير بان اهديه اليكم

الاخ ابو طويلة

الشكر لك على الاهداء

وما اجملها من هديه يا ابو طويله بالله افتح الماسوره دي زياده
وهات الكثير

ازهرى محمد على
.............


العزيز ابوطويلة


شكرا جميلا على الاهداء

من فيض شاعرنا المرهف ازهرى محمد على

القصيدة على ما اذكر اسمها " بحبك بحر "ء

كانت مع اخريات فى معية الراحل المقيم مصطفى منذ وقت طويل حتى وفاته ولم يعرف هل لحنها

ام لا لكن ازهرى يقول ان مصطفى قد لحن جزءا منها


ويحضرنى هنا قول الشاعر ازهرى محمد على عند مواراة التراب على قبر الراحل فى تلك الليلة


مصطفى .. ما دفناك لكن زرعناك لينبت الف مصطفى

مصطفى لم تمت ولكن ذهبت لترتب العالم البى هناك

الاعزاء الشريف موصلي وشيبا الله يخليكم لهذا الوطن الغالي
وربنا يديكم العافيةشيبا عاوزنك تتحفنا بى بعض اشعار ازهري وعاطف خيري
يا موصلي الماسورة لو فتحناها اكتر من كده البدفع الفاتورة منو الجماعة شايلين كواريكم والازمة عشان يقطعو الموية وابدا ما بيفكرو يحلو الازمة