جمعية معاكسة عباد الله...

امبارح حصل لي موقف وقررت بعدو انو انشيء جمعية مسماها جمعية معاكسة عباد الله لانو في ناس ربنا خلقم عشان يعكلتو ويعكسو -دة طبعا كان ماقفلوها ووقفو- كل الامور الانت بتسوي فيها لغاية ما تحرد وتحلف طلاق -ديل طبعا الرجال المكجنين نساوينم-...واليكم الحكاية



عندنا في الشغل كل فترة وفترة لازم الواحد يعمل ابديتنج للبيانات بتاعتو فمشيت امبارح السفارة عشان اجدد الجواز بتاعي وطبعا الميزة بتاعة الاقامة في المملكة السعيدة انو لما اشوفو حرمة كانهم شافو شيطان بتلاقي الرجال بتجارو منك بيهنا وهنا..المهم انا اديت الجواز بتاعي للراجل اللي هو صاحب السيد الوالد وانا قعدت انتظرت في المكتب المهم خلص لي الجواز وانتهيت بس فضل حاجة بسيطة كدة قال لي اعمليها وانتي طالعة وماتخافي مابتاخد وكت لانو هو زاتو كان طالع محصل مواعيد..المهم شلت الجواز واديتو لزول تاني عشان اعملو طبعا بس شاف اسم الكفيل ونطط عيونو زي التقول قرصتو شحموطة..طلع لي كمييييية من الحاجات المفروض ادفعها لما جمعتها كدة لقيتها في النهاية حوالي 2000 ريال وشوية (طبعا انا شاطرة خالص في الحساب وداااايما بطلع الاولى فيهو) المهم قلت ليهو خلاص طيب انا بدفعهم ليك بس مش كاش يعني بالبطاقة بتاعة الصراف بس مشيني لاني ماخدة اذن من الشغل وما بقدر اتاخر اكتر من كدة..كييييف اتجرأ واقول ليهو مشيني وما بقدر اتاخر اكتر من كدة قاااااام الاخو دخل جوة وجا سايق لي واحد دقنو لغاااااية كعب رجولو ولما وقف قدامي نزل لي القرآن كلو وبعد داك سلم علي بعريضة كاملة وبعد كدة شال الجواز بتاعي وعاد لي نفس الكلام القالو الراجل القبلو مع زيادة بسييييتة في المبلغ المفروض ادفعو..المهم طبعا انا استغفرت 390 مرة في سري وقلت مااامشكلة ادفعو بس اخلص من البرنامج العلة دة وارجع لشغلي..لكن غلطت غلطة لااااااا تغتفر واللي هي اني عاينت لساعتي عشان اعرف الساعة كم لانو كان عندي مواعيد في المكتب فجاة سمعت صيحة عاااالية من الراجل الاول بقول للراجل ابو دقن شفت الزولة دي مستفزة كيف!!! المهم ابو دقن كان راجل صبور ومتفهم قال لي اتفضلي يا بنتي نصلي ونرجع المهم انا قاعدة منتظرة من الساعة 12 ونص وخمسة تقريبا لغاية الساعة 1 17 دقيقة مافي زول رجع لي وفي النهاي اكتشفت اكتشاف خطير انو ناس السفارة السودانية عندهم صلاة تراويح في ايام السنة العادية بس وكتها بختلف من بدل بعد صلاة العشاء لبعد صلاة الضهر!!!
المهم جاني ابو دقن ومعاهو راجل تاني بقول لي انتي فلانة قلت ليهو اي نعم انا فلانة الفلاني قال لي متاكدة قلت ليهو اي نعم وطلعت ليهو الاقامة بتاعتي قال لي دي ما اقامة...قلت ليهو ايوة وشرحت ليهو انواحنا مابكون عندنا اقامات زي باقي الناس وشرحت ليهو الموقف كللللللو ووريتو الكلام الشرحتو ليهو دة واللي هو موضح في الكرت بتاع الاقامة قال ليك طيب انتي صورتك الفي الجواز ما نفس الصورة الفي الاقامة قلت ليهو ايوة مانفس الصورة لكن الصورتين نفس المخلوقة قال لي انا ما بقبل بصورة الاقامة لانو مافيها حجاب قلت ليهو احنا لازم صورة الاقامة تكون من غير حجاب لانو دة قرار من المكتب الرئيسي قال لي عشان نمشي الاقامة بالطريقة دي لازم اجيب خطاب من المكتب موقع من الكفيل يبين اني لسة شغالة معاهم وعلى كفالتو ويوضح الراتب الانا بستلمو !!!! دة طبعا زيادة على مبلغ 1750 ريال ومبلغ 100 ريال لزوم البلاستيك بتاع الجواز ومبلغ 500 ريال دمغة و 320 ريال رسوم تسفير –دي طبعا انا مستعدة ادفع ربع عمري واعرف المقصود بيها شنو- المهم غلطت للمرة التالتة وطلبت موية شراب –موية زرقة- جابو لي موية حارة ولو غلطت وكان نظرك ستة علة ستة حتشوف جنينة حيوانات بتسبح في الموية المهم ماااعلينا قلت ليهو موافقة انا معاك لغاااااية 5 الف عشان تخلصو لي اوراقي دي بالكتير بكرة عشان انا مسافرة وعايزة اعمل اجرآت سفري قال لي جدا اتفضلي يا اختي ارتاحي بعد شوية جاني واحد لما شفتو عرفت شبب المجاعة في العالم شنو قال لي انتي فلانة قلت ليهو نعم انا علتكانة قال لي والله للاسف ما هنقدر نواصل في الاجرآت دي لانو السيد فلان الفلاني واللي هو اخوكي مطلوب ارجاعو للسودان من قبل الحكومة السوادانية!!! واسقط في يدي لانو انا اصلا من الاساس ماعندي اخوان!!! المهم حاولت المستحيل عشان اقنع الراجل انو انا ماااعندي وليدات اخوان حلف ما يفهم بعدين طرأت ليهو فكرة المعية وقال لي جيبي ورقة من الكفيل انو ماعندك اخوان !!! ماعرفت دخل الكفيل شنو في الحتة دي قلت اخدو على قدر عقلو قلت ليهم طيب حاااااضر ادوني حاجاتي وبجي بكرة ومعاي كل الاوراق الناقصة وشوال قروش قالو لي لا ما بنقدر نديك اوراقك الا تسليمنا اخوكي وبعد كدة نشوف قصة الجواز!!! في اللحظة دي انا كنت خلاااااااااااااص كملت اللفة بتاعة حبال الصبر الجيت بيها من الصباح انفعلت وسرخت ولعنت ابو اليوم الطلعني من المكتب وجابني عشان اجدد جوازي....مرقت زي الفاكني بنبلة وانا طالعة قبل ما اصل الباب لقيت لي شافع كدي جاري وراي بقول لي يا خالة..- ملاحظين ياخالة دي كيف- عايزين 5 ريال حق الموية !!!!



بالمناسبة دي الحكاية من غير اي زيادة لكن فيها شوية حاجات مسنسرة عشان بكرى ما يشوتني برة البورد

لاحول ولاقوة الا بالله

شكرا يا ميادة
علي هذا الوصف الجيد
رغم التجربة السخيفة مع ناس السفارة

والله دي مصيبة
تعرفي مشكلة البيروقراطية عندنا
أنهاعبارة عن فوضي غير منظمة
المقصود منها في الاساس أن يكون عندك واسطة
عشان بعدين تجي تحكي وتتفشخر تقول الجواز اديتوا لخالي والله جابوا لي في البيت بعد داك

الجمعية دي واجب تكوينها عشان الناس يعرفوهم هم منوا
أضيفوا ليه برضوا جمعية الغالطين
ديل برضوا بيفقعوا المرارة

يا لطيييييييييييف
عشان الحاجات دي مشينا حتات
تجي داخل السفاره عشان تأشر للسودان

شوفي في حلين
الاول
إنك ماتمشي السودان إلا بعد الحكومه تطفش
التاني
إنك تجينا هنا
الناس ديل لسه في البيروقراطيه
و الحراميه كمان ؟
وده كل من عكاز المغتربين زي
ما قال سجيمان

أغرب من الخيال فعلا

ميادة إنت بتتكلمى جد ! ماقصدى عدم التصديق طبعا


طيب وبعد كله ماعاوزين الناس تاخد جنسيات تانية ! وتستخرج جوازات أجنبية ؟ طيب هو وينو الوطن ! من زى ديل وا أسفاى

ميدى


الشمارات ما اندك لكن

و بعدين انتى القال ليك تعالى السفارة بهيئة دبلوماسية منو ؟؟؟؟
و كمان عليها شعار المراسم .. و جنبها سيفين و نخلة
تقول لى تكنولوجيا ؟؟؟

المشكلة انو الواحد فينا لما تواجهو اي عصلجة من غير اي هدف في بلد الغربة طواااالي يغش روحو ويقول معليش دي ما ما بلدي لكن طبعا لو مشيت بلدي اكيد ما هيكون فيها جنس العصلجة والعكليت دة تقوووووم تفاجأ بالعصلجة دي فيييي نص بيتك...أهاااااااا في الحالة دي تسوي شنو؟؟؟

كوستا
اها أكان حلينا قصة العربية البحلنا من الاقامة شنو؟؟؟؟؟

وازيدكم من الشعر بيت مشيت الليلة -ومعاي كل الاوراق الناقصة - عشان اكمل الاجراءات قالو لي وين الزول المفروض يخلص ليك جوازك سافر عمرة برجع يوم السبت ومافي زول يحل محلو امشي وتعالي بالسبت (اتخيلو لو انا كنت جاية من منطقة برة الرياض كنت هتصرف كيييييف!!!)

ميادة : انا ما مندهش إطلاقا لانو هي دي أنماط البشر الكنت بتتعوذي منهم... لكن في سوال محيرني هم عاوزين واحد بس من أخوانك لية طيب والباقين ؟
زوربا

لانو الباقين ساقوهم من زماااااااان ...

الأخت ميادة : عذرا ربما لم اوضح جيدا هترشتي
حكي لي أحد الاصدقاء انه أثناء معركة الخليج الاولي كان صدام حسين
يردد دائما مقولة (( ٍسأمسح نصف أسرائيل )) فعلق أحد ألأصدقاء :
والنص التاني دا مخليهو ليـــه

مياده
الزوال بتاع المويه كفيلو منو
واخوك المزعوم دا سف قروش طريق الانقاذ الغربى
ربنا يسهل عليك تجديد الجواز
ودعقاب

انشاء الله الزول يرجع من العمره بمزاج رايق. ويخلص ليك ورقك وبعدين نحن برضنا اخوانك

اخواني لكن برضو بجدد جوازي براي

يا مياده
المشكله وين فى الجواز ولا فى الكفيل
؟
انت عايزه تجددى جواز
ولا دايره تعملى زياره للكفيل
؟
يا مياده
احتسبى
ولا حوله ولا قوه الا بالله

ولا يهمك يا مياده
بس ما تنسي شكل الناس العاكسوكي ديل عشان لمن تطير حكومتهم نقدر ناخد حقك منهم

الحيوان بيفضل حيوان وحتي لو شغلوهو في سفاره

والله يا عمدة وزي ماقلت في اول كلامي في ناس ربنا خلقم عشان يعكننو على باقي البشر بالتالي حتى كان اتغيرت الحكومة مليون مرة هم ما هتغيرو ابدا ابدا

Dear Myada,

First: Why do you still keep a Green Passprot anyway?? don't you know that the green passport is actualy a "passport" for humilation and indignity??.

Second: Let me tell you, you are one brave girl, you walked with your own feet to the "Ingaz Embassy, and where??, in Saudi Arabia", wow, you are one tough cookie!

Finally: Do you look good?? do you look modern?? do you look like a human being??

If you answer yes to any of these questions, then, you are going to have such a "wonderful" journey at the so called Sudanese Embassy.

Allah Maak, my advise, please, drop this Green Joke, sorry I mean Passport, it's nothing but bad news.

Dear outcast..

It is not just a matter of Green Passport. Being a Sudanese is an identity rather than a paper whether it is a Green Passport or a Green Card. Therefore, throwing away the passport will not relieve you from your nationality, which was granted by birth. Do you agree? If not, I advise you to take a course in psychology.

As regards the look, whether it’s modern, etc., putting premium on the shape will turn the issue from an objective, substantive one to a subjective one that is subject to the vagaries of individual tastes and preferences. I do believe that we, both women and men, should deal with our agonies as Sudanese in a gender-free environment. Since time immemorial, this was our nature as a nation, which had hardly let gender imbalance to spoil its competency to manage their affairs. Muhaira Bin Aboud could better testify to this wisdom.

Mind you ino al ikhtalaf fi alrai la youfsid liwod qadeeya الاختلاف في الرأي لا يفسد للود قضية

الاخت مياده

تحياتى

انا محيرنى اصرارهم على احضار اخوك الغير موجود ده ؟؟

يعنى الجماعة ديل ما سمعوا بالاية القرآنية التى تقول

ولا تذر وازرة وزر اخرى

عموما اخوك المزعوم ده مشكلته شنو ؟؟

معارضة ولعن حكومة ولا ارهاب امريكى ؟؟

المهم اكان ارهاب امريكى انا ما عندى شغله فيه
اما لو شغل حكومة ايه رأيك انا متبرع تقولى ليهم اخوى ده اسمه قرشو وياهوداك فى جده امشوا عليه

ما المسألة كلها عدم منطق فى عدم منطق
مش عاوزين زول وخلاص ؟؟

لك الود كله

حتى لو جبت ليهم اخوي هيقولو لي لااااااالأ دة ماهو لانو اخوكي عدد شعر راسي اكتر من دة

ميادة
دخلت الفيلم دا الاسبوع المضي بس في جدة وناس تماسيح بس تشوفي واحد تفتيحه بعرفهم
وانا لحدي ما وصلت القنصليةزولي ما اتصل علي الراجل عشان يسلك اموري
وغايتوا سكيتوا تلوفنات لحدي ما خلصت
لكن من شباك لشباك

ومسالة اخوكي وكدا قولي ليهم انتوا عندكم اتفاقية امنية ليه ما تطلبوه من الحكومة بنفسكم

لما تقيفي قداموا اقري ليهوا هذه الاية
لقد جاءكم رسول من انفسكم عزيز عليه ...
الي اخر الاية ثلاث مرات في وجهه
وانتي طالعة من البيت ثلاثة مرات برضو