.. مس الحب .. مس الجنون .. غواية الماسنجر

الحب من أول نظرة .. رغم علامة الإستفهام التي يمكن أن نلصقها في آخر هذه المقولة ، لكنها – على أية حال – تعبّر عن الشخص الذي وقع أسيراً لتلك النظرة .. ويحق له أن يصنف نفسه في خانة ( المحبين ) أو ( المعجبين ) الذين ( يتكسرون ) لمجرة أن ( تقع ) عينه على وجهٍ مبهرٍ .. حتى ولو لم يكن ذلك الغزال ماراً بجوار الخضرة والماء .. لكن ما شّد إنتباهي أغنية رائعة لإبراهيم عوض سمعتها ( ربما مرات عديدة قبلا ) .. وكان (يكيل ) فيها اللوم والعتاب لحبيبو ويتساءل في حسرة
[ مين قساك .. من قسى قلبك
ايه نسـاك يا ناسي حبـك
..
..
عشت سنين .. وسنين طويلة
في الحرمـان أنا كل ليلـة
لا ولســـه كمان
اشـهد لي الليل وصمتو
شفت الويل والهم عرفتو
تخيلو بعد دا كلو .. هذه المعشوقة لا ذنب لها في كل ما وقع على هذا العاشق الولهان .. وليس لها أدنى فكرة بآلام صاحبنا .. بي بساطه كده وبإعتراف الحبيب نفسو .. قال
Center ( حبك لي عمر إبتسـامة )
right يعني كل الحكاية إنو واحدة ابتسمت لي واحد .. وطواااالي .. هام في حبها .. وعليه ممكن القياس .. لو واحد ( داهمو ) ماسنجر …اقوم طوالي يعد النجوم .. ولا كيفين ؟؟؟
ــــ
.. حق أدبي
هذه الفكرة مستوحاه من بوست لأهل العوض بعنوان إيميـلك اتأخـر خبـارو


رحمابي
[

يعني يا رحيمابي دي كان ضحكت ليهو كان رفع فيها دعوة قضائية لبيت الطاعة
لوووووووووول

(ـــــــــــ ماقصدي ــــــــ)

بسم الله الرحمن الرحيم

الرحمابي ود أختي
سلام وإحترام

أنا غايتو مسنجري دي قاجيها زي القلابة وكل يوم أجي أشوفها الصباح بدري عشماً في عصفورة أو غزال شارد .. هل تصدق ما بتقبض غير أهل العوض والملا عمر؟؟؟

قال غواية المسنجر قال

الاخ الرحمابى

ما احلى الماسنجرات الحارة

بصراحة رغم توفر وسائل الوصل والاتصال ولكن يبدو ان رهافة القلوب ليس لها علاقة بكل الحداثة وحتى توفر الكاميرات عبر الاجهزة عشان تكون الماسنجرات (سمع وشوف) وما زال الرجال يتكبكبون.

احمد الله ما عندى ماسنجر
كان تلقونى كل يوم ابكى ليكم هنا
واغنى مع ابراهيم عوض

يشهد لى الليل وصمته

مع تحياتى

الرحمابي كيف حالك؟

تعرف انحن ماسنجرنا ده ما بجيب الا مواضيع جادة، اصلا نحن زمان لما كنا بنحب لا كان في مسنجر ولا انترنيت، تمشي تمد قرعتك عديل كده وزي ماقال ابونا نميري، وجهالوجه، يخبطوك شاكوش في نص راسك تقعد تجعر لما الله يغفر ليك، ولا تعمل زي واحد اخونا كده ترسل بالبريد يا وصل يا ماوصل وانت حظك

بمناسبة الشعر، بالله شوف النوع الاستسلامي ده

امهد ليك تتخلص مني


زي ما قال ابراهيم عوض، وانت وقت ما قدرها البوديك تشولق شنو؟
ولا النوع المتردد زي الكهرباء

بعيونك تقول لي تعال وتعال وبقليبك تقول لي لا مافي مجال

زي ماقال صاحبنا الواحد ما يعرف يمشي ولا يرجع

ولا عاين النوع المهذب المؤدب الراقي ده

الزمان زمانك اهدي لي من فضلك نظرة في رمانك

يعني بكل ادب وتهذيب، يعني زي ده لو لقى بت ناس مؤدبة ومهذبة اعتقد طوالي بتجيب ليه طلبه ده، عشان تهذيه ده، قال من فضلك قال

أساسي

كيفنك

هسى والله أنا قايل بوستيك بتاع الحب اللي اندفقت فيهو داك .. قايلك غرقت لي شوشتك.. أها كان كلامي دا صحى بس أوع يكون ماسنجر
هههههه


بدر الدين شنا

لكن مع المسنجر القاجيهو زي القلابة دا .. لكن ما قاجي ليك صورة خطيرة خلاااس .. لما خلت ناس تماضر واخواتها قالن بري ما شفنا


قرشو.. أيها الرجل الرائع
لك محبة خالصة

والله رغم مسحة السخرية التي ظللت هذا البوست .. إلا أني مدرك بأن هذا ( الشيئ ) عندما يجتاحنا قد تكون الإبتسامة أكثر مما يتطلبه الامر .. ولكن على ( ما أظن ) كان في ذلك الوقت الجميل للحب شروط ومقدسات نبيلة .. أما ما يشاع الآن بين خيوط الهواء هذه
ربما كان فيها مفارقات وعدم مصداقية ... والله أعلم


ياسر حنا

بس عايز أعرف .. الراجل طلب بكل أدب واحترام أن ( يهدو ) ليهو هدية وهي مجرد نظرة فقط لا غير .. ات مالك محرق خدارك

لكن والله غنا زمان دا فيهو جنس كلام بينه وبين حد السيف - حد السيف نفسه .. إلا أنه ربما يكون الحب عذري .. وأعذرني ما بقدر أعيد


رحمابي

الرحمابي

لك السلام ياانيق الحرف

لا اذكر من من الشعراء كان يتحدث عن الفرق بين غزل زمان وشعر زمان وحق اسع فضرب مثال قال زمان الشاعر يقول
ياجرح غوّر

واسي يقول

بخاف
ويخاف منو شنو
اسأل عليك الناس

زي ماقال ليك ياسر عديل وكان جاك شاكوش تركز وطبعا
ناس خالك وباقي الجماعة ديل الظروف الملونة والقلب الفيهو سهم ودمو منقط وهاك ياغنا بالذات عثمان حسين الواحد يبدا من من عيونك ياغزالي وانا والنجم والمسا وخمرة العشاق ولا وحبك وياربيع الدنيا والدرب الاخضر ووووو وطبعا الحكاية في الاخر تنتهي بي باغاني الشاكوش قصتنا والوكر المهجور وشتات الماضي وووووو
عشانكدا ناس زمان ديل اكتر حاجة يخافو منها حكاية المسينجر والحب عبر اي نوع من انواع التكنولوجيا


يديك العافية

عبدالله جعفر

الأديب عبدالله جعفر


لو جينا نظرنا ( لجرسة ) المحبين ، تجد أن هناك رابطا عجيبا بينهم
وان اختلفت وسائل و ( عبارات ) التعبير عن ذلك .. لكن يا أستاذ في ناس عملوها ( ظاهرة ) كده .. يعني أنا لسه محتار كيف يكون مجرد ابتسامة .. يقوم صاحبنا يبني منها كل هذه القصور .. لكنه حقا هو مس الحب .. مس الجنون

... وتعرف حاجة

أجد متعة حقيقة وأنا بستمع لأغنية لمصطفي سيد أحمد
وهذا الثبات على الموقف .. وأن الحب لا ( يشيخ )أبدا

.. قال

ما بان عليك ســفر العمر


يعني أصلو ما بتكبر تب ..

ومن الحب ما أحيا

تسلم

رحمكابي

الرحمابيي
نقول صباح الخير
يبدو إننا لو بحثنا في كل أغنية حقيبة سنجد شيئا من هذا النواح

شايل نوم عيوني
وسايب قلبي دايب
وانت الساهي لاهي
ماك الحاسي حاسب

آه من جور زماني
ومابي من نوايب
سهران ليلي طايل
حارس نجم غايب

أهل العوض

سلام

وعركي قال..

يا قليب أنا كنت قايلك تبتا من تعب السفر
ومن محاكاة القماري ومن شراب موية المطـر

تاريييك كامن لي بي شيتاً كتر


يعني توبه ما في ولا شنو ؟؟؟

تسلم

آآآآآ اخوانا

الامي دا ما اتوجع بالحييييل خلاس

هواك وهواى بى جاروا وسبن أفكارى نظراتك

أحب تعطف تزيل وجدى واحب كل البحب ذاتك

بحب لونك بحب لونك بحب يا حبى نفحاتك

بحب فى خدك الزهرة وبخاف ترمينى لمحاتك

أخاف صدك بخاف جورك واحب تتهنى بحياتك

بحبك حبى للعافية وكمان يا سيدى وحياتك

بحب فيك الحيا الفطرى ويذوب من حالى صيحاتك

إذا فى حبكم ضعت واذا أُقبر فى ساحاتك

أكون للحظ دوام شاكر وأقبل أنت راحاتك

أحب أنظر جمال محياك وأخاف تسحرنى بسماتك

وأخاف لحظك يجرحنى واحب تسكرنى بسماتك

وأحب طيفك يأنسنى واحب تسمعنى نغماتك

وأخاف هجرك يطول بى و أخاف تحرمنى كلماتك

منعم يا فريد عصرك سعيد وسعيده ساعاتك

مكمل يا نزيه صافى وعفافك فطرى مافاتك

وديع وبديع مثال رقة حشيم والريم هوى صفاتك

أٍرت فؤادى يا ضامر ودمعى خضاب فى كفاتك

زيد يا دمعى فى سيلك وزيد يا صدرى زفراتك

حبيبك ودعك راحل زيد يا طرفى عبراتك

حمام الأيك حن مره تعال أسمعنى نبراتك

طربت أم در مقر أملى زمان كفاى عباراتك

هوب لس

زولك دا فعلا راقد سلطة .. لكن يبدو إنو أخد وقتو

لكن أنا محيرني الحب السرييييييع دا

ما سمعت رائعة عثمان حسين
(أجتمعنا على المحبة في ثواني)

[right] بس دا المجنني .. الناس على الهبشة

ولا رياك غير كده؟؟؟

بسم الله الرحمن الرحيم

الغالي الرحمابي
سلام وحب شديد

Quote: وعليه ممكن القياس .. لو واحد ( داهمو ) ماسنجر …اقوم طوالي يعد النجوم

أنا غايتو مسنجري دا التقول كمبو يوم واحد ما زارتة جكس