كالجوع و العطش : يتحدث بكل اللغات

فليعذرني أولئك : فقد ذكرت هذه القصة ، و أذكرها هنا بإضافات و ( بهارات ).

زولنا شاب سوداني طويل ، أنيق أناقة لا تخطؤها العين ، وسيم وسامة ممزوجة بهيبة الرجل ( السهل الممتنع ) ، أحب فتاة خليجية و أحبته بكل ما تحمل كلمة الحب من معنى.
لهجته سودانية بحتة ، يحادث بها ( أتخن تخين ). لا يحاول أن يدخل كلمات محلية لتقريب المعنى ، إنما يطلق للهجته السودانية العنان ، و لأنه محبوب ، يحاول الكل فك طلاسم بعض الكلمات السودانية التي تسقط من قواميسهم.

يقابل فتاة أحلامه الخليجية ، فيقول لها :

جمالك أصلو ما معقول ، إنت من الناس ولا من الحور ؟

و يش قلت ؟ أنا من الحور ؟

عيونك ، زى عيون الريل النافرة في بطن الخلا.

أنا ما فهمت منك شى غير عيونك ، لكن الظاهر بتقول في كلام حلو. مش كدة ؟

هو البشوفك بقدر ينضم ؟

اللي يشوفني إيش بيحصلو ؟ إيش قلت ؟

بموت و ما بقروليهو الفاتحة.

إحكي معي عربي.

و الله كلامي من جوة حوش العربي و فايتو بي غادي.

حتحكي زين ولا باأروح.

بريدك.

إيش ؟

بريدك زى عويناتي ، و ريدك حاميني النوم و مخليني زى زولا فقد إسمو و عنوانو. أنا لو علي، أشيلك فوق هدب عينى و أغطيك برمش العين. أنا لو علي ، أغطيك من وهج الشمس و أخاف عليك من النسَام ، أنا يا تومة روحي ، كاتلني ريدك ، و كاسر فيني كم ضلعة.

ما فهمت شي واجد من حكيك ، لكن بشوف أشياء واجد في عيونك.

أمال لو دخلت جوة قليبي كنت حتقولي شنو ؟ كنت حتلقي (كرويات) دمي كلو من حروف إسمك و دقاتو زى صوتك الكلو حنية يا السمحة أم عجن.

إنت بتحبني صدق ؟

أحبك ؟ دة أنا بحبك حب لو سمع بيهو قيس كان قال ( أهو دة المجنون ، مش أنا) .

طيب ليش ما تقول كدة من أول ؟ إنت لما تحكي و تناظر في ، ما بعرف ويش بيحصلي.

بتتلبشي ، مش ؟
ويش ؟
ما كنت فاهمة بقول ليك شنو ؟

يعني ، مش كله ، بس كنت متأكدة إنك بتحبني.

كيف ؟

عيونك بتتكلم أحسن منك. و نظراتك فيها صدق ، و عطفك على فات الحد. ما أبغى أكثر من كدة. أنا إنسانة محظوظة.

هوى يا ناس ، زولكم بفقد عديل. البنية واقعة في ريدتي وقعة شينة.

مع من بتحكي ؟ بتحكي مع مين و إنت بتناظر للسما ؟

أنا بكورك و بطلِع الجواى. كلامك دة ولع فيني الجمر.

إيش قلت ؟

سيبك من كلامي ، بس عايني لى جوة عيوني و إنت تفهمي.

حاضر يا روحي.
_________________________________________
و ما زال الزول ( متوهقا ).