حـفــلة شــمارات

الجماعة ديل جابو التلج.. قول ليهم يدخلوهو في الراكوبة ديك ..ياخي السخانة دي لحام عديل التلج دا بسوح كله احسن يغتوهو بالخيش داك ويختوهو في الحمام عشان ما يجلبغ الحوش كله.. وكلم الشافع دا يجيب نشارة خشب من النجار البي جاي دا
مشهد داخلي انت فتحية دي مالها عاملة جوطة كدا..؟ والله سامعاها قالت سيدة شالت وش الملاح حقها كله وعملتو في حلتها.. عليك الله شوف المراة الما بتخجل دي لكن عادتها ما بتخليها المرة الفاتت عملت في عرس بت الرضية نفس الحكاية دي . ..عليك الله شفتي ملاح النعيمية حقي كيف ..؟الرجال شربو شراب والله كل دقيقة يرسلو لي زيادة ما زي تقليه هدي الكلها بصل محروق دي ..انت في التقلية ولا في ام العروس دي عليك الله شفتي حرصها وجبرها كيف مقفلة السكر في الدولاب ما بتطلعوا الا بالسيسي زي حقن الملاريا الببسي دا ما ورتنا ليهو خاتاهو في بيت ناس علي في اخر الدنيا
اها يا صاحبي البت اتكسرت في الولد (دش دش) والولد ما اشتقل بيها قفل الباب (رووو) وطوالي البت (تووووش) مشت البحر وجنبلوق) جو المويه ومن (يوم داك (وعيييييك )الود جانته نفسيات
اسمع انت البت الصفرة الواقفة في الشاي بت ناس منو ..؟اول مرة اشوفها الليلة.. صاح والله بت زي الطلقة ما عارفها والله..؟! دقيقة النعبي السيرموس دا من جوة.. ياخي ديل اربعة ملانات!! مافي زول شربهم بس قول داير تدخل تلوص وسط النسوان ..؟!اسمع ما تقعد تحكها معاي كدا
مشهد لبرة شوية اسمع يا الطاهر كدي اجدع حقتك دي بعد ان دردم سفة وقلوظها مظبوط وتكلها امامه مثل كبوت التيمس ؟اسمع يا جنا كلمت عمكم محمود بتاع التعاون بالعقد ولا لا؟؟؟ايوا والله ..مشيت ليه انا زاتي وكلمته ؟طيب ماله ما جا لاسع؟؟.. يا حاج ياخي انا سارح بيه..؟ القطيعة التقطعك حتت الشافع مسيخ تقول فطموهو بي موية ترمس
مشهد الحفلة لاحولة ولا قوة الا بالله امة الله دي كلها جات من وين ؟؟عليك الهه شوفي الزحمة دي كيف ؟؟عليك الله ما لقو الا الفنان الذي السخيلة دا يجيبوهو ..؟
يا شباب يا شباب عليكم الله لي وراء شوية الساحة دي خلوها فاضية شوية بعدين الغنية الجاية دي للعرسان يا شباب كان ما رجعتوا لينا وراء شوية والله الحفلة دي ما بتستمر بالطريقة دي البنات ديل دايرات يرقصن انت يا ابو قميص احمر عليك الله لي وراء شوية وانت يا ابو سويقات دا بي طنطنه (حالق راسك بي قزازة التقول) اسحب لي وراء شوية يا اخوانا البنات ديل نصهن جوة ما مرقن فضوا لينا محلات ليهن ما ممكن الرجال ماسكين الساحة عي حسابهم
جوة البيت شوية اسمعوا انتو يا الرجال ادونا فرصة في العشاء دا شوية شلتو الصواني كلها برة النسوان لاسع ما اتعشن بشيلن حالنا والله
مرتين في الحوش بعد العشاء ورقيص العروس عليك الله شفتي الفسالة دا عشاء دا عليك الله قطعة طعمية ومخلل حي الحمة الخاتنها زي قطعة البلاستيك ولا سلطة الاسود شفتيها مرة كيف كدي خليني من العشاء شفتي العروس كان شفت رقيصها..رت رت رت..تتهوزز وتتمايل
زي الجلي النزلو من القالب..تسيح سوووووووت
وتترب تترب تقوم زوووووووووووووت..زي لبانة
في خشم فلانة طق تك طق تك

اساسي

سلاااام مربع


شمارك قوي لكن



-

هوبلس الشمار قلب الدفار

منظر تاني
الحافلة تتحرك من ابو جنزير قاصدة امتداد ناصر ( موش علي كيفي )ما حلتنا الكمساري يتنحنح ممنيا النفس بخمس بواقي المائتني والخمسون جنية بدعوة عدم وجود فكة ويبدا
طق طق طق طق طق مستخدما الوسطي مع الابهام محدثا فرقعة محببة اليه فقط يلا يا شباب ادونا حقنا يلا يا معلم القدام جمب السواق ارح اها يلا يا حاج ابو عمة انت سريع يا معلم الحاج: عمي الكباسة ما تصبر الندخل يدي في جيبي الكمساري : متجاهلا يلا سريع يا حاج خلصنا اها يلا انت ...شنو الحساب ورا؟ ورا عند منو صوت من الخلف معاي انا يا حبيب الكمساري طيب مكسب اها البعده يلا انت يا ابو نظارات ...شنو مية جنيه باقي القروش يا حبة ادينا قروشنا ؟؟؟طالب..؟؟ يازول دا ما وقت طلبة زاتو مافي مدارس زي الوقت دا الطالب: انا طالب في الجامعة يا حبة ..الكمساري :طيب البطاقة سريع يا ابو نظارات .الطالب: اتفضل الكمساري: يا حبيب دي تاريخها منتهي ارح كمل لينا قروشنا وتحصل رجة تنتهي بتدخل السواق حاسما الموقف لصالح الكمساري ويواصل الكمساري : ارح انت ؟؟؟شنو ما عندك ما عندك دي فنلة ناس منو ارح يا حبيب ادينا حقنا رافعا صوته الحافلة كلها تنتبه مجدا والماعنده هذا ياطئ راسه خجلا الكمساري.: ارح يا فردة ادينا حقنا انحنا ما فاتحنها تكية هنا .....شنو الماعندك طيب ما تتكلم من تحت اسمع يا معلم مخاطبا السائق وقف نزل الفارة دا هنا يتدخل اولاد الحلال ويدفع له احدهم ويواصل الكمساري في تفانيه من اجل الجلابي ارح يا شابة ادينا حقنا شنو من قبيل ما شايفاني يادوب دايرة تفتحي الشنطة طيب سريع ....؟ شنو طالبة الكمساري متنرفزا ياخي كرهتونا حافلة ولا فصل كلها طلبة طيب بطاقتك وعندما لم يجد اي ماخز يطنش الباقي قليلا فتتابع الطالبة قائلة باقي الخمسمائة الكمساري: طيب اصبري شوية مافي فكة ويواصل الكمساري اها يا حجة حقنا وتعطيه الحاجة مائتان جنيه اظنها من التكية السابقة الكمساري: دا شنو يا حجة جايباهم من خشم بقرة دي قروش ما بتمشي اسع كان اديتك ليها بتشيليها : وتتزمجر الحاجة ويدخل الاجاويد ويحسم الامر بان ياخز الكمساري المائتين علي مضض وهو مكفهرا للحاجة
ياخي بنشر ليهو لستك ما حاتمها زهجت