السخانة بوخه لاوي....بوخه لاوي ....بوخه لاوي

السخانة بوخة لاوي
بوخة لاوي
بوخة لاوي
باقّة فينا نار مكاوي
نار مكاوي
نارمكاوي

الله في
الله حي
الله غالب
ابكر مع المغارب
المطر باعوضو ضارب
الخطر مع الكهارب
الله في
الله حي
الله غالب

دة كلام ناس فرقة الهيلا هوب
لكن اليومين دي نحن شايفين الكلام قدامنا عديل كدي

سخانة تلحم
تقول البلد ميت فيها رئيس نقابة المكوجية

الواحد يكون جايي من الشغل الساعة3 عز الضهر
والشمس طاقة ليهو في نص صنقورو
والعرق سايل جداول راسما ما شاء من الخرط على الملابس
ويحس بسائل جايي نازل من احدي طاقتي انفه
فيتخيل لوهلة ان مخه قد بدا في الذوبان يفعل الحرارة الفائقة
امكانية القياس وكل درجات السنتغريد والفهرنهايت
وان هذا المخ في طريقه لمغادرة مسكنه في الجمجمة متسربا عبر
كل الفتحات الموجودة فيها…
ولكنه يدرك بعد قليل انها نزلة (برد)مصابة بعمى الفصول
ودا شي قريب من عمى الالوان يصيب النزلات وخاصة
تلك التي لا زالت في ميعة صباها وشرخ شبابها… في المناطق المدارية
وسهول السافنا الفقيرة التي أفقرت تضامنا مع حال المواطن السوداني
ثم يخرج منديله البشكيري ذو اللون الأحمر الصارخ الذي يشترك مع سخانة الجو
في إيقاع شتى صنوف الأذى بعين المسكين الذي يقع في عينه…ويمسح به جالونات
العرق التي تجمعت في وجهه وعلى صلعته …
ثم يلعن في سره تلك المرأة السمينة بجواره في الحافلة التي أجبرته على أن يجلس بجوار النافذة
معرضا نفسه لسياط أشعة الشمس التي لا ترحم ولا تبقي ولا تذر
وفجأة ينتبه الى انه قد تجاوز محطته وذلك بسبب استغماء الحرارة الذي درسونا له في
المتوسطة ونحن لسذاجتنا المتناهية تخيلنا انه يصيب الذباب فقط….
فهذا المسكين قد جرب استغماء الحرارة ورآه رأ ي العين وبسببه عليه ان يقطع 200 متر
مشيا في هذه السخانة اللاهبة ……لكي يصل الي المنزل حيث ينعم بالراحة
ولكن هيهات …
تعرفوا الحصل شنو؟؟
الكهربا قاطعة كالعادة ومعها الموية
لكن من يهتم …عدم الكهرباء كان له تاثير زمان
اما هذه الايام..
فان صوت شخيره ضارب في الصالون بعد ان فتح ما امكن من شبابيك
وما زالت تراوده احلام الربيع والشتاء والفصول التي لا يحتاج المرء فيها الى
تكييف او ترويح

انا ما عارف الكلام دا شنو
قصة
خاطرة
ما عارف اسميها شنو
المهم قعدت قدام الكيبورد
لقيت نفسي قاعد اكتب
وطلعت البتاعة دي
ان شاء الله تعجبكم

جدوجدوجدو
شفت الحرايه
زي الغلايه
سكنت حلتنا
واكلت جلدتنا

جدوجدوجدو
شفت الرماضه
فوق الواطه
جريت حفيان
ارنب في الحيشان

جدوجدوجدو
انته عرقان
مسخن وهلكان
وكمان عطشان
ياهو السودان

جدوجدوجدو
شفت الهناي
طار في الهنايه
حرق الهنايه
وقطع الهناي

جدوجدوجدو
الماسوره شُخرت
ما المويه اتبخرت
والمطره اتاخرت
والناس اتحيرت

الخواض يا حبوب

عودا حميدا
وابداع مد البصر

مشتهنك ومشتهين طلتك
وبوستاتك المدنكلة

وكلماتك المتقاطعة

بسم الله الرحمن الرحيم

المسخن جدو
سلام وتكييف

بوخة لاوي
باقّة فينا نار مكاوي
نار مكاوي
نارمكاوي

مكاوي دي جمع مكوة ولا وزير الكهرباء؟؟؟


قعدت قدام الكيبورد
لقيت نفسي قاعد اكتب
وطلعت (البتاعة) دي
ان شاء الله تعجبكم

طيب البتاعة دي لو طارت في الهناي ما بتبوظ الشغلانة يا جدو

الجميل
بدر الدين شنا
نحن تاني حكاية الشنا دي ما بنصدقها
بعد ما شفنا البرهان
والدليل الولو


انت عارف انا من زمان قلت انه بكون في هناي
طار في البتاعة مؤديا الى (بوظان وللا تبويظ)الشغلانية
حقو نسال ابو الطيب

غايتو في بلدنا القعدين فيها دي ما قدرنا نفهم دي جهنم ولا سخانةعادية!!

الرائعة مايا
وين بلودك يا حنينة

الله لا ورانا جهنم

كفاية علينا سخانتنا دي

بلدا يا جدو بعرفوها ناس بدرالدين الماشين
يعني نهرب من سخانة السودان تلحقنا سخانة في بلد الغربة اكبر من جهنم اجاركم الله

سلام يا جدو

اتكلمت مع ناس بيتنا

عشان شفقت عليهم بعد كلامك دة

وأكدوا اللهلبة الحاصلة دي

وقالو إقتنعوا إنو السبب عشان الهناي الطار فوق الهناية

طلعت بإقتراح--بيزنس

أصدر ليهم من البرد النشف العرقوب

وأستورد الحر الطير الطايوق

تشارك في البيزنس؟

حنينة

يا اااااااااااااااااااااااحليله السخانة البوخها لاوى والله بختكم بختكم انا هنا فى البلد دى ما مشتاقه وما حنينى الا للسخانة ام بوخا لاوى مشتاقة ليها ومشتاقة ليكم البعرفكم والما بعرفكم

الحنينة والحنين

بالله عليكم الله مشتهين السخانة ودايرين تستوردوها

ما عندنا اي مانع اتفضلوها طوالي

اها يا حنينة لقيتي ليك واحدة تخش معاك في البزنس

وعندك واحد سخانة بالبوخ وصلحو

سلام مربع

ياشباب كلكم معزومين عندنا في القصر الجمهوري

اصلوا انا قررت اعملوا بيت الشعب

اصلو بعيد عنكم الكهرباء زايدة عندنا
ومن كان عنده (فضل) كهرباء
فيعزم بها من كانت
السخانه مكرهتهم

ست المهترشين شيري
نفرش البوست ورود
لي طلتك ذات السلام المربع



تسلمي على العزومة
ومن دربنا دا على القصر الجمهوري





سؤال:ممكن الواحداقرطع الشاي ويقعد ما يشتت؟

جدو

سلام أخوي

الله برطب السخانة

وانا قبلت بالبيزنس

إنتو بترضوا؟



حنينة

جدو الحبيب
قولي لي مبروك
الجوء ما بقي عندنا اروبي بس
مطر رزاز .. ونسيم يتهادي بلطف
ملتحف بدخان الشيشه
ناشر عبير التفاح في كل الجنبات
اها نرسل ليك دعوه

تشكر يا حبوب

ايه رايك اجازف ليك انا دعوة لينا هنا في السودان
وانت تجيب معاك الجو الاوروبي وتجي؟؟

اها لقيتني كيف؟؟

جدو
ياسلام عليك
مليان ضحك
والله البتاعة دي بالجد طلعت حاجة جميلة في وصف الحال واجمل مافيها الحرف الساخر
اتمني ان تواصل مابدأت

لك التحية والتقدير

عبدالله جعفر

المبدع عبدالله حعفر

دي شهادة اعتز بيها
واعلقها قلادة في رقبتي


تسلم يا رائع للحضور الجميل
وفرحتنا شديد بيجيتك



لك الود والاحترام