شقي الحال يلقى العضم في الفشفاش

في الزمن الأخضر أيام امتحان الشهادة السودانية سنة مية وخمسين قبل الميلاد .كنا عدد من أولاد وبنات الفريق بنذاكر مع بعض ، فينا القاعد على كرسي والمنبطح على الأرض والمتمدد على السرير.. قوم يالمنبطح على الارض يشوف ليك الدبيب مطلع رويسو الكبير من جحر في ركن الحيطة ، اب درق بي جلالة قدره . وأب درق لمن يجهله هو الكوبرا بي ذاتها بس مركبين ليها مكنة سودانية ، القرصة منه بتمهل الواحد يكتب وصيته ولكن كان ضيع وقته في المشي للمستشفى إلا يشيل معاهو مسجل ويسجل الوصية في الطريق للمستشفى . صاحبنا شاف أب رويس وصرخ .. الدبييييب .. قولة الدبيب البنات اتضايرن واتخارجن وأب درق لبد في جحره . في دقائق تم الاستعداد للمعركة . ثلاثة من الأشاوس المحنكين في التعامل مع الثعابين وقد تسلح كل منهم بعصا . الخطوة الأولى هي قفل سكة الهروب أمام الضحية . قمنا بقفل البال بالمفتاح منعاً لدخول النساء والأطفال ، الوسيلة المضمونة لإخراج الضحية هي إغراق الجحر بالماء ويبقى قدامو خيارين إما الغرق بالماء أو الخروج للقتال . حملت شخصياً جردل الماء وأفرغته في الجحر . مرت دقيقة قبل أن يندفع بحراق روحه العزيزة وله صوت ينبئ بحجمه وخطره . تراجعنا تراجعاً تكتيكياً موسعين دائرة الحصار وقد تواصينا بأن الضربة الأولى ستوجه لوسطه لكسر الهيكل العظمي وتعطيل حركته ومن ثم الضرب على الرأس لحسم المعركة . عادة تكون الضربة بعد خروج الرأس وبعض الجسم من الجحر قبل ان تستعيد الضحية توازنها وفي نفس الوقت لا تتمكن من الرجوع لمكمنها . فوتنا هذه الأفضلية بتراجعنا التكتيكي . اندفع ( أب درق ) بسرعته المعروفة وزاد التراجع التكتيكي عند رؤية حجمه وطوله . صرخت إحداهن مأخوذة بما رأت عبر النافذة – الليلة سجمممممكم - مع نهاية لفظم ميم سجمممكم الكهرباء قطعت عندها صرخنا الثلاثة وبقفزة واحدة تجمعنا الثلاثة في السرير في الركن البيعد الهاديء .

اها

وعضاكم

العزيز سنجاوي
والجزء الثاني من الفيلم نشوفو في القاعه ولا شنو
والله حيرتنا معاك
وفي انتظار البقيه
الكهرباء جات تاني ولا قاطعه لحدي هسي

لكن شقي الحال في الزمن ده الما بيلم ليهو في عضمه زاتو

اخوى سنجاوى
تحياتى
اهم شى سلامة الجكس
لو شفت الهنود مربنهن زى الحمام تلقى الواحد فى مزرعته عنده اكثر من 10
كوبرا.
والجدير بالذكر ان الكوبرا احد الهة الهنود ولو شفتها فى المعبد اخر دلع وبخور وعطور زى العروس والجكس الهندى حايم حولها صف صف زى ما تقول بتجلب ليهم العريس لا صراخ ولا حاجة,لو كانت معاكم جكسوية هندية
كان باست الكوبرا حقتكم ديك . وهى مدت راسها عشان قايلة فيكم واحد حنين
بس انتم اى واحد فيكم مسك ليه عصا , عرفتكم ارهابين عايزين تفجروا عليها الجحر
تسلم ياعزيزى

جـدو
يعضي منو
انت قايلنا اتضايرنا عشان خايفين منو ولا شنو
لا ياخ انت فهمتني غلط
نحن صرخنا وتشعبطنا في السرير عشان الواحد ما يضرب أخوهو في الضلام وكدا
معتز
الجزء التاني من الفلم .. الجزء التاني من الفلم .. نحن كنا واقفين وين
أها .. استمرت الكهرباء ملحوسة لما يزيد عن الثلاثة ساعات
الباب مقفول بالمفتاح وهو باب حديد مأصل فانتفى العون الخارجي
الفانوس العلقوهو لينا في الشباك من وراء النملي – لمكافحة البعوض – يادوب يضيء حافة السرير حيث نقف وهو ما يطمئنا ان ( أب درق ) بعيد عن مياهنا الإقليمية .. المهم بعد رجوع الكهرباء بحثنا عن طويل العمر سماء أرض وقبضنا الريح .. أعدنا صب الماء في الجحر بدون فائدة .. ولما كنا متأكدين من عدم خروجه من الغرفة عبر الباب المقفول أو الشباك استفتينا أهل العلم فقالو لينا الله مرقكم سااااااااي .. الشغل دا جان ويمكن من ملوك الجان كمان .. كان لحقتو ضربتو كان لحقكم أمات طه .
أبو قوتة
تُم كيا كرّهيهو ؟
جكسوية الهنود تمسح كوبرتهم زي ما عايزة .. بقول ليك دا كوبرا مركبين ليها مكنة سودانية يعني بشاكل ضلو .. بعدين وكت جبت السيرة ، أنا من زمان لعبهم مع الكوبرا في أفلامهم دا بخلي شعرة جلدي تكلب .. نحن والدبيب دا ما بتنعايش يعني العين كان شافت العين يا كاتل يا مكتول .. والحمد لله لي هسة مكتول دي ما جربناها .. هل صحيح اهلك الهنود بيفصلو عروق السم في ثعابينهم البلعبو معاهم ديل .. وفي رواية أخرى انهم بيكسرو أنيابهم زيادة في الحرص على السلامة . أفيدونا دام فضلكم

هههههههههههه
والله يا سنجاوي ضحكتني
طيب نطتكم في السرير عشان ما تضربو بعض
دي عرفناها...الصريخ لزومو شنو؟؟؟

قلت لي مركب مكنة سودانية وبشاكل ضلو

ههههههه

الأخ الحبيب سنجاوي

يظهر في الزمن داك ما كان عندكم الأسلحة الذكية ، يا خي البف باف ذو قوة الإبادة الثلاثية ،،، مفروض كان يستخدم في المعركة

قلت لي نطة واحدة وكلكم فوق السرير

سلامة يا أخوي

حبيبنا سنجاوى

لك التحية


اتاريك وانا اقول الزول ده الطيرو من سنجة شنو ثانى ما عتب عليها اصلو
اتارى الحكاية فيها اب درق وفيها صريخ ونط فوق السرير

اظنك نسيت ان السرير المسكين انكسر من النص

لكن ياخوى خلاص ممكن ترجع سنجة وتلقى الناس نست الحكاية دى خالص ومافى زول بتذكرها اصله

شفت ناس زمان كانوا حساسين كيف الواحد لا يرضى ان يسجل ضده اى موقف جبن مهما كان منطقيا..

واكيد كل القريتوه طار من روسينكم وحصاد السنة كله راح شمار فى مرقة

لك حبى وتحياتى

الحبيب ولي

بف باف .. انت قايلو نملة ولا قملة
دا أب درق سييييييد الإسم
دبيبي وكتييين يبتسم
كتيبة ياناس تنهزم

سلمك الله يالحبيب
تحياتي

عمدتنا ومحبتنا

أفو يالعمدة .. سنجاوي بفز من البلد خوف الدبيب ود عم الدودة
اتلومت يالعمدة
علي الحلف من يوم صرخنا فيهو صرخة الحرب ديك – الكلام ليك ياجدو المنطط عينيك – محل غطس ما اتعرف
انت قايلنا صرخنا قلنا وااااااااي على قلو درر
انت يازول ما قاعد تشوف أفلام كراتيه
الصرخة دي فن قائم بي ذاتو .. لا يتقنه إلى ألو العلم والحنكة
وبعدين السرير دا ما انكسر لأنه سنجاوي أصيل
ودي دعاية لي موبليات سنجة
نصيحة لوجه الله البدورلو كم سرير ولا طقم كراسي جلوس ولا طقم طرابيز
اليزورنا في سنجة .. جمال ومتانة وخشب زي العسل لا تقول لي إيطالي ولا أمريكي
والدليل السرير الاتحمل تلاتة علوج نزلوا عليه بقفزة رجل واحد

هجم اب درق هجم اب درق
واتخن شنب تلب مرق

دا شنو يا رجال..؟

كمان جابت ليها واااي

افا انا اخوك آآآآآآآآآآآ بنيه
ناس سنجه الليله جابوها قويه
دي ما كانت المحريه
فيكم يا ناس السبحه والطوريه
شيلتو كليمه البنيه
درر السودانيه..؟

اب درق..؟
علي الطلاق بالمخمس
انا بديهو لشفعي يتسلو بيهو

ولمن يزهجو منو يقلعولو قرونو ويفكوهو عكس الهواء

رجاله سااااااي

اها شن قولكم..؟

حتى أنت يابروتس

كلمة وااااي دي لما أدونا ليها في الحروف الانجليزية أنا قلت للأستاذ حرم ما بقولها يا أستاذ تجي انت تقول لي شنو وشنو
علي الحلف دي ما كانت المحرية فيك
البورد دا فيهو بنات العم انت عايز تطفشني من سنجة ولا شنو ياعديم الهوب انت

لك الود

سنجاوس

قلت سنجه ماله..؟

بدور تطفش منها؟..طلع فيها اب درق ولا شنو آآآآزول
اثبت

بنات العم حبابكن
خشن جوه اضارن واقفلنو بابكن
عندي نضيمه مع الجنه القدامكن

اها يا وليد العم
دارينا الفضيحه ولميناها لم
لاتجيلك فضيحه ولا تِنَم

دحين اب درق مرق ورينا فراستك
كان فزاز تعال نربطلك لساتكك
وكان فارس الليله ورينا رجالتك

وشن قولك..؟

حتى أنت يابروتس

كلمة وااااي دي لما أدونا ليها في الحروف الانجليزية أنا قلت للأستاذ حرم ما بقولها يا أستاذ تجي انت تقول لي شنو وشنو
علي الحلف دي ما كانت المحرية فيك
البورد دا فيهو بنات العم انت عايز تطفشني من سنجة ولا شنو ياعديم الهوب انت

لك الود

اب درق