عطبرة............قردين وحارس؟؟؟؟؟؟؟؟؟؟؟

سألت اخد الاصدقاء القادم حديثا من السودان سالته بلهفه وشوق ..عطبرة كيف؟ رد كأن الكلمات كانت فى طرف لسانه..والله عطبرة قردين وحارس!!!!!!!!!!ومضى فى طريقه.
وانا حتى الان حائر من قصه القردين والحارس لكن المؤكد ان اجابته تعنى ان الاحوال غير جيدة
وهذا قدر عطبرة فى كل الحقب وهى التى انجبت افذاذا للسودان ولم ينالها سوى الظلم من ابنائه السيئين
بس ياجماعه المحيرنى بالجد قصه القردين والحارس
القردين ديل شنو؟والحارس دة منو؟؟؟؟؟
افيدونا
يابالقردين يابالحارس

ههههههههههههههههههههه والله يا ود الياس انا لا عرفت القردين لا الحارس لكن البعرفو القرود في عطبرة اكتر من اتنين
والحارس الله

قردين وحارس؟؟؟؟؟
يا ود الياس
جد حاجة تحير
افتونا ياشباب
ما معنى هذه المصطلحات

الاخ امادو
انت قايله امبدة
دى عاصمه الحديد والنار الحديد شالوة بقت النار
بتقدروا تشيلوها


اخى
قليبى المهضلم
حاجه تحير وبس
الله غالب

العـــــزيز ود الياس

لك كل الود والتحايا

لو حاولت أحكى ليك عن عطبرة حبيبتى ، كل صفحات البورد ما تكفينى ، ولكن الاخ يقصد إنو ما بين المطرقة والسندان ، وانا إتفتحت فى عطبرة ، وعرفت السودان كلو من عطبرة ، وهى كانت الفريسة دائما لكل الحكومات ،
بعد سنين طويلة من الغربة من السودان ، وفى طريق عودتى من الشمالية ، قررت ان أعود بالقطار ، عشان اشوف حبيبتى عطبرة،
لكن إتخيل شفت شنو ؟ هـــيروشيما ، وإتحسرت شديد ، مشيت المدرسة الثانوية اللى قريت فيها ، لقيت أشباح ، لقيت طلبة ما طلبة ،
ورجعت تانى للقطر الشايلنى للخرطوم وكلى حسرة ، على مدينة كانت أم المداين وقهوة عمك المرحوم الامين وسينما الوطنية وأفلامها الهندية وكمان افلام الكراتية، وسينما الجمهورية اللى كان دايما بيرجعوا للناس قروشهم لانهم ماقدرو يخلصوا الفيلم وكمان وكمان ، فخليها فى حنانك ياخوى ، لحد ما نلقى ليها سكة.

الاخ احمد

ياريت لو تحكى اكتر عشان الناس ماتتحدث عن ثلاثة مناطق مهمشه فقط ويركيزوا عليها قى موفاوضاتهم ونقاشاتهم ايضا ويعرفون انه فى مناطق كتير مهمشة فى السودان مش ابيى وجبال النوبة والجنوب والواقع ان السودان كله مهمشم بفضل هذه الفئة الحاكمة و غيرها من حكام الوطن الذين يحكمون لما فيه مصالحهم فقط

مكرر

اخى احمد
هانت ونتمنى ان ترجع عطبرة زى زمان وكل السودان كذلك
والسكه قربت ونحن ناي السكه زاتها

عزيزي ود الياس
لك التحايا

أسمح لي بأن ألج في هذا البوست العطبراوي الحميم ، فأنا كما قلت للأخ العطبراوي من قبل : أنا عطبراوي حتى النخاع.

فقد ولدت في الزمن ( العديل ) في حى القيقر ( بيوت بثلاث قبب ) و بجنينة ممكن تظبط ساعتك عند دخول الماء لري أشجارها. ثم إنتقلنا للعيش في منزلنا بالحصايا ( المزاد ).
زمن اللبودي و فريق الأمل و الأمير و الهدف.
زمن عبدالله موسى ( زميل الدراسة ) و شوقي عبد العزيز زميل ميادين الكورة بالقرب من الأميرية الوسطى.
زمن السينما الوطنية و الجمهورية.
زمن قهوة شناكة. و مكتبة دبورة.
و حوامتنا في أم بكول و زقلونا و محطة ود الريح و الداخلة و حى العمال و شارع الرى و الفكي مدني.
و سوق عطبرة الكبير ، و عمك صالح عبد الله ، أول من أفتتح ( بوتيكا ) في السودان.
و حسن خليفة العطبراوي الذي كان يملأ رئة عطبرة بالزخم الوطني.
و نهر الأتبراوي الذي له الفضل في تعليمنا السباحة.
و ساحة المولد التي تعلمنا فيها ركوب الدراجات.
زمن نذهب( لإلتقاط الزونيا ) من حدائق السودنة ، فننتهي بمطاردة ممتعة لبيوتنا.
زمن الخوف و الإختباء أيام أبو جنزير و القصص الخرافية و الحقيقية التي نسجت حول شخصيته. و صفارات الورش و إنطلاقة العمال على عجلاتهم ( الرالي ).
ثم نعاصر زمن الإنتكاسات أيام نميري و ما تلا ذلك من تدمير منظم للمدينة التي كانت من المدن التي يتحدث عنها إلى الآن الأساتذة المصريين الذين كانوا يدرسون في مدارس الأقباط.
عطبرة التي تركناها قسرا عام 1978م بعد أن عشنا عزها ، و شاهدناها تموت ببطء.
و لكن عزاؤنا أن الأهل و الأحباب ما زالوا ( مكنكشين ) بأهداب هذه المحبوبة التي نعرف أنها ستصحو مرة أخرى كمارد من تحت الركام.
لا أدري ما أقول ، غير أن الذكريات تزاحمت بشكل فوضوي في ذهني.

أنا ( قردين و حارس ) ، لرغم أنني أول مرة أسمع بها كعبارة عن عطبرة ، إلا أنني أترجمها ( بنهر عطبرة و نهر النيل ، ثم إنطلاقة نهر النيل من عند المقرن شمالا.

و رغم أنني لا أحبذ هذا التعبير لأن حاشا للنيل أن يكون قردا ، و الحارس هو الله.

عافاك الله و دمت.

عفوا ، فقط تصحيح بسيط ( أما ( قردين و حارس )

عزيزى ابوجهينه
اهلا بيك فى بوستك ايها الاصيل من الزمن العديل ياحليل زمان وايام زمان ياريت تدينا لسه اكثر واكثر من زكريات ذلك الزمن الجميل
عن كل احياء عطبرة وناسها
ونحن فى انتظار المزيد
ولم تبقى غير الذكريات
فى هذا الزمن الصعب
ودمت للسودان ولعطبرة

يا ابو جهينة ، طلعت دفعة يا راجل

بذكر اول ما وصلنا داخلية المدرسة الحكومية ،طبعا جايين من الاقاليم ، وفى نفس الليلة كانت فى حفلة فى حى السكة حديد ، وكان اول مرة اسمع عن فرق الجاز ،وعطبرة كانت فيها احسن تلاتة فرق جاز فى السودان منها - فرقة دانا وهى فرقة سلاح المدفعية بقيادة الفنان طيوبة والذى كان بهلوانيا للحد البعيد
وفرقة بوليس النيل بقيادة احمد طرمبة
وفرقة جاز بوليس السكة حديد بقيادة عوض، فرق كانت تتنافس منافسة قوية جدا
فى الليلة ديك كانت الحفلة بى فرقة (دانا )لكن المشكلة كانت إننا ما بنعرف البلد ، مرة تسمع الصوت جاييك من جهة الجنوب ومرة من جهة الشمال المهم إتجهجهنا جهجهة شديدة لحد ما وصلنا محل الحفلة ، وطبعا فى الوقت داك ما كانت دايرة ليها عزومة ، المهم تمشى تقيف ليك بى جنبة لحد نهاية الحفلة ،
المهم إتدردرنا شوية ، وفى الفترة ديك بديت اعزف على الاكورديون
وجانا برنامج إسمو من خارج الاستديو فى مسرح مدرسة عطبرة الحكوميةوجانا الفنان العملاق حسن خليفة وطلعت معاهو المسرح وكانت قصتى الطويلة مع هذا الفنان العملاق وبداية حياتى الفنية -
ولى بقية--------

عزيزي ود الياس : لك تحياتي ، و يشرفني أن أكتب عن عطبرة ، هذه المدينة الوطن.

عزيزي و إبن عزيزي : أحمد ساطور
لك التحايا و المودة

ربما نكون دفعة ، و لكن أنت تعرفني قبل أن تحضر أنت لعطبرة ، فقد كنا أحيانا ننزل ضيوفا في منزلكم العامر متجهين شمالا أو جنوبا ( أيام الكومر ).

أحكي لك قصة ظريفة حدثت لنا في عطبرة.
كنا نسكن في بيوت حى القيقر بالقرب من منزل المغفور له محمد عبد المجيد طلسم ( والد البلابل ) أيام كان ناظر الثانوية الحكومية ، و كان إخوة البلابل نادر و بركات يدعوننا دائما للسباحة خلف منزلهم في النيل ، و حدث أن رآنا يوما والدهم طلسم ، فكانت علقة لا تنسى.
لذا قررنا أن ننقل نشاطنا ( السباحي ) إلى نهر عطبرة ، و طبعا نهر عطبرة نهر شبه موسمى ، يعني بيعتمد كثيرا على روافده ( الساسريب و أنهر صغيرة أخرى ) لذا تجده في أغلب الأحيان متقطع هنا و هناك ، و كان مرتعا خصبا للتماسيح و الورل.
المهم ذهبنا كلنا كشلة ، و كان معانا واحد ( أطال الله عمره ) إسمه تاج الدين
( حلفاوي من دغيم قريب البلابل ) فإقترح نعمل مسابقة في الغطس و إحضار أي شيء من القاع.
المهم بدينا في الغطس و كل واحد يغطس و يجيب حاجة من تحت . دة نص دقيقة و يجي مقلع بخشبة ، و داك دقيقة إلا ربع و يجي مقلع بقماش .
المهم معانا واحد نظرو ضعيف جدا ، و منذ صغره نضارتو ( قعر كباية ) ، أها أخونا دة غطاس و نفسو طويل ، غطس لغاية ما شفقنا عليه ، جانا مقلع و رافع ليهو فخدة تمساح ميت ، كلنا قمنا جارين و شايلين هدومنا ، هو بالخلعة خلى هدومو و جاري ورانا و يكورك و شايل فخدة التمساح ، نحن نقول ليهو ( أرمي رجل التمساح ) و هو جاري يكورك
( وين رجل التمساح ؟ )
لغاية ما وقفنا شرطي من شرطة السكة حديد ، و وقف صاحبنا و قلع منو الرجل التي كانت متعفنة تماما.
صاحبنا حلف قال : يمكن إسبوع يقوم من النوم مخلوع : التمساح ... التمساح

و لنا عودة

عطبره مدينتنا الحره, الثائره ضد العسكر

اذكر جدتي عند الانتفاضه, كانت من اوائل الثائرات الالئ خرجنا الي الشارع, عندهاكنت صغيره, اقضي اجازه الصيفيه معها, اندهشت وقتها لحس و الوعي المتطور لدي نسائها و رجالها

ود الياس

ممكن يكون القردين النظامين العسكريين (نميري و البشير) الاثنين حاولوا بكل السبل تدمير عطبره اجتماعيا , اقتصاديا وثقافيا و الحارس هو النيل الذي يقف شاهدا علي ذلك

bent-elassied
ان شاء الله الايام دى تعود وسوف تعود
عطبرة الجميله بلد الحبايب
عطبرة الجميله بلد القرايب
تسلمى

ود الياس







تعرف ناس عطبره من اوائل المؤسين لامبده؟؟؟؟؟؟؟؟؟

الاخ
فجراوى
اسف انا كنت بمزح مع اخى امادو
وطبعا ام بدة فى قلوبنا مثل عطبرة
لك العتبى حتى ترضى
لك اجمل التحايا

الاخ العزيز ود الياس
نحن من عطبره لكن ما بنقدر نفسر ليك الكلام ده لكن احد مجانين عطبره زمان كان بقول الحكومات بتمر بتلاتة مراحل مرحلة الكلب ودى مرحلة الانباح والبيانات النارية والخطب العصماء...ثم مرحلة الحمار وهذه مرحلة التحميل والثراء الحرام والمرحلة الاخيرة مرحلة القرد ودى خلاص مرحلة من نعمره ننكسه فى الخلق تاتى الحكومة فىهذه المرحلة بالافعال والسياسات المضحكة والتى تثير سخرية المواطنين الاذكياء و الاسرة الدولية
*********
غايتو ده استشهاد بعيد ومن قال لا اعلم فقد افتى
واهلا بيك صديق للمدينة التى قتلت ودفنت حية مع سبق الاصرار والترصد

عزيزى
عادل امين
تفسيرك وصل والله يعطيك العافيه
واهلا بك اخا وصديقا لكل السودان المكلوم
ودمتم للوطن

ودالياس
تحية
احد القرود انت والبرتقالة هي

أخونا ود الياس
تحية وسلام

من قال لك هذا المثل هو عطبراوي قح
قديم قدم الدوم

كانت عطبرة غابة من الدوم
وسميت عطبرة ام دوم
كانت فيها قرود من اصعب أنواع القرود
كذلك كان فيها القرادة وكان هناك سوق لبيع القرود
بجانب مصنع الخواجة نقولا لصناعة الصدف من الدوم (البقو)، ومن صعوبة نوع تلك القرود التي تنتشر على فروع أشجار النيم كان القرد الواحد يغلب حارسة (القراد) فما بالك بقردين
وأصبح يضرب المثل لصعوبة السيطرة عليهن وخاصة لو علمت من رقة حال القراد وضعفه

هي عطبرة لن يروضها قراد او مروض أسود
سوف تظل رغم كل السياسات هي عطبرة
أما التفسير الذي قصده العطبراوي القح هو إن القردين بدت عليهما السطوة لمهاجمة الحقل الذي تحير حارسه إلى أيهما يلتفت
خاصة كما ذكرت لك من قبل تلك القرود الصعبة كانت تسلب إذا جاعت
فقد أراد أن يقول لك هناك نذر فقد أعذر من أنذر
وأن الحال أصبح يأتي من ذات الشمال مرة ومن ذات اليمين مرة
وقد تكاثرت النبال


وإذا كانت هناك حيرة فهي في من أين أتى القرد الآخر إذا كنا نحن أهل عطبرة نرى وحدة الظروف في كل شيء ولو في قرداً واحداً
هذا هو التفسير للمثل
وشكراً لك لإتاحتك لهذا المهنى أن يطل على ساحة يمر بها الكثيرون من أحباب اتبرا ام دالات بندر السرة

اخى الدكتور
المبدع
محمد مدنى
بتقول ليك البرتقالة انا والخلاسى هو
اين انت ماهذة الغيبه حرمتنا من ازرقك الفتان
نحن فى الانتظار
مع تحياتنا