Post: #1
Title: كونسيرتو الشوق _ علاء سنهوري
Author: خالد عويس
Date: 06-04-2003, 09:12 AM
كتبت قصيدة جديدة هنا في الغربة
... ... ... ...
كونسيرتو الشوق
علاء سنهوري
كلماتك وصلن
ورّنّي حالة قلبك
ومسّدن أحزان العين
وصلن
حوّمتهن الغربة
شافن أوجاعي وسمعن كونسيرتو الشوق
وحكيت
أحياناً
كانن ببكن من حال الدم الفي قلبي معكّر
والنم الفي فمّي محكّر طوفان
أحياناً
بحتاج أسكت وأسمع قولن
كلماتك صوت ساكس وكمنجة بينات الليل
صوت موج ونوارس مليان برحيل
قول بت دابت في نسمة
وسوّت فِ الحته دُعاش
وحكيت
عن طقس فِ إقليم المنفى
ما بشبه طقس الأصحاب الضاحك صيفاً
ولا بشبه طقس الحب
الحار في مِسا شاتي ... وأتمنّى يطول
كلماتك وصلن
أُمبارح ... وهسه ... وباكر
وصلن
ولو كنتِ معاي
كان شفتِ الأوراق كيفن حضنن عينين
ما ملّ يسقن جرح السكّه
ولو كنتَ معاك
ما كان عبّيت إيديك فَ الذاكرة وداع ... وبكيت
وكتين
سافرتَ وخلّيت
شقيانه وراك خطوات الموج
وما كان أصلاً طلعت جواز لي غربة
وغادرت الأصحاب
كيف الأصحاب ؟
كيف الزحمة ؟
والجامعة معاك ؟
والونسة نهار ؟
كم فِ الأشجار من حُب ؟
يارب فِ كلام عن حفل قريب ؟
والتذكرة كم ؟
أو رحلة إلى قلب المحبوب ؟
والشيرنق كيف ؟
يارب فِ شنو ؟
والحاصل إيه ؟
... ...
كلماتك وصلن
حوّمتهن الغربة
فتحن شُباك
طليتي معاك الدنيا هناك
قيّلنا سوا
وسمعنا كونسيرتو الشوق
حريّة ... وحب
... ... ...
|
Post: #2
Title: Re: كونسيرتو الشوق _ علاء سنهوري
Author: أبو ساندرا
Date: 06-04-2003, 10:27 AM
Parent: #1
لو كنا نعرف ان الغربة ستفتح مخزن ابداعه ،لحرضناه عليها من زمن ،ونرجو لعلاء المزيد من المكابدات من اجل مزيد من الروائع ، هذا
الصباح أرسلها لي على الإيميل ،وعرفت إيميلك ودعوة للتواصل
ولا عزاء لعلاء
|
|