خشوا واكتشفوا براكم عشان ما لقيت عنوان كويس ! ليك يا اساسي وشيري وكلكم قولو

بسم الله الرحمن الرحيم

عليكم الله انتو بتجيبو المواضيع دي من وين مواضيع رائعه

انا مواضيعي بايخه شديد ودايما بكون نصيبي لما اخش البورد الاحباط

لانو مافي زووووووووووووووووووول برد علي مش حرام عليكم الله وروني

رايكم بصراحه في المواضيع دي خاصة انت يا اساسي ويا شيرى وبامسيكا

وكمان هوبلس ودكتوره نهى وود الجعلي ويا زوله انا اتعودت منك

الصراحه عشان كده وريني رايك بصراحه ويا جدو كمان

السفير دايمنشن
اولا الليلة رفعت معنوياتي لحدي راس البيت دي تاني مرة زول يعنون بوست ويوجه لي مخصوص طبعا كنت بغير من الناس البوجهو البوستات وما بدخلها كلو كلو عشان فرضو لي (س)وما اشتغلوا بي
اها قلت ليك المرة الاولي البوست المعنون باسمي انتهي بشكلة ليها ضل ورفدوا الزول العنون لي البوست ولاسعي ما كتب تاني لكن المرة دي شكلها مختلف طبعا اسع من الفرح والبطر اوداجي منفخة ما يسمع واحد اوداجي منفخة اسع ويلحقني بي دبوس
يازول والله بصراحة انا ما قاعد احضر لبوست قبل فترة والكلام البيجي في راسي بدون غربلة زاتو بفكو ومرات بدق في العراضة ويطلع اوت دي كتير ومرات بخش القون
لكن يا السفير منو القال انت بوستاتك ما بتجيب دخل تعرف بتكلم عن نفسي بس وما عندي علاقة بالناس التانين القلتهم الحكاية عاملة زي موضة الافلام الكومدية غير زات المضمون وهي ما نكتبه ولكن ما يكتبه البعض وانت منهم فهو مثل الافلام الكلاسيكية الكبري التي قد يقاطعها احيانا الجمهور يكون محتاج لنوع من الترفيه بشتي اشكاله وهذا ما اظن الذي نساعد في جزء منه ولكن تبقي الاشياء الجيدة ازمانا طويلة وهذه بوستات تستمر فترات طويلة اما ما نكتبه فيذهب جفاء وينتهي الموضوع في يومين بعد ان يقيم الدنيا ويقعدها ولكن سريعا لانه خارج عن المالوف
لذا سيدي اكتب ما يمليه عليك احساسك الصادق ولا تتصنع شئيا ليس فيك ولا تكن الا السفير ولا تعتقد انك غير مقرؤ واحيانا قد تقل المشاركات ولكن تكون الاستفادة كبيرة جدا مما تكتبه سوي ما نحدثه احيانا فهو فرقة في فنجان لا تبقي طويلا
احيانا اميل الي عناوين مستفزة نوعا ماء وهي تساعد في قراءة بعض ما اكتب
اليك مثالا
كتبت بوستين امس لا اعتقد ان فيهم ما ينفع قضية كثيرا وان قلت فيهم راي وانزلت اليوم بوست يتلمس في ماساة الخدمة الالزامية وما تفرزه من ماسي وان اخترت لها عنوان غريب نوعا ما ولكن لم احظي بمشاركة واحدة حتي الان فهل في رايك اهم موضوع من يكتب باي اسم ام موضوع الخدمة الالزامية وهذا الرابط للموضوع عملا بما قاله بدرالدين ابو شيبة الشين ودشن
يا للعار حبيبتي ....نشالة

يا سفير
غالي والطلب رخيص

انا شخصيا ما قاعدة اكتب مواضيع منفردة كتير
زمان يمكن لمن كان البورد بورد
بعدين اخدت لي فترة صمت وتفرج لمن زهجت
ولقيت انه مافي فايدة
يعني لمن موضوع يستفزني كنت بافكر عشرين مرة رد الفعل على ردي حيكون شنو والزول ده حيزعل والزول داك حيفهمني غلط
بس ده كله طلع مضيعة وقت
وفي الاخر قررت اكتب الدايراه واعلق بالكلام العايزاه دونما اعتبار لاحد, يعني حتى لو قالوا البت دي لسانها طويل وشكالو وجريئة وووووو ما حتفرق معاي

اها ارجع لسؤالك
مواضيعك ما مملة, لاكن بصراحة ما قاعدة افتحها لووول

اقول ليك سر ؟موضوع اوضة الاولاد ده عجبني شديد
وملاحظتي الاخرى انك كتبت اكتر من اربعة بوستات في وقت واحد
واي زول حيقول السفير ده ما عنده موضوع اكيد كلهم بيتشابهو وبس بيضيع وقت
بعدين ما تستجدي الناس يقروا ليك حتى بالهظار
عشان بالفعل في كتير بيقروا ليك من دون ما يعرفوك او يكتبوا
دي نصيحة بناتية بحتة يعني اتعززز وما توريهم انك ما لاقي قراء لوووول

اها نصيحتى الاخيرة للحصول على ردود
حاول تخلي مواضيعك تأخذ منحى نقاش
يعني تطرح تساؤل فعلي في آخرها او تسلسل في رؤووس الاقلام
يدي مجال للردود ومن ثم الحوار

نصيحة اخيرة
اوع تغير شخصيتك او تتصنع يعني ممكن تطور نفسك للاحسن بس حافظ على مفردات شخصيتك الاساسية

يعني ما تتحول لكشال زي اساسي عشان تضمن فضول الناس البيخليهم يفتحوا بوستاته
ولا تبقى مجامل زيادة عن اللزوم زي البعض عشان تضمن ردود اصحابك والجكس وكدة

اها تاني داير شي؟

تحياتي
زولة123

سفير الانسانيه

سلام دبلماسي

ياسيدي اساسي ودكتوره زولا ما قصروا وقالوا مافيهو الكفايه

اساسي قال

Quote: لذا سيدي اكتب ما يمليه عليك احساسك الصادق ولا تتصنع شئيا ليس فيك ولا تكن الا السفير ولا تعتقد انك غير مقرؤ واحيانا قد تقل المشاركات ولكن تكون الاستفادة كبيرة جدا مما تكتبه سوي ما نحدثه احيانا فهو فرقة في فنجان لا تبقي طويلا

دكتوره زولا123

Quote: وفي الاخر قررت اكتب الدايراه واعلق بالكلام العايزاه دونما اعتبار لاحد, يعني حتى لو قالوا البت دي لسانها طويل وشكالو وجريئة وووووو ما حتفرق معاي

وانا بقول

خلي احساسك يوصلك للشئ الانت عاوز توصلو للناس ومن غير كلفه
مادمت شايل فكره وعاوز توصله للناس اكيد حتوصل ولو بعد عده محاولات بس يا سيدي خلي بينك وبين اليأس مسافه وعدم ولف

وبصراحه وما مجامله

مداخلاتك ومشاركاتك كلها جميله وما محتاجه منك استجداء لزول

وبنفسك تصنع نفسك وبفكرك تقدر شخصك

والسلام امان

شكرا على التشجيع

عزيزى السفير


انا شايفك ما جبت سيرتى فى البوست دا . يعنى نحن ما قدر المقام ولا شنو

اساسى دى فرصة اتملقك . بوستاتك بتعجبنى انت وسجيمان الرمدان
اساسى انا بأتملقك كدا ليه ؟ أكون داير منك شنو ؟ القرد بعتو ولا لسع

السفير ياخى انت سفير ياتو دولة فى ياتو دولة

شكرا مره تانيه على التشجيع

انا سفير دولة الوليات المتحده في الولايات المتحده



وكيف يعني ما قدر المقام وزالاغنيه ابت كلو كلو تجيني

السفير الرجاء قراءة بوست بدر الدين بخصوص تكبير كوم بوستاتك، أخونا هوبلس لو الأفكار بتوصل للناس براها ما كان في داعي للتعب و الأكل الكعب و شوف ليك وسيلة مواصلات سريعة لأنو الصدق و الفكر و الاقناع بقوا موضة قديمة،،،،، تحياتي

مبروك سعادة السفير .. خلاص اعتمدوا أورقك

العزيز السفير
لك التحايا العواطر
تسلم يا اخوي على هذا الشرف الذي اوليتني اياه بذكري مع
عمالقة البورد ومخضرميه...مع اني لسه يا دوب ولست بكاتبا
ولكني قارئ متابع للبورد...وقد عانيت من عدم الرد على بعض
البوستات على قلتها ..
وشايف الاخوان ما قصرو تب في مدك بالنصائح ...وقد همست لك الاخت
د.زولة 123 بالعديد من الوصفات السحرية والنصائح الذهبية
وما عندي كتير اضيفو الا ان اذكرك مرو اخرى بالبعد عن الياس
والاصرار والمثابرة على الكتابة...

آسف جدا على تأخر الرد فقد كانت عندي مشكلة مع صفخة البورد من الصباح ...معصلجة معاي وابت تفتح...لكن اخوك عكليييييتة..
بقيت كلو مرة امشي واجيها القاها كانت بي ديسبلايد...وتاااااني امشي واجيها..المهم في نهاية اليوم فتحت معاي..
دا برضو درس في الاصرار والعكلتة..


لك المودة والاحترام
جدو

السفير
كدي تعال دقيقة تاني
يا زول انت الا بعد ده تدفع للدروس دي, ولا نقدم ليك في بلاد بره عشان الحالة متقدمة

عاين يا عزيزي
حسي اساسي المسكين ده وما حقول ليك انا عشان متنازلة عن حقي
تفتكر الوقت الختاه لكتابة المداخلة الطويلة دي لا يستحق منك تعليق ؟
يعني حتى شكرا قلتها في الآخر ويمكن لزول تاني ولا يمكن برضو للجميع
اها شفت انت لسة ما فهمت العبة
وزي ما بتكسل ترد على الناس نفر نفر هم حيكسلوا يردوا على مواضيعك

اها قوم اكتب رد ومداخلة ذات معنى على رد اساسي وردي والباقيين
وقبلها افتح بوست الموصلي بتاع صور ابناءه وشوف الحرص على شكر المشاركين بيرفع معنوياتهم كيف مع انه بخلص الباند.. اسمه شنو داك حق بكري؟؟ لووووول

عاين الحصة الجاية تجيب الرسوم قبل ما تجي

تحياتي
زولة123

[email protected]
اها شفت الحرفنة كيف يا السفير
دي دروس مجانية ساكت
امسك في زولة دي قوي

بسم الله الرحمن الرحمن الرحيم

شكرا ليكم جميعا على نصائحكم المفيده شديد كلكم و خاصة الدكتوره زوله وجدو واساسي ويا ريت لو بقدر ارد جميلكم

شكرا جزيلا وانا حاسمع كلامك يا جدو وحامسك في زولا دي مسكه لما

تقول بس