بـركة الشـيخ الـبرعـي

سنة زلزال الخرطوم المزعوم (على وزن سنة ميتة فلان) كتب الشيخ عبد الرحيم البرعي قصيدة خفيفة قام بأدائها أبناؤه في فرقة أبناء البرعي للانشاد . القصيدة كانت مجاراة لأغنية التراث الكردفاني المشهورة – دار ام بادر يا حليلا . ما أتذكره من كلمات تلك الأنشودة الخفيفة :

من هزة الأرضي
مولانا بالمرضي
تداركنا

متوسلين ليكا
بالساجدين ليكا
الأرض تحريكا
زلزلبو أمريكا

ندعوك يا شافي
ويا حي ويا كافي
تلفى الحبيب دافي
وتجيبو من مافي

فنجانك البكري
شاغل دوام فكري
فوق ود حبيب بكري
زايد دوام شكري

والقصيدة طويلة ..

طيب أها .. يمكن ما نتلاقى تاني ، الدنيا ما معروفة . ما تقطعو الجوابات .

اهل العوض سلام

نعل ما عوجه آآآزول وين هابق..؟

ات دحين القصيده دي ياها كدي ولا عدلته لزوم مواكبه احوال البورد الايام دي..؟

بس اكان جات زي ما هي

ما في غير قولك بركاتك يا شيخنا البرعي

ما في أمل
ماتكلم الجماعة .. اسكت ساي
وقول يا لطيف

حىىىىىىىىىىىىى

بركاتك يا شيخنا
تجيب دافى


مع تحياتى

بالليل ده ماشى وين ...يا أهل العوض ؟...
القلتو نتمنى ما يحصل

ولك البقاء بيننا...ما بقيت السين تتوسط السودان كتابة...

تحياتى
ودعزة

نرفع الطواقي عاليا
للعمدة
ولك يا قلب البورد - ود عزة

بسم الله الرحمن الرحيم

أهل الجمال والذوق
سلام يا رائع

والله يا أهل العوض برعت وأتبرّعت .. طبعاً تبرعت دي ما تخاف ما فيها قروش تبرعت هنا المقصود بها إنك بقيت برعي البورد

ندعوك يا شافي
ويا حي ويا كافي
تلفى الحبيب دافي
وتجيبو من مافي

فنجانك البكري
شاغل دوام فكري
فوق ود حبيب بكري
زايد دوام شكري

وكمان أنا أتمنى من ود حبيب بكري الصفح عن الجميل دافي

ربنا يحفظ أبونا البرعي


قوود وييك إند العوض فاميلي

اهل العوض

يديك العافية يازول جميل جدا
ونحنا معاك
بعد تدينا الفاتحة

متوسلين بيكا
وبي وشك البدري
كان يرضي ودبكري
ويفرح جميع القوم
بي رجعة البدري

قلوبنا معك
فوالله ماعهدته الا رفيق حرف ابيض

عبدالله جعفر

عايزة انتعش وانعش معاي عشاق السيرات العطرة
والمديح والانشاد
عايزة اعرف اصوم وادخل بوستات البورد بدون ما يجرح صيامي نابي القول
سلام يا اهل المحبة

الجندرية الأستاذة
لو كنتي رجلا لقلت ليك زوجك الله من الحور العين ..
هذا البوست كتبته في لحظة افتقاد للأخ دافي فريد فرقته ..
تحياتي لك
تحياتي لتمبس
تحياتي لدافي

اخونا اهل العوض
سلام ورمضان كريم
والقال ليك منو نحن ما بزوجونا
نحن بخيرونا
ولانه ازواجنا الاخترناهم واختارونا اجمل في نظرنا من اولاد الحور حنختارهم تاني
اللهم اوعدنا الجنة جميعاً ببركة الشهر الكريم دا قول امين

آمين يا الجندرية
يعني طلعت سليمة - يبدو إنو دي فعلا بركة الشهر الفضيل ..
كنت متوقع سيخة طايرة ولا شي من هذا القبيل
حيث أن المعروف عنك أنك الصول بتاع البورد
عموما كلمي تمبس يشوف لينا دافي دا لابد وين

السيخ خلينا لي اهله
نحن ناس الحسنة المعطت شارب الاسد
رمضان كريم يا اهل العوض
بعدين يا اخوي رقونا لي لواء
تاني مافي سيخ
في رصاص الكلمات الندية
ودي تهد الجبل وتجيب الديب من ديله

الجندرية أختي وأهل العوض الزين
سلام ورمضان كريم وتصوموا وتفطروا على خير

انتوا الكلام الحلو دا قاعدين تجيبوه من وين ؟

القومة يا ناسي
للزادوا ايناسي
لي دافي ما ناسي
فُرق الحبيب قاسي


اهل العوض صايم
بي واجبه تب قايم
قال دافي وين حايم
دا الفي الذكر هايم


شنتير وجنديرة
ودافي الكتير خيره
ماهم قراب ديرة
لكن نضاف سيرة

اهل العوض تشكر
راجل الكرم والكر
مع دافي يوم الحر
في الجنة نتحكر


يا رب سلم وصلْ
على خير من أرسلْ
بي جاهو نتوسل
من طاعتو ما نكسل

ابو قصي
الكلام دا بجي براه ما فتشوه وبكون حلو عشان كلام المحبة
ربنا يعمر القلوب بيها ويديم علينا نعمه

الصاوي
يجازيك ربي بالخير والسعادة

الصاوي تلب الشيل
متشكرين بالحيل
نمك فتق قنديل
يضوي ويعدل الميل

فيض شكري فيك قليل
كونك رزين وعديل
لين قول كلامك أصيل
يشفي السقيم وعليل

اهــل العوض
الجنــدرية .. والاخوان
رمضانكم كريم وتصوموا وتفطروا علي خير ..
كلامك السمح ده . يحمي الزول النوم يا اهل العوض .. والله من امس من ما جدعوني باللنك ده .. وانا اتململ داير الطريق التلمني بيكم .. الزحمة حاصلة .. ربنا يسهل الامور . .يا اهل العوض الزول الممسوخ ده ما لامي فيهو والله انا ذاتي كايس لو .. بياخد ليهو غطسه كده بيعرفه براهو ويجيك قالع شغال بي مزاجو بس .. لما يكون رايق بيعمل نائم .. ولما تسخن عليهو الحكاية يج ينكرش هنا .. لكن بنطلق ليهو البمبان ..بيجي مارق ومسعول من الخير .. ودشنتير البلعو ما قال ؟؟ عملت ليهو البحث في القوقل والا لسه ؟؟ والرحمابي وين؟؟ أبو النسب البنية دستو مننا كمان .. والله يا اهل العوض رمضان ده ما بنقدر من غير الناس السمحين ديل .. الله يجمعا بيهم

يا سلام
ده الكلام


اهل العوض
والله القومة ليك يا حبيب
انت والجندرية
وابو قصى
وتمبس
وكل الاحباب

ورمضان كريم وواصلوا النم
نحن غايتو فراجة ساكت ما بنعرف لى جنس ده

تمبس ... شغل سحرك المدخور واطلق ذلك البخور حتى نرى ونسمع من دافي ...
شنتير والله اللدي لا غيرو .. لا خلينا ولا أبقينا .... سعلنا كل الناس البنعرفهم .. وكل الناس ترتسم على كيبورداتهم (لا أقول شفاههم) نفس الأسئلة الحائرة .. أقرب الاجابات في نظري هو رأي الأستاذة دوما التي تظن أن أحدا ما ، في مكان ما ، في نقاش ما أثار غضبته الكبرى فنعل خاش أبو النت وحطم الكمبيوتر والموبايل وجميع أدوات الحضارة وارتمى في حضن مسدار معتق وساقه ذلك المسدار إلى مسادير أخرى .. الله يجمع بيه .

الرحمابي تقول الأخبار المتسلطنة والقادمة من السلطنة أنه شغال حجاز بين صفا (الوسطى) وصفية الصغرى .. لكني أضيف أنا أنه ما زال يتأمل في جمال ذلك المخلوق الجديد ، يرشف من خندريسه ويضيف إليه من جمال روحه ، يتشبع منه هو أولاً قبل أن يكون ملكاً مشاعاً لغيره .

الأطفال في هذه العمر حاجة ما تخلص .. عقبالك يا زعيم .