Post: #1
Title: شنبي الجنن البنوت .....فقدي الليلة
Author: garjah
Date: 05-28-2003, 06:31 PM
جلست الى حلاق هندي
بدا كالعادة بالمساج
وهو تنويم وليس مساج
المهم الراجل خلص المساج وبدا الحلاقة
ودخلت انا في غفوة
صحيت بحركة المقص على شنباتي
انتفضت من الغفوة الجميلة
وامسكت بشنباتي
لاجدها رقيقة الحال
خفيفة الوزن
ضاعت عنها الهيبة وملامح شخصيتي
نظرت للمرايه فاذا امامي شخص اخر
شنبي الذي ربيته في سنوات
وانفقت فيه الساعات تهذيبا وتاديبا
اضاعته غفوتي عنه لدقائق
بمقص حلاق هندي
امسكت به انا قلت ليك احلق شنب
انت في نوم انا فكر احسن ظبط شنب
انت شلت كلوتي وفلذة كبدي يا صديق
|
Post: #2
Title: Re: شنبي الجنن البنوت .....فقدي الليلة
Author: الجندرية
Date: 05-28-2003, 06:52 PM
Parent: #1
اجي يا قرجة
انت البوديك للهندي دا كل مرة شنو
مش ياهو ذاتو الحلق ليك قبل بوست شنباتنا فلذات اكبادنا ؟
|
Post: #3
Title: Re: شنبي الجنن البنوت .....فقدي الليلة
Author: garjah
Date: 05-28-2003, 06:59 PM
Parent: #2
الاصيلة
الجندرية
تسلمي ومشكورة على الطلة
تكررت الحالة يا اختاه
كفري لي
|
Post: #4
Title: Re: شنبي الجنن البنوت .....فقدي الليلة
Author: شلاقة
Date: 05-28-2003, 07:36 PM
Parent: #1
البقية فى دقنك
|
Post: #5
Title: Re: شنبي الجنن البنوت .....فقدي الليلة
Author: Abdalla Gaafar
Date: 05-28-2003, 07:40 PM
Parent: #1
قرجة
السلام والود
والله تستاهل ياخوي الهنود ديل في السينما الناس خلتهم تجي انت تسلم راسك لي هندي وكمان تنوم ويازول بركة الماشلو كلو وخلاك تتلفت
وبعدين ياقرجة اخوي انت من زمن البنات البعجبن شنبات الرجال دا كان زمان زمن بقولوا الشنبات ضنب عقرب
وغاب اب شنب
وياناس شوفو لي شنب
اصلك كان مارق في السوق اخير ليك تستعرض بالشنيب الفضلو ليك الهندي وكدي جرب مع بنات الزمن دا
يديك العافية
عبدالله جعفر
|
Post: #6
Title: Re: شنبي الجنن البنوت .....فقدي الليلة
Author: cola
Date: 05-28-2003, 07:42 PM
Parent: #1
ودعمتى قرجة
مشيت الحلاق تتجمل وطلعته بدون شنب عجبنى ليك تب
وانته ماعندك شغلة غير تبرم الشنب
وانا حا امر الحلاق واديه بقشيش على فعلته الجميلة
لكين عندى سؤال حلقته هسى مالك ما قبل كم يوم كنت حالك
ولا لزوم التجهيز 
|
Post: #7
Title: Re: شنبي الجنن البنوت .....فقدي الليلة
Author: سجيمان
Date: 05-28-2003, 09:00 PM
Parent: #1
يا قرجة شنبك دا جننك ....وجنن الهندي ..وجننا معاك..... عليك الله لما تمشي تحلق تاني غتيهو بلصقة...
|
Post: #13
Title: Re: شنبي الجنن البنوت .....فقدي الليلة
Author: HOPELESS
Date: 05-29-2003, 09:32 AM
Parent: #7
يا زول انت قايلو داير يضرب وشو بويه ولا شنو
|
Post: #8
Title: Re: شنبي الجنن البنوت .....فقدي الليلة
Author: كبسيبة
Date: 05-29-2003, 08:38 AM
Parent: #1
والله ياعبد الله جعفر كلامك تب هو الحقيقة
انت ياقرجة من ذمن البنات البعجبن الشنب ده ذمن الشنيب ولاحظ للشنيب ده حتى ولو مافى كمان اهم حاجة جيبك مليان
ويابنات البورد هوى هل الشنب مهم بالنسبة ليكن؟؟؟
|
Post: #9
Title: Re: شنبي الجنن البنوت .....فقدي الليلة
Author: قرشـــو
Date: 05-29-2003, 08:48 AM
Parent: #8
الحبيب قرجة
لك التحية
تعرف المشى للهنود يكون غلطان فهم لا يميزون بين ما يطلبه المصرى وما يطلبه السودانى وكله عندهم شنب يستحق القص..لك ولا يهمك عليك بوصفة اخونا مهاجر وكريم برشوت والشنب يرجع اشد كثافة والعهدة على مهاجر ..
تعرف اغرب حاجة مرة عند الحلاق وبرضو سهيت وما اشوف ليك صاحبنا الا وشغال بالمقص فى الحاجب .. أى والله الحاجب .. بالله من الله خلقك شفت ليك زول بقصوا ليه حاجبه ؟؟ انا قلت الرفيق جن .. يازول ده شنو البتسوى فيه ده ؟؟ ايوه صديق كده ميه ميه.. المهم الراجل كان عمل بمقصه فى الحاجب وحتى الان انا محتار هل حدث ذلك لغيرى ام انه هندى حقار ؟؟؟
لك تحياتى وحبى
|
Post: #10
Title: Re: شنبي الجنن البنوت .....فقدي الليلة
Author: HOPELESS
Date: 05-29-2003, 09:03 AM
Parent: #9
يا عم قرجه
والله حرام عليك
انت قرجتك دي خاتيه زينه ولا شنو..؟
ما كان تركب الهندي عكاز وتعرفو قميه شنبك
هسي الزول دا ما ضراك وحبسك في بطون بيتك كم يوم
اوعي تقول لي حتحوم بيهو كدا
يا عم قرجه كل شئ الا التشويه
وخاصه تشويه السمعه والشنب
ديل فيهن دم
اها ناوي تضبح ولا لسه...؟
عمو قرشو
الزول دا والله حقر بيك عديييل كدا
كدى شوف الموضوع دا تاني ممكن تطلعوا الاتنين ضحيه هندي واحد
|
Post: #12
Title: Re: شنبي الجنن البنوت .....فقدي الليلة
Author: ابو نور
Date: 05-29-2003, 09:26 AM
Parent: #10
قرجه
كفاره والجاتك
في شنبك جهجهتك
مره انا كنت في كوالالامبور
وقعدت فيها زي شهر ونص
المهم اضطريت احلق
وكان صحبك هندي ماليزي
عمل لي قطعيه من نص رأسي
كرهتو ليك كره
ولي يوم الليله انا بحلق عند زول واحد بس
شديده منك يا سجيمان قطي بلزقه دي هههههههههههه
كل الود كل التحايا لكم
ابونور
|
Post: #11
Title: Re: شنبي الجنن البنوت .....فقدي الليلة
Author: bushramk
Date: 05-29-2003, 09:09 AM
Parent: #1
هندى؟
انت أضان فى موجود صديق؟
|
Post: #14
Title: Re: شنبي الجنن البنوت .....فقدي الليلة
Author: مهاجر
Date: 05-29-2003, 09:46 AM
Parent: #11
قرجة
في حلاق سوداني من الدرجة الاولي
ما عندك مشكلة نوريك المحل وين
في جنوب جدة لكن لازم تدفع كوشن عشان اوريك الحلاق
او تعمل دعوة لبودراب جدة
|
Post: #16
Title: Re: شنبي الجنن البنوت .....فقدي الليلة
Author: garjah
Date: 05-29-2003, 10:24 AM
Parent: #14
الاحبيب مهاجر
اول مرة اسمع بحلاق سوداني في البلد دي
ياخي في السودان السودانيين خلو الشغلانة دي
للاخوان الارتريين والاثيوبيين
موضوع العزومة مافي مشكلة بس الناس القبلي
يوفو بوعدهم
|
Post: #18
Title: Re: شنبي الجنن البنوت .....فقدي الليلة
Author: مهاجر
Date: 05-29-2003, 12:07 PM
Parent: #16
ما عندك مشكلة نديك الجوال بتاعوا عشان تمشي ليهوا
لكن الجماعة القدامك ديل ناموا في العسل
لكن يا اخوي الشهر ما خلص لسة نديهم 5 يوم
يعني قبل الخميس الجاي لو وجهوا الدعوة نعلن ثورة عليهم
|
Post: #15
Title: Re: شنبي الجنن البنوت .....فقدي الليلة
Author: garjah
Date: 05-29-2003, 10:11 AM
Parent: #11
شلاقة
البقية تاتي يا حبيب
عبدالله جعفر
...لكن الشنب
عندو تاثير ولا زال له بريق وجذب
ابرم شنبك يا حبيب ولا تفرط فيه ابدا
فهو ثروة قومية وعملة صعبة حيث عزت الاشناب
وخفت الشلوفة
كـــــولا ود الخال
لاحظت اني الان سريع الكلام بعد ان خف عن شلوفتي العليا حمل ثقيل
بالمناسبة كلموشلوفة تناسب السودانيين
فعند المصريين هي بؤ....وهي كلمة قدر بؤهم
وعند الشوام تم ....وقي قدر تمهم
وعند الخواجات ليبس وهي قدر ليبهم
وعندنا طبعا شلوفة وهي قدر شلوفتنا
سجيمان
معليش يا سجيمان صبرك علينا شوية
يعني عليك الله الشنب المخلوع لا يستحق ليهو بوست
واللصقة ...احسن والا شنب جاهز
تتخيل يكون عندك في الدولاب ضلفة شنبات
كل ما تجي مارق تختار ليك شنب
واحد زي دركسون العجلة ده تهرش بيهو الجماعة
وواحد زي ضنب الضب تقابل بيهو ناس البورد
وواحد شنيب على قول عبد الله جعفر
لتبدو به رقيقا
هوبلس
والله يا اخوي كونو الواحد بقى شنبلس
وشاركك في هوبلس ....وعقبال شنبك
كبسيبة
انت وعبد الله جعفر علي
ومن يقف لجانبي في ازمتي...وفقدي العزيز
عمدتنا قرشــــــو
والله سمعت حكاية ضياع حاجبك
هان علي ضياع شنبي
لكن يا قرشو حلاقي ده رغم فعلتو دي عندو مقدرة عجيبة على اصطياد
الشيب....وقلعه بالمقص....وتخرج كانك ابن العشرين...رغم اني قريب
من العشرين بحاجة بسيييييييييطة
الحبيب ابو نور
والله حكايتك بتاعت ماليزيا دي خلتني اخجل اني فتحت بوست بحالو عن ضياع شنبي....ياخي حلقة زي دي كان المفروض تفرش ليها عديييل كدة ...وتلوم الما بيعزيك في قطعيتك
بشرامك العزيز
انت اضان في موجود صديق
ذكرتني نكتة الحلاق القطع اضان الراجل
وقال ليهو عايز اضانك
رد عليهو ايوا عايزة ياخي
قام الحلاق قطع الاضان التانية كمان
واداهم ليهو الاتنين في يدو
.؟
|
Post: #17
Title: Re: شنبي الجنن البنوت .....فقدي الليلة
Author: manubia
Date: 05-29-2003, 11:04 AM
Parent: #15
this is the second time it happened to you ,ya garjah,next time pay attention, do not take a nab at the barbershop,
regards ,ya fardah
|
Post: #19
Title: Re: شنبي الجنن البنوت .....فقدي الليلة
Author: Ahlalawad
Date: 05-29-2003, 12:17 PM
Parent: #1
يكون دا شنبك التاني يا قرجة؟
الكنت بتخليه في البيت لمن تمشي الحلاق الهندي
بعدين وين كولا .. عايزين كولا
|
Post: #27
Title: Re: شنبي الجنن البنوت .....فقدي الليلة
Author: garjah
Date: 06-01-2003, 06:41 AM
Parent: #19
البنريدو مانوبيا
الناس تقيف قدام المراية تسرح الشعر
واخوك كان بيقيف يسرح الشنب
صدقني الشنب زي صدام العربية
يقي من كثير من الحوادث ....وكل من فكر في مد يده عليك
نظر للشنب وتراجع لقواعده ينشد الامان
الحبيب اهل العوض
كولا جاك وما لقاك
بعدين سيد الشنب قاعد تسال ود خالو ؟
|
Post: #20
Title: Re: شنبي الجنن البنوت .....فقدي الليلة
Author: بدرالدين شنا
Date: 05-29-2003, 01:50 PM
Parent: #1
بسم الله الرحمن الرحيم
المحبوب قرجة
سلام وعزاء
ما خلصنا من المذنّب هالي يظهر لينا المشنّب قرجة
|
Post: #21
Title: Re: شنبي الجنن البنوت .....فقدي الليلة
Author: ابو جهينة
Date: 05-31-2003, 10:06 AM
Parent: #20
قرجة
إنت في نوم تاني عند صديق ، إنت مافي حاجات كتير. إنت في صاحي و عين كبير لازم.
معلوم ؟
|
Post: #22
Title: Re: شنبي الجنن البنوت .....فقدي الليلة
Author: cola
Date: 05-31-2003, 10:29 AM
Parent: #1
اهل العوض اخوى
الظاهر عليك عندك شمار حار
هات العندك وانا جاهز افتو ليك فت
|
Post: #23
Title: Re: شنبي الجنن البنوت .....فقدي الليلة
Author: aboalkonfod
Date: 05-31-2003, 06:25 PM
Parent: #22
أخوي قرجة سلام
أولاً الفاتحة  .. الجاتك في شنباتك سامحتك ...
الله ينعل المقص اللعين .. هو الكان السبب، عزاك الوحيد،
أخوهو الدقن .. الله يصبركم على مصابكم الجلل ..
اليومين ديل عتوتكم حا يمرح بلحيل ..
ما خلاص الحبل الكان بكتيفو راح ..
لكن شنبك كان غلطان .. دة الجنن البنوت
ناس أماني وحنان ..
وكسر ناس هوزي .. ودومة وشيري
ما هم ديل السحرنو .. وخلنو شمار في مرقة
ليك العزا ولينا الندم ... أخوي أب قرجة
حليل شنبك البكتف البهم ...
يا حليلو الأسود التخين ...
شيال التقيلة .. وكتين الدواس يحين
يا كُليكة البرسيم .. يا قطعة منين
أماً جابتك تعقر من سنين
شنبك شنب السرور
غننبو بنات البادية والخرطوم
أها الله اليصبرك
|
Post: #29
Title: Re: شنبي الجنن البنوت .....فقدي الليلة
Author: garjah
Date: 06-01-2003, 07:00 AM
Parent: #23
الحبيب
ابو القنفد
الله يصبرك شنيبي من حالتك الفوقك
دخل احد اصدقائي علي صباح اليوم التالي للحادث الاليم
وكانت بيني وبينه نقاشات حادة وكنت افتخر بشنبي
وكنت اقول له انا اب شنب
وكنت بقول ليهو شنبك زي بوخ العصيدة
دخل علي صاحبي فجاة فرآني بدون العزيز
واتفسح فيني اليوم داك
|
Post: #28
Title: Re: شنبي الجنن البنوت .....فقدي الليلة
Author: garjah
Date: 06-01-2003, 06:52 AM
Parent: #22
الصديق
الاستاذ جلال ابو جهينة
الغريبة صديق عندو شنب يقيف فوقو الصقر بارتياح شديد
واخذه لشنبي افتكر انو كان مؤامرة متورطة فيه قوى دولية
على راسها الولايات المتحدة وضلوع بوش شخصيا في المؤامرة غير مستبعد
بعد ان شمل الارهاب اخطار الاشناب
الحبيب بدر الحلا
جاييك في دكاكين الايجار بس لقيت الناس متلمين
وخجلت من شنيبي الخفييييييف
قلت اخليهو يعود الى تخوم شلوفتي
واجيك
كـــــولا
شمارك......شوف ليهو فول كارب
واضربو ....اهل العوض كويس الاختفى
|
Post: #24
Title: Re: شنبي الجنن البنوت .....فقدي الليلة
Author: soma
Date: 05-31-2003, 09:45 PM
Parent: #1
عمى قرجة لووووووووووووووووووووووووووووووووووول
والله كتلتنى الليله بالضحك ..
واتاريك انت مدسى ..ونحن نشيل ونسال منك الطير الطائر ..
وابو جهينه حسو انقرش بالكواريك ..انت لابد لامن شنبك يقوم تانى ولا شنو ؟؟؟ ..لوووووووووول
قلنا امكن تكون عامل ليك عمله فى زول بى عكازك ده .. تراك انت العملوا فيك العمله ؟؟ ومن منو ؟ هندى ؟.. امكن تكون اتطاولت وشفت ليك شعر هندى مسبسب وحاولت يعملوا ليك شعرك زيو .. وقلت لى الحلاق ..سيم ..سيم .. وصاحبنا داك ما هندى فهمو يعجبك ..يكون افتكر سيم سيم لى كل الراس والوش ..وبدأ بالشنب الضحية .. البركه فى باقى السبيبات الخفاف الفضلن ليك .. كتر من الودك ..بس ما تلحسو .. لول عم قرجة
|
Post: #30
Title: Re: شنبي الجنن البنوت .....فقدي الليلة
Author: garjah
Date: 06-01-2003, 07:08 AM
Parent: #24
شاعرة المنبر الرقيقة
ســـــوما
جاييكم...بس اركب شنب مستعار حتى يعود فقيدنا العزيز
ولكن ما لقيت واحد سيم سيم شنبي المخلوع
حتى صاحب المحل اتاني بشنب هارون الرشيد فوجدته رقيقا
وكذلك شنب عنترة بن شداد وجدته خفيفا
وتعجبت كيف كانت لهم كل تلك البطولات بشنبات خفيفة الوزن
قليلة الهيبة
سلمتي اختاه
|
Post: #25
Title: Re: شنبي الجنن البنوت .....فقدي الليلة
Author: عديلة المتوهجة
Date: 05-31-2003, 10:30 PM
Parent: #1
استاذنا العزيز قرجة
وجعنى جدا هذا المصاب الجلل ومعليش اتاخرت طبعا المشاغل وانت عارف مشغولين بالفارغة والمليانة مع انى ما عرفاهم شنو
المهم عرفت من الشباب انك قلت الما بعزيك فى شنبك كان مات ابوه ما بتعزيه لذلك تركت كل شىء وجيت اعزيك
وارجو ان تقبل منى هذه المناحة لشنبك الجنن البنوت
ليه يا صديق تعمل كده
تزعمط قرجة بالشكل ده
ليه ياصديق تعمل كده
شنبو قيافة انت ليه فى سوى كده
شنب مكلف وغايظ العدا
شامبو كريم صبغة وكده
ليه يا صديق تعمل كده
عين عاوزالهاكرامة وفدا
خرووووف مدنكل وماكن كده
حرام يا صديق سوى كده
حدد لينا يوم موعدا
انت مافى بليلة وتشتتها
عشان مشاويرنا ما تروح سدا
وتبقى خسائر نتكبدا
انت مافى زوغ كده او كده
وسلمت
اللحن طبعا جاهز عاوزين الحلقوم زول يجعر تمام اقترح الاخ
دافىءللامكانيات سمعته يغنى فى بوست سمعته بعيونى دييييل
ودمتم للمحبة
|
Post: #26
Title: Re: شنبي الجنن البنوت .....فقدي الليلة
Author: HOPELESS
Date: 05-31-2003, 10:37 PM
Parent: #25
معلقه بن شنبون
والله يا قلجه
شنبك دخل التاريخ من اوسع قدودو
وعقبال ماتبقي من فصائله
|
Post: #31
Title: Re: شنبي الجنن البنوت .....فقدي الليلة
Author: garjah
Date: 06-01-2003, 07:13 AM
Parent: #26
الاخت العزيزة
عديلة المتوهجة
ما قصرتي تب......ابشري بالخير
دي المؤساه والا بلاش
ليه يا صديق تعمل كده
تزعمط قرجة بالشكل ده
ليه ياصديق تعمل كده
شنبو قيافة انت ليه فى سوى كده
شنب مكلف وغايظ العدا
شامبو كريم صبغة وكده
ليه يا صديق تعمل كده
عين عاوزالهاكرامة وفدا
خرووووف مدنكل وماكن كده
حرام يا صديق سوى كده
حدد لينا يوم موعدا
انت مافى بليلة وتشتتها
عشان مشاويرنا ما تروح سدا
وتبقى خسائر نتكبدا
انت مافى زوغ كده او كده
وليك علي ازلها في سي دي مخصوص
وفيديو كليب كمان
تسلمي يا غالية
هوبلس
رفيقي في اللس
شعارك الجديد خطير
|
Post: #32
Title: Re: شنبي الجنن البنوت .....فقدي الليلة
Author: ابو جهينة
Date: 06-01-2003, 07:34 AM
Parent: #31
قرجة أخوى
صباحك خير
الغريبة أمبارح في قناة فضائية ( شرق أوروبا ) يعني الخبر لحقتو في آخرو ، يقول الخبر ( هذا و قد قال مسئول في الإنتربول أنه تم ضبط شحنة من الشنبات القادمة من الشرق الأوسط و شرق أفريقيا و المهربة إلى دولة من دول الإتحاد السوفيتي المستقلة ، و التي يمكن الإستفادة منها في عمل تجارب كيميائية و يعمل منها قنبلة إنشطارية بدلا من المسامير التي يضعها الإنتحاريون في قنابلهم. )
غايتو ما عارف ، كدي راجع الهندي قول ليهو أنا عاوز شنبي عشان أختو تذكار ، لو عويناتو زاغن ، معناتا مشترك في تهريب الشنبات و عمل معاك القصة دي عمدا و متعمدا و ممكن تطالب فيها بتعويض.
كل واحد يخلي بالو من شنبو.
|
Post: #36
Title: Re: شنبي الجنن البنوت .....فقدي الليلة
Author: garjah
Date: 06-01-2003, 03:50 PM
Parent: #32
الحبيب ابو جهينة
لو شعر الشنبات سبيب سلك نحاس تمن بوصة ياهو حقي
ولو بقى
ههههههههه
شعر اباط بوخ عصيدة
شوف ليهو اسياد
.
|
Post: #33
Title: Re: شنبي الجنن البنوت .....فقدي الليلة
Author: sentimental
Date: 06-01-2003, 07:43 AM
Parent: #1
قرجة
احزننى خبرك فقد شنبكم العزيز. وشد ما احزننى ان نهايته كانت علي يد حلاق بوذى لا يفهم قيمة هذا الشنب مع اولاد بحرى وشراريمهم. لعمرى اواسيكم بهذه الابيات المتواضعة علها تخفف ولو قليلا من فقدكم الجلل.
اغنية الشنب الحزين
كان لى في غابر العهد شنبات....ااااه
ربيتها بالشامبو والدهن والكريمات... ااه
كى اهرش بها الاولاد والبنات
عشت معها اجمل اللحظات ...ااه
فطارت... اه طارت
على يد حلاق تعيس... اوووووه تعيييييييس ...
والبقية فى حياتك يا قرجة
|
Post: #34
Title: Re: شنبي الجنن البنوت .....فقدي الليلة
Author: aboalkonfod
Date: 06-01-2003, 11:07 AM
Parent: #33
الأخ .... قرجـــة سلام
بعد التطورات المذهلة في قضية ما يعرف بالشنب المتأمر عليه.
هوي يا أخوي قرجة، الكلام دخل الحوش، وما بنسكت عليهو.
في تقارير غربية بتقول، هنالك مجموعة إرهابية، تعرف بمجموعة
،، العداريج ،، لإبادة الشعر الشنبي، ومقرها ديار بني بكـــر
،، أظنو البورد حقنا دة ،، طبعا بيتزعموها مجموعة البنات
والنساء داخل البورد ،، طبعا بطبعهم عداريج ،، بالإضافــة
لمجموعة الرجال الحاقدين من عديمي الشنبات.
عليه نقترح عليكم .. توقيف واعتبار كل النساء متأمرات، مالم
يبرزوا براء زمة من دم الشنب المهدور. يا أخوي قرجة ما تشوف
لي دموع التماسيح دي، والبكاء على أطلال الشنب المغدور، النساء
كلهم حاقدات على شنبك.
أنا سمعت تحت تحت .. قالوا الحكامات بقن يغنن، بي أغنية ،،
العدروج عدروجنا ونحنا حبايبو وبنستاهلو ،،،
|
Post: #38
Title: Re: شنبي الجنن البنوت .....فقدي الليلة
Author: garjah
Date: 06-01-2003, 04:03 PM
Parent: #34
ابو القنفد الحبيب
انت عارف انا ارجعت قلة الاقبال على تقديم العزاء
في شنبي العزيز لامر هام
وهو انني لم انشر صورتي بشنبي العزيز
والا لانهالت المشاركات
العدروج عدروجنا ونحنا حبايبو وبنستاهلو
|
Post: #35
Title: Re: شنبي الجنن البنوت .....فقدي الليلة
Author: sentimental
Date: 06-01-2003, 01:05 PM
Parent: #1
|
Post: #37
Title: Re: شنبي الجنن البنوت .....فقدي الليلة
Author: garjah
Date: 06-01-2003, 03:58 PM
Parent: #35
سنتمنتال
الخواجة خشمو وينو
متخيلو بياكل
يجي يدخل اللقمة بيد واليد التانية رافعة الشنب
او ياكل وياكل شنبو معاهو
الغنية حولناها للجنة النصوص ووللاسف رجعوها
هههههههههه
قالوا بتهرب زيت .....والشكمان بتاعا مشروط
قلت ليهم لكن كتبا سنتمنتال الشاعر الفحل
قالو لي لو كان فحل ماكان سوى شنبك بصل
وسلموني قائمة بها خمسين خطا لغوي ونحوي
ومهروا تعقيبهم بتعقيب يقول
انها لا تناسب شنبك المفقود
|
|