عــــــمّـة مـــــان شــــو

مساء كل احد تطالعنا كمية من قماش التوتال الناصع البياض لتملاء شاشة الفضائية السودانية وبحجم لم يتعوده السودانيون ولا يليق بحالتهم المعيشية ولا حتى بجو السودان الحار

القماش الملفوف بعناية فائقة لم يتمكن رغم طوله الذي يبلغ اكثر من عشرة امتار من حجب كمية شعر راس مقدم البرنامج حسين اللميع فمع عمته التي ملات الشاشة ابى الا ان ان يسدل الشعر على جوانب وجهه المنتفخ نعمة وثراء من بيع الكذب وتسويد الصحائف

وفي حلقة لم استطع متابعتها ولم افهم فيها شئ لان صاحب العمة العجيبة استضاف صاحب عمة اخطر منه فامتلات الشاشة المسكينة بكمية من القماش حجب رؤية الوجوه وظهر اصحاب العمم العادية كانهم اتوا للحفلة ضهبا ولم يتم تنبيههم بان المباراة ليست مباراة في الفكر بقدر ماهي معركة في
اظهار اكبر عمة وبراعة لفها

وظهرت شخصيات نقدرها لعلمها وافقها الواسع مثل محمد طه القدال والحاج وراق بعممهم البسيطة التي تعكس بساطة السوداني وتواضعه كانهم متطفلين في مهرجان عمة مان شو

واذا كنت مخرج البرنامج لرفضت ان تخرج الحلقة بذلك الشكل ولاتيت بطاقة توتال ولففت الرؤوس الاخرى بنفس كمية قماش الراسين الكبيرين حسين خوجلي وكمال ترباس
او اخذت العمتين الكبيرتين وقصصت منها الزيادة ليبدو الجميع في مظهر واحد

والعجيب في كل حلقة يتباكى مقدم البرنامج على الخرطوم زمان واشفاقه على ثقافة الوسط ولا تنتهي الحلقة الا وقد زرف دمعا على امدرمان وكيف انها اتسعت واتاها الغرباء من كل حدب وصوب
ونظل نتحمل كلامه السخيف لانه تعود استضافة مغنين جيدين وبكامل اوركسترا التلفزيون

احد اصحاب العممالكبيرة اشترى كريسيدا جديدة لنج ودخل فيها وخرج منها وساله اصدقاءه حاجة تمام موش ؟؟
قال ليهم ما بطالة بس الخواجة لو رفع السقف شوية عشان العمة؟؟

مؤكد ان المصنع عندما يعرف بالاحتياجات الخاصة لاصحاب العمم الكبيرة سيعمل على تقويس سقف السيارة قصاد العمة مباشرة حتى يرتاح السائق ولا تتاثر عمته الملفوفة بعناية



.

ياقرجة

عمة مان شو ...دعاية لنوع جديد من العمم والا شنو

لكن حكاية القماش الكتير فعلا يوم الاحد بيغطي على موضوع النقاش

انا غايتو واحد من الناس سهرة ايام لها ايقاع برجاها عدييل كده

اها رايك شنو

غايتو يا فقراء عندكم جنس حقد عجيب خلاص

نحن بنكبر العمم دي لمنو..؟ ماليكم انتو يا غبش عشان تتطمئنوا انو السودان لسه بخير .. وانو الواحد لو ما عندو حاجه تسترو ممكن نقطع ليهو من طرفه ونفصل ليهو منها جلابيه وعراقي وسروال بتكه بس تتكفلوا بحق التكه يا حوش

نحن نتعب ليكم وانتو تنبزونا شعب غدار

هوبلس

لو كنت بتعمل زي قولك ده كنت بقيت هوبفول

قال تكة قال

كبسيبة

يا بتاع غنى القعدات

فعلا السهرة فيها غنى جميل

بس لو يخففو شوية من غنى العمم

يا قرجة العمم دى عندها فنكشن تانى لانها بتلم الصلع والريسين المحفرة دى. بينى وبينك حسين ده كان ملص العمة في زول بقيف. السترة احسن. بعدين كان العمم ملت عليك الشاشة اشترى ليك تلفزيون خمسين بوصة خصيصا لقناة النيل الازرق. الدنيا ما معروفة قرنق جاى وعمتو بتكون بطانية عدييييل.

قرجة سلام كبير.

قال الشاعر :

أنا إبن جلا و طلاع الثنايا
متى ما أضع العمامة تعرفوني

لو سلمنا جدلا بأن العمة هي رمز من رموز هويتنا ( كالجلابية و المركوب الفاشري ) فقد إختلط الحابل بالنابل.
الجلابية عندنا نوعان : الجلابية العادية ، و جناح أم جكو أم جيبين.
أما العمامة فحدث و لا حرج ( مع إحترامنا التام لذوقيات الناس ) :
فهذه كعش النسر الأمريكي.
و تلك كالمصارين بعد طبخة جقاجق.
و أخرى كشعر إستيفي واندر أو الطايوق، و كأن صاحبها قد قام بلفها بمفرمة لحمة مقاس عشرين سم.
و عمة مثل طاقية حرس الحدود الهندي.
و عمة ، تجد العزبا الواقعة خلف العمة أطول من العمة.
و الآن العمة و الشال و الجلابية طقم واحد ( سمعت أنهم الآن بصدد عمل مركوب فاشري ألوان مختلفة لتتماشى مع باقي الطقم. ) بس بيتوقف معرفة الموضة دي على مصور البرنامج إياه عشان نقدر نشوف الجزمة لو ماشية مع الطقم الفوق ولا لا.
و هناك الآن شال أحمر ( الغترة السعودية ) يلفها البعض كالعمة.
و العجب ، بعض الجاليات تلقاها لابسة بنطلون و لافة عمة.

و للعمة في اللافيها شجون.

حبيبنا الغالى قرجة

يسعد صباحك بالحب

Quote: يسدل الشعر على جوانب وجهه المنتفخ نعمة وثراء من بيع الكذب وتسويد الصحائف

لعل الوجه الاخر للرجل غير معروف فى النقطة اعلاه ولكنى شاهد عيان فقد كان الرجل زميلى فى المرحلة المتوسطة واشهد ان والده كان من كبار تجار امدرمان ولهم دكان بجوار جامع امدرمان الكبير وكنا كثيرا ما نزوره هنالك وهذا للحقيقة والتاريخ ولكى نفصل بين الامور ..

اما ايام لها ايقاع فالحديث عنه ذو شجون ولا شك ولكنه قدم فى حلقات سابقات روائع من الشدو والطرب اهمها فى البدايات مع الاستاذ عبد الكريم الكابلى ولكنى فعلا استغرب لماذا بعض البرامج تبقى متجددة فى كل دورات التلفزيون ؟؟؟

اوافقك الرأى ان حكاية العمم كانت اكبر من قدرة احتمالنا ولو انهم ينقصونها قليلا لكانت اجمل ..

لك تحياتى واحترامى عزيزى الفاضل

عمدتنا قرشــــو

وشهد شاهد من اهلها

بس لكن هسع في تاجر واقف على حيلو عليك الله غير الجماعة الانت عارفهم؟؟؟

الزول اصلو لو طزيان قدر ده ما يجيب ليهو خمسة عمم يختها في الاستديو الضيوف اول ما يبدا البرنامج كل واحد يلف ليهو واحدة

يخلص البرنامج يقلع لحسوني عمتو

وهكذا دواليك


سنتمنتال

ياخي بس ما تكلم زول

الجماعة جرو واطي في موضوع الخرفان

خسسسسسسسمتك

الحبيبر ابو جهينة

كيفك يا غالي...يارفيق بوستات دريمز

قلت

أنا إبن جلا و طلاع الثنايا

متى ما أضع العمامة تعرفوني

هسع تقول ابن جلا دي الناس تفتكرك بتزم في روحك

يقول ليك ده قال عن روحو جلا

في تقليعة جديدة برضو قايم بيها الممثل علي مهدي

ما متذكر اسمو كويس وهو افتكر رئيس اتحاد الممثلين العرب

ده بقى عمتو ملونة شي اخدر وشي كحلي

ويجيك الشنب قادي الشاشة ومارق

سنتمنتال صديقي العزيز

اشتري تلفزيون خمسين بوصة شان افرش فيه العمم؟؟

شوف عمة جدنا المهدي دي كانت مهذبة كيف

انت عارف يا سنتمنتال واحد لما يديك كلام حلو ويجاملك زيادة

كنا بنسميهو لف ليك العمة

لكن جون قرنق لو بلف العمة الحرب كان لزومة شنو؟؟؟

عمى قرجة
شفت العمة كيف عند جدنا. لكن تقول لى ناس زعيط ومعيط. الواحد فيهم عمتو توب حبش.
اها ما قلت لى ضبحتوا وسلختوا منو وليه? والجايه متين.... عشان الواحد يعمل حسابو يا عمو.

يا قرجة......... عمه عرفناها... مان شو دا منوووووووووو؟

CG man

كيفك يا غالي

عمة مان شو الهلال رشو

مادام سعلتني يبقى عندي حق اتفلهم عليك شوية

انت عارف ياسجومي عمةمان شو اخو برناردشو لزم

حتى في بعض الرويات بيقولو انهم تيمان

عمة مان شو ركب البحر ونزل السودان وعرس كلتوم بت مساعد

قامو خلفو الغبشة الانت شايفه دي

اخوه برنارد شو قعد في بلاد الخواجات وعمل عمايلو الانت عارفة ديك

قرجة

في حكاية الأنساب دي ، أسألني أنا يا قرجة ود عمي. أنا عندي كتاب قديم لقيتو صدفة ، فيهو كل الأنساب القديمة ، قالوا مان شو ، أخو كوماتشو المنغولي بالأبو، أصلا جا مع هولاكو التتري لما دخلو بغداد ( العلوج الأوائل ) ، قام عرسوا ليهو واحدة خاساوية كانت مخطوفة من ميناء سواكن ، زوجها الأولاني أكان إسمو سمبوك الرشيدي ( كان مهرب بين جدة و سواكن ) أكلو سمك القرش .
المهم الخاساوية عندها بت من الرشيدي ، زوجوها لولد كوماتشو ، أها إتسلسلو لغاية مان شو دة الحسع سعلك منو سي جي.
فرعهم التاني قالو في موريتانيا بس ما عندهم علاقة بالشناقيط، و عندهم فرع في مكناس بالمغرب إسمهم قبيلة ( الدقلاشو ) ، و لو الوكت أسعفني ، مرة تانية بفتفتم ليك سمح.
عافية

يا قرجه

هو حسين خوجلي ده عمتو بس الكبيره
ما برضو لحمو كتير
وكلامو كتير
ومنظراتي كبير
وقداد كبير
وضيوفو بيقعدو يتفرجو عليه وهو بيونسم
لك كل التحايا والود

ابونور

لكن يا ابوجهينة افتكر

ون مان شو ود عم الجماعة ديل

قالو كان جنو يلخبت الحاجات

المهم يوم قاعد يلخبت يلخبت لغاية ما طلعت

ون مان شو العطر المعروف

يقول اختراع

اختراع شنو العالم دي كانت بتجوط الحكاية لغاية ما تظبط

ويجو يقدونا اخترعنا واكتشفنا


الحبيب ابو نور

قلت لي خلي كتير برة القوس واكتب جوة القوس

لحم شحم عمم لغم

سؤال هل تصح صلاة صاحب العمة الكبيرة

حيث يستحيل ان تلامس الجبهة الارض

يا سنتمنتال

جدك مندكورو ده لو عرس حبوبة جون قرنق

ما كنا شفنا حرب ولا اتفاقيات مشاقوس

كان هسع ابوقرون الاسم المندكوري لجون قرنق

ود عما لينا .. لافي عمتو...وطاقين الحنك يوم في جوبا ويوم في شندي

وقعدة في الحوش وسفرة للخوي

ون مان شو ود عمهم لزم ، بس أمو سرية ( متزوجة عرفي بكلام الزمن دة ) و كانت بتسوي الكركار و تبيعو ، الولد إتعلم منها اللخبطة ، قعد يلخبط أي حاجة في أي شيء لغاية ما طلع الريحة دى.
إنت شامي حاجة ولا براى ؟
فتك بي ريحة
أقصد عافية

ابو جهينة

شامي والا تونسي


قلت لي صاحبك شغال بمبدا ليس يطلع كويس

مين كان يصدق حبوباتنا قدرن يعملن العجين دلكة خطيرة

حتى فكرة الحلو مر انا بقيف عندها كتير

وبفتكر انها اختراع سوداني يدل على عبقرية حبوباتنا

سطر جديد

شوفت العمة الطلعت موضة .....هي عمة صغيرة جدا وبدون طاقية

وبتتلف بطريقة مختلفة ...في مغني مصري جديدبيلبسها بتاع غنية

الواد ده اسمو ايه....سنكوتي

والله يا قرجة ياخوي قطعت مصاريني من الضحك
يا خي عندك جمال اسلوب
ربنا يحفظ ابداعك ده ياخي
بس اوعك تكون مخمخم عكاكيزك دى ماشي عليهم ؟

اخي خالد عويس

سالني صديقي ونحن نتسامر عبر المسنجر من هو اكتبنا

فاجبت بدون تردد

خالد عويس

عندما يكون مداد قلمك روحا شفيفة وصدق فهذا يعني

ان القادم هو خالد عويس

اخي نحن لا نشفق على وطن انتم ابناءه

ولا نخاف غربة انتم فيها الرفاق

قرجة
الشيء الفوق راس سنكوتي دي عمة ؟
أظنها حاجة قديمة في دولاب الملابس قام قص منها زوائد و عمل منها الشي الفي راسو.

قرجة يا خوي
انا كنت بفتكر فعلا انو انا زولا كتّاب
كنت فاكيها فى نفسي
طبعا مع تسليمي الكامل بأنو المبدعين الكبار المعانا جزء منهم فى البورد ده مستثنيين
لكن بكل امانة وصدق
لما اشتركت فى البورد
وقريت لأسماء مش معروفة ابدا
وبعضها اسماء حركية
اكتشفت انو انا بكتب شوية كلام فارغ
بجد والله
فى اقلام فى البورد ده بتساوي قلمي مليون مرة
انا ما عايز اعدها
لكن مثلا
انت وشيري وابو حراز وتماضر فى الكتابة الخفيفة الساخرة
عمالقة بجد
لك تحياتي
ولجميع البورداب مودتي ومحبتي الصادقة

الاخ خالد عويس

تحياتي يا غالي



العزيز ابوجهينة

اي قماش يا حبيب لتغطية خلو الزهن