كتبت ليك

صلاح حاج سعيد


كتبت ليك

لا بينى بينك ريدة .. لا قصة غرام

إخترت ليك

أجمل حروف .. وأصدق فواصل نادرة

فى لغة الكلام

لا قصدى ألهو معاكى بى كلمات غنا

لا شعرى ليك مرجيحة من شعر الغمام

كتبت ليك والله يا قمر الزمان

شان جيتى بى زمن المحنة

وشفت فى عينيكى .. حس أهلى القُدام


كتبت ليك وأنا جايى من زمن الشقا

الممدود على وش الثوانى .. مظللا

تتمدد الساعات سنين

تتفتح الأحزان غريبة .. ومذهلة

وأشتاق أفتش نسمة .. فى الزمن العذاب

وأيامى من كتر الأسى

وكتر العزوف .. والإغتراب

صارت حروف مترهلة

لحظات أسيفة .. ومهملة



كتبت ليك

ووقفت ليك .. لامن لقيتك جايه من قلب الطريق

ولمحت فيك راحة المشاوير البعيدة

ونفحة النسمة الحنينة

الجاية من قلب الطريق

حسيت عجايب الدنيا .. إتلمـّت .. بقت

جايـّانى من عصراً سحيق

عينيكى حس أطفال بنادوا القمرة لى الغايب .. يعود

وجبينك الضوّاى

حجا الحبـّوبة فى الزمن السعيد



وأنا فى قساوة الموحش

الزمن المكهرب .. بى الحريق

أنا حيلتى أيه

قوليلى يا قمر الزمان

غير أتـّكى .. وأحلم معاك

وأحضن أماسى الصحو ..

والأمل البريق

المسافة

عذوبة وحميمية حقيقية تسكننا ونحن نتعطر بأريح صلاح حاج سعيد

سمعت هذه القصيدة بصوت ليلى المغربى، الراحلة العزيزة، وسفيرتنا الى أكون الإبداع، سمعتها ذات يوم، فطربت وطرب معى المدى

صلاح حاج سعيد من طينة أزهرى محمد على ومحمد أحمد سوركتى والنخلى

وننحنى لهم جميعا، ولك أنت قبلهم إذا تأتينا بالجمال

شكرا يا المطر
يا مطر عز الحريق

ألقاكى وين
قاسم أبوزيد

كان التعب قفـّل مسامات الضياع

غناكى مزمار الزمن .. إرشيف عِشِق

مشوار نغم

وتر التراخى .. موشحات

ألقاكى وين

من غبتى ما شرقت شمِس

والدهشة ساساق الدروب

لى وين تمِش

نار النضال لو تنهبِش

توقِد سنون المتعبين

تعقد زفاف آخر ضمير

إتباع مقنّن بالقِرِش


ألقاكى وين

كان التعب ما ختّ إيدو

على جبين تربال يخم رمل الشقا

المليان غُلُب

دقست قوافلو مع السراب

ورابط جِلَيد الهم سِعِن

محزوم خِشيمو من الصَبُر

راجى السحاب

نلقاكى وين

أنا .. وإنتى .. والنيل .. والأرض

والبور مشتّت متنسى

نجامة التعب .. الكَعب

.. ما كان عَوَل ريدى الصِبِح

صفصاف هدير البر

أيامى توب شحاد .. هزاهو خمّ وخمْ

أنا ما لقيتِك ليه

طعم الفراق دم.. دمْ

ختيتى فوقى الليل

والليل سقانى السّمْ

أنا خاطرى فى المطرة

ريحة الدعاش .. والشّمْ

.. ألقاكى وين