Post: #1
Title: الشرطة السودانية تطارد تماسيح عملاقة في شمالي السودان
Author: Yassir7anna
Date: 05-24-2003, 04:57 AM
Parent: #0
Quote: قالت الشرطة السودانية انها قتلت تمساحا طوله أربعة امتار في شمال البلاد ولا تزال تبحث عن تماسيح اخرى ضخمة تهدد حياة السكان والمواشي.
ونقلت أنباء صحافية عن مدير شرطة حماية الحيوانات البرية العقيد تاج السر الحسن عكود يوم الخميس قوله ان قوات الشرطة لا تزال تبحث عن أربعة تماسيح في منطقة الحصايا بولاية نهر النيل على مسافة 125كيلومترا شمالي الخرطوم.
وقال عكود ان ادارته تلقت عدة بلاغات بوجود التماسيح التي أصبحت تشكل خطرا على المواطنين والمواشي.
واضاف ان الشرطة استعانت باحد المتخصصين فى اصطياد التماسيح. وقال عكود "استطاع هذا المواطن اصابة التمساح فى مقتل ببندقية" مضيفا ان التماسيح الاخرى اختفت.
وحذر عكود المواطنين من ان التماسيح الهاربة كبيرة الحجم وتشكل خطورة على حياتهم مطالبا اياهم بتوخي الحذر. ويعيش التمساح النيلي فى المناطق الاستوائية في منطقة المنابع العليا لنهر النيل الا ان اسرابا من التماسيح تدخل السودان وتتمركز فى منطقة النيل الابيض وخاصة في جنوب السودان ويتمكن بعض هذه التماسيح أحيانا من عبور خزان جبل اولياء على بعد 45كيلومترا جنوبي الخرطوم ثم تسبح شمالا حتى وادى حلفا قرب الحدود السودانية المصرية. وتشكل التماسيح فى مناطق ظهورها اضطرابا كبيرا في حياة السكان الذين يعتمدون في كسب عيشهم على الزراعة على ضفتي النيل حيث تهاجمهم التماسيح.
ويمكن أن يصل طول التمساح النيلي إلى عشرة امتار ويدعى العشاري وهو من اكثر التماسيح شهرة فى السودان لشراسته وقوته. |
|
Post: #2
Title: Re: الشرطة السودانية تطارد تماسيح عملاقة في شمالي السودان
Author: HOPELESS
Date: 05-24-2003, 05:07 AM
Parent: #1
وعقبال القضاء علي التماسيح البريه
|
Post: #3
Title: Re: الشرطة السودانية تطارد تماسيح عملاقة في شمالي السودان
Author: singawi
Date: 05-24-2003, 05:33 AM
Parent: #1
هوب لس
حرام عليك تخطف الكلام من خشمي
هسة أنا جاي أقول كلامك دا
أنا غايتو التماسيح دي بنصحها تعمل ليها قصر عشوائي وتلبد فيهو
بيسترها فترة طويييييييييييييلة
ولما الحكاية تسخن تكب الزوغة
تعرف الصيادين حيقولو شنو
حيجو في لقاء عام وبعد ما يرقصو وينططو حيقولو
التماسيح دي نحن خليناها لي الله
يوم القيامة نشيلو منها شحمة ولحمة
|
Post: #4
Title: Re: الشرطة السودانية تطارد تماسيح عملاقة في شمالي السودان
Author: Mayada
Date: 05-24-2003, 06:56 AM
Parent: #1
والله الخوف انو يجو يقولو لقد قضينا عليهم في مقتل وهم بعينهم ما يكونو شافو غير التمساح الكتلوهو دة
|
Post: #5
Title: Re: الشرطة السودانية تطارد تماسيح عملاقة في شمالي السودان
Author: Yassir7anna
Date: 05-24-2003, 06:57 AM
Parent: #1
الاعزاء hopless و سنجاوي
والله انا اول ما شفت الخبر ده اول حاجة قلتها عقبال التماسيح البرية
وربنا يسمع مننا ان شاء الله
تسلموا اخوتي
|
Post: #6
Title: Re: الشرطة السودانية تطارد تماسيح عملاقة في شمالي السودان
Author: سودانوبس
Date: 05-24-2003, 08:43 AM
Parent: #1
يا رحمن ارحم بي جودك... دلي الغيث ينزل في بلودك
يا رحمن ارحم بي برك...يا حافظ في بحرك وبرك
في وليانك اطلق سرك...وخل نيشانهم ها اليتحرك
يا الخلفاء الحالكم مرضية..يا اهل البيعة العقدوا النية
التمساح سكن الشايقية..زخلوا يروح نسياً منسيا
يا عبد الوهاب التازي.ياب درعاً منسوب لى حجازي
التمساح تمساحاً خازي...درنا العوم ادونا إجازي
يا يسين يا ود حميدة.ززيا اهل القبة الباقية فريدة
إنتو أم ما تباطيتو اكيدة..ما بتغلبكم هذي الصيدة
يا رجالة نوري اتلموا..خلوا الغفلة جميعكم هموا
محمد صالح قام بي عمو..لطم الدود بالسر فوق فمو
|
Post: #7
Title: Re: الشرطة السودانية تطارد تماسيح عملاقة في شمالي السودان
Author: قرشـــو
Date: 05-24-2003, 09:00 AM
Parent: #6
العزيز ياسر حنا
لك التحية
لعل منطقة شمال السودان اشتهرت منذ القدم بالتماسيح الكبيرة ولم تتوقف الحروب بين البشر والتماسيح ابدا فهى كم اختطفت عرائس ونساء اضافة الى الانعام ولذا يتم صيدها بلا رحمة وهى زاخرة ايضا لصائديها بالنعم والثروات ولكننى كنت اظن ان مع حركة المدنية قد انقطعت سيرة التماسيح ولكن هاهى تعود من جديد وطبعا على واجهة مركز بوليس امدرمان يعلق تمساح عشارى لعل الكثيرين رأوه واستغربوا كيف تم اصطياد هذا العشارة وطبعا العشارى ورد فى اغانى البنات سابقا اذ يوصف به الفتى الشجاع الجسور المقدام الذى لا يخاف شىء ابدا ولكن الان اصبح الغناء للجلابية البيضاء..
بالمناسبة منطقة الحصايا الواردة فى الخبر هى جنوب الدامر مباشرة وهى منطقة اشتهرت بزراعة الحناء وبها اجود انواع الحناء بالسودان والمنطقة من الجيلى وحتى حلفا اشتهرت بالتماسيح الضخمة الشرسة ..
لك تحياتى
|
Post: #9
Title: Re: الشرطة السودانية تطارد تماسيح عملاقة في شمالي السودان
Author: abuguta
Date: 05-24-2003, 09:10 AM
Parent: #7
الاخ ياسِر
تحياتى
ايام قوانين سمبتمر وابادة الخمور كانت نكات كتيرة وظريفة
اظرفها تمساح ابوروف السكران
التمساح اكل سمك والسمك شارب خمر
ولما طلع على الشاطى جاو ناس الشرطة حاملين البنادق
قام قال ليهم ما قلت جلد ساكت ياجماعة بقى موت احمر عديل
ودخل منهم فى النيل العريض
وعقبان تماسيح المنشية
|
Post: #8
Title: Re: الشرطة السودانية تطارد تماسيح عملاقة في شمالي السودان
Author: عبدالأله زمراوي
Date: 05-24-2003, 09:08 AM
Parent: #1
يا حليلك يا أبن عوف
ويا حليلك يا بلدنا....
فقط من باب النصح يبدأوا بالقضاء على تمساح المنشية وبعدو تمساح القصر. الباقين حيتحولوا ورل....
أهم شى يصوروا لينا دموع التماسيح
|
Post: #10
Title: Re: الشرطة السودانية تطارد تماسيح عملاقة في شمالي السودان
Author: عديلة المتوهجة
Date: 05-24-2003, 09:22 AM
Parent: #1
غايتو لو المزيكةبتاعة الانقلابات ديك سمعتها حاجزة لى كم تمساح هنا
على قولكم آآآآآآمين يارب العالمين
|
Post: #11
Title: Re: الشرطة السودانية تطارد تماسيح عملاقة في شمالي السودان
Author: Yassir7anna
Date: 05-25-2003, 05:25 AM
Parent: #1
الاعزاء
مياده
سودانوبس
قرشو
عبدالاله زمراوي
عديلة المتوهجة
لكم التحايا
نسال الله ان يحمي اهلنا في الشمالية من تماسيح البحر واهلنا في السودان عموما من تماسيح البر
وكان الله في العون
|
|