مابين ديانتى الشيوعية ومنصبى فى مجلس السفهاء الجديد

ماقبل المشهد

ليس لى لون سياسى.. فانا مع الحق اينما كان...ولكن
كل من تقيف امامه باسم الحق فسوف يراك تنتمى الى العصابة التى هو ضدها
--------------
ما قبل قبل المشهد

هذة الايام تمر بى ظروف صعبة جدا ومعقدة...لو مرت بواحد من هؤلاء الكفرة الذين نعيش وسطهم لكانت كفيلة وكافية ان تكون سبب مقنع فى انتحاره لانه ليس مسلم ومؤمن بالله وقدره وقضائه وامتحاناته وفرجه ورحمته...فحمد الله حمدا كثير ا على نعمه الاسلام والايمان وان الله جعلنى من امة محمد(ص) المسلمة المؤمنة....فتذكرت ذاك النفر من رجال الامن فى السودان عندما
----------------
اصل المشهـــد

رجل الامن : هندا ليهو مدوخنا من امبارح
رجل امن اخر : ارميهو جوة المكتب لمن نجى عليه
دخلت المكتب وكان فارغا الا من صديق عمرى (ع) الذى تفاجأت بوجوده و الذى كان شرفهم قبلى بليلة وددت ان احتضنه لحظتها فداهمنى ..لا وقت لسلام فهمز لى فى اذنى( كل العلاقة البينى وبينك علاقة عادية واخر مرة تقابلنا فيها يوم الاربعاء) وفى تلك اللحظة دخل رجل امن واخذ صديقى ولم اقابله بعدها ابدا الا بعد خروجى من المعتقل
وبعدها دخلو كمية من رجال الامن وحاوطونى وبداءت الاسئلة العجيبة
فنظر الى احدهم بتفحص ( من فوق لتحت)...وكانت عادتى ان اللبس الساعة فى اليد اليمين و اكف البنطلون وحينها كنت بلحية
فقال لى : غريبة غريبة غريبة...شكلك انصار سنة وعمايلك عمايل شيوعيين
ومن حيث لا ادرى جاءتنى لكمة اظلمة الدنيا فى وجهى ومعها سؤال اشبه بصرخة: انت شيوعى ولا انصار سنة؟؟
وبرغم الآلم تذكرت رد عادل امام فى شاهد ماشاف حاجة (وانا ح اعرف احسن من الحكومة)
ولكن كان ردى : لا انصار سنة ولا شيوعى
وحينها توقعت ردا سخيفا كعادت ردودهم : شنو يعنى سماك
لكمة وسؤال اخر من رجل امن : طيب ممكن تقول لينا منصبك شنو فى مجلس السفهاء الجديد ؟؟
فلم ارد.....وتكرر السؤال وتكررت اللكمات ...وجاء بعدها امر من احدهما بوضعى فى الزنزانة.....ودخلت وكانت متر فى متر ونصف وكانت بها مسطبة فى شكل سرير مماجعل المساحة اضيق ووجدت بالداخل شلة من الاصدقاء والزملاء...صدقونى فى تلك المساحة كان عددنا خمسة عشر وكل ليلة نذداد شخص او شخصين
وبعد سلسلة من انواع العذاب المختلفة وبعد فترة من الزمن سمعنا فيها مالا اذن سمعت وذاقت اجسادنا لم يذقه جسد
وبعد ان لم يجدوا منى عقاد نافع قررو اطلاق سراحى ...فدخلت الى ذاك المكتب مرة اخرى
رجل الامن :اسمع نحنا ح نفكك لكن خليك عارف نحنا ح نجيبك وقت ماعاوزين ولو طرت السماء.. فاهم!!!...حاجة تانية قبل ما افكك عاوز اراجع معاك البيانات دى
رجل الامن :الاسم
انا:-- -- -- --( وقلت اسمى بالكامل
رجل الامن : تاريخ ومكان الميلاد
انا:-- -- -- -- --( وقلت تاريخ ومكان الميلاد
رجل الامن : المهنة
انا:-- -- -- -- --( وقلت المهنة
رجل الامن : الديانة
انا : مسلــــم
رجل الامن : لالالا ما مسلـــم
انا : كيف يعنى ما مسلــم؟؟
رجل الامن : ايو كدا ما مسلــم.. البيانات العندى بتقول انو ديانتك شيوعى
انا : لكن الشيوعية ما دين ؟؟
رجل الامن : عندكم دين
انا : ياخى انا مسلـــم
رجل الامن : ما مسلـــم انت شيوعى
انا : ياخى قلت ليك انا مسلــم
رجل الامن : انت ما مسلـــم انت شيوعى
انا :مسلــم
رجل الامن : لالالالالا انت شيوعى شيوعى شيوعى شيوعى
انا :مسلــم
رجل الامن : لالالالالا انت شيوعى شيوعى شيوعى شيوعى
انا :مسلــم
رجل الامن : لالالالالا انت شيوعى شيوعى شيوعى شيوعى

نسيت تورينا عدد الركلات فيما بين مسلم وشيوعي

طبعا دى حذفنها ياساتذنا الموصلى الرائع عشان يستوى الوزن الموسيقى...مش كدا؟؟
تسلم ياحبيب

شكلك كده شيوعى يعنى عندك دقن ولابس جلابيه قصيره وماك من جماعة الهديه يا عمى حسبو انا رايى مع بتاع الامن يا عمى حسبو

بترجف انت فى قصرك

نغرد فى زنازينك

مساجينك

السلام عليكم

ما شاء الله كمان بقوا الشيوعيه ديانه



استغفرك يا قادر



تحياتي عمو حسبو

و لو حدثتنا عن الايام القضيتها هناك تكون ما قصرت

عشان يغشي الضوء اعين العمي



تحياتي

و

لى قدام

لكن يا عم حسبو....في النهاية طلعت شنو؟ شيوعي والله مسلم؟

العم حسبو تحياتنا وحمداً لله على سلامتكم
لازالت محاكم التفتيش تمارس اعمالها قال حريات قال فالامي القريب منع شاعرنا حميد من القاء قصائده لانها ملحدة حسب زعمهم وتلفزيوننا يستضيف رجل الثقافة والادب قريبي الكودة وهو يتحدث عن حبة للفن والفنانين والشعراء اكيد انه يقصد شعر ايوة يلا علينا جاااااي
واردد ما رددته الاخت تماضر
نغرد ونحن في اسرك
وترجف وانت في قصرك
واردد مع حميد
البوليس صاقع شيوعية شيوعية
وفاكر نفسو بينبذ فينا
يابوليس امك مسكينة


اسبوعين عشناهم جوة
اسبوعين ذادنا قوة
واكيد ياعم حسبو خرجت اقوي

سلام لكل الحلوين
ود محجوب والرائعة تماضر والبنية وسجيمان الرمدان وابو يسراء
شكرا نورتو علينا البوست بعد ظلمة الجماعة اياهم
والله اكان شيوعية وللاصعاليك وللامولنات وللامهترشين ذى شيرى وللا غيرو فى النهاية كبيرنا الله ...كعب الناس الكبيرهم الجمل

عمك حسبو

انت شكلك كده من الاخوان الشيوعين


مصداقا لي كلامك عمك حسبو ، عندي مره واحد صاحبي مسكوه الجماعة ديل، لمن جات صلاةالمغرب قال ليهم عايز اصلي، قالو ليهو يهنديك الماسورة امشي اتوضا، المشكلةانه نظره ضعيف وشالو منه نضارته، والدنيا بدأت تظلم قال ليهم ما شايف الماسورة ، وقعوا ليك فيه ضرب لغاية ما وصل الماسورة، المهم اتوضا وجا بعد ما صلى، قام واح فيهم ساله قاليه انت المغرب كم ركعة قال ليه تلاته، قام التفت لي زميله قال عاين ده قال المغرب تلاته ركعات قام داك اتلفت على صاحبي قال ده كان زمان نحن هسع عدلناه المغرب قى اربع ركعات، قام قال ياخ هو تلاته، قامو وقعوا ليك فيه ضرب مرهتانية وقال ليه الا تصلي المغرب اربعة ركعات


تقولي دولة اسلامية ودولة ذات رسالة حضارية، انا ما عارف لو مانوا عاملين فيها مسلمين كان عملوا شنو


لك الله قادر
والله فيه
وكل اول ليه آخر

العزيز حسبو
ليس غريبا علي دوله تعتمد في جهاز امنها
علي الجاهلين لكي يطيعوا ويقولوا سمعنا واطعنا
كلامك دا اكد لي ما مدي جهلهم
كل من يعارضهم شيوعي
وان الشيوعيه ديانه؟؟؟؟؟؟؟؟
علي راي الاستاز الموصلي في فرق في
عدد الركلات ما بين شيوعي ومسلم







************************************
خزنه وتنك ولحيه فشنك ******سيد اللبن في الباب ام مخبرين اشرار

الاخوان ياسر حنا وبيكو لكم التحية والشكر للمشاركة
يا ياسر ذكرتنى بى قصة الماسورة دى...برضو كان معانا واحد قبضوهو بشرب من المبرد بتاعهم جنب المكتب اظنو مشى الحمام ولقى مافى زول جنب المبرد قال يتتهزا فرصة ويبرد جوفو شوية...بس قبضو ليك الجماعة قالو ليهو مالك بتشرب فى الموية قال ليهم عطشان قالو ليهو دى مشكلة حلها بسيط.. ووصلو ليهو الخرطوش من الماسورة وقالو ليهو تشرب طوالى وماتطلع الخرطوش من خشمك الا الماسورة تكمل.. وصاحبنا حالتو بقت بى البلاء الموية تطلع بى نخريهو وعينو دمعن وغايتو...ربنا يكون فى العون