Post: #1
Title: ســـؤال في الطــب؟
Author: Yassir7anna
Date: 05-20-2003, 02:37 PM
الاخوة الاطباء والاختصاصين بالبورد
سلام
عندي بنتي الكبرى عمرها اربعة اعوام ، قبل تلاتة اربعة ايام كده وقعت من السرير بالليل وضربت راسها بالارض مما سبب لها ورم صغير في نفس منطقة الضربة، وفي صباح اليوم التالي زال الورم الذي كان نتيجة الضربة لكن من امس بدأت الاحظ ان مكان الضربة بدأ يميل للون الاخضر الخفيف
فهل هذا شئ عادي يزول مع الوقت ام انه يحتاج الى مقابلة طبيب؟
لكم الشكر أجزله
|
Post: #2
Title: Re: ســـؤال في الطــب؟
Author: ودنمر
Date: 05-20-2003, 02:42 PM
Parent: #1
الاخ حنا
تحياتى
بالله انت بنتك واقعة على رأسها وانت قاعد تتفاصح بى جاى
يا زول القاعد ليها شنو
لا تهمل وتستهون الامور
الله يخليها ليك ويحفظها من كل شر
طمئنا عليها بعد مقابلة الدكتور
بالسلامة
|
Post: #3
Title: Re: ســـؤال في الطــب؟
Author: EMU إيمو
Date: 05-20-2003, 02:46 PM
Parent: #2
كده يا ود نمر شوف ليك بصير
عشان يفصد الدم الفاسد من رأس بنتك
حتى لا توصف بأنها علامة صلاة
|
Post: #5
Title: Re: ســـؤال في الطــب؟
Author: Ahmed Poison
Date: 05-20-2003, 04:03 PM
Parent: #3
يا ودنمر
الله يكتب السلامة اولا.. بعدين احباب الله ديل ما تلعب فيهم .. عشان ما يلعب فيك
شوف ليك دكتووووووووووووووور فااااااهم كدا وما تستهون
|
Post: #6
Title: Re: ســـؤال في الطــب؟
Author: Yassir7anna
Date: 05-20-2003, 04:31 PM
Parent: #5
أحمد بيسون
كتر الف خيرك ان شاء الله
انا بس قلت اشوف لو لقيت لي دكتور في البورد يورينا الحاصل
تشكر أخي
انتو يا اخوانا مسؤلين من الخير..أساسي وين اليومين ديل؟
|
Post: #4
Title: Re: ســـؤال في الطــب؟
Author: Yassir7anna
Date: 05-20-2003, 04:02 PM
Parent: #1
ود نمر العزيز
كيف حالك؟
بالله شفت ميت القلب دي كيفن؟
الشافعة قعدت تبكي وامها تقول لي قوم وديها الدكتور، اقول ليها يا وليه انت مجنونة دكتور شنو في الليل خليها الصباح بتبقى كويس، عايز ارجع اواصل نومي
والله انحن زمان اتوقعنا وقيع، تفتح خشمك يلطشوك بالمركوب وينهروك كمان يا ود اسكت سكت حسك..
الببكيك شنو؟ انت ما راجل
الببيكيك شنو ما عارف وانت تكون واقع ليك من راس حيطة ولا راس بيت
تقوم تاكلها رجاله ساكت وانت تكون واصل مرحلة من الم
تسلم اخي على الاهتمام وان شاء الله نطمنكم
العزيز EMU
انا ما عشان كده بسأل؟ لو بقت بتعمل علامة صلاة النخليها، بعدين يقولوا البت صالحه خلاص، طبعا ح يقولوا الفضل يرجع لأبوها... وانا اقول قر من الضحك
دحين بتعرف حكيم يمرق الدم الفاسد ولا تمشي المستشفى، انا باقي المستشفى دي ما مقتنع بيها، تمشي يعملوا ليك توم وشمار، تمشي تقول ليهم عندي وجع راسك يقعدوا يقيسوا ليك من الضغط للسكري وفي النهاية يديك بندول
انا مره مشيت ليهم بي نزلة ساكت قالوا لي عندك ضغط، انا من الخلعة قرب يجيني ضغط جد، لغاية ما لقيت دكتور سوداني، في النهاية طلع لا في ضغط ولا حاجة
كدي دحين كان بتعرف ليك حكيم ولا فكي في الخليج ده كلمنا خلي النودي ليه البت دي
تشكر اخي للأهتمام
|
Post: #7
Title: Re: ســـؤال في الطــب؟
Author: جدو
Date: 05-20-2003, 04:59 PM
Parent: #4
العزيز ياسر حنا
الف سلامة للأمورة الصغيرة
هذا اللون عبارة عن تجمع دموي صغير نتيجة لتهتك الاوعية الدموية الصغيرة في فروة الرأس ..وسوف تزول بأذن الله بعد مدة بسيطة..
ما تتخلع من كلمة تهتك دي ..دي مصطلح يفيد اصابة الاوعية..
لكني اقترح عرضها على طبيب لأجراء بعض التحاليل والصور حتى يتأكد من عدم وجود كسور او اصابات..
وربنا يكتب ليها السلامة في كل خطوة...
|
Post: #8
Title: Re: ســـؤال في الطــب؟
Author: Alsawi
Date: 05-20-2003, 05:22 PM
Parent: #1
سلام يا ياسر، وسلامة البنية وسلامتكم كلكم من كل اذى
والله ما دام البت بتلعب عادي يعني لا بتشكي من صداع ولا استفراغ ولا حاجة تانية فالغالب ان المسالة شوية دم وسوائل تحت الجلد تاخدلها كم يوم كده وتروح دون ان تترك اي اثر يؤثر على مستقبل الامورة، وعند الاطفال بالذات الحكاية دي شفاءها سريع وساهل
لكن زي ما اقترح الاخ جدو فلمجرد الاطمئنان لو كانت مقابلة الطبيب ممكنة فالافضل ان يشوفها، وممكن اذا احتاج يعمل صورة بس عشان نكون في السيف سايد، فلذات الاكباد ديل ما بيهم لعب، لكني احيي فيك روحك الرياضية وتقديرك السليم، حيث الكثير من الامهات لمجرد خدشة في الطفل يقومن الدنيا كلها، ويقومننا نحن نص الليل عشان الولد عندو شوية قحة وليها يومين!!
وربنا يديكم جميعا العافية
|
Post: #9
Title: Re: ســـؤال في الطــب؟
Author: Yassir7anna
Date: 05-20-2003, 06:10 PM
Parent: #1
الصاوي
بارك الله فيك وكتر الف الف خيرك
كده طمنتني شوية وان شاء الله اقابل بيها الدكتور في اقرب فرصة، لني فعلا كنت قلق اذا ما كنت المسالة خطيرة وممكن تسبب اي اذى، لكن زي ماقلت مقابلة الدكتور برضو مهمة
تعرف المشكلة هنا في بلاد الغربة عملية صعبة جدا مع ظروف العمل الصعبة دي انك تزوغ عشان تمشي اي حتة، وخصوصا الكفيل اليومين ديل قايم عليه جن الفنيش
لك ان شاء الله في نهاية الاسبوع اقوم بالازم
كترف الف خير عزيزي الصاوي
|
|