Post: #1
Title: كدا كويس ياقرشو.. وياباقى الجماعة؟؟؟
Author: 3mak Hasabo
Date: 05-20-2003, 08:11 AM
ســلام للكل
امبارح لمن قريت بوست العمدة قرشو محظور دخول المترفين وابنائهم زادنى سرحان وتفكير وهم (غايتو ياعمدة شكيت محنك ) الفقر دا قدر مانذوق منو بجاى يجيك بجاى والحمد لله
بس المشكلة نحن قاعدين نصدق كلام الاغنياء ويزينو لينا الفقر دا حاجة جميلة
واتذكرت امبارح (ودا الخلانى اكتب البوست دا) قصة عم واحد صاحبنا بيحكى قال لينا.. انو كان ماشى ومعاهو ولدو الصغير بالقرب من شارع المطار فى الخرطوم ..ومروا بجنب واحد بيبيع تفاح.. وقام الولد يبكى قال الا يشترو ليه تفاح ..وطبعا التفاح فى السودان غالى جدا.. وطبعا ابو الولد ماعندو المبلغ الكافى لشراء التفاح ..قام قال ليه بصوت حزين ياولدى التفاح دا شغلتو كتيرة خلاص.. لازم امك تقشرو وتولع ليه النار ويقطعو ليه البصلة ويحمروها.. ولمن ينتهوا منو تكون الوطا فللت وانت نومت.. احسن ليك نشترى ليك موز اكلو سريع وساهل فاقتنع الولد راضيا
اها ياجماعة كدا كويس ؟؟؟
عمك حسبــــو
|
Post: #2
Title: Re: كدا كويس ياقرشو.. وياباقى الجماعة؟؟؟
Author: قرشـــو
Date: 05-20-2003, 09:30 AM
Parent: #1
حبيبنا عمك حسبو
نهارك بنكهة التفاح الفرنسى
لك التحية والشكر ولك الود كله وانت تنقلنا امعانا فى معاناة الفقر وتحويره لمعانى الاشياء ..
دعنى اذكر لك هذه النكتة والشىء بالشىء يذكر
يقال ان احد الفقراء جاء فى سوق الخرطوم ورأى اكوام التفاح اشكال والوان والراجل يلمع فى التفاح ويمسح فيه ومخليه زى العروس والفقير يطيل النظر الى التفاح وعندما انتبه الفكهانى للراجل وعرف مقصده ساله هل تريد ان تأكلا تفاحاً ؟؟ فتهللت اسارير الفقير واجاب باسرع ما يتوقع الفكهانى بالايجاب ..
فقال له الفكهانى اذن عليك عمل الاتى : اولا تمشى تتجند فى الدفاع الشعبى ثم تذهب الى الجنوب تم تستشهد ثم تدخل الجنة وهنالك ستأكل الكثير من التفاح..
بالله يا عمك حسبو دى حالة دى ؟؟؟
مع حبى لك وتحياتى
|
Post: #3
Title: Re: كدا كويس ياقرشو.. وياباقى الجماعة؟؟؟
Author: بدرالدين شنا
Date: 05-20-2003, 10:10 AM
Parent: #1
بسم الله الرحمن الرحيم
عمك حسبو
سلام ياعم
هسع أنا اقول سلام عمي حسبو ولا سلام عمك حسبو هو حسبو دا عم منو إنت ولا أنا؟ .. أنا شخصياً ما فاهم حاجة
قصة التفاح دي ذكرتني قصة
أخونا وصديقنا جمال كدوس لاعب الهلال السابق طبعاً راجل حلو ومرح جداً
أها يوم كان بتريض في إحدى الحدائق هنا في بلد الشتات ووجد أسرة سودانية منعمة وياكلوا في تفاح .. ففجأ الراجل المنعم وهو ماسك تفاحة في يدو قال لجمال كدوس .. معقول دا جمال كدوس؟؟؟؟
يا كدوس عليك الله مخليين الهلال العظيم جايين هنا تسووا شنو؟
كدوس قال ليهو
جايين ناكل التفاح البتمعط فيهو إنت دا
قال الهلال العظيم قال
|
Post: #4
Title: Re: كدا كويس ياقرشو.. وياباقى الجماعة؟؟؟
Author: 3mak Hasabo
Date: 05-20-2003, 10:44 AM
Parent: #3
العمدة الحبيب قرشو
واللذيذ ذى التفاح بدرالدين شنا
طاب ملتقاكم..بس للاسف مافى تفاح نقدموا ليكم ..رايكم شنو نديكم موية زير باردة ترطب الجوف وتخلى يقول شحشحشح..احسن لكم من التفاح الشغلتو كتيرة دا
وبعدين يابدر الدين اى حاجة منك حلوة تقول عمى حسبو تقول عمك حسبو كل البجى منك سمح ياسمح.. بس انا عمكم حسبو
|
|