بكائية لروح فقيدنا الاستاذ مصطفى الشيخ

فارس القبيلة الفات
خلانا بعدو شتات
أبكنو يا الأمات
أبكنو يا الخالات
دخري الحوبة..عشا البايتات
حليلو الليلة ولآ وفات

تبكيك البراري أم در وبيت المال
تبكيك كل المحافل الليها انت الفال
تبكيك نوادينا- بوادينا- مناراتنا والأطفال
تبكيك الوسيلة والميدان

يا حليل حبيبنا اللي رجال هو مثال
يا حليل دليلنا يوم قلت الأمثال
يا حليلو خال الكل وخال اقبال

يا حليل أبونا الما فرقنا من أولادو
يا حليل دخلتو علينا- فتحة بابو

تبكيك (سرورة) العالقة بي ذكراك
تبكيك(سهى) الديمة هي طارياك

الليلة يا خالد مين البوعينا
نفتح قليبنا يشرح يقول لينا
(أبقوا عشرة) وين انت التقول لينا؟

ركيزتنا..منارتنا..هدايتنا
ثباتك كان بعلمنا
مواقفك هي بتقوينا
أبوتك هي البتهدينا

يا ميدانا يا ما فقدتي
أشوف دمعك يقطر دم
أدور أمحاه يتقطر
يزيد وجعي وأتحسر
على رجالا قليلة امثالهم
على رجالا طيبة ذكراهم

ارقد قفا يازول
عهدك- تب والله ما بنخونو
قضيتك- حاشا والله ما بتنباع
دربك ..أخوانك كتار واقفين
بس كنا عشمانين
لكن.. الحمد لي الله سيد الكون

نو هاني يا ميمون ويا درتنا يا المصيون

تشفع ليك نياتك الطيبة
وتشفع ليك دعواتك الواسعة
بس سودانن سمح بالحيل
بي لقمة للجوعى
بي بسمة للمرضى
بي لمة للأخوان
بي جية الحبان
القلوبهم ماليها ده السودان

أبشر عديلة وزين

البركة فيكم يا ام سهى

الغالية ام سها
انا يا سهى كسرت قلمي عشان اجري من الكلام الرائع الذي كتبتيه في حق عمنا مصطفى وارجعت البصر كرتين وبكيت
لذا قررت ان اتناول سيرته من زاوية سيفرح هو كثيرا عندما يجد ان البذور التي بذرها ستتربى على سيرته وتواجه اقوى المصائب بي الثبات الهو دايروا لينا
من حقنا ان نحزن وننوح في احبائنا ونودعهم بمايستحقون
ارجو منك حسب الاقتراحات التي وجدتها في الكلام الذي كتبته عنه تحت عنوان
احتتطب الموت ويا للهول نضير العود
ان نواصل التوثيق لهذا الرجل السامق وانت كنت واحده من الناس المقربين ليه جدا
لك مني كل الامتننان
خالد

أحسن الله عزاءكم وعظم الأجر