زوال تاثير الشاكوش

والله القصيدة دي عاجباني من زمان ، ويادووب لقيتا كاملة.. احتمال تنفع معاكم

تاني كاتب لي خبارك؟
انت فاكر انو لسه
قلبي تايه في مدارك؟
دي الديار خليتا ذاتا
لما ضاقت بيّ ديارك
البعاد الشايفو قاسي
ما زمااااان كا بي اختيارك
لما رحت تجور عليّا
ورحت ابعد من مسارك
كنت فاكر بنسي جرحك
جيت تنمق في اعتذارك؟...

الجواب الجاني منك
عندي صار ما ليهو قيمة
والهوي الكان بيني بينك
عدّي بالشوق والهزيمة
وهسي لما طريت هوايا
وقصة الذكري الاليمة
جاي تاني عشان تعاود
للحكايات القديمة؟...

هسي حاول انت تنسي
انو كان بناتنا قصة
وحقو ما يفكر قليبك
اني بطراك انت لسه
الزمن استاذ بِقرّي
واهو قدم لينا حصة
السهاد والغدر ساسا
وما عليك ابداً بدسا

الكلام القلتو ليا
كان بيمشي علي زمان
قبل ما تغدر عيونك
وقبل ما يخوني الزمان
كم جرعت معاك مزلة
واكتويت منك هوان
وانحنا ناس عزتنا اكبر
من حنانك والحنان...

اصلو كان خادعني لونك
والبريق الفي عيونك
والبسيمة الضاوية شمعة
وباقة من اطراف سنونك
كلو كان تغليف مشاعر
عكس ما بتحمل ظنونك..

انت لو فاكرني بحزن
عشان فراقك او جفاك
تبقي موهوم في عواطفك
اصلو قلبي زمااان نساك
ابتديت انساهو ليلك
والسنين الراحو ديلك
وانسي جور كل الاماسي
الفيها كم قاسيتو ويلك...

يبقي ردي علي جوابك
يا جميل الرجعة لا لا
كوني ارجع ليك تاني
الف مليون استحالة
ما البعاد انت البديتو
يوم حرمت الروح وصالا
وانت عارف البادي اظلم
ايه لزوم يعني الرسالة
وانت لو فاكرني بحزن
عشان فراقك !!..يا حليلك
يا حيليك

أخي أحمد
الكلمات رائعة ومعبرة لأنها تجربة صادقه للشاعر والذي أحسب أنه هو أنت وربنا يبعد عنك جميع أنواع الشواكيش.

فعلاً قصيدة معبرة .. ,انا ذاتي من القصائد العاجباني لما فيها من قوة معاني ومواقف .. وهي تسمى الرسالة لمختار دفع الله .. وبعدين "الضربة التي لا تقتلني تقوينى" وربنا يقويك

الاخ احمد بويسون

ليك زمن مختفي

شاعر القصيدة هو مختار دفع الله

وهو شاعر المكسرين والحب العذري

القصيده جميله ومعبره
لكن انا اعتقد ان الشاعر كتبها علي لسان امراة يعني الشاكوش جاي من الرجل وليس المرأه
بعدين يااحمد ياخوي مالك كاتب توقيعك كده

لا تأمنن لامراءة وان حبتك بودها
ان النساء ودارهن مقسم
فاليوم اليك ودها وحنينها
وغداً لغيرك يدها والمعصم

دا كلا م خالي من الصحه

اخي الملا عمر
هي بحق قصيدة معبرة واستطاع الشاعر ان يجسد تجربته في كلمات ، ويايرت لو كنت انا بعرف اقول كلام زي دا ما كان الحصل حصل.. والله يبعد عننا جميع انواع الشواكيش

نون
الله يقوي الجميع واحييك علي احساسك الراقي دا .. بس ما تفهموني غلط..دا ما انا
وشكرا علي المعلومة القيمة

قرجة
والله ما شغلني عنكم الا الشديد القوي.. لكن رجعنالك.. وبرضو شكرا علي المعلومة لانو صراحة ماكنت عارف ليها سيد

بت الجزيرة الرائعة
لماذا اعتقدت انها بلسان رجل؟.. لكن زي مابقولو تعددت الاجناس والشاكوش واحد
اما عن توقيعي.. دا ما تعميم لكن في خرطومنا دي الوضع جايط جداً ولا ماكد

عذرا احمد اذا استعرت توقيعك لكي اكتبه هنا
تتصور ياابو حميد انو النساء فيهن الوفيات الحافظات للعهد والامانة والعشرة ويتمسكن بها رغم كل الظروف ولكن على النقيض تماما هنالك مع الاسف الشديد من ينخدعن ويخدعن فهؤلاء اكتب لهن توقيعك هذا فهن لا امانة ولا عهد ولا ذمة ولا عشرة ولا وفاء لهن
ويغدرن بك ويبيعنك كما تباع البضاعة وتشترى
لا تأمنن لامراءة وان حبتك بودها
ان النساء ودارهن مقسم
فاليوم اليك ودها وحنينها
وغداً لغيرك يدها والمعصم

اخي ابراهيم
اتمني ان يستعير هذا التوقيع كل الشباب (اللي زي حالتنا) وعلي كل فهو ليس ملكي وان امنت به..
بس المشكلة انو مفهوم الوفاء وحفظ العهد والامانة والعشرة ووو.. اللي قلتهم، يا اما انا فاهم غلط او الجماعة ديل غيرو معناهم..وحتي لا تتصور انني اظلم هؤلاء القوارير ، فانالا اعتبرها خيانة او خداع واذا تاملت معني التوقيع بعمق ستجد ان مفهوم البيع يعتمد علي امكانيتك علي تحقيق الاحلام (الخيالية) للنساء في زمن اصبح الولاء فيه لل... وليس الرجال.. اي بالعامية كدا (بيحسبوها صح) فزمن القطية والقشة قشة ولي وهذا زمن الديجيتال والكوري والدفع الامامي يا صحبي
ومع هذا اكرر ان هذا الكلام غير معمم وقد نجد منهن حالة شاذة .. يارب

أخي أحمد
أظن وبعض الظن إثم أنه حتى لو سلمنا بأن القصيدة هي ليست من بنات أفكارك ولا حتى من بنات جيرانهم فهي بالتأكيد إختيار موفق ، فلتنتفي حقيقة أنك لست شاعر القصيدة وإن كنت شاعر بها وشعورك هذا ربما نابع من شاكوش قديم وما يؤكد هذا الظن أنك قلت ما كان الحصل حصل وبالضرورة فإن الحصل لم يعجبك وما يجعلني أقول قولي هذا أيضا ما جاء على كيبورد أختنا بنت الجزيرة تعقيباً على التوقيع الرسمي لك أخي أحمد.

اخي الملا عمر
نون و قرجة الله يعطيهم العافية اسعفوني باسم شاعر القصيدة واسم القصيدة ذاتا مما يدل علي اني لستلا كاتبها.. اما عن الشاكوش القديم فصحيح وعادي (هسي انت ما ماخد ليك شاكوش؟)
المشكلة اخي ليست في الشاكوش وانما ما بعد الشاكوش ولا ماكدا
اما سمعت القائل:
نحن رجال كالمسامير.. لا تذيدنا الشواكيش الا ثباتاً..

ماذا تعني بكلمة
إلا ثباتا
!!!!
هل هي شبيهة بما يقوله العسكر في السودان
أثبت ثااااااااااااااابت
!!!!!!
ولك ودي

نحن رجال كالمسامير.. لا تذيدنا الشواكيش الا ثباتاً
ما اجمل هذا الرد يأأبو حميد والثبات في الجيش معروف وكلمة اثبت معناها لا حركة ولا تلفت ولا اية حاجة يعني تكون كالصنم كهذا هم المشوكشون (كده صاح ولا غلط) دائماً
وبالمقابل ياخي أبو حميد
فقد انتهي زمن الولاء والوفاء واصبحت المعايير مختلة والكثير اصبح يحسبها حساب ربما تكون صاح وربما تكون خطاء ولكن في النهاية تكون قيمة الوفاء والولاء قد اندثرت وحلت محلها البيع السريع حتى ولو على حساب حاجات كثيرة حامياني

ابراهيم

Quote: فقد انتهي زمن الولاء والوفاء واصبحت المعايير مختلة والكثير اصبح يحسبها حساب ربما تكون صاح وربما تكون خطاء ولكن في النهاية تكون قيمة الوفاء والولاء قد اندثرت وحلت محلها البيع السريع حتى ولو على حساب حاجات كثيرة حامياني

هو دا القاصدو انا... الله يديك العافية
اما الثبات القاصدو يعني فترة هدنة مع النفس (وقف اطلاق النار) واخذ العبر والاستعداد للشاكوش التالي بروية.. وبرضو في مثل بيقول :
المحب مشكوكش حتي يثبت عقد قرانه
وأرمي لي قدام

ابو حميد دي قلبت فيها هوبة عديييييييل كده
المحب مشوكش حتى يثبت عقد قرانه
وبعد العقد مصيرو حيكون شنو لحبه الكان القبيل وبناه قشة قشة وناس تجي كده تخطفه منك

الله يكفينا شر الشواكيش

القصيده للشاعر المخضرم مختار دفع الله
رد الرساله

وليد
لو كنت جاهز ما بتجيك عوجة ..

الله يخليك يا ابراهومة
لكن بعد العقد هو وشطارته .. يا بقي زول عاقل وعامل بيتو بي المفهوم الصح او ارتكب غلطة عمرو بانو يعمل البيت زي الفندق والمرأة زي الجارية بحجة انو مشغول وساكي الرزق!!
يعني اخلاق ضيقة ويعمل فيها انو حل مشكلة فلسطين علي يدو وكدا (الحاجات البنعرفا انحنا الرجال)..
والله يستر

القصيده جميله انسانيع ومعبلاه وصريحه
لو كان علي هنالك كلمه
عشان فراقك
لو تغيرت
وبقت
لي فراقك
فان البيت يستقيم
لك الود

استاذي الموصلي
علي العهد بك دائماً حساس ، مرهف ، فنان..
واشكرك علي التعليق

الغالي أبو حميد
وما زال التاثير مستمراً
هل مزيد

يا ابراهيم يا خوي شكلك كدي مجهجه زيّ
ما تورينا انت حاجة