Post: #1
Title: قبل ان يستحيل شوقي رمادا.....
Author: حنين
Date: 05-13-2003, 07:20 PM
Parent: #0
واشواقي ليك غريبه....
وتحاورني واحاوها ...ومرات احاول اقاومها.....واقوليها خليني لنفسي شويه ...تعبت من سفر الروح في السما وانتظار نجمه مساء...عشان احلفها بعينيك ...واوصيها لمن ترحل الليالي من هنا...ويجي الدور عليك...بس تقول ليك...كيف انت قدرت تغالبها...وكيف ما حسيت بيها لما تطلع من دواخلي...لما ترحل من بداياتي العميقه...عشان تتجمع في ركن العيون...في اهداب مشاعري..وتسرق مني لحظه حب وجنون...وتتعلق هناك...فلا هي بتنزل وتريحني من عزابي...ولا بهون علي امسحها...بخاف لمن ايدي تمتد لها ...تحس بيك فيها...وتعاكسها...وتفضل معاها تونسها...............
طيب لو انت ما مشغول ...تقدر تقول؟......ليه الليل الطويل لمن يقيف في نص العمر.....وتنوم النسمه والقمر...وتسكت اوراق الشجر....وترتاح مويه الضفاف في حضن حبات الرمل...وترحل هموم كل البشر....تقدر تقول منو البناديني من عز السكون...من البياخد روحي لالف كون....منو البملاني بالعواطف والعواصف والجنون....من البنقلني من حاله بين حاله الفرح الخرافي والموت والشجون...زقول لي بس لو ماكانت روحك مين يكون.؟
يا حبيبي اشواقي ليك بقول ليها تعالي وتعالي وتعالي
اخديني من لحظات وسن...ختني في حضن الصفا....وشيليني من لحظه الم....وسافري واتحدي الخريف والمحيط...عشان لمن تحس بلمسه حنان او بسمه بتنبع فوق شفافك في لحظه جفاف...انتعاشه روح جميله.رجفعه حنين...رنه وتر. ما تبقى تسال ايه السبب...لانو شواقي ليك هي السبب
اما اشواقك لي فانا بعرف كيف احررها....ولحدما احررها...باشواقى بدفيك...وبتغطى بيها وبغطيك
|
Post: #2
Title: Re: قبل ان يستحيل شوقي رمادا.....
Author: WAD ELGAALI#4
Date: 05-13-2003, 08:07 PM
Parent: #1
حنين حمدا لله على سلامتك وبركة زنقتك اللتفكت ورجعتى تانى عشان تطربينا ياخى كلامك لذيذ لذة يخلى الواحد يهيم مع حبيبتو بالمناسبة انت متاكدة انك
بتقرى صيدلة ياخى عليك الله لو قريتى اداب فرنسى
والله ماكنتى تخلصى معليش ما تقولى دا كسير لكن
بالجد انا بعجبنى الكلام البطلع من القلب طوالى على
الورقه عبر القلم او الكيبورد اتمنى انك تكونى رجعتى
بكل قواك للكتابة واطرابنا وحقو تدى امير ترافولتا هبشة
عشان قصتو حلوة هى وقصه تمبس بتاعة فرنكش
لك تحياتى واغلى الاشواق
|
Post: #3
Title: Re: قبل ان يستحيل شوقي رمادا.....
Author: جدو
Date: 05-13-2003, 10:17 PM
Parent: #1
حنين حمدالله علي السلامة
وكيف الامتحانات ان شاء الله تكون عدت على خير
انت الكلام الجميل بتجيبي من وين؟؟
وبضم صوتي لي ود الجعلي بانك تشوفي لينا حكاية امير اب لمبة
مزيد من الابداع .... ونحن في الانتظار
|
Post: #4
Title: Re: قبل ان يستحيل شوقي رمادا.....
Author: Hozy
Date: 05-13-2003, 10:47 PM
Parent: #1
حنين
كلامك حنين ذيك كده
|
Post: #5
Title: Re: قبل ان يستحيل شوقي رمادا.....
Author: بت قضيم
Date: 05-14-2003, 06:07 AM
Parent: #1
حنين الحنينة
بركة الشفتك طيبة
كلامك شفيف يا حنين يمس القلب بلا حواجز
استمري ارجوك
|
Post: #6
Title: Re: قبل ان يستحيل شوقي رمادا.....
Author: حنين
Date: 05-20-2003, 04:15 PM
Parent: #1
الاعزاء دوما
ود الجعلي
جدو
هوزي
بت قضيم
اشكركم شديد ومعليش جات متاخره باين الزره وراي وراي
|
Post: #7
Title: Re: قبل ان يستحيل شوقي رمادا.....
Author: حنين
Date: 05-20-2003, 04:28 PM
Parent: #1
وحاسه اني ما عارفه النهايه...وبمشي من غير دليل في سكه سفر...ممكن تطول ...او تبقى لي كل العمر
وخايفه...خايفه يجي يوم ازحف على الشوك ..واترجاهو يديني..الدموع...يديني الالم...عشان احس بالعذاب...لانو احساسي من غيرك كل الوهم ...كل السراب.....
حتى الجرح ما حاحس بيو...لو مافي حاجه انزفها...وانزف شنو وانت الدم البسكن في كل عروقي..وبعرفها
وخايفه من نور الصباح...يجيهو يوم ويتنكر لعيون عشقت ملامحو وغنتو
لانفاس بلت جبينو واندتو...
لاحزان ضحكت معاهو وبكتو....
لدموع باتت في خدو..وصحتو
سقت براعمو....وادتو...وماتت عشانو واحيتو
وخايفه يوم تخوني الاشواق وابكيك...قبل الفراق
وخايفه افكر افتح قلبي ليك اكتر...القى مفاتيحي ضاعت من زمان...واسأل عليها واتحير...ويقولو لي مفاتيح القلوب...لا بتتعوض ... لا بتتأجر
يا ربي..قادر تحس بي...قادر تشوف وتتصور
...طيب عارف كمان انو كلمه بحبك لما تطلع من حنان جنه مشاعرك كل المخاوف بلحظه واحده تتبخر
وكل الاشواك المفروشه بيها سكتنا...بمشيها ورد وعطور وعنبر...
وكل الضلام البعصف بي حياتي بيروح ويرحل...
وتنهزم مغاره قلبي...وتتراجع صخورها...واشوفك امير ..بتشيل من كنوزك وتتديها اكتر...
عشان كدا بحبك ..يا جميل المشاعر والدواخل والوتر....
فخليك معاي...وصح قصتنا في الهوى لسه ما بنعرف ليها نهايه...لكني حاعيشها قصه عمر ومصير مقدر
ولو شاء ربي وربك يوم تكتمل...
ولحدي ما تكتمل....تعال معاي,,,نحكي الحكايه...بحروف امل
|
Post: #8
Title: Re: قبل ان يستحيل شوقي رمادا.....
Author: ايهاب
Date: 05-20-2003, 05:00 PM
Parent: #7
اخونا حنين
خطير والله
loOoOoOoOoOoOlz
عارف والله بهظر معاك ساي
مافي اي داعي تغلبي النمله و تلزقي ليها اي حاجه
حمد لله على السلامه
شنو الابداع دا يا دكتوره
|
|