العضه...وأشياء أخرى

السلام عليكم ورحمه الله



أتصلت ببعض الصديقات لأدعوهن لباربى كيو عاملاهو أختى..قلت لهم تعالو الليه أنتو معذومين عضمه..فأنفجروا فى الضحك

لم أدرى سبب ضحكهم فتسألت فى حيره عما يضحكهم فأجابو أن أسمها عضه وليست عضمه فضحت أنا الأخرى

حقيقه أعجبنى لفظ عضه وبعض المفردات السودانيه التى يستغرب الأخرون أننى لا أعرف معانيها..ولكن أذا عرف السبب بطل العجب فأنا غادرت السودان منذ ذمن طويل وكنت لسه شافعه وهذا يفسر عدم معرفتى بجميع المفردات السودانيه

فمن أين أتت كلمه عضمه..قصدى عضه؟

وما السبب فى تسميتها بهذا الأسم؟

وهل نحن نعتبر جاهلون لعدم ألمامنا بالعاميه السودانيه؟

وماذا يظن عنى الناس فى السودان حين يقولوا لى أشياء لا أستطيع فهمها أو أطلب منهم معرفه معناها؟ هل يعتقدون أن ذلك فلهمه ودلع بنات فارغ أم يتفهمو وضعنا كمغتربين عن الوطن كل ذللك الوقت؟



وفى أمان الله

لا اله الا الله

الاخت بت الاحفاد تحياتي

طبعا بالغتي عديل كان لازم تغلطى وتقولي عضمه بعد البربكيو ده

طبعا ذكرتني ولد اختى عايش بره السودان منذ الميلاد
وكنت بحكي ليهو عن لعبات الشفع زمان فى الشارع البلعبوها وهم راجعين من المدرسة وسألتوا سمعته بالعبةبتاعت كديس نطااك قال لي ايوه انا اندهشته
قلته ليهو متاكد انك بتعرفها قال لي ايوه دي مش البقلع
كل شافع فيهاالينوفووورم بتاعوا

العضه جايه من العض ولمن نقولها بنكون قاصدين السفسفة
جد بدون برتوكولات اوع تقول لي ما بتعرفي السفسة كمان؟؟

طبعا الجهل بالكلمات العاميه دي امر طبيعي لاي شخص ابتعد عن الشارع
السوداني لفترة زمنية وبالمناسبة المصطلحات العامية متجددة دائما
لذلك تجدي حتى المغترب عن السودان لفترة لم تتعدى العام بواجه نفس المشكلة دي والمصطلحات كتيره

زي شمار و قنزب، كنجالات و ضحاكات
اها عندي سؤال ليك ولكل البورداب
ما معني المصطلحين ديل

1* كشى مشى
2* ابرش الهشي

يا بت الاحفاد لو ما جاوبتي على الاقل على وحدة منهم تكوني مدلعه وحنكووشه كمان.

الحمدلله ما مدلعه
طيب أنا ما بعرف غير الكشا مشا ، التانيه ما بعرفها ، بقيت مدلع كدا ؟

وعليك الله أشرح لينا بتاعت الكديس دي بدون الاضافات الفوق اياها

قلتى لي شنو...عازماهم عضمه...........كلاب هم يابعيد
.........
بعدين لازم تفضحينا....ماهو الناس عندهم راي في بنات الاحفاد...اها كدا تبتى الفكرة....
.....................
بالمناسبة دى لو مشيتى السودان انتى...حتحتاجى لمعجم.
...................
السنجك:
كشي مشي...دا الزول السبهلل...
التانية دى ماعارفها

لووووووووووول حلوه عضمه يا بت الاحفاد بالمناسبه حتي نحن الاغتربنامؤخرا رجعنا السودان لقينا لغه الرندوق , ياشباب لو سمحتم قولي لي من اين استمدت الكلمه انا فهمت انهالغه من كان يطلق عليهم بالاستريت بويز او الشماسه واعتقد جايه من الشمس لانهم لا ماؤي لهم طوال النهار . من اين اشتقت كلمه الرندوق ويكون جميل لو كتبتوا لينا مفرداتها الشائعه الاستعمال ومعناها. انا بعرف اسمي بالرندوق وهو جلكينه اي امراه عجوزة.يا السنجك ولدي بنعرف كشي مشي يعني زول لا وزن له ليس ذي شأن يعني ما ود عز اومصارين بيض. يعني النوع داك من يتخلق يقوم ماشي يعافر في امور الدنيا بنفسه. لكين التانيه دي ابدا ما سمعت بيها

الفاضله بنت ابوها


ضحكت كثيرا علي الموقف ولكني لا الومك

فقد استمعت قبل ايام في احدي غرف البالتولك السودانيه وكان بعضهم يتحدث ولاافهم من مايقول غير السلام عليكم يا فرد
اقترح ان يقوم الاخ السنجك وبعض الاخوه من فحال لغه اهل الشارع السوداني بكتابة كتيب صغير تجمع فيه جميع الكلمات المتداوله ويتم توزيعه علي السفارات ... حتي لا يأتي يوما احتاج فيه الي مترجم اسطحبه معي خلال زيارتي الي السودان...و

من باب الشمار يا سنجك عليك الله التانيه دي معناها شنو غريبه جد




ودمتو

بسم الله الرحمن الرحيم

الغالية/ بنت الأحفاد
سلام وإحترام

العضة دي إنت نشوف الأشياء الأخرى

عندنا بت مغتربين زي حالتك دي كدا .. أها مشت السودان وبقت تسمع ليك كلمات كتيرة وما فاهماها

واحدة من حبوباتها قالت ليها .. ها بت ها ناوليني (الكزلك) داك وهي واقفة كأن الكلام لا يعنيها

مرة سمعت حبوبتها بتحاجج في أمها تقول ليها (أبقصي) اللبن
فسالت أمها
يما أبقصي يعني شنو؟
فردت أمها
أبقصيهو يعني نقصيهو
أيوااااااااا يعني ممكن نقول عشرة باقص خمسة يساوي خمسة

مرة سمعت ناس الحلة يتكلموا عن الزراعة والمحصول فلان جاب 30 وفلان جاب 45 وفلان جاب 20 فقالت ليهم
طيب خالو حسن جاب 45 من كم؟

علي الطلاق انا العضة قايل معناها قروش .. شوف الغبا ده .. لاني اول مرة سمعتها كان من واحد صاحبنا قال لقى ليه شغل في منظمة عالمية .. و عضتها كويسة جداً. يكون صاحبي داقس؟

العزيزة بت الاحفاد
وكل الاخوة المشاركين
كونك ما تعرفي العضة يا بت الاحفاد دي عادي جدا ومافيها حاجة
المشكلةفي الناس المابعرفو الغنماية(موش العتود)..مرة واحدة معانا في الجامعة حلفت ما بتعرف الغنماية
ولغة الراندوق او لغة الشماسة من اللغات ذات الخصوصية العالية لا يجيدها الا من كان متبحرا في علومها وفنونها من اولاد شمس ..
واديكم حتة غريسة(بضم الغين وسكون الياء بمعني صغيرة)اهداءلبت الاحفاد
ودوما
واحد بحكي لي صاحبو قال ليهو :خطيبتي عملت لي شعرها الفاتح الصباغ ,قام جاها عاطف السماني ,عملنا ليها وداد حمدي للمستشفى,لو ما الدكاترة لحقوهاكان حتعمل موتمبا,,,هسه عاملين ليها محمد كرم الله بخروف.....
الترجمة(عارفكم ما فهمتو حاجة زيي كدة)
خطيبتي صبغت شعرها ,جاها تسمم ,وديناها المستشفى ,لو ما الدكاترة لحقوها كان حتموت ,,,وهسه عاملين ليها كرامة بخروف

الأخـــت بنت الأحـفـاد و البقية ســـــــلام

كــدا إنـت جيتي في إختصاصنا نحن أولاد الجزارين

العـضـة جاية من عـض اللحم مش أي شـئ تاني يعني السلطة ما عضة

لكن العضة هي الأكـل اللفيهو لـحـم يعني لو عملتي ليك عزومة ما فيها لحم

لحم واااااااااااضح شية ضلع و هلم جرا دي ما عضة .

اما تسميتها عضة جات من أنو اللحم بتعضى و البقية ما بتعضى

شفتي فصلتها ليك كيف لكن عليك الله الباربي كيو دي شنو

بت الاحفاد،ربنايعين،
لكين يا بدرالدين ابغصي والكزلك،الكلمات دي اول مرة اسمعها،ممكن تكون محصورة في منطقة معينة من جغرافية السودان

السنجك
الزول الكشي مشي عزمو فطور جي عشي

الاخت بت الاحفاد
ذكرتني نكته لذيذه حصلت معاي في السودان قبل شهور
كان عندنا مناسبه في البيت وكعادتنا في السودان بنكسر التلج ونخته في براميل ونخت فيه الحاجه البارده .. اول ما بديت اكسر في التلج الضربه كانت قويه واتطاير التلج في كل اتجاه اتنين من اولاد عماتي صرخو في نفس الوقت - واحد متربي في مانشستر والتاني متربي في شندي - فقهو فقهو.... يو بروكت يو بروكت

فقهو = كسرو

منوبيا
الكزلك ,التكل ,السعن ,ابقصي ,الكنش
كلمات منتشره في بقاع السودان

سؤال
وين فطاحله الردنوق اساسي وملهم
رنــــــــــدوق
قاموس سوداني

الوالده دومه و الاخ هوبلس تحياتي

طبعا لغة الشارع فى السودان او لغة الشمس لها بحورها
و لايجيدونها الا قلة وتشهد تطور سريع جدا يفوق الخيال والثورة
المعلوماتيه نفسها وذلك لخصوصيتها الشديدة
وطابع الترميز الذي يكسبها الغموض الا على فحولها ولذلك
تجد كل مجوعة شمس لا تكف عن اضافة تعديلات عليها لاكسابها
طابع الخصوصية والغموض ليأكدوا للمجموعات الاخرى مدى تفتيحتهم
لقد بدات بالرندوك ومن ثم حدث للرندوك ابغريد (بيتا) ومن ثم
تم عمل الاصدار الاخير لهو واصبح قرنووط اها ابرش الهشي
دي مصطلح قرنووطي بحت وهي تعني اشرب الشااي
والقاعده الاساسية التى يجب اتباعها كالاتي
ارشب الياش وهذا رندوك
ولكي تصبح قرونط عليك باستحدام قاعدة حزف واضافة الاحرف موسيقيا
وبالتالي تصبح ارشب الياش ابرش الهشي
نلاحظ هنا تم اضافة الهاء وهي ليست من اصل الكلمة ولكن تمت اضافتها عشان تدي المصطلح
بعد موسيقى متناغم وتخلي اتراكتف. وهذا ما جعل القرنوط اكثر تميزا ولا يجيده
الا الشمس البروفيشنااال.
السؤال الثاني ما معنى الآتي


* دلو الخيش دلو دمينه باج لينا حرحرتات فنيطه ؟؟؟



ـــــــــــــــــــــــــــــــ
يتبع

[

الأخت .. بت الأحفاد

سلام

Quote: لباربى كيو

والله دى ما فهمتها

السلام عليكم ورحمه الله

وشكرا لمداخلاتكم

الأخ السنجق

لا أعتقد بأنى مدلعه أو حنكوشه ولكن والله لا أدرى بمعنى أى من الكلمتين الذكرتهم, بل ويذيد على ذللك أننى لم أفهم ما معنى هذه المفردات التاليه ما عدا كلمه الكزلك التى ذكرها الأخ بدر الدين شنا وكلمه شمارات وهى سمعتها كثيرا وكنت أعتقد معناها الشمار يعنى البهارات الى أن جاءت خالتى فى ذياره من السودان وأخبرتنى بمعناها ولكنى لا أدرى معنى هذه الكلمات

و قنزب، كنجالات و ضحاكات ولا حتى كلمه سفسفه ويا جماعه عدم المعرفه بالشئ ما عيب ما دمنا بنسعى وراها
أسأل الله تعالى أن يذيدنا علما


الخاله العذيذه دوما

أول مره أسمع بلغه الرندوق , أكيد تعرضتى مثلى لبعض المواقف الطريفه والمحرجه بسبب عدم الألمام التام بالعاميه السودانيه فياريت تحكى لينا منها

الأخوه أبو حسين وخضر حسين

الباربى كيو هى عباره عن خروف أو لحم يبهر جيدا ويوضع فى شوايه مخصصه لذلك, عاده يكون فى الحوش أو الحديقه ويؤكل ساخنا, يتم تقديمه مع بعض السلطات الخفيفه

الأخوه الكرام

obay_uk
omdurmani
HOPELESS
بدرالدين شنا
Shinteer
جدو
ABUHUSSEIN
manubia
Elkhawad
خضر حسين


أشكركم لمداخلاتكم المفيده وعليكم الله أثبتوا لينا فى لغه واحده عشان بعدين مانكون ذى الأطرش فى الذفه ولا نحتاج لديكشنرى نمشى بيهو السودان


وفى أمان الله

لا اله الا الله

..
.
الحبوبه جات لبتها المغتربه تقضي معاهم الاجازه في الامارات
وطبعا الاولاد 13 , 10سنه
بعد السلامات و الكلام و الهناي جا النوم.....
رقدو في الغرفه و اتونسو تمام التمام الحبوبه قالت هيا خالد (اكتل النور)...
الاولاد..ورررووووك حرامي الحقوناوينو النكتلو كل زول مسك سلاحو
قالت ليهم يا غبيانين..يعني اقفلو النور؟؟؟!!؟؟؟

بالنسبه لناس السودان أأكد ليك انهم بفتكرو البت مدلعه او حنكوشه او عويره...يعني ما بتفهمو الاسباب
وده جهل مننا...لازم اكون عندنا الفضول عشان نعرف ولو شويه و نحن بنتعلم

تحياتي
Solara....
.

سولارا

حلوه بتاعه أكتلى النور ولأنو لو كنت مكانهم ما كنت فهمتها برضو لكن الا تدرى بأنه ظلم لنا نحن المقيمين خارج السودان وكيف بأمكاننا اللألمام بجميع الكلمات العاميه..غايتو أحسن الواحد يعمل فيها سمعو تقيل عشان الناس ما ينظرو ليهو نظره مختلفه خصوصا لو فلتت كلمه أنجليذيه كده ولا كده


وفى أمان الله

لا اله الا الله