بوست للاسماك خارج المياه

هذا البوست مخصص لاهات مرتادى المنبر من الذي كانت احلامهم تقوم على وجودهم فى السودان فكم من شاعر هنا
وممثل بخاطرته كثير من الاعمال وفنان يرغب بحفلة فى السودان وكاتب وناقد يحلم بصحيفة فى ارض الوطن وعريس
لم يحن عرسه حتقولوا ابوحراز اسع حيجى طاير
يعنى بالمعنى المشاريع كانت شنو وحالت الغربة دون ذلك

انا كنت دايرة
ارفع روح اناس المعنوية ، من خلال اعمال ايجابيه

وارجع للمواطن اعتبارو

واخلى اولاد جنوب السودان وشرقو وغربو واقصى شمالو يحسوا انهم فى بيتهم ومطرحهم

كنت دايرة الانسان السودانى تكبر فيه فكرة حب الحياة وغلاوتها ، وغلاوة الاطفال واهمية زرع الامل فى تربيتهم

كنت دايرة المرأة السودانية تحس بكبرياء يخليها تعرف انها اغلى من مجرد فقاسة للاطفال ، وشغالة فى بيت الزواج ، وانها اقيم واكبر فى المعنى من مجرد انها ، حرمة

كنت دايرة الشعب السودان يفهم انه لو مختلف فى المظهر ولا اللون ولا العقيدة ولا اللغة ، انه برضو جميل ، ومقدر ، وعندو قيمة ، قيمته كانسان ، ما بتقل وتنقص وتزيد بدرجة سمارو ، او باعتقادو الدينى ولا بمعرفتو للغة معينة او جهله بيها ، وانه يحب غيرو بى نفس الطريقة

كنت دايرة بى فنى ، اعيش واشوف تربيتى للاطفال فى عالم حب الحياة وحب الجمال ورعاية موهبتهم ، وفطرتهم الجميلة ، بتثمر ، ازدهار فى الوطن ، وفى انسانية الانسان

كنت دايرة السودان يبقى مضرب مثل فى افريقيا وكل القارات ، وانه محل للتعايش النبيل السلمى ، البضخ دم فى حياة الناس ويخليهم يمشوا فوق ولى قدام

انا كنت دايرة ، انشر كلمة حب ، للجميع ، عن طريق فنى

وما قدرت

الغالية العزيزة تماضر
انا كنت داير اطلع على خشبة المسرح واقدم اعمال جميلة
احوم بها القرى اسالى معتصم ودالجمام كيف كنت بجى بحضر
عروضم واقيف معاهم ورا الكواليس اشوف اعداد الممثل
الحاجة التانية وعايز ابدا فيها عايز اكتب مسرحيات
وشعرية بالذات ...واواصل
وانشاء الله احلامنا سوا متحققة مش ملاحظة انو احلامك
بتحقق بالمسرح وعارفا انو الفاضل سعيد وفيروز الاتنين
مثلوا فى خشبة مسرح مختوتة فى لورى