حكايتي مع شوندا بوندا

وصلتني رسالة عبر بريدي الالكتروني من شخص يدعي شوندا بوندا
يذكر فيها بأنه مسلم من بوروندي و كانت عائلتة تقيم بالعراق
و خلال الحرب الاخيرة فقد عائلتة و كان يدرس ببريطانيا و ترك الدراسة
و عاد للعراق و لم يستطيع معرفة مصير عائلتة و جلس مع عائلة عراقية
صديقة و اخبرتة هذه العائلة ان احد اللصوص ترك صندوق به مبلغ 10 مليون دولار و يرغبون في اخراج هذا المبلغ من العراق لسوريا
المهم هو استطاع اخراج المبلغ واودعة بشركة امنية بسوريا
و لكي يستفيد من هذا المبلغ لا بد من وجود شريك اجنبي له
و هو يعرض نصف المبلغ لمن يرغب في مشاركتة ليتمكن من استلام المال
في دبي حيث يقيم حالياَ
و ترك رقم تلفونة بدبي و عنوانة و هو مستعد لتحمل كافة نفقات الرحلة لدبي حسب كلامة
اها يا جماعة رائيكم شنو في كلام شوندا بوندا ؟؟

الحبيب فالكون

لك التحية والود

وصلنى ذات الايميل ولا شك انه نصاب درجة اولى فقد كانت لو تذكر تأتى فى السابق مثل هذه الفاكسات والميلات من نيجيريين ولكن تم التحذير منهم لانهم حالما يعرفوا رقم حسابك فقل على حسابك السلام فهم يقومون بتحويل كل الرصيد الى صالحهم وما تعرف كيف حتى ان الصحف السعودية حذرت منهم بل وجاء منشور رسمى يحذر منهم..

عموما شوندا بوندا لو جادى انا ما عندى مانع امشى معاك ليه بس خليه يرسل التذاكر ولا اقول ليك يرسل حق التذاكر ونحن نتصرف برانا
بس رقم حساب ما معانا

مع خالص ودى

الحبيب الغالي

خالد فالكون

ويييينك مشتاقين للدافوري

انت عارف دي احدث سبل الاحتيال.....وسبق ان حدثت مع رجال اعمال واثرياء كثيرون....فالمحتال يختار ضحيته ليعرف رقم حسابه بالبنك وتوقيعه ليقوم هو بمحاولة تنظيف الحساب في اقرب فرصة
وطبعا العربي المسكين عادة ما يعطي رقم حسابه في الخارج املا في ايداع هذا المبلغ الضخم به ولا يدري بانه الضحية القادمة

فحزاري ان يسيل لعابك للملايين فتضيع شوية الفكة المحوشها للعيال

الحبيب قرجة
شوف يا سيدي لو عايزنا يعمل الاتي
اولا حجز جناح مدفوع الاجر لمدة اسبوع ببرج العرب
ثانيايرسل التذاكر علي الدرجة الاولي
و بعد داك ياقرجة كان عندو باقي دولارات نسحبها منو و نجي راجعين
قال رقم حساب قال؟؟
ليك ليك ليك
و بعدين قبل موضوع الدافوري ما عاوزين لينا لمه لناس جدة المجافين ديل قبل الرطوبة ما تزيد و لا شنو؟؟

الحبيب فالكون
أخبارك شنو
كدي خلينا من دبي وبوركينا فاسو
سمعت بلصوص الباحة
طبعاً ديل قلعوا ليهم ماكينة صراف آلي
قلعوها من نافوخها بشيول
ومشوا بيها البيت
ولمن فتحوها لقوها فاضية

لكن دا ما شديد شدة الحرامي الي سرق التلفزيون و المسلسل شغال

فالكون العزيز
نفس الرسالة وصلت لي.. وما اظن انو في الزمن العلينا ده في زول بيطلب
Help
من زول في موضوع زي ده
وهذا يذكرني بعصابة افريقية القى القبض عليها في القاهرة من كم شهر، وديل استطاعوا النصب على رجل اعمال مصري،ن ويمكنك ان تصدق عندما ينصب شخص ما على المصريين أكيد ما ناس عاديين

أخي فالكون
هذه القصص كثيرة ومسيخه وهي بالنسبة للمحتالين مجرد كليك ، أنا في واحد بيقول لي إنو أخذ إسمي وعنواني من غرفة تجارة وصناعة جنوب أفريقيا إتخيل وأنا العندي كلها غرفتين مقرونات في نمرة إثنين وكمان ما ساكن فيهم ، أها رديت ليهو وقلت ليهو يا سيادة إبن الحاكم السابق لجمهورية أربعه إثنين أربعه إنت غلطان بيكون ده واحد لبناني ولا سوري ما ممكن تسافر يعني مش أنا ، الراجل قايل السنارة غمزت حلف طلاق بالسواحيلي وقال لا وألف لا أنا المعني بالأمر قلت ليهو لو كده يا دوب ما ضعت يا مان ، أقوم أشكه ليك بي إيميل لمن الشاشة ميلت وكتبت ليهو في نهايته أنت كالمستجير من الرمضاء بالنار بالإنجليزي طبعاً لازم تحرجونا يعني أكتبها ليكم تاني وحكيت ليهو قصة حنين والأديدس وحذاء أبو الطمبوري وعبد لقادر المتسرع أها من يومها ولا أى إيميل من طرفه طار الطيرة الياها.

المسألة كلها بقت مكشوفة بعد العديد من المقالب

سمعت عن واحد سوداني مقيم بالسعودية ( المنطقة الشرقية) اتعامل مع المجرمين ديل وادهو عنوان عشان يصلهم في المانيا ويقوم باستخراج شحنة من غرب افريقيا باسمه فيها ملايين الدولارات ونصيبه محفوظ
صاحبنا صدق الكلام وقال لمرته انه عندو حقوق من ايام شغله في ليبيا وحولوها ليهو المانيا
وولما مشى هناك شاف العجب العجاب ولقى نفسه اتورط مع شلة تهريب مخدرات
ودخل في مطاردات مع الشرطة الالمانية وكاد يروح فيها واتسجن كم حوالي سنتين وبعد داك رجع السودان وقد فقد وظيفته ومستقبل عياله

عزيزنا ابو حراز
اول ما الحكاية فيها قروش تقوم تظهر طوالي
وينك لابد ليك زمن؟؟
بعدين الباحة دي بقت ذي تكساس
يعني الشيول دل شغال يقلع ساعة بحاله و لا دورية و لا انذار يشتغل؟؟

الاخ ادروب
انت سمعت بالحرامي الاطرش لما تلب في بيت
وقع ليهو في طشط و قايل نفسو ما في زول سامعو؟؟
لك التحية

الاخت رجاء
و الله النصب علي المصريين دا يستاهل ميدالية

اخي الملا عمر
قلت لي حكيت ليهو قصة حذاء ابو الطمبوري؟
طفشت الراجل مرة واحد و هو قايل الملا اقصد العمة تحتها ملا

زول وحيد
ياخي احيانا الجشع بسيطر علي عقول البسطاء
و صحبك البركة في رجعتة السودان
لك التحية،،

الأخ العزيز فالكون
ها هو ذا بريدي الإلكتروني يتلقى رسالة على غرار رسالة شوندا بوندا ولا أدري أشر أريد بي أم أرد بي هذا الشوندا بوندا خيرا وقطعاً لا يريد لي خيرا لكن المحير في تلك الرسائل هي محاولة هؤلاء النصابين الأغبياء بيع الموية في حارة السقايين. هاؤم أقروا كتاب المدعو عيسى حسن:

ISSA HASSAN
NATIONAL MARITIME AUTHORITY
4 Burma Road, Apapa,
Lagos Nigeria

Dear Sir/Madam,
My name is ISSA HASSAN. I work for the Nigerian Maritime Authority (NMA) as commercial clerk. I write to ask for your
consent to assist us to do among other things, to receive on our behalf the sum of US$18.5million. To invest for us the amount into any profitable venture in your country or outside as you may deem fit.
It may interest you to know how this fund was realized.The fund no doubt was inflated by the former management in connivance with foreign contractors.Unluckly for the management,they were
sacked after which the fund was released for payments to contractors,in which case, after paying the listed contractors there are still some left-over that has no record.

Further details, which include percentage that will accrue to you shall be communicated to you when I receive your letter.

Anticipating your earliest reply through the above maiL
Include your private telephone and fax numbers when
you reply.
Thanks.
Yours sincerely
ISSA HASSAN

ألعب غيرها يا عيسي لأنو آخر رقم درسونا ليهو في المدارس هو ألف وهو الرقم المتعارف عليه في بلادي والملايين تلك لم نسمع بها إلا في نشيد المرحوم سيد خليفه الذي يقول فيه بالملايين قلناها نعم قلناها نعم قلناها نعم ، أيدناك بايعناك ، فلو لك رغبة في تلك الملايين فالأمر هين خذ ما تشاء.