Post: #1
Title: حلم رائع
Author: raheemsudani
Date: 05-02-2003, 05:07 AM
Parent: #0
حلم رائع
يوم في المنام القي
انو الزمان ناضر
والخير كتير وافر
وبأنني صحفي
وبانني شاعر
ومخي التقيل اصبح
من دون اذن شاطر
واني بتاع بزنس
"فوقو الادب ظاهر"
يحومو حولي الناس
يايها المحبوب
يايها المشهور
يا ود كرام الناس
يا ايها الرائع
يا ايها الفاخر
ويجوني فتانين
ويجوني عيانين
ويجوني ساسة كتار
ويجوني مكارين
حتي الدكاترة يجو
ويقبلوا الايدين
لو يا منامي تدوم
او الق روحي رئيس
او ثروة تغمرني
زي حال صلاح ادريس
لكن صحيت فجاة
من دون ايجار البيت
وعرفت نفسي زويل
زي ما تقولو كديس!!!
|
Post: #2
Title: Re: حلم رائع
Author: zumrawi
Date: 05-02-2003, 05:37 AM
ياالفى منام داقس
احلم ولايهمك
اصلو الحلم مجان
ماشالو من دمك
كان القرش خلاك
طافش كتير همك
احلم بانك امير
الحلم بيلمك
عايز تكون غنيان
بس زى صلاح ادريس
خليك كوز فهمان
والطش من اى نفيس
دولار ونفط ومال
قوم ودع التفليس
بعد العزوبية
فى لحظةتبقى عريس
عايز تكون صحفى
خليتا ليك يازول
بس تانى فى نومك
خلى الحلم معقول
خلينا نتقاسم
الشهرة ماتملاك
يكفيك تكون غنيان
زول صاحب الاملاك
تقدل تربطع زى
مادرت يافلته
كل الدكاترة يجوك
فى دقيقة لوقلت
كل الجمع يحضر
لبهجتك انت
تصبح كمان موسيقار
كمنجة عود وجيتار
وتدوزن الالحان
ماانت زول غنيان
|
Post: #3
Title: Re: حلم رائع
Author: فى حافة الغياب
Date: 05-02-2003, 06:21 AM
معقوله بس يا زعيم
يا قمة الاحساس
لو كنت انت كديس
بنكون انحنا دباس
وداختك السنجك
بشهد على علمك
ما انت ربيتنا
بى سلسبيل فنك
يسلم تواضعك لى
دكتورنا عارفنك
يا قمة الاحساس
راقى وخفيف دمك
المكى صاحبا لى
شبلا مرق منك
عاشرنا بى أصلو
واصلو الأساس منك
|
Post: #4
Title: Re: حلم رائع
Author: maman
Date: 05-16-2003, 12:57 PM
| Quote:
لكن صحيت فجاة
من دون ايجار البيت
وعرفت نفسي زويل
زي ما تقولو كديس
|
يا صديقنا رحيم سوداني نحن نشبه الكدايس فقط بمخالب الاصرار التي نتشعبط بها حيطة الأمل .. ولهذا يا صديقي ضربنا في أرض الله الواسعة بحثاالزرق .. ويجب آلا يتسرب اليأس الى نفوسنامهما كان حجم الفشل..
عندما بدأ الانجليز في بناء خزان سنار في عشرينات القرن العشرين هاجر بعض أهلنا من شمال السودان بحثا عن فرص عمل في مكوار كما كانت تسمى. ويبدو أن الآمال لم تتحقق للمهاجرين. وقد وصف الشاعر حالتهم في قصيدة ، فقال:
كل الجانا من مكوار مصقع
شنطو كبوتة والسروال مرقع
يشارو في امو أقعد ولا أرجع
والشنطة الكبوتة شنطة كان تنسج على ما أظن من السعف ولها غطاء وكانت حقيبة الفقراء.
وقال الآخر يحكي عن حاله ، وقد هاجر الى أم جر في النيل الأبيض للعمل في المشاريع ولم يجن شيئا من تعبه :
دردرني الزمان وداني في ام جر
بي شيل الصفايح ضهري دبر
|
Post: #5
Title: Re: حلم رائع
Author: maman
Date: 05-18-2003, 04:04 AM
up
|
|